ನವದೆಹಲಿ: ನೀವು ವಿದೇಶ ಪ್ರಯಾಣದ ಪ್ಲಾನ್ ಮಾಡುತ್ತಿದ್ದೀರಾ? ಅಥವಾ ನಿಮ್ಮ ಪಾಸ್ಪೋರ್ಟ್ ಅವಧಿ ಮುಗಿಯುತ್ತ ಬಂದಿದೆಯೇ? ಹಾಗಿದ್ದರೆ ತಕ್ಷಣವೇ ಎಚ್ಚೆತ್ತುಕೊಳ್ಳಿ, ಏಕೆಂದರೆ ಕೇವಲ ಒಂದು ವಾರ ತಡ ಮಾಡಿದರೂ ನಿಮ್ಮ ಜೇಬಿಗೆ ಭಾರಿ ಕತ್ತರಿ ಬೀಳಲಿದೆ.
ಕಳೆದ ಆರು ತಿಂಗಳಿನಿಂದ ದಿನಸಿ ಸಾಮಗ್ರಿಗಳಿಂದ ಹಿಡಿದು ಗ್ಯಾಜೆಟ್ಗಳು ಹಾಗೂ ಅಂತಾರಾಷ್ಟ್ರೀಯ ವಿಮಾನ ಟಿಕೆಟ್ಗಳವರೆಗೆ ಎಲ್ಲವೂ ದುಬಾರಿಯಾಗುತ್ತಿರುವುದನ್ನು ನೀವು ಗಮನಿಸಿರಬಹುದು. ಈಗ ಈ ಸಾಲಿಗೆ ಪಾಸ್ಪೋರ್ಟ್ ಕೂಡ ಸೇರಿದೆ. ಕಳೆದ 14 ವರ್ಷಗಳಲ್ಲಿ ಇದೇ ಮೊದಲ ಬಾರಿಗೆ ಭಾರತ ಸರ್ಕಾರವು ಪಾಸ್ಪೋರ್ಟ್ ಶುಲ್ಕವನ್ನು ಭಾರಿ ಪ್ರಮಾಣದಲ್ಲಿ ಹೆಚ್ಚಳ ಮಾಡಿದೆ. ಕೇಂದ್ರ ವಿದೇಶಾಂಗ ಸಚಿವಾಲಯದ (MEA) ಪ್ರಕಟಣೆಯ ಪ್ರಕಾರ, ಈ ಹೊಸ ದರಗಳು ಜುಲೈ 1, 2026 ರಿಂದ ದೇಶಾದ್ಯಂತ ಅಧಿಕೃತವಾಗಿ ಜಾರಿಗೆ ಬರಲಿವೆ.
ಪಾಸ್ಪೋರ್ಟ್ ಹೊಸ ಶುಲ್ಕದ ಕಂಪ್ಲೀಟ್ ವಿವರ :
ಜೂನ್ 20, 2026 ರ ಅಧಿಕೃತ ಅಧಿಸೂಚನೆಯ ಪ್ರಕಾರ, ಹೊಸ ಪಾಸ್ಪೋರ್ಟ್, ನವೀಕರಣ (Reissue), ತತ್ಕಾಲ್ (Tatkal) ಮತ್ತು ಕಳೆದುಹೋದ/ಹಾನಿಗೊಳಗಾದ ಪಾಸ್ಪೋರ್ಟ್ಗಳ ಹೊಸ ದರ ಪಟ್ಟಿ ಈ ಕೆಳಗಿನಂತಿದೆ:
ಸಾಮಾನ್ಯ ಪಾಸ್ಪೋರ್ಟ್ (Normal Scheme – Fresh / Reissue):
36 ಪುಟಗಳ ಪಾಸ್ಪೋರ್ಟ್: ₹2,500 (ಹಳೆಯ ದರ: ₹1,500)
60 ಪುಟಗಳ ಪಾಸ್ಪೋರ್ಟ್: ₹3,500 (ಹಳೆಯ ದರ: ₹2,000)
ತತ್ಕಾಲ್ ಪಾಸ್ಪೋರ್ಟ್ (Tatkal Scheme):
36 ಪುಟಗಳ ಪಾಸ್ಪೋರ್ಟ್: ₹5,000 (ಹಳೆಯ ದರ: ₹3,500)
60 ಪುಟಗಳ ಪಾಸ್ಪೋರ್ಟ್: ₹6,000 (ಹಳೆಯ ದರ: ₹4,000)
ಕಳೆದುಹೋದ ಅಥವಾ ಹಾನಿಗೊಳಗಾದ ಪಾಸ್ಪೋರ್ಟ್ ಬದಲಾವಣೆ (Lost / Damaged):
36 ಪುಟಗಳು: ಸಾಮಾನ್ಯ – ₹5,000 ತತ್ಕಾಲ್ – ₹7,500
60 ಪುಟಗಳು: ಸಾಮಾನ್ಯ – ₹6,000 ತತ್ಕಾಲ್ – ₹8,500
18 ವರ್ಷದೊಳಗಿನ ಅಪ್ರಾಪ್ತ ವಯಸ್ಕರಿಗೆ (Minors Below 18 Years):
ಹೊಸ/ನವೀಕರಣ (36 ಪುಟಗಳು): ಸಾಮಾನ್ಯ – ₹1,750 ತತ್ಕಾಲ್ – ₹4,250
ಕಳೆದುಹೋದ/ಹಾನಿಗೊಳಗಾದ ಪಾಸ್ಪೋರ್ಟ್: ಸಾಮಾನ್ಯ – ₹4,250 ತತ್ಕಾಲ್ – ₹6,750
ಜನಸಾಮಾನ್ಯರ ಮೇಲಾಗುವ ಪರಿಣಾಮಗಳೇನು?
2025 ರಲ್ಲೊಂದೇ ಭಾರತದಲ್ಲಿ ಬರೋಬ್ಬರಿ 13.9 ಮಿಲಿಯನ್ (1.39 ಕೋಟಿ) ಪಾಸ್ಪೋರ್ಟ್ಗಳನ್ನು ವಿತರಿಸಲಾಗಿತ್ತು. ಇಷ್ಟೊಂದು ಭಾರಿ ಬೇಡಿಕೆಯಿರುವ ಬೆನ್ನಲ್ಲೇ ಈಗ ದರ ಏರಿಕೆಯಾಗಿರುವುದು ವಿದೇಶ ಪ್ರವಾಸ ಕೈಗೊಳ್ಳುವ ಕುಟುಂಬಗಳು, ಉದ್ಯೋಗಿಗಳು ಹಾಗೂ ಪ್ರಮುಖವಾಗಿ ಉನ್ನತ ಶಿಕ್ಷಣಕ್ಕಾಗಿ ವಿದೇಶಕ್ಕೆ ಹೋಗುವ ವಿದ್ಯಾರ್ಥಿಗಳಿಗೆ ದೊಡ್ಡ ಆರ್ಥಿಕ ಹೊರೆಯಾಗಲಿದೆ. ತಜ್ಞರ ಪ್ರಕಾರ, ಒಂದು ವೇಳೆ ನೀವು ಪಾಸ್ಪೋರ್ಟ್ ಅರ್ಜಿ ಸಲ್ಲಿಸುವುದಿದ್ದರೆ ಹೊಸ ದರಗಳು ಜಾರಿಯಾಗುವ ಮುನ್ನವೇ ಸಲ್ಲಿಕೆ ಮಾಡುವುದು ಬುದ್ಧಿವಂತಿಕೆ.
ಹೆಚ್ಚುತ್ತಿದೆ ಭಾರತೀಯ ಪಾಸ್ಪೋರ್ಟ್ ತಾಕತ್ತು
ಒಂದೆಡೆ ಶುಲ್ಕ ದುಬಾರಿಯಾಗುತ್ತಿದ್ದರೂ, ಜಾಗತಿಕ ಮಟ್ಟದಲ್ಲಿ ಭಾರತೀಯ ಪಾಸ್ಪೋರ್ಟ್ನ ಶಕ್ತಿ (Power) ದಿನದಿಂದ ದಿನಕ್ಕೆ ಹೆಚ್ಚುತ್ತಿದೆ. ಮೇ 2026 ರ ಜಾಗತಿಕ ಹೆನ್ಲಿ ಪಾಸ್ಪೋರ್ಟ್ ಇಂಡೆಕ್ಸ್ ಪ್ರಕಾರ ಭಾರತವು 78 ನೇ ಸ್ಥಾನದಲ್ಲಿದ್ದು, ಭಾರತೀಯ ಪಾಸ್ಪೋರ್ಟ್ ಹೊಂದಿರುವವರು ಜಗತ್ತಿನ 27 ದೇಶಗಳಿಗೆ ವೀಸಾ ರಹಿತವಾಗಿ (Visa-Free Entry) ಅತ್ಯಂತ ಸುಲಭವಾಗಿ ಪ್ರಯಾಣಿಸಬಹುದಾಗಿದೆ.
