ಬೆಂಗಳೂರು: ಕಾರು ಹಾಗೂ ಇತರೆ ವಾಹನಗಳ ಸ್ಟೇರಿಂಗ್ ಮಕ್ಕಳ ಕೈಯಲ್ಲಿ ಆಟಿಕೆಯಲ್ಲ ಮತ್ತು ಸಾರ್ವಜನಿಕ ರಸ್ತೆಗಳು ಅಂತಹವರ ಭೋಗಕ್ಕೆ ಆಟದ ಮೈದಾನವಲ್ಲ ಎಂದು ಕರ್ನಾಟಕ ಹೈಕೋರ್ಟ್ ಕಟುವಾಗಿ ಅಭಿಪ್ರಾಯಪಟ್ಟಿದೆ. 14 ವರ್ಷದ ತನ್ನ ಅಪ್ರಾಪ್ತ ಮಗನಿಗೆ ಕಾರು ನೀಡಿದ್ದರಿಂದ ಸಂಭವಿಸಿದ ಭೀಕರ ರಸ್ತೆ ಅಪಘಾತದಲ್ಲಿ ಮೂವರು ಸಾವಿಗೀಡಾಗಿದ್ದರು. ಈ ಪ್ರಕರಣದಲ್ಲಿ ತನ್ನ ವಿರುದ್ಧ ದಾಖಲಾಗಿರುವ ಉದ್ದೇಶಪೂರ್ವಕವಲ್ಲದ ಕೊಲೆ ( culpable homicide not amounting to murder) ಆರೋಪವನ್ನು ಕೈಬಿಡಲು ಕೋರಿ ಬಾಲಕನ ತಂದೆ ಸಲ್ಲಿಸಿದ್ದ ಕ್ರಿಮಿನಲ್ ಅರ್ಜಿಯನ್ನು ನ್ಯಾಯಾಲಯ ತಿರಸ್ಕರಿಸಿದೆ.
೨೦೨೦ರ ಡಿಸೆಂಬರ್ 10ರಂದು ರಾತ್ರಿ ಬೆಂಗಳೂರು-ಮೈಸೂರು ರಸ್ತೆಯ ದಂಡಿನ ಮಾರಮ್ಮ ದೇವಸ್ಥಾನದ ಬಳಿ ಈ ದುರ್ಘಟನೆ ನಡೆದಿತ್ತು. ರಮೇಶ್ (40), ಉಷಾ (30) ದಂಪತಿ ಹಾಗೂ ಅವರ 5 ವರ್ಷದ ಮಗ ಮೊನೀಶ್ ಬೈಕ್‌ನಲ್ಲಿ ತೆರಳುತ್ತಿದ್ದಾಗ, ಅರ್ಜಿದಾರ ನದೀಮ್ ಉರ್ ರಹಮಾನ್ ಅವರ 14 ವರ್ಷದ ಮಗ ಅತಿವೇಗವಾಗಿ ಕಾರು ಚಲಾಯಿಸಿ ಬೈಕ್‌ಗೆ ಡಿಕ್ಕಿ ಹೊಡೆದಿದ್ದ. ಪರಿಣಾಮ ಸ್ಥಳದಲ್ಲೇ ಮೂವರು ದುರ್ಮರಣಕ್ಕೀಡಾಗಿದ್ದರು. ಈ ಸಂಬಂಧ ಎನ್.ಆರ್. ಠಾಣಾ ಪೊಲೀಸರು ತನಿಖೆ ನಡೆಸಿ ದೋಷಾರೋಪ ಪಟ್ಟಿ ಸಲ್ಲಿಸಿದ್ದರು.
ವಿಚಾರಣೆ ವೇಳೆ ಸರ್ಕಾರದ ಪರ ವಕೀಲರು ವಾದ ಮಂಡಿಸಿ, ಮಗ ಕಾರು ಕೇಳಿದಾಗ ತಂದೆಯೇ ಸ್ವತಃ ಕೀ ಕೊಟ್ಟು ಕಳುಹಿಸಿರುವುದು ತನಿಖೆಯಿಂದ ದೃಢಪಟ್ಟಿದೆ ಎಂದರು. ಅಷ್ಟೇ ಅಲ್ಲದೆ, ಅಪಘಾತದ ಸುದ್ದಿ ತಿಳಿದು ತಂದೆಯೇ ಖುದ್ದು ಸ್ಥಳಕ್ಕೆ ಬಂದು ಮಗನನ್ನು ಕರೆದೊಯ್ದಿರುವುದು ಸಾಬೀತಾಗಿರುವುದರಿಂದ, ಅವರ ವಿರುದ್ಧ ಕಾನೂನು ಕ್ರಮ ಮುಂದುವರಿಯಬೇಕೆಂದು ವಾದಿಸಿದ್ದರು. ಈ ವಾದವನ್ನು ಪುಷ್ಟೀಕರಿಸಿದ ನ್ಯಾಯಮೂರ್ತಿ ಎಂ. ನಾಗಪ್ರಸನ್ನ ಅವರ ಪೀಠ ಅರ್ಜಿಯನ್ನು ವಜಾಗೊಳಿಸಿತು.
ಅಪ್ರಾಪ್ತರು ವಾಹನ ಚಲಾಯಿಸುವುದನ್ನು ನಿಷೇಧಿಸುವ ಕಾನೂನುಗಳು ಕೇವಲ ಅಲಂಕಾರಿಕವಾಗಿಲ್ಲ ಎಂದು ಹೈಕೋರ್ಟ್ ಸ್ಪಷ್ಟಪಡಿಸಿದೆ. ತರಬೇತಿ ಪಡೆಯದ ಹಾಗೂ ಕಾನೂನುಬದ್ಧವಾಗಿ ವಾಹನ ಚಲಾಯಿಸಲು ಅಸಮರ್ಥರಾದವರು ರಸ್ತೆಗಿಳಿದು ದುರಂತಗಳಿಗೆ ಕಾರಣವಾದರೆ, ಅಂತಹವರಿಗೆ ಅಥವಾ ವಾಹನ ನೀಡಿದವರಿಗೆ ಯಾವುದೇ ರಕ್ಷಣೆ ಸಿಗಲು ಸಾಧ್ಯವಿಲ್ಲ ಎಂದು ಕೋರ್ಟ್ ಎಚ್ಚರಿಸಿದೆ.
