ರಾಜ್ಯ ಸರ್ಕಾರದಿಂದ ಜಲಸಂಪನ್ಮೂಲ ಇಲಾಖೆಯ 4 ನಿಗಮಗಳಿಗೆ ₹2,421 ಕೋಟಿ ಅನುದಾನ ಬಿಡುಗಡೆ

ಬೆಂಗಳೂರು: ರಾಜ್ಯ ಸರ್ಕಾರದ ಜಲಸಂಪನ್ಮೂಲ ಇಲಾಖೆ ವ್ಯಾಪ್ತಿಯ ಪ್ರಮುಖ ನಾಲ್ಕು ನಿಗಮಗಳ ವಿವಿಧ ಆಡಳಿತಾತ್ಮಕ ಹಾಗೂ ಅಭಿವೃದ್ಧಿ ವೆಚ್ಚಗಳಿಗಾಗಿ ಬರೋಬ್ಬರಿ ₹2,421 ಕೋಟಿ ಅನುದಾನವನ್ನು ಬಿಡುಗಡೆ ಮಾಡಿ ಸರ್ಕಾರ ಆದೇಶ ಹೊರಡಿಸಿದೆ. ಆಯವ್ಯಯದಲ್ಲಿ (ಬಜೆಟ್) ಘೋಷಿಸಿದಂತೆ ಈ ಮುಂಗಡ ಅನುದಾನವನ್ನು ರಾಜ್ಯ ಸರ್ಕಾರ ಬಿಡುಗಡೆ ಮಾಡಿದೆ.

ಅನುದಾನ ಪಡೆದ 4 ನಿಗಮಗಳು:

ರಾಜ್ಯದ ನೀರಾವರಿ ಹಾಗೂ ಮೂಲಸೌಕರ್ಯ ಜಾಲವನ್ನು ನಿರ್ವಹಿಸುವ ಈ ಕೆಳಗಿನ ಪ್ರಮುಖ ನಿಗಮಗಳಿಗೆ ಈ ಮೊತ್ತವನ್ನು ಹಂಚಿಕೆ ಮಾಡಲಾಗಿದೆ:

1. ಕೃಷ್ಣಾ ಭಾಗ್ಯ ಜಲ ನಿಗಮ ನಿಯಮಿತ (KBJNL)

2. ಕರ್ನಾಟಕ ನೀರಾವರಿ ನಿಗಮ ನಿಯಮಿತ (KNNL)

3. ಕಾವೇರಿ ನೀರಾವರಿ ನಿಗಮ ನಿಯಮಿತ (CNNL)

4. ವಿಶ್ವೇಶ್ವರಯ್ಯ ಜಲ ನಿಗಮ ನಿಯಮಿತ (VJNL)

ಯಾವೆಲ್ಲಾ ವೆಚ್ಚಗಳಿಗೆ ಅನುದಾನ ಬಳಕೆ?

ಬಿಡುಗಡೆಯಾಗಿರುವ ₹2,421 ಕೋಟಿ ಅನುದಾನವನ್ನು ನಿಗಮಗಳ ನೌಕರರ ವೇತನ ಪಾವತಿ, ನೀರಾವರಿ ಯೋಜನೆಗಳಿಗೆ ಸಂಬಂಧಿಸಿದ ಬಾಕಿ ಭೂಸ್ವಾಧೀನ ಪ್ರಕ್ರಿಯೆ, ಪರಿಹಾರ ವಿತರಣೆ ಹಾಗೂ ನಿಗಮಗಳ ಕಚೇರಿಗಳ ದೈನಂದಿನ ನಿರ್ವಹಣಾ ವೆಚ್ಚಗಳು ಸೇರಿದಂತೆ ವಿವಿಧ ಆದ್ಯತೆಯ ಕಾರ್ಯಗಳಿಗೆ ಬಳಸಿಕೊಳ್ಳಲು ಸೂಚಿಸಲಾಗಿದೆ.

ಗುತ್ತಿಗೆದಾರರ ಬಾಕಿ ಬಿಲ್‌ಗೆ ಅನ್ವಯವಿಲ್ಲ:

ಪ್ರಮುಖವಾಗಿ, ಈ ಅನುದಾನವು ಗುತ್ತಿಗೆದಾರರ ಬಾಕಿ ಬಿಲ್ ಪಾವತಿಯನ್ನು ಹೊರತುಪಡಿಸಿ, ಕೇವಲ ಸಿಬ್ಬಂದಿ ವೆಚ್ಚ, ಭೂಸ್ವಾಧೀನ ಹಾಗೂ ಇಲಾಖಾ ಆಡಳಿತಾತ್ಮಕ ವೆಚ್ಚಗಳಿಗೆ ಮಾತ್ರ ಸೀಮಿತವಾಗಿದೆ ಎಂದು ಆದೇಶದಲ್ಲಿ ಸ್ಪಷ್ಟಪಡಿಸಲಾಗಿದೆ. ಸರ್ಕಾರದ ಈ ಕ್ರಮದಿಂದಾಗಿ ಹಲವು ದಿನಗಳಿಂದ ನನೆಗುದಿಗೆ ಬಿದ್ದಿದ್ದ ಭೂಸ್ವಾಧೀನ ಪ್ರಕ್ರಿಯೆಗಳು ಚುರುಕುಗೊಳ್ಳಲಿದ್ದು, ನಿಗಮಗಳ ನೌಕರರ ವೇತನ ಸಮಸ್ಯೆಗೂ ಪರಿಹಾರ ದೊರೆತಂತಾಗಿದೆ.