ನ್ಯೂಯಾರ್ಕ್: ವಿಶ್ವದ ಪ್ರಮುಖ ಚಿಪ್ ತಯಾರಿಕಾ ಕಂಪನಿ ಹಾಗೂ ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನ ಕ್ಷೇತ್ರದ ದೈತ್ಯ ಸಂಸ್ಥೆ ಎನ್ವಿಡಿಯಾ (Nvidia) ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಜೆನ್ಸನ್ ಹುವಾಂಗ್ ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದಾರೆ. ನವೆಂಬರ್ 12ರಂದು ಕಂಪನಿಯ ನಿರ್ದೇಶಕರ ಮಂಡಳಿ ಈ ನಿರ್ಧಾರವನ್ನು ಅಧಿಕೃತವಾಗಿ ಪ್ರಕಟಿಸಿದ್ದು, ತಕ್ಷಣದಿಂದಲೇ ರಾಜೀನಾಮೆ ಜಾರಿಗೆ ಬಂದಿದೆ.
ಕಳೆದ ಕೆಲವು ದಿನಗಳಿಂದ ಅವರ ವೈಯಕ್ತಿಕ ಜೀವನಕ್ಕೆ ಸಂಬಂಧಿಸಿದ ವಿವಾದಗಳು ಮತ್ತು ಚೀನಾದ ಗುಪ್ತಚರ ಚಟುವಟಿಕೆಗಳ ಕುರಿತ ಶಂಕೆಗಳು ಕಂಪನಿಯ ಮೇಲೆ ಒತ್ತಡ ಸೃಷ್ಟಿಸಿದ್ದವು. ಈ ಬೆಳವಣಿಗೆಗಳ ಬೆನ್ನಲ್ಲೇ ಹುವಾಂಗ್ ಅವರ ನಿರ್ಗಮನ ಜಾಗತಿಕ ತಂತ್ರಜ್ಞಾನ ವಲಯದಲ್ಲಿ ಭಾರಿ ಚರ್ಚೆಗೆ ಕಾರಣವಾಗಿದೆ.
ಮಧ್ಯಂತರ ಸಿಇಒ ಆಗಿ ಕೋಲೆಟ್ ಕ್ರೆಸ್ ನೇಮಕ
ಜೆನ್ಸನ್ ಹುವಾಂಗ್ ಅವರ ರಾಜೀನಾಮೆಯ ನಂತರ ಕಂಪನಿಯ ಮುಖ್ಯ ಹಣಕಾಸು ಅಧಿಕಾರಿ (CFO) ಕೋಲೆಟ್ ಕ್ರೆಸ್ ಅವರನ್ನು ಮಧ್ಯಂತರ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿಯಾಗಿ ನೇಮಕ ಮಾಡಲಾಗಿದೆ.
ಹೊಸ ಪೂರ್ಣಾವಧಿ ಸಿಇಒ ಆಯ್ಕೆಯಾಗುವವರೆಗೆ ಅವರು ಈ ಜವಾಬ್ದಾರಿ ನಿರ್ವಹಿಸಲಿದ್ದಾರೆ. ಶಾಶ್ವತ ಉತ್ತರಾಧಿಕಾರಿಯನ್ನು ಆಯ್ಕೆ ಮಾಡಲು ಆಂತರಿಕ ಮತ್ತು ಬಾಹ್ಯ ಅಭ್ಯರ್ಥಿಗಳನ್ನು ಪರಿಗಣಿಸುವುದಾಗಿ ನಿರ್ದೇಶಕರ ಮಂಡಳಿ ತಿಳಿಸಿದೆ.
ಎನ್ವಿಡಿಯಾ ಮಂಡಳಿಯ ಪ್ರಕಟಣೆಯಲ್ಲಿ ಹುವಾಂಗ್ ಅವರ ಕೊಡುಗೆಯನ್ನು ಶ್ಲಾಘಿಸಲಾಗಿದ್ದು, ಕಂಪನಿ ಮತ್ತು ಉದ್ಯಮದ ಬೆಳವಣಿಗೆಗೆ ಅವರು ನೀಡಿದ ಸೇವೆಯನ್ನು ಸ್ಮರಿಸಲಾಗಿದೆ.
ಚೀನಾದ ಶಂಕಿತ ಗೂಢಚಾರಿಣಿ ಜೊತೆ ಸಂಬಂಧದ ಆರೋಪ
ಈ ವಿವಾದದ ಪ್ರಮುಖ ಅಂಶವೆಂದರೆ ಆಲಿಸ್ ಹುವಾಂಗ್ ಎಂಬ ಚೀನಾದ ಉದ್ಯಮಿಯೊಂದಿಗಿನ ಜೆನ್ಸನ್ ಹುವಾಂಗ್ ಅವರ ಸಂಬಂಧ. ಆಲಿಸ್ ಹುವಾಂಗ್ ಅವರು ಸಿಂಗಾಪುರ ಮೂಲದ ಮೆಗಾಸ್ಪೀಡ್ ಎಂಬ ಡೇಟಾ ಸೆಂಟರ್ ಸಂಸ್ಥೆಯೊಂದಿಗೆ ಸಂಬಂಧ ಹೊಂದಿದ್ದಾರೆ.
ಅಮೆರಿಕದ ಗುಪ್ತಚರ ಸಂಸ್ಥೆಗಳು ಆಲಿಸ್ ಹುವಾಂಗ್ ಅವರು ಚೀನಾದ ಪರವಾಗಿ ಕಾರ್ಯನಿರ್ವಹಿಸುತ್ತಿರುವ ಶಂಕಿತ ವ್ಯಕ್ತಿಯಾಗಿರಬಹುದು ಎಂದು ಪರಿಶೀಲಿಸುತ್ತಿವೆ ಎಂಬ ವರದಿಗಳು ಪ್ರಕಟವಾಗಿದ್ದವು. ಆದರೆ ಈ ಆರೋಪಗಳು ಇನ್ನೂ ದೃಢಪಟ್ಟಿಲ್ಲ. ಜೆನ್ಸನ್ ಹುವಾಂಗ್ ಅವರಿಗೆ ಆಕೆ ಚೀನಾ ಸರ್ಕಾರದ ಪರವಾಗಿ ಕಾರ್ಯನಿರ್ವಹಿಸುತ್ತಿದ್ದಾಳೆ ಎಂಬ ಅರಿವು ಇರಲಿಲ್ಲ ಎಂದು ವರದಿಯಾಗಿದೆ.
ಈ ಸಂಬಂಧದ ಕುರಿತು ತನಿಖೆ ನಡೆಸಲು ಎನ್ವಿಡಿಯಾ ಮಂಡಳಿ ಪ್ರಮುಖ ಅಮೆರಿಕದ ಕಾನೂನು ಸಂಸ್ಥೆಯೊಂದನ್ನು ನೇಮಿಸಿತ್ತು. ಕಂಪನಿಯ ಗೌಪ್ಯ ತಂತ್ರಜ್ಞಾನ ಮತ್ತು ಎಐ ಚಿಪ್‌ಗಳಿಗೆ ಸಂಬಂಧಿಸಿದ ಮಾಹಿತಿಯ ಭದ್ರತೆಯ ಬಗ್ಗೆಯೂ ಆತಂಕ ವ್ಯಕ್ತವಾಗಿತ್ತು.
ಕಂಪನಿಯ ಉದ್ಯೋಗಿಯೊಂದಿಗೂ ಸಂಬಂಧದ ಆರೋಪ
ಇದರ ಬೆನ್ನಲ್ಲೇ ಜೆನ್ಸನ್ ಹುವಾಂಗ್ ಅವರು ಎನ್‌ವಿಡಿಯಾದ ಆರೋಗ್ಯ ವಿಭಾಗದ ಉಪಾಧ್ಯಕ್ಷೆ ಕಿಂಬರ್ಲಿ ಪೊವೆಲ್ ಅವರೊಂದಿಗೂ ವಿವಾಹೇತರ ಸಂಬಂಧ ಹೊಂದಿದ್ದರು ಎಂಬ ಮತ್ತೊಂದು ವರದಿಯನ್ನು ನ್ಯೂಯಾರ್ಕ್ ಟೈಮ್ಸ್ ಪ್ರಕಟಿಸಿತ್ತು.
ಈ ಎರಡು ಬೆಳವಣಿಗೆಗಳು ಕಂಪನಿಯ ನಿರ್ದೇಶಕರ ಮಂಡಳಿಯ ಮೇಲೆ ಮತ್ತಷ್ಟು ಒತ್ತಡ ಉಂಟುಮಾಡಿದವು. ಹುವಾಂಗ್ ಅವರು ತಮ್ಮ ಪತ್ನಿಗೆ ನಿಷ್ಠರಾಗಿರಲಿಲ್ಲ ಎಂಬುದನ್ನು ಕಂಪನಿಯ ಉದ್ಯೋಗಿಗಳಿಗೆ ಕಳುಹಿಸಿದ ಸಂದೇಶದಲ್ಲಿ ಒಪ್ಪಿಕೊಂಡು ಕ್ಷಮೆಯಾಚಿಸಿದ್ದರು ಎಂದು ವರದಿಯಾಗಿದೆ.
ಷೇರು ಮಾರುಕಟ್ಟೆಯಲ್ಲೂ ಕಂಪನಿಗೆ ಹೊಡೆತ
ಜೆನ್ಸನ್ ಹುವಾಂಗ್ ಅವರ ಸುತ್ತಲಿನ ವಿವಾದಗಳು ಎನ್ವಿಡಿಯಾ ಷೇರುಗಳ ಮೇಲೂ ಪರಿಣಾಮ ಬೀರಿವೆ. ಕೆಲವೇ ದಿನಗಳಲ್ಲಿ ಕಂಪನಿಯ ಷೇರು ಮೌಲ್ಯದಲ್ಲಿ ಗಣನೀಯ ಕುಸಿತ ಕಂಡುಬಂದಿದೆ. ಗುರುವಾರದ ವಹಿವಾಟಿನ ಪೂರ್ವದಲ್ಲಿ ಷೇರುಗಳು ಸುಮಾರು ಶೇ.7ರಷ್ಟು ಕುಸಿದಿದ್ದವು ಎಂದು ವರದಿಯಾಗಿದೆ.
ಹುವಾಂಗ್ ಅವರ ವೈಯಕ್ತಿಕ ಸಂಪತ್ತು ಸುಮಾರು 145 ಬಿಲಿಯನ್ ಡಾಲರ್ ಎಂದು ಅಂದಾಜಿಸಲಾಗಿದ್ದು, ಅವರು ವಿಶ್ವದ ಶ್ರೀಮಂತ ಉದ್ಯಮಿಗಳಲ್ಲಿ ಒಬ್ಬರಾಗಿದ್ದಾರೆ. ಎನ್ವಿಡಿಯಾ ಕಂಪನಿಯ ಮಾರುಕಟ್ಟೆ ಮೌಲ್ಯ 4 ಟ್ರಿಲಿಯನ್ ಡಾಲರ್‌ಗಿಂತ ಹೆಚ್ಚಿದೆ.
ಎಐ ಕ್ರಾಂತಿಯ ಹಿಂದಿನ ಪ್ರಮುಖ ವ್ಯಕ್ತಿ
ಜೆನ್ಸನ್ ಹುವಾಂಗ್ 1993ರಲ್ಲಿ ಎನ್ವಿಡಿಯಾ ಕಂಪನಿಯನ್ನು ಸಹ-ಸ್ಥಾಪಿಸಿದ್ದರು. ಕಂಪನಿಯು ಆರಂಭದಲ್ಲಿ ಗೇಮಿಂಗ್‌ಗಾಗಿ ಗ್ರಾಫಿಕ್ಸ್ ಚಿಪ್ ಗಳನ್ನು ತಯಾರಿಸುತ್ತಿತ್ತು. ನಂತರ ಕೃತಕ ಬುದ್ಧಿಮತ್ತೆ ಕ್ಷೇತ್ರಕ್ಕೆ ಅಗತ್ಯವಿರುವ ಅತ್ಯಾಧುನಿಕ ಸೆಮಿಕಂಡಕ್ಟರ್‌ ಗಳ ಪ್ರಮುಖ ಪೂರೈಕೆದಾರನಾಗಿ ಬೆಳೆದಿದೆ.
ಇಂದು ಜಗತ್ತಿನ ಪ್ರಮುಖ ಎಐ ಕಂಪನಿಗಳು ತಮ್ಮ ಕೃತಕ ಬುದ್ಧಿಮತ್ತೆ ಮಾದರಿಗಳಿಗೆ ತರಬೇತಿ ನೀಡಲು ಎನ್‌ವಿಡಿಯಾದ ಚಿಪ್ ಗಳನ್ನು ಅವಲಂಬಿಸಿವೆ. ಹೀಗಾಗಿ ಹುವಾಂಗ್ ಅವರ ನಿರ್ಗಮನ ಕೇವಲ ಒಂದು ಕಂಪನಿಯ ನಾಯಕತ್ವ ಬದಲಾವಣೆಯಲ್ಲ, ಜಾಗತಿಕ ಎಐ ಉದ್ಯಮದ ಮೇಲೆಯೂ ಪರಿಣಾಮ ಬೀರಬಹುದಾದ ಬೆಳವಣಿಗೆಯಾಗಿದೆ.
ಅಮೆರಿಕ ಮತ್ತು ಚೀನಾ ನಡುವಿನ ತಂತ್ರಜ್ಞಾನ ಸ್ಪರ್ಧೆ ತೀವ್ರವಾಗಿರುವ ಸಂದರ್ಭದಲ್ಲಿ ಈ ಬೆಳವಣಿಗೆ ನಡೆದಿರುವುದು ಮತ್ತಷ್ಟು ಕುತೂಹಲ ಮೂಡಿಸಿದೆ. ಇದೀಗ ಹೊಸ ಸಿಇಒ ನೇಮಕ, ಕಂಪನಿಯ ಆಡಳಿತ ವ್ಯವಸ್ಥೆ ಮತ್ತು ಎಐ ಚಿಪ್ ಮಾರುಕಟ್ಟೆಯ ಮುಂದಿನ ಬೆಳವಣಿಗೆಗಳ ಮೇಲೆ ಜಾಗತಿಕ ಉದ್ಯಮ ವಲಯದ ಗಮನ ನೆಟ್ಟಿದೆ.
Disclaimer: ಈ ವರದಿಯು ಮಾಧ್ಯಮ ವರದಿಗಳನ್ನು ಆಧರಿಸಿದೆ. ವೈಯಕ್ತಿಕ ಸಂಬಂಧ ಮತ್ತು ಗೂಢಚಾರಿಕೆ ಕುರಿತ ಕೆಲವು ಅಂಶಗಳು ಮಾಧ್ಯಮ ವರದಿಗಳಲ್ಲಿರುವ ಆರೋಪಗಳಾಗಿದ್ದು, ಅವುಗಳನ್ನು ದೃಢಪಟ್ಟ ಸತ್ಯವೆಂದು ಪರಿಗಣಿಸಬಾರದು.
