ನ್ಯೂಯಾರ್ಕ್: ಜಗತ್ತಿನ ಮಹಾನ್ ಉದ್ಯಮಿ, ಟೆಕ್ ದಂತಕಥೆ ಎಲೋನ್ ಮಸ್ಕ್ ಈಗ ಜಗತ್ತಿನ ಇತಿಹಾಸದಲ್ಲೇ ಮೊದಲ ಟ್ರಿಲಿಯನೇರ್ (ಲಕ್ಷ ಕೋಟಿ ಡಾಲರ್ ಒಡೆಯ) ಎಂಬ ಐತಿಹಾಸಿಕ ಮತ್ತು ಅದ್ಭುತ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ ಮಸ್ಕ್ ಒಡೆತನದ ಬಾಹ್ಯಾಕಾಶ ಸಂಸ್ಥೆಯಾದ ಸ್ಪೇಸ್ಎಕ್ಸ್ ಜಾಗತಿಕ ಷೇರು ಮಾರುಕಟ್ಟೆಗೆ ಲಗ್ಗೆ ಇಟ್ಟ ಬೆನ್ನಲ್ಲೇ, ಅವರ ಆಸ್ತಿ ಮೌಲ್ಯವು ಜಗತ್ತಿನ ಯಾವುದೇ ವ್ಯಕ್ತಿ ಇದುವರೆಗೆ ತಲುಪದ ಅತಿ ದೊಡ್ಡ ಮೈಲಿಗಲ್ಲನ್ನು ದಾಟಿದೆ.
ವಾಲ್ ಸ್ಟ್ರೀಟ್ನ ನಾಸ್ದಾಕ್ (Nasdaq) ಮಾರುಕಟ್ಟೆಯಲ್ಲಿ SPCX ಹೆಸರಿನಲ್ಲಿ ಸ್ಪೇಸ್ಎಕ್ಸ್ ವಹಿವಾಟು ಆರಂಭಿಸುತ್ತಿದ್ದಂತೆ ಷೇರುಗಳು ಶೇ. 11 ಕ್ಕೂ ಹೆಚ್ಚು ಜಿಗಿತ ಕಂಡು 150 ಡಾಲರ್ ತಲುಪಿದ್ದು, ಮಸ್ಕ್ ಸಂಪತ್ತನ್ನು ಗಗನಕ್ಕೇರಿಸಿದೆ
ಸೌದಿ ಅರಾಮ್ಕೋ ದಾಖಲೆ ಧೂಳಿಪಟ: ವಿಶ್ವದ ಅತಿ ದೊಡ್ಡ IPO ಇದು ಷೇರು ಮಾರುಕಟ್ಟೆಯ ಇತಿಹಾಸದಲ್ಲೇ ಸಾರ್ವಕಾಲಿಕ ಬೃಹತ್ ಐಪಿಒ (IPO) ಪ್ರಕ್ರಿಯೆಯನ್ನು ಸ್ಪೇಸ್ಎಕ್ಸ್ ಪೂರ್ಣಗೊಳಿಸಿದೆ
ವಿಶ್ವ ದಾಖಲೆಯ ಬಂಡವಾಳ: ಐಪಿಒನಲ್ಲಿ ಪ್ರತಿ ಷೇರಿಗೆ $135 ರಂತೆ ಒಟ್ಟು 55.56 ಕೋಟಿ ಷೇರುಗಳನ್ನು ಮಾರಾಟ ಮಾಡಿ ಬರೋಬ್ಬರಿ $75 ಬಿಲಿಯನ್ (ಸುಮಾರು ₹6.2 ಲಕ್ಷ ಕೋಟಿ) ಬಂಡವಾಳವನ್ನು ಮಾರುಕಟ್ಟೆಯಿಂದ ಬಾಚಿಕೊಂಡಿದೆ.
ಮಾರುಕಟ್ಟೆಯಲ್ಲಿ ಭೀಕರ ಕ್ರೇಜ್: ಕಂಪನಿಗೆ ಕೇವಲ 75 ಬಿಲಿಯನ್ ಡಾಲರ್ ಅಗತ್ಯವಿತ್ತು. ಆದರೆ ಹೂಡಿಕೆದಾರರು ಬರೋಬ್ಬರಿ $250 ಬಿಲಿಯನ್ (₹20 ಲಕ್ಷ ಕೋಟಿಗೂ ಅಧಿಕ) ಹಣ ಹೂಡಲು ಬಿಡ್ ಸಲ್ಲಿಸಿ ಮುಗಿಬಿದ್ದಿದ್ದರು
ಇದರೊಂದಿಗೆ 2019 ರಲ್ಲಿ ಸೌದಿಯ ತೈಲ ಸಂಸ್ಥೆ ಸೌದಿ ಅರಾಮ್ಕೋ ($29.4 ಬಿಲಿಯನ್) ನಿರ್ಮಿಸಿದ್ದ ಜಗತ್ತಿನ ಅತಿ ದೊಡ್ಡ ಐಪಿಒ ದಾಖಲೆಯನ್ನು ಸ್ಪೇಸ್ಎಕ್ಸ್ ಎರಡೂವರೆ ಪಟ್ಟು ಹೆಚ್ಚು ಹಣ ಸಂಗ್ರಹಿಸುವ ಮೂಲಕ ಧೂಳಿಪಟ ಮಾಡಿದೆ. ಐಪಿಒ ನಂತರ ಕಂಪನಿಯ ಒಟ್ಟು ಮಾರುಕಟ್ಟೆ ಮೌಲ್ಯ 2 ಟ್ರಿಲಿಯನ್ ಡಾಲರ್ ದಾಟಿದ್ದು, ಅಮೆರಿಕದ 6ನೇ ಅತಿ ದೊಡ್ಡ ಸಾರ್ವಜನಿಕ ಕಂಪನಿಯಾಗಿದೆ.
ಮಸ್ಕ್ ಆಸ್ತಿ $1.1 ಟ್ರಿಲಿಯನ್ (₹91 ಲಕ್ಷ ಕೋಟಿ) ದಾಟಿದ್ದು ಹೇಗೆ?
ಐಪಿಒ ಆರಂಭಕ್ಕೂ ಮುನ್ನ ಮಸ್ಕ್ ಆಸ್ತಿ ಸುಮಾರು $780 ಬಿಲಿಯನ್ ಇತ್ತು. ಆದರೆ ಸ್ಪೇಸ್ಎಕ್ಸ್ ಲಿಸ್ಟ್ ಆದ ತಕ್ಷಣ ಮಸ್ಕ್ ಹೊಂದಿರುವ ಶೇ. 82.4 ರಷ್ಟು ಪಾಲಿನ ಮೌಲ್ಯವೇ ಬರೋಬ್ಬರಿ $866 ಬಿಲಿಯನ್ ತಲುಪಿದೆ.
ಇದನ್ನು ಅವರ ಟೆಸ್ಲಾ (Tesla) ಕಂಪನಿಯ $280 ಬಿಲಿಯನ್ ಷೇರುಗಳು ಹಾಗೂ ಇತರ ಹೂಡಿಕೆಗಳೊಂದಿಗೆ ಒಟ್ಟುಗೂಡಿಸಿದಾಗ, ಮಸ್ಕ್ ಅವರ ನಿವ್ವಳ ಆಸ್ತಿ ಮೌಲ್ಯ $1.1 ಟ್ರಿಲಿಯನ್ ಗಡಿಯನ್ನು ದಾಟಿದೆ
ಭಾರತೀಯ ರೂಪಾಯಿ ಮೌಲ್ಯದಲ್ಲಿ ಇದು ಸುಮಾರು 91 ಲಕ್ಷ ಕೋಟಿ ರೂಪಾಯಿಗಳಿಗಿಂತಲೂ ಹೆಚ್ಚಾಗಿದೆ
ದೇಶಗಳಿಗಿಂತಲೂ ಶ್ರೀಮಂತ: ಮಸ್ಕ್ ಅವರ ಸಂಪತ್ತು ಜಗತ್ತಿನ 2ನೇ ಶ್ರೀಮಂತ, ಗೂಗಲ್ ಸಹ-ಸ್ಥಾಪಕ ಲ್ಯಾರಿ ಪೇಜ್ ($304 ಬಿಲಿಯನ್) ಅವರಿಗಿಂತ ಬರೋಬ್ಬರಿ ಮೂರು ಪಟ್ಟು ಹೆಚ್ಚಾಗಿದೆ. ಇಷ್ಟೇ ಅಲ್ಲ, ಐರ್ಲೆಂಡ್, ತೈವಾನ್, ಸ್ವೀಡನ್ ಮತ್ತು ಸಿಂಗಾಪುರದಂತಹ ದೇಶಗಳ ಒಟ್ಟು ಜಿಡಿಪಿಗಿಂತಲೂ (ದೇಶದ ಒಟ್ಟು ಆರ್ಥಿಕತೆ) ಮಸ್ಕ್ ಅವರ ವೈಯಕ್ತಿಕ ಆಸ್ತಿ ದೊಡ್ಡದಾಗಿದೆ
ರಾತ್ರೋರಾತ್ರಿ 4,400 ಸಾಮಾನ್ಯ ಉದ್ಯೋಗಿಗಳು ಕೋಟ್ಯಧಿಪತಿಗಳು
ಈ ಐಪಿಒ ಕೇವಲ ಎಲೋನ್ ಮಸ್ಕ್ ಅವರನ್ನು ಮಾತ್ರ ಶ್ರೀಮಂತನನ್ನಾಗಿ ಮಾಡಿಲ್ಲ. ಸ್ಪೇಸ್ಎಕ್ಸ್ ಸಂಸ್ಥೆಯಲ್ಲಿ ಆರಂಭದಿಂದಲೂ ಕಷ್ಟಪಟ್ಟು ಕೆಲಸ ಮಾಡುತ್ತಿದ್ದ ಇಂಜಿನಿಯರ್ಗಳು, ವೆಲ್ಡರ್ಗಳು ಸೇರಿದಂತೆ ಸುಮಾರು 4,400 ಕ್ಕೂ ಹೆಚ್ಚು ಸಾಮಾನ್ಯ ಉದ್ಯೋಗಿಗಳು ರಾತ್ರೋರಾತ್ರಿ ಮಿಲಿಯನೇರ್ಗಳಾಗಿದ್ದಾರೆ (ಕೋಟ್ಯಧಿಪತಿಗಳು). ಕಂಪನಿಯು ಅವರಿಗೆ ಸಂಬಳದ ಭಾಗವಾಗಿ ನೀಡಿದ್ದ ಸ್ಟಾಕ್ ಆಪ್ಷನ್ಗಳ (ಷೇರುಗಳು) ಮೌಲ್ಯ ಈಗ ಕೋಟಿ ಕೋಟಿಗೆ ಜಿಗಿದಿದೆ!
ಈ ಮಹಾ ಬಂಡವಾಳ ಯಾವ ಯೋಜನೆಗಳಿಗೆ ಬಳಕೆಯಾಗಲಿದೆ?
ಸ್ಪೇಸ್ಎಕ್ಸ್ ಅನ್ನು ಶೇರು ಮಾರುಕಟ್ಟೆಗೆ ತಂದಿದ್ದರ ಹಿಂದೆ ಮಸ್ಕ್ ಅವರ 3 ಭೀಕರ ಮಾಸ್ಟರ್ ಪ್ಲಾನ್ಗಳಿವೆ:
ಸ್ಟಾರ್ಶಿಪ್ (Starship): ಮಂಗಳ ಗ್ರಹಕ್ಕೆ (Mars) ಮಾನವರನ್ನು ಕಳುಹಿಸುವ ಬೃಹತ್ ರಾಕೆಟ್ ಯೋಜನೆಯನ್ನು ವೇಗಗೊಳಿಸಲು.
ಸ್ಟಾರ್ಲಿಂಕ್ (Starlink): ಮುಂದಿನ ತಲೆಮಾರಿನ ಉಪಗ್ರಹಗಳ ಮೂಲಕ ಜಗತ್ತಿನಾದ್ಯಂತ ಸ್ಯಾಟಲೈಟ್ ಹೈ-ಸ್ಪೀಡ್ ಇಂಟರ್ನೆಟ್ ನೀಡಲು.
ಕೃತಕ ಬುದ್ಧಿಮತ್ತೆ (AI): ಬಾಹ್ಯಾಕಾಶ ಸಂಶೋಧನೆಯೊಂದಿಗೆ ಮಸ್ಕ್ ಅವರ ‘xAI’ ಸಂಸ್ಥೆಯ ತಂತ್ರಜ್ಞಾನವನ್ನು ಜೋಡಿಸಿ, ಬಾಹ್ಯಾಕಾಶ ಆಧಾರಿತ AI ದತ್ತಾಂಶ ಕೇಂದ್ರಗಳನ್ನು (Data Centers) ಸ್ಥಾಪಿಸಲು.
