ಬೆಂಗಳೂರು: ರಾಜಧಾನಿ ಬೆಂಗಳೂರಿಗೆ ಹೊರರಾಜ್ಯಗಳಿಂದ ಭಾರಿ ಪ್ರಮಾಣದಲ್ಲಿ ಮಾದಕ ವಸ್ತುಗಳನ್ನು ಸಾಗಿಸುತ್ತಿದ್ದ ಬೃಹತ್ ಜಾಲವೊಂದನ್ನು ಭೇದಿಸಿರುವ ಕುಂಬಳಗೋಡು ಠಾಣಾ ಪೊಲೀಸರು, ಬರೋಬ್ಬರಿ 317 ಕೆಜಿ ಗಾಂಜಾ ವಶಪಡಿಸಿಕೊಂಡು ಇಬ್ಬರು ಆರೋಪಿಗಳನ್ನು ಬಂಧಿಸಿದ್ದಾರೆ. ಬಂಧಿತರನ್ನು ಚಾಂದ್ ಪಾಷ ಹಾಗೂ ವಿಷ್ಣು ಎಂದು ಗುರುತಿಸಲಾಗಿದೆ.
₹1.70 ಕೋಟಿ ಮೌಲ್ಯದ 317 ಕೆಜಿ ಗಾಂಜಾ ಜಪ್ತಿ
ಕೇರಳ ಹಾಗೂ ಒಡಿಶಾ ರಾಜ್ಯಗಳಿಂದ ಬೆಂಗಳೂರು ನಗರಕ್ಕೆ ಬೃಹತ್ ಪ್ರಮಾಣದಲ್ಲಿ ಗಾಂಜಾ ಸರಬರಾಜು ಆಗುತ್ತಿರುವ ಬಗ್ಗೆ ಕುಂಬಳಗೋಡು ಪೊಲೀಸರಿಗೆ ಖಚಿತ ಮಾಹಿತಿ ಲಭಿಸಿತ್ತು. ತಕ್ಷಣ ಕಾರ್ಯಪ್ರವೃತ್ತರಾದ ಪೊಲೀಸರ ತಂಡ, ಕಾರ್ಯಾಚರಣೆ ನಡೆಸಿ ಅಂತಾರಾಜ್ಯ ಮಾರುಕಟ್ಟೆಯಲ್ಲಿ ಅಂದಾಜು ₹1.70 ಕೋಟಿ ಮೌಲ್ಯದ 317 ಕೆಜಿ ಗಾಂಜಾವನ್ನು ಜಪ್ತಿ ಮಾಡುವಲ್ಲಿ ಯಶಸ್ವಿಯಾಗಿದೆ.
ಕಾರಿನ ಸೀಟ್‌ಗಳಲ್ಲೇ ಮಾದಕ ವಸ್ತು ಕಳ್ಳಸಾಗಣೆ
ಆರೋಪಿಗಳು ತಪಾಸಣೆ ವೇಳೆ ಪೊಲೀಸರ ಕಣ್ಣಿಗೆ ಬೀಳದಂತೆ ಅತ್ಯಂತ ಚಾಲಾಕಿತನದಿಂದ ಕಾರನ್ನು ಮಾರ್ಪಾಡು ಮಾಡಿಕೊಂಡಿದ್ದರು. ಕಾರಿನ ಎಲ್ಲಾ ಸೀಟುಗಳ ಒಳಭಾಗ ಹಾಗೂ ವಾಹನದ ವಿವಿಧ ಜಾಗಗಳಲ್ಲಿ ಗಾಂಜಾ ಪ್ಯಾಕೆಟ್‌ಗಳನ್ನು ಅಡಗಿಸಿಟ್ಟು ನಗರಕ್ಕೆ ಸಾಗಿಸುತ್ತಿದ್ದರು. ವಾಹನವನ್ನು ತಡೆದು ತೀವ್ರ ತಪಾಸಣೆ ನಡೆಸಿದಾಗ ಈ ಕುತಂತ್ರ ಬಯಲಾಗಿದೆ.
ಜಾಲದ ಬೇರುಗಳ ಪತ್ತೆಗೆ ತನಿಖೆ ಚುರುಕು
ಅಂತಾರಾಜ್ಯ ಮಟ್ಟದಲ್ಲಿ ಸಕ್ರಿಯವಾಗಿರುವ ಈ ಮಾದಕ ಜಾಲದ ಹಿಂದೆ ಇನ್ನಷ್ಟು ಮಂದಿ ಭಾಗಿಯಾಗಿರುವ ಶಂಕೆ ವ್ಯಕ್ತವಾಗಿದೆ. ಸದ್ಯ ಬಂಧಿತ ಆರೋಪಿಗಳಿಬ್ಬರನ್ನೂ ವಶಕ್ಕೆ ಪಡೆದಿರುವ ಪೊಲೀಸರು, ಇವರಿಗೆ ಗಾಂಜಾ ಪೂರೈಸಿದ ಮೂಲ ಯಾವುದು ಮತ್ತು ಬೆಂಗಳೂರಿನಲ್ಲಿ ಯಾರೆಲ್ಲರಿಗೆ ಇದನ್ನು ವಿತರಿಸಲು ಯೋಜಿಸಲಾಗಿತ್ತು ಎಂಬ ಕುರಿತು ತೀವ್ರ ವಿಚಾರಣೆ ನಡೆಸುತ್ತಿದ್ದಾರೆ.
