ಬೆಂಗಳೂರು: ಜೀವ ಉಳಿಸುವ ಔಷಧಗಳ ಹೆಸರಿನಲ್ಲಿ ಅಮಾಯಕ ರೋಗಿಗಳಿಂದ ಕೋಟಿ ಕೋಟಿ ರೂಪಾಯಿ ಸುಲಿಗೆ ಮಾಡುತ್ತಿದ್ದ ಬೃಹತ್ ದಂಧೆಯನ್ನು ಆಹಾರ ಮತ್ತು ಔಷಧ ಆಡಳಿತ ಮಂಡಳಿ (FDA) ಇದೀಗ ಯಶಸ್ವಿಯಾಗಿ ಬಯಲಿಗೆಳೆದಿದೆ. ಒಟ್ಟು 254 ಪ್ರಸಿದ್ಧ ಔಷಧ ತಯಾರಿಕಾ ಕಂಪನಿಗಳು ಅತ್ಯಂತ ಕಡಿಮೆ ವೆಚ್ಚದಲ್ಲಿ ತಯಾರಾಗುವ ಹಾಗೂ ಸರಬರಾಜಾಗುವ ಮಾತ್ರೆ, ಇಂಜೆಕ್ಷನ್‌ಗಳಿಗೆ ಅತಿಯಾದ ಎಂಆರ್‌ಪಿ (MRP) ನಿಗದಿಪಡಿಸಿ, ರೋಗಿಗಳ ಜೇಬಿಗೆ ಕನ್ನ ಹಾಕುತ್ತಿರುವುದು ಅಧಿಕಾರಿಗಳ ತನಿಖೆಯಲ್ಲಿ ಸಾಬೀತಾಗಿದೆ.
ಲ್ಯಾಂಡಿಂಗ್ ಕಾಸ್ಟ್‌ಗೂ ಎಂಆರ್‌ಪಿಗೂ ಅಜಗಜಾಂತರ ವ್ಯತ್ಯಾಸ! ಅಧಿಕಾರಿಗಳು ನೀಡಿರುವ ಲೆಕ್ಕಾಚಾರದ ಪ್ರಕಾರ, ಔಷಧಗಳ ನೈಜ ಖರೀದಿ ಬೆಲೆ (Landing Cost) ಮತ್ತು ಗ್ರಾಹಕರಿಗೆ ವಿಧಿಸುತ್ತಿದ್ದ ಎಂಆರ್‌ಪಿ ನಡುವೆ ಶೇಕಡಾ ಸಾವಿರಾರು ಪಟ್ಟು ವ್ಯತ್ಯಾಸ ಕಂಡುಬಂದಿದೆ. ಕೇವಲ 86 ರೂಪಾಯಿಗೆ ಖರೀದಿಸಿದ ಔಷಧಿಗೆ ಬರೋಬ್ಬರಿ 4,528 ರೂಪಾಯಿ ಎಂಆರ್‌ಪಿ ನಿಗದಿಪಡಿಸಿ ಮಾರಾಟ ಮಾಡಲಾಗುತ್ತಿತ್ತು. ಅದೇ ರೀತಿ, 160 ರೂಪಾಯಿ ಉತ್ಪಾದನಾ/ಲ್ಯಾಂಡಿಂಗ್ ವೆಚ್ಚದ ಔಷಧಿಗೆ 7,110 ರೂಪಾಯಿ ಬಿಲ್ ಹಾಕಿ ದೋಚಲಾಗುತ್ತಿತ್ತು. ಆಸ್ಪತ್ರೆಗಳು ಮತ್ತು ಫಾರ್ಮಾ ಕಂಪನಿಗಳು ಶಾಮೀಲಾಗಿ ಈ ರೀತಿ ಕೃತಕ ಅಭಾವ ಹಾಗೂ ದುಬಾರಿ ದರವನ್ನು ಸೃಷ್ಟಿಸಿ ರೋಗಿಗಳನ್ನು ಸುಲಿಗೆ ಮಾಡುತ್ತಿದ್ದವು ಎಂಬ ಭೀಕರ ಸತ್ಯ ಹೊರಬಿದ್ದಿದೆ.
ಖಾಸಗಿ ಆಸ್ಪತ್ರೆಗಳು ಮತ್ತು ಕಂಪನಿಗಳ ಶಾಮೀಲು: ಹೆಚ್ಚಿದ ಆಕ್ರೋಶ ಲಭ್ಯವಾಗಿರುವ ಪ್ರಮುಖ ಔಷಧಗಳ ದರ ಹೆಚ್ಚಳದ ಪಟ್ಟಿ ಬೆಚ್ಚಿಬೀಳಿಸುವಂತಿದೆ:
-
ಸೈಟ್ಯಾಕ್ಸ್ (Cytax) 100 MG: ಲ್ಯಾಂಡಿಂಗ್ ವೆಚ್ಚ ₹342 ಇದ್ದರೆ, ಅದರ ಎಂಆರ್‌ಪಿ ₹3,836!
-
ನ್ಯೂಕೈನ್ (Neukine) 300 MG: ಲ್ಯಾಂಡಿಂಗ್ ವೆಚ್ಚ ₹112 ಇದ್ದರೆ, ವಿಧಿಸಲಾಗಿದ್ದ ಎಂಆರ್‌ಪಿ ₹1,239!
-
ಬಿವಾಟಾಸ್ (Biwatas) 400 MG: ಲ್ಯಾಂಡಿಂಗ್ ವೆಚ್ಚ ₹5,859 ಇದ್ದರೆ, ಮಾರಾಟ ಮಾಡುತ್ತಿದ್ದ ಎಂಆರ್‌ಪಿ ಬರೋಬ್ಬರಿ ₹62,690!
-
ಕೋಸ್ಟೆ (Coste) 3 MIU Inj: ಲ್ಯಾಂಡಿಂಗ್ ವೆಚ್ಚ ₹340 ಇದ್ದರೆ, ಎಂಆರ್‌ಪಿ ₹3,699!
ಕಠಿಣ ಕ್ರಮಕ್ಕೆ ಸಾರ್ವಜನಿಕರ ಆಗ್ರಹ ಅತ್ಯಗತ್ಯ ಹಾಗೂ ಜೀವರಕ್ಷಕ ಔಷಧಗಳ ಮೇಲಿನ ಈ ಅತಿಯಾದ ಲಾಭಕೋರತನವನ್ನು ಪತ್ತೆ ಹಚ್ಚಿರುವ ಎಫ್‌ಡಿಎ ಅಧಿಕಾರಿಗಳು, ಈ 254 ಕಂಪನಿಗಳ ಬಂಡವಾಳವನ್ನು ಪೂರ್ಣವಾಗಿ ಬಯಲು ಮಾಡಿದ್ದಾರೆ. ಆರೋಗ್ಯ ತುರ್ತುಸ್ಥಿತಿಯಲ್ಲಿರುವ ರೋಗಿಗಳ ಅಸಹಾಯಕತೆಯನ್ನು ಬಂಡವಾಳ ಮಾಡಿಕೊಂಡು ಇಷ್ಟೊಂದು ಪ್ರಮಾಣದಲ್ಲಿ ದೋಚುತ್ತಿದ್ದ ಕಂಪನಿಗಳು ಮತ್ತು ಆಸ್ಪತ್ರೆಗಳ ವಿರುದ್ಧ ಸರ್ಕಾರ ಕೂಡಲೇ ಕ್ರಿಮಿನಲ್ ಮೊಕದ್ದಮೆ ದಾಖಲಿಸಿ, ಕಠಿಣ ಕಾನೂನು ಕ್ರಮ ಕೈಗೊಳ್ಳಬೇಕು ಎಂದು ಸಾರ್ವಜನಿಕರು ಹಾಗೂ ರೋಗಿಗಳ ಹಿತರಕ್ಷಣಾ ಸಂಘಟನೆಗಳು ಆಕ್ರೋಶ ವ್ಯಕ್ತಪಡಿಸಿವೆ.
