ಶಿಕ್ಷಣ ಸಚಿವ ಧರ್ಮೇಂದ್ರ ಪ್ರಧಾನ್ ರಾಜೀನಾಮೆಗೆ ಪಟ್ಟು ಹಿಡಿದು ಹೋರಾಟ ನಡೆಸಿ ಸುದ್ದಿಯಾಗಿದ್ದ ‘ಕಾಕರೂಚ್ ಜನತಾ ಪಾರ್ಟಿ’ (ಸಿಜೆಪಿ) ಸಂಸ್ಥಾಪಕ ಅಭೀಜಿತ್ ದೀಪ್ಕೆ, ಈಗ ಮುಖ್ಯ ಚುನಾವಣೆ ಆಯುಕ್ತ ಜ್ಞಾನೇಶ್ ಕುಮಾರ್ ಅವರ ರಾಜೀನಾಮೆಗೆ ಆಗ್ರಹಿಸಿ ‘ಜೈಲ್ ಭರೋ ಆಂದೋಲನ’ಕ್ಕೆ ಕರೆ ನೀಡಿದ್ದಾರೆ. ಮುಂಬೈನ ಶಿವಾಜಿ ಪಾರ್ಕ್‌ನಲ್ಲಿ ಪ್ರತಿಭಟನೆ ನಡೆಸುವ ಮುನ್ನ ಬಾಂದ್ರಾ ರಸ್ತೆಯಲ್ಲಿ ಅವರು ನಡೆಸಿದ ಸಂಚಾರ ಹಾಗೂ ಅವರ ಅಭಿಮಾನಿಯೊಬ್ಬರು ಆಡಿದ ಮಾತುಗಳು ಈಗ ಸಾಮಾಜಿಕ ಜಾಲತಾಣದಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿವೆ.
ಶಾರುಖ್ ಖಾನ್ ನಿವಾಸದ ಬಳಿ ನಡೆದ ಪ್ರಸಂಗ
ಬಾಲಿವುಡ್ ನಟ ಶಾರುಖ್ ಖಾನ್ ಅವರ ದೊಡ್ಡ ಅಭಿಮಾನಿಯಾಗಿರುವ ಅಭೀಜಿತ್ ದೀಪ್ಕೆ, ಶಾರುಖ್ ಅವರ ನಿವಾಸ ‘ಮನ್ನತ್’ ಇರುವ ಬಾಂದ್ರಾ ಬಾಂಡ್‌ಸ್ಟ್ಯಾಂಡ್ ಪ್ರದೇಶದಲ್ಲಿ ಸಂಚರಿಸುತ್ತಿದ್ದರು. ಈ ವೇಳೆ ಕಾರಿನಲ್ಲಿ ತೆರಳುತ್ತಿದ್ದ ಯುವ ಅಭಿಮಾನಿಯೊಬ್ಬರು ಅಭೀಜಿತ್ ಅವರನ್ನು ಗುರುತಿಸಿ, ವಾಹನವನ್ನು ಪಕ್ಕಕ್ಕೆ ನಿಲ್ಲಿಸಿ ಮಾತನಾಡಿಸಿದ್ದಾರೆ. ವಿದ್ಯಾರ್ಥಿಗಳ ಪರವಾಗಿ ಹೋರಾಟ ನಡೆಸುತ್ತಿರುವುದಕ್ಕೆ ಅಭೀಜಿತ್ ಅವರಿಗೆ ಧನ್ಯವಾದ ತಿಳಿಸಿದ ಆ ಯುವತಿ, ಜ್ಞಾನೇಶ್ ಕುಮಾರ್ ವಿರುದ್ಧದ ಪ್ರತಿಭಟನೆಯಲ್ಲೂ ಭಾಗವಹಿಸುವುದಾಗಿ ತಿಳಿಸಿದರು.
ಈ ಸಂಭಾಷಣೆಯ ವೇಳೆ ಆ ಯುವತಿಯು, “ಇಲ್ಲಿ ಯಾರೂ ಶಾರುಖ್ ಖಾನ್ ಅವರನ್ನು ನೋಡುತ್ತಿಲ್ಲ, ಎಲ್ಲರೂ ನಿಮ್ಮನ್ನೇ ನೋಡುತ್ತಿದ್ದಾರೆ” ಎಂದು ಹೇಳಿದರು. ಈ ಮಾತಿಗೆ ಅಭೀಜಿತ್ ಅವರು ವಿನಮ್ರವಾಗಿ ನಗುತ್ತಾ, ತಾನೂ ಕೂಡ ಶಾರುಖ್ ಅವರ ದೊಡ್ಡ ಅಭಿಮಾನಿ ಎಂದು ಒಪ್ಪಿಕೊಂಡರು. ಈ ವೀಡಿಯೋವನ್ನು ಅಭೀಜಿತ್ ಅವರ ತಂಡ ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದು, ಭಾರಿ ವೈರಲ್ ಆಗಿದೆ.
ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಕ್ತವಾದ ಆಕ್ರೋಶ ಹಾಗೂ ಟೀಕೆಗಳು
ಈ ವೀಡಿಯೋ ವೈರಲ್ ಆಗುತ್ತಿದ್ದಂತೆ ನೆಟ್ಟಿಗರಿಂದ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಅಭೀಜಿತ್ ಬೆಂಬಲಿಗರು ಈ ಮಾತನ್ನು ಹೆಮ್ಮೆಯಿಂದ ಹಂಚಿಕೊಳ್ಳುತ್ತಿದ್ದರೆ, ಬಹುತೇಕ ನೆಟ್ಟಿಗರು ಇದನ್ನು “ಸ್ಕ್ರಿಪ್ಟೆಡ್ ಪ್ರಚಾರ ತಂತ್ರ” ಎಂದು ಕರೆದಿದ್ದಾರೆ.
“ತುಂಬಾ ಚನ್ನಾಗಿ ಸ್ಕ್ರಿಪ್ಟ್ ಬರೆದಿದ್ದೀರಿ, ಇಂತಹ ಆಕಸ್ಮಿಕ ಘಟನೆಗಳು ನಡೆದಾಗಲೆಲ್ಲಾ ಇವರ ಜೊತೆ ಕ್ಯಾಮೆರಾ ಮತ್ತು ತಂಡ ಹೇಗೆ ಇರುತ್ತದೆ?” ಎಂದು ಬಳಕೆದಾರರೊಬ್ಬರು ಪ್ರಶ್ನಿಸಿದ್ದಾರೆ. ಮತ್ತೊಬ್ಬರು “ಇದು ತೀರಾ ಹೆಚ್ಚಾಯಿತು, ಮೂರ್ಖತನ” ಎಂದು ಕಮೆಂಟ್ ಮಾಡಿದ್ದಾರೆ. ಇನ್ನು ಕೆಲವರು, “ಶಾರುಖ್ ಖಾನ್ ಜೊತೆ ಹೋಲಿಕೆ ಮಾಡುತ್ತಿದ್ದೀರಾ? ಕಣ್ಣು ಕಾಣಿಸುವುದಿಲ್ಲವೇ?” ಎಂದು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
