ಲಂಡನ್: ಇತ್ತೀಚಿನ ದಿನಗಳಲ್ಲಿ ಮಕ್ಕಳು ತಂತ್ರಜ್ಞಾನಕ್ಕೆ ಎಷ್ಟರಮಟ್ಟಿಗೆ ಒಗ್ಗಿಕೊಂಡಿದ್ದಾರೆ ಎಂದರೆ, ನಿಯಮಗಳನ್ನು ರೂಪಿಸುವ ಸರ್ಕಾರಗಳನ್ನೇ ಕಕ್ಕಾಬಿಕ್ಕಿಯಾಗಿಸುವಂತಹ ಉಪಾಯಗಳನ್ನು ಕಂಡುಕೊಳ್ಳುತ್ತಿದ್ದಾರೆ. ಬ್ರಿಟನ್ನಲ್ಲಿ ಸಾಮಾಜಿಕ ಜಾಲತಾಣಗಳನ್ನು ಬಳಸಲು ಇರುವ ವಯಸ್ಸಿನ ಮಿತಿಯನ್ನು ತಪ್ಪಿಸಲು ಮಕ್ಕಳು ಈಗ ಮೇಕಪ್ ಮೊರೆ ಹೋಗುತ್ತಿರುವುದು ಹೊಸ ಸಂಚಲನ ಮೂಡಿಸಿದೆ.
ಬ್ರಿಟನ್ನ ಆನ್ಲೈನ್ ಸುರಕ್ಷತಾ ಸಂಸ್ಥೆಯಾದ ಇಂಟರ್ನೆಟ್ ಮ್ಯಾಟರ್ಸ್ ಇತ್ತೀಚೆಗೆ ನಡೆಸಿದ ಅಧ್ಯಯನದ ಪ್ರಕಾರ, ಕಿರಿಯ ವಯಸ್ಸಿನ ಮಕ್ಕಳು ಸೋಶಿಯಲ್ ಮೀಡಿಯಾ ಮತ್ತು ಗೇಮಿಂಗ್ ಪ್ಲಾಟ್ಫಾರ್ಮ್ಗಳ ವಯಸ್ಸಿನ ಮಿತಿಯನ್ನು ಮೀರಲು ನಕಲಿ ಮೀಸೆಗಳನ್ನು ಬರೆದುಕೊಳ್ಳುತ್ತಿದ್ದಾರೆ. ಆನ್ಲೈನ್ ಏಜ್ ಗೇಟ್ ಸೆಕ್ಯೂರಿಟಿ ಸಿಸ್ಟಮ್ಗಳಲ್ಲಿ ತಮ್ಮ ಮುಖವನ್ನು ಹಿರಿಯರಂತೆ ತೋರಿಸಲು ಐಬ್ರೋ ಪೆನ್ಸಿಲ್ಗಳನ್ನು ಬಳಸಿ ಮೀಸೆ ಬರೆಯುವ ಮೂಲಕ ತಂತ್ರಜ್ಞಾನವನ್ನು ವಂಚಿಸುತ್ತಿದ್ದಾರೆ.
ಬ್ರಿಟನ್ನ ಆನ್ಲೈನ್ ಸುರಕ್ಷತಾ ಕಾಯ್ದೆಯಡಿ ಹಾನಿಕಾರಕ ವಿಷಯಗಳಿಂದ ಮಕ್ಕಳನ್ನು ರಕ್ಷಿಸಲು ವಯಸ್ಸಿನ ಪರಿಶೀಲನೆಯನ್ನು ಕಡ್ಡಾಯಗೊಳಿಸಲಾಗಿದೆ. ಸಾಮಾನ್ಯವಾಗಿ ಸಾಮಾಜಿಕ ಜಾಲತಾಣಗಳನ್ನು ಬಳಸಲು ಕನಿಷ್ಠ 13 ವರ್ಷ ಹಾಗೂ ಕೆಲವು ನಿರ್ದಿಷ್ಟ ತಾಣಗಳನ್ನು ಬಳಸಲು 18 ವರ್ಷ ತುಂಬಿರಬೇಕಾಗುತ್ತದೆ. ಆದರೆ ಸುಮಾರು ಒಂದು ಸಾವಿರ ಮಕ್ಕಳನ್ನು ಒಳಗೊಂಡ ಈ ಸಮೀಕ್ಷೆಯಲ್ಲಿ, ಮೂರನೇ ಒಂದು ಭಾಗದಷ್ಟು ಮಕ್ಕಳು ಇಂತಹ ಭದ್ರತಾ ವ್ಯವಸ್ಥೆಯನ್ನು ಯಶಸ್ವಿಯಾಗಿ ದಾಟುತ್ತಿರುವುದು ತಿಳಿದುಬಂದಿದೆ.
ಸಮೀಕ್ಷೆಯಲ್ಲಿ ಪಾಲ್ಗೊಂಡ ಶೇಕಡಾ 46 ರಷ್ಟು ಮಕ್ಕಳು ವಯಸ್ಸಿನ ಪರಿಶೀಲನೆಯನ್ನು ಸುಲಭವಾಗಿ ತಪ್ಪಿಸಬಹುದು ಎಂದು ನಂಬಿದ್ದಾರೆ. ಇನ್ನು ಶೇಕಡಾ 32 ರಷ್ಟು ಮಕ್ಕಳು ಈಗಾಗಲೇ ಇಂತಹ ಹಾದಿ ಹಿಡಿದಿರುವುದಾಗಿ ಒಪ್ಪಿಕೊಂಡಿದ್ದಾರೆ. ಒಬ್ಬ ಪೋಷಕರು ನೀಡಿದ ಮಾಹಿತಿಯ ಪ್ರಕಾರ, ಅವರ 12 ವರ್ಷದ ಮಗ ಮುಖದ ಮೇಲೆ ಮೀಸೆ ಬರೆದುಕೊಳ್ಳುವ ಮೂಲಕ ಆನ್ಲೈನ್ ಸಿಸ್ಟಮ್ನಲ್ಲಿ ತನ್ನ ವಯಸ್ಸು 15 ವರ್ಷ ಎಂದು ದಾಖಲಾಗುವಂತೆ ಮಾಡುವಲ್ಲಿ ಯಶಸ್ವಿಯಾಗಿದ್ದಾನಂತೆ.
ಕೇವಲ ವಯಸ್ಸನ್ನು ಮರೆಮಾಚುವುದು ಮಾತ್ರವಲ್ಲದೆ, ಇಂತಹ ಕೃತ್ಯಗಳಿಂದಾಗಿ ಮಕ್ಕಳು ಅಪಾಯಕಾರಿ ವಿಷಯಗಳಿಗೆ ತೆರೆದುಕೊಳ್ಳುತ್ತಿರುವುದು ಆತಂಕಕ್ಕೆ ಕಾರಣವಾಗಿದೆ. ಸುಮಾರು ಶೇಕಡಾ 49 ರಷ್ಟು ಮಕ್ಕಳು ಇತ್ತೀಚಿನ ದಿನಗಳಲ್ಲಿ ಆನ್ಲೈನ್ನಲ್ಲಿ ಹಾನಿಕಾರಕ ಅಂಶಗಳನ್ನು ಎದುರಿಸುತ್ತಿರುವುದಾಗಿ ತಿಳಿಸಿದ್ದಾರೆ.
ಈ ಬೆಳವಣಿಗೆಯ ಬೆನ್ನಲ್ಲೇ ಬ್ರಿಟನ್ ಸರ್ಕಾರವು ಕಠಿಣ ಕ್ರಮಕ್ಕೆ ಮುಂದಾಗಿದ್ದು, 16 ವರ್ಷದೊಳಗಿನ ಮಕ್ಕಳಿಗೆ ಸಾಮಾಜಿಕ ಜಾಲತಾಣಗಳನ್ನು ಸಂಪೂರ್ಣವಾಗಿ ನಿಷೇಧಿಸುವ ಬಗ್ಗೆ ಆಸ್ಟ್ರೇಲಿಯಾ ಮಾದರಿಯ ಕಾನೂನು ತರುವ ಕುರಿತು ಚಿಂತಿಸುತ್ತಿದೆ. ಲೇಬರ್ ಪಾರ್ಟಿ ಮತ್ತು ಕನ್ಸರ್ವೇಟಿವ್ ಪಾರ್ಟಿಯ ಹಲವು ಸಂಸದರು ಇದಕ್ಕೆ ಬೆಂಬಲ ಸೂಚಿಸಿದ್ದಾರೆ. ಅತಿಯಾದ ವ್ಯಸನಕ್ಕೆ ಕಾರಣವಾಗುವ ಇನ್ಫೈನೈಟ್ ಸ್ಕ್ರೋಲಿಂಗ್ ಮತ್ತು ಆಟೋ ಪ್ಲೇಗಳಂತಹ ಫೀಚರ್ಗಳ ಮೇಲೂ ನಿರ್ಬಂಧ ಹೇರುವ ಕುರಿತು ಸಮಾಲೋಚನೆಗಳು ನಡೆಯುತ್ತಿವೆ.
