ಮುಂಬೈ: ಬಾಲಿವುಡ್‌ನ ಗ್ಲಾಮರಸ್ ನಟಿ ದಿಶಾ ಪಟಾನಿ ಈಗ ಅಂತರಾಷ್ಟ್ರೀಯ ಮಟ್ಟದಲ್ಲಿ ಮಿಂಚಲು ಸಜ್ಜಾಗಿದ್ದಾರೆ. ಅವರ ಬಹುನಿರೀಕ್ಷಿತ ಹಾಲಿವುಡ್ ಚೊಚ್ಚಲ ಚಿತ್ರ ‘ದಿ ಪೋರ್ಟಲ್ ಆಫ್ ಫೋರ್ಸ್’ (The Portal of Force) ಸಿನಿಮಾದ ಟ್ರೈಲರ್ ಶುಕ್ರವಾರ ಬಿಡುಗಡೆಯಾಗಿದ್ದು, ಸಿನಿರಸಿಕರ ಗಮನ ಸೆಳೆಯುತ್ತಿದೆ. ಇದು ಒಂದು ಸುಪರ್ ನ್ಯಾಚುರಲ್ ಆಕ್ಷನ್-ಥ್ರಿಲ್ಲರ್ ಚಿತ್ರವಾಗಿದ್ದು, ದಿಶಾ ಅವರು ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ.
ಈ ಚಿತ್ರದಲ್ಲಿ ದಿಶಾ ಪಟಾನಿ ಅವರು ಕೆವಿನ್ ಸ್ಪೇಸಿ, ಟೈರಿಸ್ ಗಿಬ್ಸನ್ ಮತ್ತು ಡಾಲ್ಫ್ ಲುಂಡ್‌ಗ್ರೆನ್ ಅವರಂತಹ ಘಟಾನುಘಟಿ ಹಾಲಿವುಡ್ ನಟರೊಂದಿಗೆ ತೆರೆ ಹಂಚಿಕೊಂಡಿದ್ದಾರೆ. ಲಾಡೋ ಒಖೋಟ್ನಿಕೋವ್ ಸೃಷ್ಟಿಸಿರುವ ‘ಸ್ಟಾಟಿಗಾರ್ಡ್ಸ್ ವರ್ಸಸ್ ಹೊಲಿಗಾರ್ಡ್ಸ್’ ಎಂಬ ಹೊಸ ಸಿನಿಮಾ ಜಗತ್ತಿನ ಮೊದಲ ಭಾಗ ಇದಾಗಿದೆ. ಟ್ರೈಲರ್‌ನಲ್ಲಿ ದಿಶಾ ಅವರು ‘ಜೆಸ್ಸಿಕಾ’ ಎಂಬ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದು, ಎರಡು ಪುರಾತನ ಶಕ್ತಿಗಳ ನಡುವಿನ ಸಂಘರ್ಷದಲ್ಲಿ ಸಿಲುಕುವ ‘ದಿ ಚೋಸನ್ ಒನ್’ (ಆಯ್ದ ವ್ಯಕ್ತಿ) ಆಗಿ ಮಿಂಚಿದ್ದಾರೆ.
ತಮ್ಮ ಮೊದಲ ಹಾಲಿವುಡ್ ಅನುಭವದ ಬಗ್ಗೆ ಮಾತನಾಡಿರುವ ದಿಶಾ, “ಈ ವಿಶೇಷ ಪ್ರಾಜೆಕ್ಟ್‌ಗಾಗಿ ನಾನು ತುಂಬಾ ದಿನಗಳಿಂದ ಕಾಯುತ್ತಿದ್ದೆ. ಅಂತರಾಷ್ಟ್ರೀಯ ಮಟ್ಟದ ಸಿನಿಮಾದಲ್ಲಿ ನಟಿಸುವುದು ರೋಮಾಂಚನಕಾರಿ ಮತ್ತು ಸವಾಲಿನ ಕೆಲಸವಾಗಿತ್ತು. ಕಥೆ ಹೇಳುವ ರೀತಿಗೆ ಭಾಷೆ ಮತ್ತು ಭೂಗೋಳದ ಹಂಗಿಲ್ಲ ಎಂಬುದು ಈ ಚಿತ್ರದಲ್ಲಿ ನಟಿಸಿದಾಗ ನನಗೆ ಅರಿವಾಯಿತು” ಎಂದು ಸಂತಸ ಹಂಚಿಕೊಂಡಿದ್ದಾರೆ.
ವಿಶೇಷವೆಂದರೆ, ಖ್ಯಾತ ನಟ ಕೆವಿನ್ ಸ್ಪೇಸಿ ಅವರು ಎರಡು ದಶಕಗಳ ನಂತರ ಈ ಚಿತ್ರದ ಮೂಲಕ ಮತ್ತೆ ನಿರ್ದೇಶನಕ್ಕೆ ಮರಳಿದ್ದಾರೆ. ಅಂದಹಾಗೆ ದಿಶಾ ಪಟಾನಿ ಅವರು ಹಾಲಿವುಡ್ ಮಾತ್ರವಲ್ಲದೆ, ಬಾಲಿವುಡ್‌ನ ‘ಆವಾರಾಪನ್ 2’ ಚಿತ್ರದಲ್ಲೂ ನಟಿಸುತ್ತಿದ್ದಾರೆ. ಈ ಸಿನಿಮಾವು ಏಕಕಾಲದಲ್ಲಿ ಹಲವು ಭಾಷೆಗಳಲ್ಲಿ ಬಿಡುಗಡೆಯಾಗುವ ಸಾಧ್ಯತೆಯಿದೆ.
