ಸಾಮಾಜಿಕ ಮಾಧ್ಯಮ ದಿಗ್ಗಜ ಮೆಟಾ ಮಹತ್ವದ ನಿರ್ಧಾರ ಕೈಗೊಂಡಿದೆ. ಮಕ್ಕಳು ಮತ್ತು ಹದಿಹರೆಯದವರ ಮೇಲೆ ಸಾಮಾಜಿಕ ಮಾಧ್ಯಮದ ಪರಿಣಾಮ ಹಾಗೂ ಆ್ಯಪ್ಗಳಿಗೆ ವ್ಯಸನಿಯಾಗಿಸುವ ವೈಶಿಷ್ಟ್ಯಗಳ ಕುರಿತು ಹೊಸ ನಿರ್ಬಂಧಗಳನ್ನು ವಿಧಿಸಿದೆ.
ಅಮೆರಿಕದಲ್ಲಿ ದಾಖಲಾದ ಪ್ರಕರಣಗಳನ್ನು ಇತ್ಯರ್ಥಗೊಳಿಸಲು ಮೆಟಾ ಭಾರಿ ಮೊತ್ತದ ಸೆಟಲ್ಮೆಂಟ್ಗೆ ಒಪ್ಪಿಕೊಂಡಿದೆ. ಸುಮಾರು 48 ರಾಜ್ಯಗಳು, ಡಿಸ್ಟ್ರಿಕ್ಟ್ ಆಫ್ ಕೊಲಂಬಿಯಾ ಹಾಗೂ ಇತರ ಅಮೆರಿಕದ ಪ್ರದೇಶಗಳೊಂದಿಗೆ ಮಾಡಿಕೊಂಡಿರುವ ಒಪ್ಪಂದದ ಪ್ರಕಾರ ಮೆಟಾ 17.1 ಬಿಲಿಯನ್ ಡಾಲರ್ವರೆಗೆ ಪಾವತಿಸಬೇಕಾಗಬಹುದು. ಆದರೆ ಅಂತಿಮ ಅನುಷ್ಠಾನಕ್ಕೆ ನ್ಯಾಯಾಲಯದ ಅನುಮೋದನೆ ಅಗತ್ಯವಿದೆ.
ಈ ಒಪ್ಪಂದದ ಭಾಗವಾಗಿ Instagram ಮತ್ತು Facebookನಲ್ಲಿ 18 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಬಳಕೆದಾರರಿಗೆ ಹಲವು ಕಠಿಣ ನಿಯಮಗಳು ಜಾರಿಗೆ ಬರಲಿವೆ. ಪ್ರಮುಖವಾಗಿ ಎರಡೂ ಪ್ಲಾಟ್ಫಾರ್ಮ್ಗಳನ್ನು ಸೇರಿಸಿ ದಿನಕ್ಕೆ ಗರಿಷ್ಠ ಎರಡು ಗಂಟೆಗಳ ಬಳಕೆ ಮಿತಿ ಇರಲಿದೆ. ಈ ಮಿತಿಯನ್ನು ಮೀರಿ ಬಳಸಬೇಕಾದರೆ ಪೋಷಕರ ಅನುಮತಿ ಅಗತ್ಯ. ಅಲ್ಲದೆ, ರಾತ್ರಿ 12 ಗಂಟೆಯಿಂದ ಬೆಳಗ್ಗೆ 6 ಗಂಟೆಯವರೆಗೆ ಹದಿಹರೆಯದವರು ಈ ಪ್ಲಾಟ್ಫಾರ್ಮ್ಗಳ ಫೀಡ್, ಸ್ಟೋರೀಸ್, ಎಕ್ಸ್ಪ್ಲೋರ್, ರೀಲ್ಸ್ ಸೇರಿದಂತೆ ಹಲವು ವೈಶಿಷ್ಟ್ಯಗಳನ್ನು ಪ್ರವೇಶಿಸಲು ಸಾಧ್ಯವಾಗುವುದಿಲ್ಲ.
ಶಾಲಾ ಸಮಯದಲ್ಲಿ ನೋಟಿಫಿಕೇಶನ್ಗಳು ಬಂದ್
ಶಾಲಾ ಸಮಯದಲ್ಲೂ Instagram ಮತ್ತು Facebook ಬಳಕೆಯನ್ನು ಕಡಿಮೆ ಮಾಡಲು ಕ್ರಮ ಕೈಗೊಳ್ಳಲಾಗುತ್ತದೆ. ವಾರದ ದಿನಗಳಲ್ಲಿ ಬೆಳಗ್ಗೆ 8 ಗಂಟೆಯಿಂದ ಮಧ್ಯಾಹ್ನ 3 ಗಂಟೆಯವರೆಗೆ ಪುಷ್ ನೋಟಿಫಿಕೇಶನ್ಗಳು ಡೀಫಾಲ್ಟ್ ಆಗಿ ಮ್ಯೂಟ್ ಆಗಿರುತ್ತವೆ. ಆದರೆ ಡೈರೆಕ್ಟ್ ಮೆಸೇಜ್ಗಳು ಮತ್ತು ಖಾತೆಯ ಭದ್ರತೆಗೆ ಸಂಬಂಧಿಸಿದ ಪ್ರಮುಖ ಎಚ್ಚರಿಕೆಗಳು ಮಾತ್ರ ಲಭ್ಯವಿರುತ್ತವೆ.
15 ನಿಮಿಷಕ್ಕೊಮ್ಮೆ ರಿಮೈಂಡರ್
ಹದಿಹರೆಯದವರು ನಿರಂತರವಾಗಿ ಸ್ಕ್ರೋಲ್ ಮಾಡುವುದನ್ನು ತಡೆಯಲು ಮೆಟಾ ‘Productive Pauses’ ಎಂಬ ವಿರಾಮದ ರಿಮೈಂಡರ್ಗಳನ್ನು ಪರಿಚಯಿಸಲಿದೆ. 15 ನಿಮಿಷಗಳ ನಿರಂತರ ಬಳಕೆಯ ನಂತರ ಹಾಗೂ ದೈನಂದಿನ ಬಳಕೆ 60 ಮತ್ತು 90 ನಿಮಿಷಗಳನ್ನು ತಲುಪಿದಾಗ ರಿಮೈಂಡರ್ಗಳು ಕಾಣಿಸಿಕೊಳ್ಳಲಿವೆ.
ವಯಸ್ಸು ಪರಿಶೀಲನೆ ಮತ್ತಷ್ಟು ಕಠಿಣ
18 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಬಳಕೆದಾರರನ್ನು ಗುರುತಿಸಲು ಮೆಟಾ ಮತ್ತಷ್ಟು ಬಲವಾದ Age Assurance ವ್ಯವಸ್ಥೆಗಳನ್ನು ಜಾರಿಗೆ ತರಲಿದೆ. ಮಕ್ಕಳಿಗೆ ಸೂಕ್ತವಲ್ಲದ ಕಂಟೆಂಟ್, ಸೈಬರ್ ಬುಲ್ಲಿಯಿಂಗ್, ಈಟಿಂಗ್ ಡಿಸಾರ್ಡರ್ಸ್, ಆತ್ಮಹತ್ಯೆ ಮತ್ತು ಸ್ವಯಂ ಹಾನಿಯನ್ನು ಉತ್ತೇಜಿಸುವ ಕಂಟೆಂಟ್ನಿಂದ ರಕ್ಷಿಸಲು ಸುರಕ್ಷತಾ ನಿಯಂತ್ರಣಗಳನ್ನು ಮತ್ತಷ್ಟು ಬಿಗಿಗೊಳಿಸಲಾಗುತ್ತದೆ. ಮಕ್ಕಳ ಪೋಸ್ಟ್ಗಳಲ್ಲಿ ಕಾಣಿಸುವ ಲೈಕ್ಗಳು, ರಿಯಾಕ್ಷನ್ಗಳ ಸಂಖ್ಯೆಯಂತಹ ಕೆಲವು ವೈಶಿಷ್ಟ್ಯಗಳಿಗೂ ಮಿತಿ ವಿಧಿಸಲಾಗುತ್ತದೆ.
YouTube, TikTokಗೂ ಮೆಟಾ ಕರೆ
ಇತರ ಸಾಮಾಜಿಕ ಮಾಧ್ಯಮ ಪ್ಲಾಟ್ಫಾರ್ಮ್ಗಳಲ್ಲಿ ಇದೇ ರೀತಿಯ ನಿಯಂತ್ರಣಗಳಿಲ್ಲದಿದ್ದರೆ ಮಕ್ಕಳು ಒಂದು ಆ್ಯಪ್ನಿಂದ ಮತ್ತೊಂದು ಆ್ಯಪ್ಗೆ ಸ್ಥಳಾಂತರಗೊಳ್ಳುವ ಸಾಧ್ಯತೆಯಿದೆ ಎಂದು ಮೆಟಾ ಹೇಳಿದೆ. ಹೀಗಾಗಿ YouTube, TikTok ಮತ್ತು Snapchat ಕೂಡ ಇದೇ ರೀತಿಯ ಸುರಕ್ಷತಾ ಮಾನದಂಡಗಳನ್ನು ಜಾರಿಗೆ ತರಬೇಕು ಎಂದು ಮೆಟಾ ಒತ್ತಾಯಿಸಿದೆ. ಈ ಸಂಸ್ಥೆಗಳು ಒಪ್ಪಿಕೊಂಡರೆ, ಸೆಟಲ್ಮೆಂಟ್ನ ಹೆಚ್ಚುವರಿ ಮೊತ್ತದ ಜೊತೆಗೆ ಇನ್ನಷ್ಟು ಕಠಿಣ ಬಳಕೆ ಮಿತಿಗಳನ್ನು ಜಾರಿಗೆ ತರಲು ಒಪ್ಪಂದದಲ್ಲಿ ಅವಕಾಶಗಳಿವೆ.
ಮೆಟಾ ತನ್ನ ತಪ್ಪನ್ನು ಒಪ್ಪಿಕೊಂಡಿದೆಯೇ?
ಈ ಸೆಟಲ್ಮೆಂಟ್ನಲ್ಲಿ ಮೆಟಾ ಯಾವುದೇ ತಪ್ಪು ಅಥವಾ ಕಾನೂನುಬದ್ಧ ಹೊಣೆಗಾರಿಕೆಯನ್ನು ಒಪ್ಪಿಕೊಂಡಿಲ್ಲ. ಆದರೆ ಮಕ್ಕಳ ಸುರಕ್ಷತೆಗಾಗಿ ತನ್ನ ಪ್ಲಾಟ್ಫಾರ್ಮ್ಗಳಲ್ಲಿ ದೊಡ್ಡ ಮಟ್ಟದ ಬದಲಾವಣೆಗಳನ್ನು ಮಾಡಲು ಒಪ್ಪಿಕೊಂಡಿದೆ. ಈ ಪ್ರಕರಣದಲ್ಲಿ ಮೆಟಾ ಪ್ರಸಕ್ತ ತ್ರೈಮಾಸಿಕದಲ್ಲಿ ಸುಮಾರು 10 ಬಿಲಿಯನ್ ಡಾಲರ್ಗಳ ಶುಲ್ಕವನ್ನು ದಾಖಲಿಸಲಿದೆ ಎಂದು ತಿಳಿಸಿದೆ.
ಭಾರತದಲ್ಲಿ ಪರಿಣಾಮ ಬೀರುತ್ತದೆಯೇ?
ಪ್ರಸ್ತುತ ಇದು ಅಮೆರಿಕದಲ್ಲಿ ಮಾಡಿಕೊಂಡಿರುವ ಸೆಟಲ್ಮೆಂಟ್ ಆಗಿರುವುದರಿಂದ ಭಾರತದಲ್ಲಿ ಇದೇ ನಿಯಮಗಳು ನೇರವಾಗಿ ಜಾರಿಗೆ ಬರುವುದಿಲ್ಲ. ಆದರೆ ಮಕ್ಕಳ ಆನ್ಲೈನ್ ಸುರಕ್ಷತೆ, ವಯಸ್ಸಿನ ಪರಿಶೀಲನೆ, ಪೋಷಕರ ನಿಯಂತ್ರಣಗಳು ಮತ್ತು ಸ್ಕ್ರೀನ್ ಟೈಮ್ ಸೇರಿದಂತೆ ಹಲವು ವಿಚಾರಗಳಲ್ಲಿ ವಿಶ್ವದಾದ್ಯಂತ ಟೆಕ್ ಕಂಪನಿಗಳ ಮೇಲೆ ಒತ್ತಡ ಹೆಚ್ಚಾಗುವ ಸಾಧ್ಯತೆಯಿದೆ.
ವಿಶೇಷವಾಗಿ Instagram ಮತ್ತು Facebookನಂತಹ ಪ್ಲಾಟ್ಫಾರ್ಮ್ಗಳು ಭಾರತದಲ್ಲಿ ಹದಿಹರೆಯದವರಿಗಾಗಿ ಭವಿಷ್ಯದಲ್ಲಿ ಇದೇ ರೀತಿಯ ವೈಶಿಷ್ಟ್ಯಗಳನ್ನು ಪರಿಚಯಿಸಲಿವೆಯೇ ಎಂಬುದು ಕುತೂಹಲ ಮೂಡಿಸಿದೆ. ಪ್ರಸ್ತುತ ಈ ಒಪ್ಪಂದವು ನ್ಯಾಯಾಲಯದ ಅಂತಿಮ ಅನುಮೋದನೆಗೆ ಒಳಪಟ್ಟಿದೆ. ಅನುಮೋದನೆ ದೊರೆತ ನಂತರವೇ ಹೊಸ ನಿಯಮಗಳ ಅನುಷ್ಠಾನ ಆರಂಭವಾಗಲಿದೆ.
