ಜಗತ್ತಿನಾದ್ಯಂತ ಕೃತಕ ಬುದ್ಧಿಮತ್ತೆ (AI) ಬಳಕೆ ವೇಗವಾಗಿ ಹೆಚ್ಚುತ್ತಿರುವ ಸಂದರ್ಭದಲ್ಲಿ, ಪ್ರಮುಖ ವಾಹನ ತಯಾರಕ ಫೋರ್ಡ್( Ford Motor Company) ಕೂಡ ಇದೇ ದಾರಿಯಲ್ಲಿ ಸಾಗಿತ್ತು. ಆದರೆ ಅನುಭವಿ ಇಂಜಿನಿಯರ್ಗಳ ಪರಿಣತಿಗೆ ಎಐ ಸರಿಸಾಟಿಯಾಗದ ಕಾರಣ, ಸಂಸ್ಥೆ ಇದೀಗ ಅವರನ್ನು ಮತ್ತೆ ಕೆಲಸಕ್ಕೆ ಕರೆತರುತ್ತಿದೆ.
ಹೌದು. ಕೃತಕ ಬುದ್ಧಿಮತ್ತೆ (ಎಐ) ಮೇಲೆ ಸಂಪೂರ್ಣವಾಗಿ ಅವಲಂಬಿತವಾಗಿದ್ದ ಅಮೆರಿಕದ ವಾಹನ ತಯಾರಕ ಫೋರ್ಡ್ಗೆ ಇದೀಗ ಮಾನವ ಪರಿಣತಿಯ ಮಹತ್ವ ಅರಿವಾಗಿದೆ. ಗುಣಮಟ್ಟ ಪರಿಶೀಲನೆಗಾಗಿ ಅಳವಡಿಸಿದ್ದ 900 ಎಐ ಕ್ಯಾಮೆರಾಗಳು ನಿರೀಕ್ಷಿತ ಫಲ ನೀಡದ ಹಿನ್ನೆಲೆಯಲ್ಲಿ, ಕಂಪನಿ ಸುಮಾರು 350 ಅನುಭವಿ ಇಂಜಿನಿಯರ್ಗಳನ್ನು ಮರುನೇಮಕ ಮಾಡಿಕೊಂಡಿದ್ದು, ಎಐಗೂ ಮಾನವ ಅನುಭವ ಮತ್ತು ಕೌಶಲ್ಯವೇ ನಿಜವಾದ ಬಲ ಎಂಬುದು ಮತ್ತೊಮ್ಮೆ ಸಾಬೀತಾಗಿದೆ.
ಬ್ಲೂಮ್ಬರ್ಗ್ ವರದಿ ಪ್ರಕಾರ, ಫೋರ್ಡ್ನ ಗುಣಮಟ್ಟ ಪರಿಶೀಲನಾ (Quality Assurance) ವಿಭಾಗದಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಹಲವು ಅನುಭವಿ ಇಂಜಿನಿಯರ್ಗಳು ಕಳೆದ ಕೆಲವು ವರ್ಷಗಳಲ್ಲಿ ಸಂಸ್ಥೆಯನ್ನು ತೊರೆದಿದ್ದರು. ಅವರ ಸ್ಥಾನಕ್ಕೆ ಹೊಸ ಉದ್ಯೋಗಿಗಳನ್ನು ನೇಮಕ ಮಾಡದೇ, ಕಳೆದ ವರ್ಷದ ಅಕ್ಟೋಬರ್ನಲ್ಲಿ ಸಂಸ್ಥೆ 900 ಎಐ ಆಧಾರಿತ ಕ್ಯಾಮೆರಾಗಳನ್ನು ಅಳವಡಿಸಿತ್ತು.
ಆ ಸಂದರ್ಭದಲ್ಲಿ ಫೋರ್ಡ್ನ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ (COO) ಕುಮಾರ್ ಗಲ್ಹೋತ್ರಾ, “ಉದ್ಯಮ ಕ್ಷೇತ್ರದಾದ್ಯಂತ ಎಐ ವೇಗವಾಗಿ ವಿಸ್ತರಿಸುತ್ತಿದೆ” ಎಂದು ಹೇಳಿದ್ದರು. ಸಂಸ್ಥೆಯ ಸಿಇಒ Jim Farley ಕೂಡ “ಎಐ ಅನೇಕ ವೈಟ್-ಕಾಲರ್ ಉದ್ಯೋಗಗಳನ್ನು ಬದಲಾಯಿಸಬಹುದು” ಎಂದು ಅಭಿಪ್ರಾಯಪಟ್ಟಿದ್ದರು.
ಆದರೆ ಕೆಲವೇ ತಿಂಗಳಲ್ಲಿ ಆ ಅಂದಾಜುಗಳು ತಪ್ಪಾಗಿರುವುದು ಸ್ಪಷ್ಟವಾಯಿತು. ಎಐ ವ್ಯವಸ್ಥೆ ನಿರೀಕ್ಷಿತ ಮಟ್ಟದಲ್ಲಿ ಕಾರ್ಯನಿರ್ವಹಿಸದ ಕಾರಣ, ಫೋರ್ಡ್ ಮತ್ತೆ ಅನುಭವಿ ಇಂಜಿನಿಯರ್ಗಳನ್ನು ನೇಮಕ ಮಾಡತೊಡಗಿದೆ. ಇದುವರೆಗೆ ಸುಮಾರು 350 ಇಂಜಿನಿಯರ್ಗಳನ್ನು ಮರುನೇಮಕ ಮಾಡಿಕೊಂಡಿರುವುದಾಗಿ ಕಂಪನಿ ತಿಳಿಸಿದೆ. ಮರುನೇಮಕಗೊಂಡ ಇಂಜಿನಿಯರ್ಗಳಿಗೆ ಎಐ ವ್ಯವಸ್ಥೆಗೆ ತರಬೇತಿ ನೀಡುವ ಜವಾಬ್ದಾರಿಯನ್ನು ವಹಿಸಲಾಗಿದೆ. ಫೋರ್ಡ್ನ ವಾಹನ ಹಾರ್ಡ್ವೇರ್ ಇಂಜಿನಿಯರಿಂಗ್ ವಿಭಾಗದ ಉಪಾಧ್ಯಕ್ಷ ಚಾರ್ಲ್ಸ್ ಪೂನ್ ಅವರು, “ಎಐ ಅತ್ಯುತ್ತಮ ಸಾಧನವೇ ಸರಿ. ಆದರೆ ಅದರ ಕಾರ್ಯಕ್ಷಮತೆ ಅದಕ್ಕೆ ನೀಡುವ ತರಬೇತಿ ಮತ್ತು ಮಾಹಿತಿಯ ಗುಣಮಟ್ಟದ ಮೇಲೆ ಅವಲಂಬಿತವಾಗಿರುತ್ತದೆ” ಎಂದು ಹೇಳಿದ್ದಾರೆ.
ಕಳೆದ ಕೆಲವು ವರ್ಷಗಳಲ್ಲಿ ಸಂಸ್ಥೆಯ ಅನುಭವಿ ಉದ್ಯೋಗಿಗಳಿಗೆ ನೀಡಬೇಕಾದಷ್ಟು ಮಹತ್ವ ನೀಡಲಾಗಿಲ್ಲ ಎಂಬುದನ್ನು ಅವರು ಒಪ್ಪಿಕೊಂಡಿದ್ದಾರೆ. ಅವರ ಸ್ಥಾನದಲ್ಲಿ ಅಳವಡಿಸಿದ್ದ ಎಐ ವ್ಯವಸ್ಥೆ ನಿರೀಕ್ಷಿಸಿದ ಮಟ್ಟದಲ್ಲಿ ಕಾರ್ಯನಿರ್ವಹಿಸಲಿಲ್ಲ ಎಂದೂ ತಿಳಿಸಿದ್ದಾರೆ.“ಕೇವಲ ಎಐಗೆ ನಮ್ಮ ವಿನ್ಯಾಸದ ಅಗತ್ಯಗಳನ್ನು ನೀಡಿದರೆ ಅದು ಸ್ವಯಂ ಅತ್ಯುತ್ತಮ ಗುಣಮಟ್ಟದ ಉತ್ಪನ್ನವನ್ನು ಸೃಷ್ಟಿಸುತ್ತದೆ ಎಂದು ನಾವು ತಪ್ಪಾಗಿ ಭಾವಿಸಿದ್ದೆವು,” ಎಂದು ಚಾರ್ಲ್ಸ್ ಪೂನ್ ಹೇಳಿದ್ದಾರೆ.
ಅನುಭವಿ ಇಂಜಿನಿಯರ್ಗಳಲ್ಲಿರುವ ತಾಂತ್ರಿಕ ಜ್ಞಾನ, ಅನುಭವ ಹಾಗೂ ನಿರ್ಧಾರ ಸಾಮರ್ಥ್ಯವನ್ನು ಎಐ ಇನ್ನೂ ಸಂಪೂರ್ಣವಾಗಿ ಹೊಂದಿಲ್ಲ. ಈ ಕಾರಣದಿಂದಲೇ ಎಐಗೆ ಹೆಚ್ಚಿನ ಗುಣಮಟ್ಟದ ತರಬೇತಿ ನೀಡಲು ಅನುಭವಿ ತಜ್ಞರ ನೆರವು ಅಗತ್ಯವಾಗಿದೆ ಎಂದು ಫೋರ್ಡ್ ಅಭಿಪ್ರಾಯಪಟ್ಟಿದೆ. ಇದೇ ಹಿನ್ನೆಲೆಯಲ್ಲಿ ಹಳೆಯ ಇಂಜಿನಿಯರ್ಗಳ ಜೊತೆಗೆ ಹೊಸ ಯುವ ಇಂಜಿನಿಯರ್ಗಳನ್ನೂ ಸಂಸ್ಥೆ ನೇಮಕ ಮಾಡಿಕೊಂಡಿದೆ.
