ನ್ಯೂಯಾರ್ಕ್: ಫುಟ್ಬಾಲ್ ಜಗತ್ತಿನ ಕಿರೀಟವಿಲ್ಲದ ಮಹಾರಾಜ, ಬ್ರೆಜಿಲ್ನ ದಂತಕಥೆ ಪೀಲೆ ಅವರ ಅಪರೂಪದ ಕ್ರೀಡಾ ಸ್ಮರಣಿಕೆಯೊಂದು ಜಾಗತಿಕ ಹರಾಜು ಮಾರುಕಟ್ಟೆಯಲ್ಲಿ ಭಾರಿ ದಾಖಲೆ ಬರೆದಿದೆ. 1958 ರ ಫಿಫಾ ವಿಶ್ವಕಪ್ ಫೈನಲ್ ಪಂದ್ಯದಲ್ಲಿ ಪೀಲೆ ಧರಿಸಿದ್ದ ಐಕಾನಿಕ್ ನಂಬರ್ 10 ಟಿ-ಶರ್ಟ್ (ಜೆರ್ಸಿ) ನ್ಯೂಯಾರ್ಕ್ನಲ್ಲಿ ನಡೆದ ಹರಾಜಿನಲ್ಲಿ ಬರೋಬ್ಬರಿ ₹47.23 ಕೋಟಿಗೆ (4.9 ಮಿಲಿಯನ್ ಯುಎಸ್ ಡಾಲರ್) ಮಾರಾಟವಾಗಿದೆ. ಈ ಮೂಲಕ ಫುಟ್ಬಾಲ್ ಇತಿಹಾಸದಲ್ಲೇ ಅತ್ಯಂತ ಅಮೂಲ್ಯವಾದ ಕ್ರೀಡಾ ಸ್ಮರಣಿಕೆಗಳ ಪಟ್ಟಿಗೆ ಇದು ಸೇರ್ಪಡೆಯಾಗಿದೆ.
17ರ ಹರೆಯದ ಪೀಲೆ ಬರೆದಿದ್ದ ಇತಿಹಾಸದ ಸಾಕ್ಷಿ ಈ ಜೆರ್ಸಿ
1958 ರಲ್ಲಿ ಸ್ವೀಡನ್ನ ಸ್ಟಾಕ್ಹೋಮ್ನಲ್ಲಿ ನಡೆದ ವಿಶ್ವಕಪ್ ಫೈನಲ್ ಪಂದ್ಯದಲ್ಲಿ ಬ್ರೆಜಿಲ್ ತಂಡವು ಆತಿಥೇಯ ಸ್ವೀಡನ್ ಅನ್ನು 5-2 ಅಂತರದಿಂದ ಧೂಳೀಪಟ ಮಾಡಿ, ತನ್ನ ಚೊಚ್ಚಲ ಫಿಫಾ ವಿಶ್ವಕಪ್ ಪ್ರಶಸ್ತಿಯನ್ನು ಮುತ್ತಿಕ್ಕಿತ್ತು. ಆ ಐತಿಹಾಸಿಕ ಪಂದ್ಯದಲ್ಲಿ ಕೇವಲ 17 ವರ್ಷದ ಬಾಲಕನಾಗಿದ್ದ ಪೀಲೆ, ವಿರೋಧಿಗಳ ಕೋಟೆಯನ್ನು ಭೇದಿಸಿ 2 ಆಕರ್ಷಕ ಗೋಲುಗಳನ್ನು ಬಾರಿಸಿದ್ದರು. ಆ ಮೂಲಕ ಫಿಫಾ ವಿಶ್ವಕಪ್ ಫೈನಲ್ನಲ್ಲಿ ಗೋಲು ಗಳಿಸಿದ ಅತ್ಯಂತ ಕಿರಿಯ ಆಟಗಾರ ಎಂಬ ಜಾಗತಿಕ ದಾಖಲೆ ಬರೆದಿದ್ದರು. ಆ ದೈವಿಕ ಕ್ಷಣದಲ್ಲಿ ಪೀಲೆ ಧರಿಸಿದ್ದ ಜೆರ್ಸಿಯೇ ಈಗ ಕೋಟಿ ಕೋಟಿ ಬೆಲೆಗೆ ಹರಾಜಾಗಿದೆ.
ಮರಡೋನಾ ಬಳಿಕ ಎರಡನೇ ಅತ್ಯಂತ ದುಬಾರಿ ಜೆರ್ಸಿ
ವಿಶೇಷವೆಂದರೆ, ಇದೇ ಟಿ-ಶರ್ಟ್ ಈ ಹಿಂದೆ ಅಂದರೆ 2004 ರಲ್ಲಿ ನಡೆದಿದ್ದ ಹರಾಜಿನಲ್ಲಿ ಕೇವಲ ₹91,51,323 ಗೆ ಮಾರಾಟವಾಗಿತ್ತು. ಆದರೆ ಇಂದು ಪೀಲೆ ಅವರ ಕ್ರೇಜ್ ಜಾಗತಿಕ ಮಟ್ಟದಲ್ಲಿ ಎಷ್ಟಿದೆ ಎಂಬುದಕ್ಕೆ ಈ ಹೊಸ ಹರಾಜು ಮೊತ್ತವೇ ಸಾಕ್ಷಿ.ಕ್ರೀಡಾ ಲೋಕದಲ್ಲಿ ಇದುವರೆಗೆ ಹರಾಜಾದ ಫುಟ್ಬಾಲ್ ಜೆರ್ಸಿಗಳ ಪೈಕಿ ಇದು ಎರಡನೇ ಅತ್ಯಂತ ದುಬಾರಿ ಜೆರ್ಸಿಯಾಗಿದೆ.
ಮೊದಲ ಸ್ಥಾನದಲ್ಲಿ ಯಾರು?:
1986 ರ ವಿಶ್ವಕಪ್ ಕ್ವಾರ್ಟರ್ ಫೈನಲ್ನಲ್ಲಿ ಇಂಗ್ಲೆಂಡ್ ವಿರುದ್ಧ ಅರ್ಜೆಂಟೀನಾದ ದಂತಕಥೆ ಡಿಯಾಗೋ ಮರಡೋನಾ ಅವರು ಪ್ರಸಿದ್ಧ ‘ಹ್ಯಾಂಡ್ ಆಫ್ ಗಾಡ್’ ಗೋಲು ಗಳಿಸುವಾಗ ಧರಿಸಿದ್ದ ಜೆರ್ಸಿ ನಂಬರ್ 1 ಸ್ಥಾನದಲ್ಲಿದೆ. ಅದು 2022 ರ ಹರಾಜಿನಲ್ಲಿ ಬರೋಬ್ಬರಿ ₹89.64 ಕೋಟಿಗೆ ಮಾರಾಟವಾಗಿ ಜಗತ್ತಿನ ಅತ್ಯಂತ ದುಬಾರಿ ಜೆರ್ಸಿ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ.
ವಿಶ್ವಕಪ್ನ ಸುಲ್ತಾನ್ ಕಿಂಗ್ ಪೀಲೆ:
2022 ರಲ್ಲಿ ತಮ್ಮ 82 ನೇ ವಯಸ್ಸಿನಲ್ಲಿ ನಿಧನರಾದ ಪೀಲೆ ಅವರ ಹೆಸರಿನಲ್ಲಿರುವ ಫುಟ್ಬಾಲ್ ದಾಖಲೆಗಳು ಇಂದಿಗೂ ಅಜೇಯ. ಪೀಲೆ ತಮ್ಮ ಅದ್ಭುತ ಕೌಶಲ್ಯದಿಂದ ಬ್ರೆಜಿಲ್ ತಂಡಕ್ಕೆ 1958, 1962 ಮತ್ತು 1970 ರಲ್ಲಿ ಒಟ್ಟು 3 ಬಾರಿ ಫಿಫಾ ವಿಶ್ವಕಪ್ ಪ್ರಶಸ್ತಿಯನ್ನು ತಂದುಕೊಟ್ಟಿದ್ದಾರೆ. ಇತಿಹಾಸದಲ್ಲಿ ಮೂರು ವಿಶ್ವಕಪ್ಗಳನ್ನು ಗೆದ್ದ ವಿಶ್ವದ ಏಕೈಕ ಆಟಗಾರ ಎಂಬ ಅಪರೂಪದ ದಾಖಲೆ ಇಂದಿಗೂ ಪೀಲೆ ಹೆಸರಿನಲ್ಲೇ ಭದ್ರವಾಗಿದೆ. 1958 ರ ಆ ಒಂದು ವಿಶ್ವಕಪ್ ಟೂರ್ನಿಯಲ್ಲೇ ಅವರು ಒಟ್ಟು 6 ಗೋಲುಗಳನ್ನು ಸಿಡಿಸಿ ಇಡೀ ವಿಶ್ವವೇ ತನ್ನತ್ತ ತಿರುಗಿ ನೋಡುವಂತೆ ಮಾಡಿದ್ದರು.ಈಗ ಹರಾಜಾಗಿರುವ ಅವರ ಜೆರ್ಸಿಯು ಕೇವಲ ಬಟ್ಟೆಯ ತುಣುಕಲ್ಲ, ಬದಲಾಗಿ ಅದು ಜಾಗತಿಕ ಫುಟ್ಬಾಲ್ ಇತಿಹಾಸದ ಸುವರ್ಣ ಯುಗದ ಮೈಲಿಗಲ್ಲು ಎಂದು ಕ್ರೀಡಾ ವಿಶ್ಲೇಷಕರು ಬಣ್ಣಿಸಿದ್ದಾರೆ.
