ಆಸ್ಟ್ರೇಲಿಯಾ ಪ್ರವಾಸದಲ್ಲಿರುವ ಬ್ರೆಜಿಲ್ ಫುಟ್ಬಾಲ್ ತಂಡದ ಆಟಗಾರರು ಅಲ್ಲಿನ ಮೂಲವಾಸಿಗಳ ಸಾಂಪ್ರದಾಯಿಕ ಸ್ವಾಗತ ಕೋರುವ ಆಚರಣೆಯ ವೇಳೆ ನಗು ತಡೆದುಕೊಳ್ಳಲು ಹೆಣಗಾಡುತ್ತಿರುವ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗಿದ್ದು, ದೊಡ್ಡ ಮಟ್ಟದ ವಿವಾದಕ್ಕೆ ಕಾರಣವಾಗಿದೆ. ಆಸ್ಟ್ರೇಲಿಯಾ ವಿರುದ್ಧದ ಸೌಹಾರ್ದ ಪಂದ್ಯಕ್ಕಾಗಿ ಕ್ವೀನ್ಸ್ಲ್ಯಾಂಡ್ನ ಟೌನ್ಸ್ವಿಲ್ ನಗರಕ್ಕೆ ಆಗಮಿಸಿದ್ದ ಬ್ರೆಜಿಲ್ ತಂಡಕ್ಕೆ ಅಲ್ಲಿನ ಸ್ಥಳೀಯ ಸಂಸ್ಕೃತಿಯಂತೆ ಆತ್ಮೀಯ ಸ್ವಾಗತ ಕೋರಲಾಗಿತ್ತು.
ಸ್ಥಳೀಯ ‘ವುಲ್ಗುರುಕಬಾ ವಾಕ್-ಅಬೌಟ್ಸ್’ ಎಂಬ ಮೂಲವಾಸಿ ಸಾಂಸ್ಕೃತಿಕ ತಂಡವು ಈ ಸ್ವಾಗತ ಕಾರ್ಯಕ್ರಮವನ್ನು ನಡೆಸಿ ಕೊಟ್ಟಿತ್ತು. ಆಸ್ಟ್ರೇಲಿಯಾದ ಮೂಲವಾಸಿಗಳ ಸಂಪ್ರದಾಯದಂತೆ ಆಶೀರ್ವಾದ, ಶಕ್ತಿ ಮತ್ತು ಶುದ್ಧೀಕರಣದ ಸಂಕೇತವಾಗಿ ವಿಶೇಷ ಹೊಗೆಯಾಡಿಸುವ ವಿಶಿಷ್ಟ ವಿಧಿಯನ್ನು ನೆರವೇರಿಸಲಾಯಿತು. ಬ್ರೆಜಿಲ್ ಫುಟ್ಬಾಲ್ ಮಂಡಳಿಯು ಸಹ ಈ ಆಚರಣೆಯು ತಂಡಕ್ಕೆ ಶುಭ ಹಾರೈಸಲು ಆಯೋಜಿಸಲಾದ ಕಾರ್ಯಕ್ರಮ ಎಂದು ತಿಳಿಸಿತ್ತು.
ಆದರೆ ಈ ವಿಶೇಷ ಸಂಪ್ರದಾಯ ನಡೆಯುತ್ತಿದ್ದ ಸಂದರ್ಭದಲ್ಲಿ ಬ್ರೆಜಿಲ್ನ ಪ್ರಮುಖ ಆಟಗಾರರು ನಗೆ ತಡೆ ಹಿಡಿದುಕೊಳ್ಳಲು ಯತ್ನಿಸುತ್ತಾ, ಕೈಗಳಿಂದ ಬಾಯಿ ಮುಚ್ಚಿಕೊಳ್ಳುತ್ತಿರುವ ದೃಶ್ಯಗಳು ಕ್ಯಾಮೆರಾದಲ್ಲಿ ಸೆರೆಯಾಗಿವೆ. ಈ ವಿಡಿಯೋ ಬಹಿರಂಗಗೊಳ್ಳುತ್ತಿದ್ದಂತೆ ಜಾಲತಾಣಗಳಲ್ಲಿ ನೆಟ್ಟಿಗರು ಕ್ರೀಡಾಪಟುಗಳ ನಡೆಯನ್ನು ತೀವ್ರವಾಗಿ ಖಂಡಿಸಿದ್ದು, ಬೇರೊಂದು ದೇಶದ ಸಂಸ್ಕೃತಿಗೆ ತೋರಿದ ಅಸೌಜನ್ಯ ಮತ್ತು ಬೇಜವಾಬ್ದಾರಿ ವರ್ತನೆ ಎಂದು ಕಿಡಿಕಾರಿದ್ದಾರೆ.
ಮುಂಬರುವ ವಿಶ್ವಕಪ್ ಸಿದ್ಧತೆಯ ಭಾಗವಾಗಿ ಆಸ್ಟ್ರೇಲಿಯಾ ಪ್ರವಾಸ ಕೈಗೊಂಡಿರುವ ಬ್ರೆಜಿಲ್ ತಂಡಕ್ಕೆ ಈಗ ಈ ಸಾಂಸ್ಕೃತಿಕ ವಿವಾದ ನುಂಗಲಾರದ ತೂತಾಗಿ ಪರಿಣಮಿಸಿದೆ. ಆಟಗಾರರು ಬೇಕೆಂದೇ ಅಪಹಾಸ್ಯ ಮಾಡುವ ಉದ್ದೇಶ ಹೊಂದಿದ್ದರೇ ಅಥವಾ ಬೇರೆ ಕಾರಣಕ್ಕೆ ನಕ್ಕರೇ ಎಂಬುದು ಸ್ಪಷ್ಟವಾಗಿಲ್ಲವಾದರೂ, ಸ್ಥಳೀಯ ಸಂಸ್ಕೃತಿಯ ಗೌರವದ ವಿಚಾರದಲ್ಲಿ ಈ ಘಟನೆ ದೊಡ್ಡ ಮಟ್ಟದ ಚರ್ಚೆಗೆ ಗ್ರಾಸವಾಗಿದೆ.
