ವಾಷಿಂಗ್ಟನ್: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತು ಪ್ರಖ್ಯಾತ ಲೇಟ್ ನೈಟ್ ಟಿವಿ ಶೋ ನಿರೂಪಕ ಸ್ಟೀಫನ್ ಕೋಲ್ಬರ್ಟ್ ನಡುವಿನ ದಶಕದ ಹಗೆತನ ಈಗ ಜಗತ್ತೇ ಬೆಚ್ಚಿಬೀಳುವಂತ ರೂಪ ಪಡೆದುಕೊಂಡಿದೆ. ಸಿಬಿಎಸ್ (CBS) ನೆಟ್ವರ್ಕ್ ಕೋಲ್ಬರ್ಟ್ ಅವರ ಸೂಪರ್ ಹಿಟ್ ‘ದಿ ಲೇಟ್ ಶೋ’ ಅನ್ನು ಬ್ಯಾನ್ ಮಾಡಿದ ಬೆನ್ನಲ್ಲೇ, ಡೊನಾಲ್ಡ್ ಟ್ರಂಪ್ ಅವರು ಕೋಲ್ಬರ್ಟ್ನನ್ನು ಕಸದ ತೊಟ್ಟಿಗೆ ಎಸೆಯುವಂತಹ ಕೃತಕ ಬುದ್ಧಿಮತ್ತೆ (AI Generated) ಸೃಷ್ಟಿತ ವಿಡಿಯೋ ಒಂದನ್ನು ಟ್ರಂಪ್ ಸೋಶಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ. ಸ್ಟೀಫನ್ ಕೋಲ್ಬರ್ಟ್ ನಡೆಸಿಕೊಡುತ್ತಿದ್ದ ಜಗತ್ಪ್ರಸಿದ್ಧ ‘ದಿ ಲೇಟ್ ಶೋ’ (The Late Show) ಕೊನೆಯ ಸಂಚಿಕೆ ಪ್ರಸಾರವಾದ ಮರುದಿನವೇ ಟ್ರಂಪ್ ಈ ವಿಡಿಯೋ ಹಾಕಿರುವುದು ಭಾರಿ ಸಂಚಲನ ಸೃಷ್ಟಿಸಿದೆ.
ವೈರಲ್ AI ವಿಡಿಯೋದಲ್ಲೇನಿದೆ?
ಕಸದ ತೊಟ್ಟಿಗೆ ತಳ್ಳಿದ ಟ್ರಂಪ್:
ಈ ವಿಡಿಯೋದಲ್ಲಿ, ಕೋಲ್ಬರ್ಟ್ ಅವರ ಕೊನೆಯ ಶೋ ನಡೆಯುತ್ತಿರುವಾಗ ಡೊನಾಲ್ಡ್ ಟ್ರಂಪ್ ದಿಢೀರನೆ ಸ್ಟೇಜ್ ಮೇಲೆ ಎಂಟ್ರಿ ಕೊಡುತ್ತಾರೆ. ನೇರವಾಗಿ ಹೋಗಿ ಶೋ ನಿರೂಪಕ ಕೋಲ್ಬರ್ಟ್ ಅವರನ್ನು ಹಿಡಿದು, ಅಲ್ಲೇ ಇದ್ದ ದೊಡ್ಡ ಹಸಿರು ಬಣ್ಣದ ಕಸದ ತೊಟ್ಟಿಯೊಳಗೆ ತಳ್ಳಿ, ಅದರ ಮುಚ್ಚಳವನ್ನು ಮುಚ್ಚಿಬಿಡುತ್ತಾರೆ. ಇದಾದ ಬಳಿಕ ಟ್ರಂಪ್ ತಮ್ಮದೇ ಆದ ಸಿಗ್ನೇಚರ್ ಶೈಲಿಯಲ್ಲಿ ಹಸ್ತಲಾಘವ ಮಾಡುತ್ತಾ, ಪ್ರಸಿದ್ಧ “Y.M.C.A” ಹಾಡಿಗೆ ಮೈದಾನದಲ್ಲಿ ಡ್ಯಾನ್ಸ್ ಮಾಡಿ ಸಂಭ್ರಮಿಸುತ್ತಾರೆ. ಆ ವೇಳೆ ಅಲ್ಲಿದ್ದ ಪ್ರೇಕ್ಷಕರು ಚಪ್ಪಾಳೆ ತಟ್ಟುತ್ತಿರುವುದನ್ನು ವಿಡಿಯೋದಲ್ಲಿ ತೋರಿಸಲಾಗಿದೆ.
ಟ್ರಂಪ್ ಬೆಂಬಲಿಗರು ಇದನ್ನು ‘ಅಪ್ರತಿಮ ಟ್ರೋಲಿಂಗ್’ ಎಂದು ಸಂಭ್ರಮಿಸುತ್ತಿದ್ದರೆ, ಟೀಕಾಕಾರರು ಮಾತ್ರ ಮಾಜಿ ಅಧ್ಯಕ್ಷರೊಬ್ಬರು ಇಂತಹ ಕೆಳಮಟ್ಟದ ವಿಡಿಯೋ ಹಂಚಿಕೊಂಡಿರುವುದು ಅವರ ಹುದ್ದೆಗೆ ತಕ್ಕುದಲ್ಲ ಎಂದು ಆಕ್ರೋಶ ಹೊರಹಾಕಿದ್ದಾರೆ.
ಶೋ ಬ್ಯಾನ್ ಆಗಿದ್ದಕ್ಕೆ ಕಾರಣವೇನು?:
ಟ್ರಂಪ್ ಅವರ ಚುನಾವಣಾ ಎದುರಾಳಿ ಕಮಲಾ ಹ್ಯಾರಿಸ್ ಅವರ ಸಂದರ್ಶನವನ್ನು ಸಿಬಿಎಸ್ ವಾಹಿನಿ ಉದ್ದೇಶಪೂರ್ವಕವಾಗಿ ಎಡಿಟ್ ಮಾಡಿತ್ತು ಎಂಬ ಆರೋಪವಿತ್ತು. ಇದಕ್ಕಾಗಿ ಸಿಬಿಎಸ್ ಸಂಸ್ಥೆ ಟ್ರಂಪ್ಗೆ ಬರೋಬ್ಬರಿ 16 ಮಿಲಿಯನ್ ಡಾಲರ್ ಪರಿಹಾರ ನೀಡಿ ಸೆಟಲ್ಮೆಂಟ್ ಮಾಡಿಕೊಂಡಿತ್ತು. ಈ ವಿಷಯವನ್ನು ಇಟ್ಟುಕೊಂಡು ಕೋಲ್ಬರ್ಟ್ ತನ್ನದೇ ವಾಹಿನಿಯನ್ನು ಲೇವಡಿ ಮಾಡಿದ್ದಕ್ಕೆ ಸಿಬಿಎಸ್ ಅವರ ಶೋ ಅನ್ನೇ ರದ್ದುಗೊಳಿಸಿದೆ
ಟ್ರಂಪ್ ಭೀಕರ ವಾಗ್ದಾಳಿ:
ಶೋ ಮುಗಿದ ತಕ್ಷಣ ಟ್ವೀಟ್ ಮಾಡಿದ ಟ್ರಂಪ್, “ಕೋಲ್ಬರ್ಟ್ ಕಥೆ ಮುಗಿಯಿತು. ಆತನಿಗೆ ಯಾವುದೇ ಟ್ಯಾಲೆಂಟ್ ಇಲ್ಲ, ರೇಟಿಂಗ್ಸ್ ಇಲ್ಲ, ಲೈಫ್ ಕೂಡ ಇಲ್ಲ. ಆತ ಒಂಥರಾ ಸತ್ತ ಹೆಣದ ತರಹ ಇದ್ದ. ರಸ್ತೆಯಲ್ಲಿ ಹೋಗುವ ಯಾರನ್ನಾದರೂ ಕರೆತಂದರೂ ಆತನಿಗಿಂತ ಚೆನ್ನಾಗಿ ಶೋ ನಡೆಸಿಕೊಡುತ್ತಾರೆ. ಆತ ಹೋದದ್ದೇ ಒಳ್ಳೆಯದಾಯಿತು” ಎಂದು ಕಟುವಾಗಿ ನಿಂದಿಸಿದ್ದಾರೆ.
ಟ್ರಂಪ್ ವಿರುದ್ಧ ತಿರುಗಿಬಿದ್ದ ಅಮೆರಿಕದ ಯುವ ಜನತೆ:
ಅಧ್ಯಕ್ಷರ ಅಧಿಕೃತ ಖಾತೆಯಿಂದ ಇಂತಹ ಎಐ ವಿಡಿಯೋ ಪೋಸ್ಟ್ ಆಗುತ್ತಿದ್ದಂತೆ ಅಮೆರಿಕನ್ನರು ಮತ್ತು ನೆಟ್ಟಿಗರು ಟ್ರಂಪ್ ವಿರುದ್ಧ ಭಾರಿ ಆಕ್ರೋಶ ಹೊರಹಾಕಿದ್ದಾರೆ:
ಯುವ ರಿಪಬ್ಲಿಕನ್ ಫ್ಯಾನ್ಸ್ ಆಕ್ರೋಶ: “ನೀವು ನನ್ನಂತಹ ಎಷ್ಟೋ ಯುವ ರಿಪಬ್ಲಿಕನ್ ಕಾರ್ಯಕರ್ತರನ್ನು ನಿಮ್ಮ ವಿರುದ್ಧ ತಿರುಗುವಂತೆ ಮಾಡಿದ್ದೀರಿ. ನೀವು ಒಬ್ಬ ಸುಳ್ಳುಗಾರ. ದೇಶದ ಯುವಕರೆಲ್ಲಾ ಸೇರಿ ಈ ಬಾರಿ ಡೆಮೋಕ್ರಾಟ್ಸ್ಗೆ ವೋಟ್ ಹಾಕಿ ಎಲ್ಲವನ್ನೂ ಉಡೀಸ್ ಮಾಡ್ತೀವಿ” ಎಂದು ಯುವಕನೊಬ್ಬ ವಾರ್ನಿಂಗ್ ಕೊಟ್ಟಿದ್ದಾನೆ.
ಕೋಪಗೊಂಡ ನೆಟ್ಟಿಗರು: “ದೇಶದ ಆರ್ಥಿಕತೆ ಅಪಾಯದಲ್ಲಿದ್ದಾಗ ಅಮೆರಿಕದ ಅಧ್ಯಕ್ಷನೊಬ್ಬ ಇಂತಹ ಬಾಲಿಶ ಎಐ ವಿಡಿಯೋಗಳನ್ನು ಹಾಕಿ ಸಂಭ್ರಮಿಸುತ್ತಿರುವುದು ದೇಶಕ್ಕೆ ದೊಡ್ಡ ಜೋಕ್” ಎಂದು ಕಿಡಿಕಾರಿದ್ದಾರೆ.
ವಿಡಿಯೋದ ಅಸಲಿ ಸಂದೇಶವೇನು?
ಕೋಲ್ಬರ್ಟ್ ಟಿವಿ ಜಗತ್ತಿನಿಂದ ಹೊರಹೋಗುತ್ತಿದ್ದಂತೆ ಟ್ರಂಪ್ ಈ AI ವಿಡಿಯೋ ಹಂಚಿಕೊಂಡಿರುವುದರ ಹಿಂದೆ ಸ್ಪಷ್ಟ ಸಂದೇಶವಿದೆ. ಅಮೆರಿಕದ ರಾಜಕೀಯ ಭಾಷೆಯಲ್ಲಿ ಹೇಳುವುದಾದರೆ, ತಮ್ಮನ್ನು ಇಷ್ಟು ವರ್ಷ ಕಾಡಿದ ವಿಮರ್ಶಕನಿಗೆ ಟ್ರಂಪ್ ಸಾಂಕೇತಿಕವಾಗಿ “ಕಸವನ್ನು ಹೊರಹಾಕಿದೆ” (Taking out the trash) ಎಂಬ ಸಂದೇಶ ನೀಡಿದ್ದಾರೆ. ಈ ಡಿಜಿಟಲ್ ಯುಗದ ವಾರ್ ಸದ್ಯಕ್ಕಂತೂ ನಿಲ್ಲುವಂತೆ ಕಾಣುತ್ತಿಲ್ಲ.
