ಕನ್ನಡ ಚಿತ್ರರಂಗದ ಜನಪ್ರಿಯ ಹಿನ್ನೆಲೆ ಗಾಯಕಿ ಮತ್ತು ಹಿಂದೂಸ್ತಾನಿ ಶಾಸ್ತ್ರೀಯ ಸಂಗೀತ ಕಲಾವಿದೆ ಚೈತ್ರಾ ಎಚ್. ಜಿ. ಅವರು ಇಂದು ತಮ್ಮ ಹುಟ್ಟುಹಬ್ಬದ ಸಂಭ್ರಮದಲ್ಲಿದ್ದಾರೆ. ಜೂನ್ 18, 1984 ರಂದು ಜನಿಸಿದ ಚೈತ್ರಾ ಅವರು ದಶಕಗಳಿಂದ ತಮ್ಮ ಸುಮಧುರ ಕಂಠದ ಮೂಲಕ ಪ್ರೇಕ್ಷಕರನ್ನು ರಂಜಿಸುತ್ತಾ ಬಂದಿದ್ದಾರೆ. ಕೇವಲ ಗಾಯನಕ್ಕೆ ಮಾತ್ರ ಸೀಮಿತವಾಗದೆ, ಕಿರುತೆರೆ ಹಾಗೂ ಬೆಳ್ಳಿಪರದೆಯ ಮೇಲೂ ತಮ್ಮ ಮುದ್ರೆ ಒತ್ತಿರುವ ಇವರು ಕನ್ನಡ ಕಲಾ ಲೋಕದ ಬಹುಮುಖ ಪ್ರತಿಭೆಯಾಗಿ ಗುರುತಿಸಿಕೊಂಡಿದ್ದಾರೆ.
ಬಾಲ್ಯದಲ್ಲೇ ಆರಂಭವಾದ ಗಾಯನ ಯಾನ ತಮ್ಮ ಎಂಟನೇ ವಯಸ್ಸಿನಲ್ಲೇ ಹಿನ್ನೆಲೆ ಗಾಯಕಿಯಾಗಿ ಚೈತ್ರಾ ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡಿದರು. ವಿ. ಮನೋಹರ್ ಅವರ ಸಂಗೀತ ನಿರ್ದೇಶನದ ‘ಬೇಡ ಕೃಷ್ಣ ರಂಗಿನಾಟ’ ಚಿತ್ರದ “ಕೋಗಿಲೆಯೇ” ಹಾಡಿಗೆ ಧ್ವನಿಯಾಗುವ ಮೂಲಕ ಬಾಲಪ್ರತಿಭೆಯಾಗಿ ಇವರು ಗಮನ ಸೆಳೆದರು. ಆನಂತರ 2003 ರಲ್ಲಿ ಖ್ಯಾತ ಸಂಗೀತ ನಿರ್ದೇಶಕ ರಾಜೇಶ್ ರಾಮನಾಥ್ ಅವರ ಸಂಯೋಜನೆಯಲ್ಲಿ ಹಾಡುವ ಅವಕಾಶ ಪಡೆದ ಇವರು, ಮುಂದೆ ಚಿತ್ರರಂಗದಲ್ಲಿ ಭದ್ರ ನೆಲೆ ಕಂಡುಕೊಂಡರು.
ಅಮೃತಧಾರೆ ಚಿತ್ರದ “ಹುಡುಗ ಹುಡುಗ” ಹಾಡಿನ ಅದ್ಭುತ ಗಾಯನಕ್ಕಾಗಿ ಚೈತ್ರಾ ಅವರಿಗೆ 2005–06ನೇ ಸಾಲಿನ ಅತ್ಯುತ್ತಮ ಮಹಿಳಾ ಹಿನ್ನೆಲೆ ಗಾಯಕಿ ಕರ್ನಾಟಕ ರಾಜ್ಯ ಚಲನಚಿತ್ರ ಪ್ರಶಸ್ತಿ ಒಲಿದುಬಂದಿದೆ. ಇದರೊಂದಿಗೆ ರೋಟರಿ ಬೆಂಗಳೂರು ಮಿಡ್ಟೌನ್ ಮತ್ತು ಬ್ರಿಗೇಡ್ ಗ್ರೂಪ್ ವತಿಯಿಂದ ಯುವ ಸಾಧಕ ಪ್ರಶಸ್ತಿ ಹಾಗೂ ‘ಜೋಕಾಲಿ’ ಧಾರಾವಾಹಿಯ ಶೀರ್ಷಿಕೆ ಗೀತೆಗಾಗಿ ಉದಯ ಟಿವಿ ಕುಟುಂಬ ಪ್ರಶಸ್ತಿಯನ್ನು ಸಹ ಪಡೆದಿದ್ದಾರೆ.
ಕಿರುತೆರೆಯಲ್ಲಿ ಜನಪ್ರಿಯ ವಾಹಿನಿ ನಿರೂಪಕಿ ಮತ್ತು ತೀರ್ಪುಗಾರ್ತಿ ಕನ್ನಡ ಕಿರುತೆರೆಯ ಅತಿ ದೀರ್ಘಾವಧಿ ರಿಯಾಲಿಟಿ ಶೋಗಳಲ್ಲಿ ಒಂದಾದ ‘ಕಾನ್ಫಿಡೆಂಟ್ ಸ್ಟಾರ್ ಸಿಂಗರ್ – ಸೀಸನ್ 1’ ಕಾರ್ಯಕ್ರಮವನ್ನು ಯಶಸ್ವಿಯಾಗಿ ನಡೆಸಿಕೊಡುವ ಮೂಲಕ ಇವರು ವಾಹಿನಿ ನಿರೂಪಕಿ ಆಗಿ ಗುರುತಿಸಿಕೊಂಡರು. ಉದಯ ಟಿವಿಯ ‘ಅಮುಲ್ ಸಂಗೀತ ಮಹಾಯುದ್ಧ’, ಪಬ್ಲಿಕ್ ಟಿವಿಯ ‘ಫ್ರೆಶ್ ವಾಯ್ಸ್ ಆಫ್ ಕರ್ನಾಟಕ’, ರೇಡಿಯೋ ಸಿಟಿ ಮತ್ತು ಮಂಗಳೂರಿನ ಫೋರಂ ಫಿಜಾ ಮಾಲ್ ಸೂಪರ್ ಸಿಂಗರ್ ಸ್ಪರ್ಧೆಗಳಿಗೆ ತೀರ್ಪುಗಾರರಾಗಿ ಜವಾಬ್ದಾರಿ ನಿಭಾಯಿಸಿದ್ದಾರೆ. ಇ ಟಿವಿಯ ‘ಪರಿಪೂರ್ಣ ಮಹಿಳೆ’ ಕಾರ್ಯಕ್ರಮದಲ್ಲಿ ಹಿರಿಯ ನಟಿ ಭಾರತಿ ವಿಷ್ಣುವರ್ಧನ್ ಅವರೊಂದಿಗೆ ಹಾಗೂ ಖ್ಯಾತ ಗಾಯಕ ಎಸ್. ಪಿ. ಬಾಲಸುಬ್ರಹ್ಮಣ್ಯಂ ಅವರೊಂದಿಗೆ ‘ಎದೆ ತುಂಬಿ ಹಾಡುವೆನು’ ಕಾರ್ಯಕ್ರಮದಲ್ಲಿ ಅತಿಥಿ ತೀರ್ಪುಗಾರರಾಗಿ ಭಾಗವಹಿಸಿದ್ದರು. ಸರಿಗಮಪ, ವಾಯ್ಸ್ ಆಫ್ ಬೆಂಗಳೂರು ಸೇರಿದಂತೆ ಹಲವು ಶೋಗಳಿಗೆ ವಿಶೇಷ ತೀರ್ಪುಗಾರರಾಗಿಯೂ ಇವರು ಆಗಮಿಸಿದ್ದಾರೆ.
ಅಭಿನಯದಲ್ಲೂ ಮುನ್ನಡೆ: ಅಂತರರಾಷ್ಟ್ರೀಯ ಮಟ್ಟದಲ್ಲಿ ಪ್ರಶಸ್ತಿ ಗಾಯನದಷ್ಟೇ ಅಭಿನಯದಲ್ಲೂ ಆಸಕ್ತಿ ಹೊಂದಿರುವ ಚೈತ್ರಾ, ಅಭಿನಯ ತರಂಗ ರಂಗಶಾಲೆಯಿಂದ ನಟನೆ ಮತ್ತು ರಂಗಭೂಮಿಯಲ್ಲಿ ಡಿಪ್ಲೊಮಾ ಪದವಿ ಪಡೆದಿದ್ದಾರೆ. 2023 ರಲ್ಲಿ ಬಿಡುಗಡೆಯಾದ ‘ಮಾವು ಬೇವು’ ಚಿತ್ರದಲ್ಲಿ ಪ್ರಮುಖ ಪಾತ್ರದಲ್ಲಿ ನಟಿಸುವ ಮೂಲಕ ಬೆಳ್ಳಿಪರದೆಗೆ ನಾಯಕಿಯಾಗಿ ಪರಿಚಯವಾದರು. ಈ ಚಿತ್ರದಲ್ಲಿನ ಇವರ ‘ನುಪುರ್’ ಪಾತ್ರದ ಅದ್ಭುತ ನಟನೆಗಾಗಿ 2024 ರ ಅಹಮದಾಬಾದ್ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವದಲ್ಲಿ ಅತ್ಯುತ್ತಮ ನಟಿ ಪ್ರಶಸ್ತಿ ಲಭಿಸಿದೆ. ಸಂಗೀತ ಮತ್ತು ನಟನೆ ಎರಡರಲ್ಲೂ ಸಾಧನೆ ಮಾಡುತ್ತಿರುವ ಇವರಿಗೆ ಕಲಾಭಿಮಾನಿಗಳಿಂದ ಜನ್ಮದಿನದ ಶುಭಾಶಯಗಳ ಮಹಾಪೂರವೇ ಹರಿದುಬರುತ್ತಿದೆ.
