ಬೆಂಗಳೂರು: ಕಳೆದ ಸುಮಾರು ಒಂದು ದಶಕದಿಂದ ಕೇವಲ ಚರ್ಚೆ ಮತ್ತು ಕಾಗದದ ಹಂತದಲ್ಲೇ ಉಳಿದುಕೊಂಡಿದ್ದ ಬಹುನಿರೀಕ್ಷಿತ 'ಅಂತಾರಾಷ್ಟ್ರೀಯ ಚಲನಚಿತ್ರ ನಗರಿ' (ಇಂಟರ್‌ನ್ಯಾಷನಲ್‌ ಫಿಲ್ಮ್ ಸಿಟಿ) ಯೋಜನೆಗೆ ಕೊನೆಗೂ ಚಾಲನೆ ಸಿಕ್ಕಿದೆ. ಮೈಸೂರು ಜಿಲ್ಲೆಯ ನಂಜನಗೂಡು ತಾಲೂಕಿನ ಇಮ್ಮಾವು ಕೈಗಾರಿಕಾ ಪ್ರದೇಶದಲ್ಲಿ ₹729.43 ಕೋಟಿ ಅಂದಾಜು ವೆಚ್ಚದಲ್ಲಿ ಈ ಅತ್ಯಾಧುನಿಕ ಫಿಲ್ಮ್ ಸಿಟಿಯನ್ನು ನಿರ್ಮಿಸಲು ಗುರುವಾರ ನಡೆದ ರಾಜ್ಯ ಸಚಿವ ಸಂಪುಟ ಸಭೆಯಲ್ಲಿ ಅಧಿಕೃತ ಅನುಮೋದನೆ ನೀಡಲಾಗಿದೆ.
ಮುಖ್ಯಮಂತ್ರಿ ಸಿದ್ದರಾಮಯ್ಯನವರು ತಮ್ಮ ಮೊದಲ ಅವಧಿಯ ಆಡಳಿತದಲ್ಲೇ ಮೈಸೂರಿನಲ್ಲಿ ಚಲನಚಿತ್ರ ನಗರಿ ನಿರ್ಮಿಸುವುದಾಗಿ ಘೋಷಿಸಿದ್ದರು. ಆದರೆ ತದನಂತರದ ದಿನಗಳಲ್ಲಿ ಸ್ಥಳ ಆಯ್ಕೆಯ ಗೊಂದಲ ಹಾಗೂ ನಾನಾ ಕಾರಣಗಳಿಂದಾಗಿ ಈ ಯೋಜನೆ ಸರಿ ಸುಮಾರು ಹತ್ತು ವರ್ಷಗಳ ಕಾಲ ನೆನೆಗುದಿಗೆ ಬಿದ್ದಿತ್ತು. ಇದೀಗ ಸಿಎಂ ಸಿದ್ದರಾಮಯ್ಯ ಅವರು ತಮ್ಮ ಎರಡನೇ ಅವಧಿಯ ಬಜೆಟ್‌ಗಳಲ್ಲಿ ಹಮ್ಮಿಕೊಂಡಿದ್ದ ಯೋಜನೆಯಂತೆ, ಸಂಪುಟದ ಒಪ್ಪಿಗೆ ಪಡೆಯುವ ಮೂಲಕ ಈ ಬೃಹತ್ ಕನಸಿನ ಯೋಜನೆಗೆ ಮರುಜೀವ ನೀಡಿದ್ದಾರೆ.
ಸುಮಾರು 160.8 ಎಕರೆ ವಿಶಾಲವಾದ ಜಾಗದಲ್ಲಿ ಸಾರ್ವಜನಿಕ-ಖಾಸಗಿ ಸಹಭಾಗಿತ್ವದ (PPP - Public Private Partnership) ಅಡಿಯಲ್ಲಿ ಈ ಫಿಲ್ಮ್ ಸಿಟಿ ರೂಪುಗೊಳ್ಳಲಿದೆ. ಇದರಲ್ಲಿ ಪ್ರಮುಖವಾಗಿ 1.27 ಲಕ್ಷ ಚದರ ಮೀಟರ್ ವ್ಯಾಪ್ತಿಯ ಪ್ರದೇಶದಲ್ಲಿ ಚಲನಚಿತ್ರ ನಿರ್ಮಾಣಕ್ಕೆ ಅಗತ್ಯವಿರುವ ಸಕಲ ಸೌಕರ್ಯಗಳನ್ನು ಒದಗಿಸಲಾಗುತ್ತದೆ. ಆಧುನಿಕ ಮಲ್ಟಿಪ್ಲೆಕ್ಸ್, ಆಕರ್ಷಕ ಥೀಮ್ ಪಾರ್ಕ್, ಒಳಾಂಗಣ ಮತ್ತು ಹೊರಾಂಗಣ ಚಿತ್ರೀಕರಣದ ಸೆಟ್‌ಗಳು, ಅತ್ಯಾಧುನಿಕ ಪೋಸ್ಟ್ ಪ್ರೊಡಕ್ಷನ್ ಹಾಗೂ ವಿಎಫ್‌ಎಕ್ಸ್ (VFX) ತಂತ್ರಜ್ಞಾನದ ಕೇಂದ್ರಗಳು ಇಲ್ಲಿ ಬರಲಿವೆ.
ಕೇವಲ ಚಿತ್ರೀಕರಣ ಮಾತ್ರವಲ್ಲದೆ ಚಲನಚಿತ್ರ ರಂಗದ ಸಮಗ್ರ ಬೆಳವಣಿಗೆಗೆ ಪೂರಕವಾಗುವಂತೆ 51,230 ಚದರ ಮೀಟರ್ ವ್ಯಾಪ್ತಿಯಲ್ಲಿ ಇತರೆ ಪ್ರಮುಖ ಸೌಲಭ್ಯಗಳನ್ನು ಅಭಿವೃದ್ಧಿಪಡಿಸಲಾಗುತ್ತದೆ. ಇದರಲ್ಲಿ ಸಿನಿಮಾ ಆಸಕ್ತರಿಗಾಗಿ ಫಿಲ್ಮ್ ಸ್ಕೂಲ್ ಮತ್ತು ತರಬೇತಿ ಸಂಸ್ಥೆ (Training Institute), ಸಿನಿಮಾ ಇತಿಹಾಸದ ಮ್ಯೂಸಿಯಂ ಹಾಗೂ ಆರ್ಟ್ ಗ್ಯಾಲರಿ, ಫಿಟ್‌ನೆಸ್ ಸೆಂಟರ್ ಮತ್ತು ಬೃಹತ್ ಸಮ್ಮೇಳನ ಸಭಾಂಗಣಗಳು (Conference Halls) ಒಳಗೊಂಡಿರಲಿವೆ.
ಮೊದಲಿಗೆ ನಂಜನಗೂಡಿನ ಇಮ್ಮಾವು ಪ್ರದೇಶವನ್ನು ಆಯ್ಕೆ ಮಾಡಲಾಗಿದ್ದರೂ, ಮಧ್ಯಂತರದಲ್ಲಿ ರಾಮನಗರ, ಬೆಂಗಳೂರು ಹಾಗೂ ರೋರಿಚ್-ದೇವಿಕಾ ರಾಣಿ ಎಸ್ಟೇಟ್ ಸೇರಿದಂತೆ ಹಲವು ಪರ್ಯಾಯ ಸ್ಥಳಗಳ ಹೆಸರುಗಳು ಚರ್ಚೆಗೆ ಬಂದಿದ್ದವು. ಆದರೆ ಕೊನೆಗೂ ಸಿದ್ದರಾಮಯ್ಯ ಸರ್ಕಾರವು ಮೈಸೂರಿನ ಇಮ್ಮಾವು ಪ್ರದೇಶವನ್ನೇ ಅಂತಿಮಗೊಳಿಸಿ, ಯೋಜನೆಗೆ ಅನುಮೋದನೆ ನೀಡುವ ಮೂಲಕ ದಶಕದ ಸುದೀರ್ಘ ಗೊಂದಲಕ್ಕೆ ಪೂರ್ಣವಿರಾಮ ಇಟ್ಟಿದೆ.
