ರೈಲು ಟಿಕೆಟ್ ಬುಕ್ ಮಾಡಿ ಪ್ರಯಾಣ ರದ್ದಾಯ್ತಾ..? ಜಸ್ಟ್ ಹೀಗೆ ಬೇರೆಯವರಿಗೆ ಟ್ರಾನ್ಸ್‌ಫರ್ ಮಾಡಿ, ಹಣ ಉಳಿಸಿ!

ನವದೆಹಲಿ: ರೈಲು ಪ್ರಯಾಣಕ್ಕಾಗಿ ಟಿಕೆಟ್ ಬುಕ್ ಮಾಡಿದ ಬಳಿಕ ಅನಿವಾರ್ಯ ಕಾರಣಗಳಿಂದ ಪ್ರಯಾಣ ರದ್ದು ಮಾಡಿಕೊಂಡಿದ್ದೀರಾ..? ಟಿಕೆಟ್ ಹಣ ವ್ಯರ್ಥವಾಗುತ್ತದೆ ಎಂದು ಚಿಂತಿಸುತ್ತಿದ್ದೀರಾ..? ಹಾಗಾದರೆ ನಿಮಗೆ ಒಂದು ಉಪಯುಕ್ತ ಅವಕಾಶವಿದೆ. ನೀವು ಪ್ರಯಾಣಿಸಲು ಸಾಧ್ಯವಾಗದ ಸಂದರ್ಭದಲ್ಲಿ, ಕೆಲವು ನಿಯಮಗಳಡಿ ನಿಮ್ಮ ಟಿಕೆಟ್ ಅನ್ನು ಕುಟುಂಬದ ಸದಸ್ಯರು ಸೇರಿದಂತೆ ಅರ್ಹ ವ್ಯಕ್ತಿಗಳ ಹೆಸರಿಗೆ ವರ್ಗಾಯಿಸಬಹುದು. ಈ ಪ್ರಕ್ರಿಯೆ ಹೇಗೆ ಎಂಬುದನ್ನು ತಿಳಿಯೋಣ.

ಹೆಚ್ಚಿನವರು ರೈಲು ಪ್ರಯಾಣಕ್ಕಾಗಿ ಮುಂಚಿತವಾಗಿಯೇ ಆನ್‌ಲೈನ್‌ನಲ್ಲಿ ಟಿಕೆಟ್ ಕಾಯ್ದಿರಿಸುತ್ತಾರೆ. ಇದರಿಂದ ರೈಲು ಹೊರಡುವ ಸಮಯಕ್ಕೆ ನಿಲ್ದಾಣಕ್ಕೆ ತೆರಳಿ ನಿಗದಿತ ಬರ್ತ್‌ನಲ್ಲಿ ಪ್ರಯಾಣಿಸಬಹುದು. ಮುಂಚಿತವಾಗಿ ರಿಸರ್ವೇಶನ್ ಮಾಡಿಕೊಂಡಿರುವುದರಿಂದ ಬರ್ತ್ ಸಿಗುತ್ತದೆಯೇ ಎಂಬ ಆತಂಕವೂ ಇರುವುದಿಲ್ಲ.

ಆದರೆ, ಟಿಕೆಟ್ ಬುಕ್ ಮಾಡಿದ ಬಳಿಕ ಕೆಲವೊಮ್ಮೆ ಅನಿವಾರ್ಯ ಪರಿಸ್ಥಿತಿಗಳಿಂದ ಪ್ರಯಾಣ ರದ್ದುಪಡಿಸಬೇಕಾಗುತ್ತದೆ. ಇಂತಹ ಸಂದರ್ಭದಲ್ಲಿ ಟಿಕೆಟ್ ರದ್ದು ಮಾಡಿದರೆ ನಿಯಮಾನುಸಾರ ಶುಲ್ಕ ಕಡಿತವಾಗುವುದರಿಂದ ಹಣದ ನಷ್ಟವಾಗಬಹುದು. ಆದರೆ ಟಿಕೆಟ್ ಅನ್ನು ಸಂಪೂರ್ಣವಾಗಿ ರದ್ದುಪಡಿಸುವ ಬದಲು, ಕೆಲವು ಸಂದರ್ಭಗಳಲ್ಲಿ ಅದನ್ನು ಬೇರೊಬ್ಬರ ಹೆಸರಿಗೆ ವರ್ಗಾಯಿಸಿಕೊಳ್ಳುವ ಅವಕಾಶವಿದೆ.

ಕುಟುಂಬದ ಸದಸ್ಯರಿಗೆ ಟಿಕೆಟ್ ವರ್ಗಾವಣೆ

ನೀವು ಪ್ರಯಾಣಿಸಲು ಸಾಧ್ಯವಾಗದಿದ್ದರೆ, ನಿಮ್ಮ ಹೆಸರಿನಲ್ಲಿರುವ ಟಿಕೆಟ್ ಅನ್ನು ಅರ್ಹ ಕುಟುಂಬದ ಸದಸ್ಯರ ಹೆಸರಿಗೆ ವರ್ಗಾಯಿಸಬಹುದು. ತಂದೆ-ತಾಯಿ, ಸಹೋದರ-ಸಹೋದರಿ, ಮಗ, ಮಗಳು, ಪತಿ ಅಥವಾ ಪತ್ನಿಯ ಹೆಸರಿಗೆ ಟಿಕೆಟ್ ವರ್ಗಾವಣೆ ಮಾಡಲು ಅವಕಾಶವಿದೆ.

ಇದಲ್ಲದೆ, ವಿದ್ಯಾರ್ಥಿಗಳು ತಮ್ಮ ಶಿಕ್ಷಣ ಸಂಸ್ಥೆಯ ಮತ್ತೊಬ್ಬ ವಿದ್ಯಾರ್ಥಿಗೆ, ಮದುವೆ ಸಮಾರಂಭದ ಗುಂಪಿನ ಸದಸ್ಯರು ಅದೇ ಗುಂಪಿನ ಮತ್ತೊಬ್ಬರಿಗೆ, ಎನ್‌ಸಿಸಿ ಕ್ಯಾಡೆಟ್ ಮತ್ತೊಬ್ಬ ಕ್ಯಾಡೆಟ್‌ಗೆ ಹಾಗೂ ಸರ್ಕಾರಿ ನೌಕರರು ಮತ್ತೊಬ್ಬ ಸರ್ಕಾರಿ ನೌಕರರಿಗೆ ಟಿಕೆಟ್ ವರ್ಗಾಯಿಸಿಕೊಳ್ಳುವ ಅವಕಾಶವಿದೆ.

ಎಷ್ಟು ಸಮಯ ಮೊದಲು ಅರ್ಜಿ ಸಲ್ಲಿಸಬೇಕು?

ಕುಟುಂಬದ ಸದಸ್ಯರ ಹೆಸರಿಗೆ ಟಿಕೆಟ್ ವರ್ಗಾಯಿಸಲು, ರೈಲು ಹೊರಡುವ ಸಮಯಕ್ಕಿಂತ ಕನಿಷ್ಠ 24 ಗಂಟೆಗಳ ಮೊದಲು ಮೀಸಲಾತಿ ಕೌಂಟರ್‌ಗೆ ತೆರಳಿ ಲಿಖಿತವಾಗಿ ಅರ್ಜಿ ಸಲ್ಲಿಸಬೇಕು. ನಿಮ್ಮ ಟಿಕೆಟ್ ಜೊತೆಗೆ ಟಿಕೆಟ್ ವರ್ಗಾಯಿಸಬೇಕಾದ ವ್ಯಕ್ತಿಯ ಅಗತ್ಯ ದಾಖಲೆಗಳನ್ನು ಸಲ್ಲಿಸಬೇಕಾಗುತ್ತದೆ.

ವಿದ್ಯಾರ್ಥಿಗಳು ಟಿಕೆಟ್ ವರ್ಗಾವಣೆಗೆ 48 ಗಂಟೆಗಳ ಮೊದಲು ಅರ್ಜಿ ಸಲ್ಲಿಸಬೇಕು. ಇದಕ್ಕಾಗಿ ಶಿಕ್ಷಣ ಸಂಸ್ಥೆಯಿಂದ ಲಿಖಿತ ಮನವಿಯ ಅಗತ್ಯವಿರುತ್ತದೆ.ಮದುವೆ ಸಮಾರಂಭದ ಗುಂಪುಗಳೂ ರೈಲು ಹೊರಡುವ ಸಮಯಕ್ಕಿಂತ 48 ಗಂಟೆಗಳ ಮೊದಲು ಮೀಸಲಾತಿ ಕೌಂಟರ್‌ಗೆ ತೆರಳಿ ಅರ್ಜಿ ಸಲ್ಲಿಸಬೇಕು. ಎನ್‌ಸಿಸಿ ಕ್ಯಾಡೆಟ್‌ಗಳು ಟಿಕೆಟ್ ವರ್ಗಾವಣೆಗೆ 24 ಗಂಟೆಗಳ ಮೊದಲು ಅರ್ಜಿ ಸಲ್ಲಿಸಬೇಕಾಗುತ್ತದೆ.

ಸರ್ಕಾರಿ ನೌಕರರಿಗೂ ಅವಕಾಶ

ಸರ್ಕಾರಿ ನೌಕರರು ಅಧಿಕೃತ ಕರ್ತವ್ಯದ ನಿಮಿತ್ತ ಪ್ರಯಾಣಿಸಲು ಸಾಧ್ಯವಾಗದ ಸಂದರ್ಭದಲ್ಲಿ, ಕೆಲವು ನಿಯಮಗಳಡಿ ತಮ್ಮ ಟಿಕೆಟ್ ಅನ್ನು ಮತ್ತೊಬ್ಬ ಸರ್ಕಾರಿ ನೌಕರರಿಗೆ ವರ್ಗಾಯಿಸಬಹುದು. ಇದಕ್ಕಾಗಿ ರೈಲು ಹೊರಡುವ ಸಮಯಕ್ಕಿಂತ 24 ಗಂಟೆಗಳ ಮೊದಲು ಅರ್ಜಿ ಸಲ್ಲಿಸಬೇಕು.

ಒಮ್ಮೆ ಮಾತ್ರ ಹೆಸರು ಬದಲಾವಣೆ

ರೈಲು ಟಿಕೆಟ್‌ನಲ್ಲಿರುವ ಪ್ರಯಾಣಿಕರ ಹೆಸರನ್ನು ಬದಲಾಯಿಸುವ ಅವಕಾಶವನ್ನು ಒಮ್ಮೆ ಮಾತ್ರ ಬಳಸಿಕೊಳ್ಳಬಹುದು. ಪದೇಪದೇ ಹೆಸರು ಬದಲಾಯಿಸಲು ರೈಲ್ವೆ ನಿಯಮಗಳು ಅವಕಾಶ ನೀಡುವುದಿಲ್ಲ.

ಹೀಗಾಗಿ, ರೈಲು ಟಿಕೆಟ್ ಬುಕ್ ಮಾಡಿದ ಬಳಿಕ ಪ್ರಯಾಣ ಅನಿವಾರ್ಯ ಕಾರಣದಿಂದ ರದ್ದಾದರೆ, ತಕ್ಷಣವೇ ಟಿಕೆಟ್ ರದ್ದುಪಡಿಸುವ ಬದಲು, ನಿಮ್ಮ ಪರಿಸ್ಥಿತಿಗೆ ಅನುಗುಣವಾಗಿ ಟಿಕೆಟ್ ವರ್ಗಾವಣೆಗೆ ಅವಕಾಶವಿದೆಯೇ ಎಂಬುದನ್ನು ಪರಿಶೀಲಿಸಬಹುದು.