ಆಧಾರ್ ಕಾರ್ಡ್ ಪ್ರತಿಯೊಬ್ಬ ಭಾರತೀಯನಿಗೂ ಅತ್ಯಂತ ಅಗತ್ಯವಾದ ಗುರುತಿನ ದಾಖಲೆ. ಇದರಿಲ್ಲದೆ ದೇಶದಲ್ಲಿ ಅನೇಕ ಸರ್ಕಾರಿ ಹಾಗೂ ಖಾಸಗಿ ಸೇವೆಗಳನ್ನು ಪಡೆಯಲು ಸಾಧ್ಯವಿಲ್ಲ. ಸರ್ಕಾರದ ವಿವಿಧ ಯೋಜನೆಗಳು, ಸಬ್ಸಿಡಿಗಳು, ರಿಯಾಯಿತಿಗಳ ಲಾಭ ಪಡೆಯಲು ಆಧಾರ್ ಕಡ್ಡಾಯವಾಗಿದೆ. ಅಲ್ಲದೆ, ವಿವಿಧ ಸೇವೆಗಳಿಗಾಗಿ ಗುರುತಿನ ದೃಢೀಕರಣ ದಾಖಲೆಯಾಗಿ ಸಹ ಇದನ್ನು ಬಳಸಲಾಗುತ್ತದೆ.
ಭಾರತದಲ್ಲಿ ಅತ್ಯಂತ ಪ್ರಮುಖ ಗುರುತಿನ ದಾಖಲೆಗಳಲ್ಲಿ ಆಧಾರ್ ಕಾರ್ಡ್ ಒಂದಾಗಿದೆ. ಸರ್ಕಾರಿ ಸೇವೆಗಳು, ಬ್ಯಾಂಕಿಂಗ್ ವ್ಯವಹಾರಗಳು, ಹಣಕಾಸು ಚಟುವಟಿಕೆಗಳು ಹಾಗೂ ದಿನನಿತ್ಯದ ಗುರುತಿನ ಪರಿಶೀಲನೆಗೆ ಇದು ಅವಶ್ಯಕ. ಹೀಗಾಗಿ ಆಧಾರ್ ಕಾರ್ಡ್ ಅನ್ನು ಯಾವಾಗಲೂ ನಮ್ಮೊಂದಿಗೆ ಇಟ್ಟುಕೊಳ್ಳುವುದು ಮುಖ್ಯ. ಆದರೆ ಕೆಲವೊಮ್ಮೆ ಆಧಾರ್ ಕಾರ್ಡ್ ಮನೆಯಲ್ಲಿ ಮರೆತುಬಿಡುವುದು ಅಥವಾ ಮೊಬೈಲ್ನಲ್ಲಿ ಅದರ ಡಿಜಿಟಲ್ ಪ್ರತಿ ಇಲ್ಲದಿರುವ ಪರಿಸ್ಥಿತಿ ಎದುರಾಗಬಹುದು.
ಇಂತಹ ಸಂದರ್ಭದಲ್ಲಿ ಪೋರ್ಟಲ್ ಅಥವಾ ಡಿಜಿಲಾಕರ್ ಆ್ಯಪ್ ತೆರೆಯುವ ಅಗತ್ಯವೂ ಇಲ್ಲ. ಕೇಂದ್ರ ಸರ್ಕಾರದ ಅಧಿಕೃತ MyGov Helpdesk ವಾಟ್ಸಾಪ್ ಚಾಟ್ಬಾಟ್ ಬಳಸಿ ಕೆಲವೇ ಕ್ಷಣಗಳಲ್ಲಿ ವಾಟ್ಸಾಪ್ನಲ್ಲೇ ಆಧಾರ್ ಕಾರ್ಡ್ ಅನ್ನು ಡೌನ್ಲೋಡ್ ಮಾಡಬಹುದು. ಈ ಸೌಲಭ್ಯದಿಂದ ಯಾವುದೇ ಹೆಚ್ಚುವರಿ ಆ್ಯಪ್ ಇನ್ಸ್ಟಾಲ್ ಮಾಡದೆ ಸುರಕ್ಷಿತವಾಗಿ ಆಧಾರ್ ಸೇರಿದಂತೆ ಇತರೆ ಪ್ರಮುಖ ದಾಖಲೆಗಳನ್ನೂ ಪಡೆಯಬಹುದು.
ಆಧಾರ್ ಕಾರ್ಡ್ ಡೌನ್ಲೋಡ್ ಮಾಡಲು ಬೇಕಾಗುವವು
- ಆಧಾರ್ಗೆ ಲಿಂಕ್ ಆಗಿರುವ ನೋಂದಾಯಿತ ಮೊಬೈಲ್ ಸಂಖ್ಯೆ
- ಸಕ್ರಿಯ ಡಿಜಿಲಾಕರ್ (DigiLocker) ಖಾತೆ
- ನಿಮ್ಮ ಮೊಬೈಲ್ನಲ್ಲಿ MyGov Helpdesk ವಾಟ್ಸಾಪ್ ಸಂಖ್ಯೆ 9013151515 ಸೇವ್ ಮಾಡಿರಬೇಕು.
ವಾಟ್ಸಾಪ್ ಮೂಲಕ ಆಧಾರ್ ಡೌನ್ಲೋಡ್ ಮಾಡುವ ವಿಧಾನ
- ಮೊದಲು 9013151515 ಸಂಖ್ಯೆಯನ್ನು MyGov Helpdesk ಹೆಸರಿನಲ್ಲಿ ಸೇವ್ ಮಾಡಿ.
- ವಾಟ್ಸಾಪ್ ತೆರೆಯಿರಿ ಮತ್ತು ಈ ಸಂಖ್ಯೆಗೆ ಚಾಟ್ ಆರಂಭಿಸಿ.
- “ನಮಸ್ತೆ” ಅಥವಾ “Hi” ಎಂದು ಸಂದೇಶ ಕಳುಹಿಸಿ.
- ನಂತರ “DigiLocker Services” ಆಯ್ಕೆಯನ್ನು ಆರಿಸಿ.
- ನಿಮಗೆ ಈಗಾಗಲೇ DigiLocker ಖಾತೆ ಇದ್ದರೆ ಮುಂದುವರಿಯಿರಿ. ಇಲ್ಲದಿದ್ದರೆ ಮೊದಲು ಖಾತೆ ತೆರೆಯಿರಿ.
- ನಿಮ್ಮ 12 ಅಂಕಿಯ ಆಧಾರ್ ಸಂಖ್ಯೆಯನ್ನು ನಮೂದಿಸಿ.
- ನೋಂದಾಯಿತ ಮೊಬೈಲ್ ಸಂಖ್ಯೆಗೆ ಬರುವ OTP ಅನ್ನು ದಾಖಲಿಸಿ.
- ಪರಿಶೀಲನೆ ಪೂರ್ಣಗೊಂಡ ಬಳಿಕ ಚಾಟ್ಬಾಟ್ ನಿಮ್ಮ DigiLocker ಖಾತೆಯಲ್ಲಿರುವ ದಾಖಲೆಗಳ ಪಟ್ಟಿಯನ್ನು ತೋರಿಸುತ್ತದೆ.
- ಪಟ್ಟಿಯಿಂದ ಆಧಾರ್ ಕಾರ್ಡ್ ಆಯ್ಕೆಯನ್ನು ಆರಿಸಿ.
- ನಂತರ ನಿಮ್ಮ ಆಧಾರ್ ಕಾರ್ಡ್ PDF ರೂಪದಲ್ಲಿ ವಾಟ್ಸಾಪ್ ಚಾಟ್ಗೆ ಬರುತ್ತದೆ.
- PDF ಅನ್ನು ಡೌನ್ಲೋಡ್ ಮಾಡಿಕೊಂಡು ಅಗತ್ಯವಿದ್ದಾಗ ಬಳಸಬಹುದು.
