ಒಂದೇ ಕುಟುಂಬದಲ್ಲಿ ಒಂದಕ್ಕಿಂತ ಹೆಚ್ಚು ರೇಷನ್ ಕಾರ್ಡ್ ಇರಬಹುದೇ? ಪ್ರತ್ಯೇಕ ಕಾರ್ಡ್ ಪಡೆಯಲು ಇರುವ ನಿಯಮಗಳಿವು!

ಬೆಂಗಳೂರು : ಒಂದೇ ಮನೆಯಲ್ಲಿದ್ದರೂ ಪ್ರತ್ಯೇಕ ರೇಷನ್ ಕಾರ್ಡ್ (ಪಡಿತರ ಚೀಟಿ) ಪಡೆಯಬಹುದೇ ಎಂಬ ಗೊಂದಲ ಅನೇಕರಲ್ಲಿದೆ. ಸರ್ಕಾರದ ನಿಯಮಗಳ ಪ್ರಕಾರ, ಕೆಲವು ನಿರ್ದಿಷ್ಟ ಷರತ್ತುಗಳಿಗೆ ಒಳಪಟ್ಟು ಒಂದೇ ಮನೆಯಲ್ಲಿ ಒಂದಕ್ಕಿಂತ ಹೆಚ್ಚು ರೇಷನ್ ಕಾರ್ಡ್‌ಗಳನ್ನು ಹೊಂದಲು ಅವಕಾಶವಿದೆ. ಯಾರು ಪ್ರತ್ಯೇಕ ರೇಷನ್ ಕಾರ್ಡ್ ಪಡೆಯಬಹುದು ಮತ್ತು ಇದಕ್ಕೆ ಇರುವ ಅರ್ಹತೆಗಳೇನು ಎಂಬ ಸಂಪೂರ್ಣ ವಿವರ ಇಲ್ಲಿದೆ.

ಪ್ರತ್ಯೇಕ ರೇಷನ್ ಕಾರ್ಡ್ ಯಾರಿಗೆ ಲಭ್ಯ?

ಪ್ರತ್ಯೇಕ ಅಡುಗೆ ಮನೆ ಮತ್ತು ಆದಾಯ: ಕುಟುಂಬದೊಂದಿಗೆ ಒಂದೇ ಮನೆಯಲ್ಲಿ ವಾಸಿಸುತ್ತಿದ್ದರೂ, ಸ್ವಂತ ಆದಾಯ, ಪ್ರತ್ಯೇಕ ಖರ್ಚು-ವೆಚ್ಚಗಳು ಮತ್ತು ಪ್ರತ್ಯೇಕ ಅಡುಗೆ ಕೋಣೆ ಹೊಂದಿರುವವರು ಪ್ರತ್ಯೇಕ ರೇಷನ್ ಕಾರ್ಡ್‌ಗೆ ಅರ್ಜಿ ಸಲ್ಲಿಸಬಹುದು. ಆಹಾರ ಇಲಾಖೆಯ ಅಧಿಕಾರಿಗಳು ಸ್ಥಳ ಪರಿಶೀಲನೆ ನಡೆಸಿ ಇದನ್ನು ದೃಢೀಕರಿಸುತ್ತಾರೆ.

ವಿವಾಹಿತ ದಂಪತಿಗಳು: ಮದುವೆಯ ನಂತರ ಪತಿಯ ಕುಟುಂಬದ ಕಾರ್ಡ್‌ಗೆ ಪತ್ನಿಯ ಹೆಸರನ್ನು ಸೇರಿಸಬಹುದು ಅಥವಾ ದಂಪತಿಗಳು ತಮ್ಮದೇ ಆದ ಹೊಸ ರೇಷನ್ ಕಾರ್ಡ್‌ಗೆ ಅರ್ಜಿ ಸಲ್ಲಿಸಬಹುದು.

ಬೇರೆ ಊರಿಗೆ ಸ್ಥಳಾಂತರಗೊಂಡರೆ: ಉದ್ಯೋಗ ಅಥವಾ ವ್ಯಾಪಾರಕ್ಕಾಗಿ ಶಾಶ್ವತವಾಗಿ ಬೇರೆ ನಗರಕ್ಕೆ ವಲಸೆ ಹೋಗುವವರು, ಹಳೆಯ ಕಾರ್ಡ್‌ನಿಂದ ಹೆಸರು ತೆಗೆಸಿ, ಹೊಸ ವಿಳಾಸಕ್ಕೆ ಪ್ರತ್ಯೇಕ ಕಾರ್ಡ್ ಪಡೆಯಬಹುದು.

ಒಂಟಿ ವ್ಯಕ್ತಿಗಳು (ಏಕ ಸದಸ್ಯ ಕುಟುಂಬ): ಪ್ರಸ್ತುತ ವಿಳಾಸದಲ್ಲಿ ಕನಿಷ್ಠ ಒಂದು ವರ್ಷದಿಂದ ನೆಲೆಸಿದ್ದು, ಪ್ರತ್ಯೇಕ ಅಡುಗೆ ಕೋಣೆ ಹಾಗೂ ಸ್ವಂತ ಆದಾಯ ಹೊಂದಿರುವ ಒಂಟಿ ವ್ಯಕ್ತಿಗಳು ಕೂಡ 'ಏಕ ಸದಸ್ಯ ಕುಟುಂಬ' (Single Member Household) ವಿಭಾಗದಡಿ ಕಾರ್ಡ್ ಪಡೆಯಬಹುದು.

ಅರ್ಹತೆಯಿಲ್ಲದವರು: ಪೋಷಕರೊಂದಿಗೆ ವಾಸಿಸುತ್ತಾ, ಅವರೊಂದಿಗೆ ಒಂದೇ ಅಡುಗೆ ಕೋಣೆಯನ್ನು ಬಳಸುವ ಅವಿವಾಹಿತರಿಗೆ ಪ್ರತ್ಯೇಕ ಕಾರ್ಡ್ ಸಿಗುವುದಿಲ್ಲ.

ಪಡಿತರ ಚೀಟಿ ಪಡೆಯಲು ಇರಬೇಕಾದ ಅರ್ಹತೆಗಳು

ಅರ್ಜಿದಾರರು ಭಾರತೀಯ ನಾಗರಿಕರಾಗಿದ್ದು, ಆಯಾ ವ್ಯಾಪ್ತಿಯ ಶಾಶ್ವತ ನಿವಾಸಿಯಾಗಿರಬೇಕು.

ಅರ್ಜಿದಾರರಾಗಲಿ ಅಥವಾ ಅವರ ಕುಟುಂಬ ಸದಸ್ಯರಾಗಲಿ ದೇಶದ ಬೇರೆಲ್ಲೂ ಚಾಲ್ತಿಯಲ್ಲಿರುವ ರೇಷನ್ ಕಾರ್ಡ್ ಹೊಂದಿರಬಾರದು.

ಪ್ರತ್ಯೇಕ ಕುಟುಂಬವೆಂದು ಅರ್ಜಿ ಸಲ್ಲಿಸುವಾಗ, ಅರ್ಜಿದಾರರಿಗೆ ಸ್ವಂತ ಆದಾಯ ಮತ್ತು ಪ್ರತ್ಯೇಕ ಅಡುಗೆ ಮನೆ ಇರುವುದು ಕಡ್ಡಾಯ.

ಹೊಸ ಕಾರ್ಡ್‌ಗೆ ಅರ್ಜಿ ಸಲ್ಲಿಸುವ ವಿಧಾನ

ಹೆಸರು ರದ್ದು ಪ್ರಮಾಣಪತ್ರ: ಹಳೆಯ ರೇಷನ್ ಕಾರ್ಡ್‌ನಿಂದ ನಿಮ್ಮ ಹೆಸರನ್ನು ತೆಗೆದುಹಾಕಿರುವ (Name Deletion) ಪ್ರಮಾಣಪತ್ರವನ್ನು ಮೊದಲು ಪಡೆಯಬೇಕು.

ಆನ್‌ಲೈನ್ ಅರ್ಜಿ: ಆಹಾರ ಮತ್ತು ನಾಗರಿಕ ಸರಬರಾಜು ಇಲಾಖೆಯ ಅಧಿಕೃತ ವೆಬ್‌ಸೈಟ್‌ ಮೂಲಕ ಹೊಸ ರೇಷನ್ ಕಾರ್ಡ್‌ಗೆ ಅರ್ಜಿ ಸಲ್ಲಿಸಿ.

ದಾಖಲೆಗಳ ಸಲ್ಲಿಕೆ: ಅರ್ಜಿಯೊಂದಿಗೆ ಗುರುತಿನ ಚೀಟಿ, ಹೊಸ ವಿಳಾಸದ ಪುರಾವೆ, ಆದಾಯ ಪ್ರಮಾಣಪತ್ರ ಹಾಗೂ ಹೆಸರು ರದ್ದಾದ ದಾಖಲೆಯನ್ನು ಅಪ್‌ಲೋಡ್ ಮಾಡಬೇಕು.

ಪರಿಶೀಲನೆ: ಆಹಾರ ಇಲಾಖೆಯ ಅಧಿಕಾರಿಗಳು ಸ್ಥಳಕ್ಕೆ ಭೇಟಿ ನೀಡಿ ನಿಯಮಾನುಸಾರ ಪರಿಶೀಲನೆ ನಡೆಸಿದ ನಂತರ ಅರ್ಹರಿಗೆ ಹೊಸ ರೇಷನ್ ಕಾರ್ಡ್ ಮಂಜೂರಾಗುತ್ತದೆ.