ದುಬೈ: ಒಮನ್‌ ನ ಸಹ-ಪೈಲಟ್ ಫ್ಲೈದುಬೈ ವಿಮಾನದ ಎಂಜಿನ್‌ಗಳನ್ನು ಸ್ಥಗಿತಗೊಳಿಸಿ, ಸೌದಿ ಮರುಭೂಮಿಯಲ್ಲಿ ಅದನ್ನು ಪತನಗೊಳಿಸಲು ಪ್ರಯತ್ನಿಸಿರಬಹುದು ಎಂದು ಗೊತ್ತಾಗಿದೆ.
ಟೆಲ್ ಅವೀವ್‌ ಗೆ ತೆರಳುತ್ತಿದ್ದ ಫ್ಲೈದುಬೈ ವಿಮಾನದ ನಿಯಂತ್ರಣವನ್ನು ವಶಪಡಿಸಿಕೊಳ್ಳುವ ಪ್ರಯತ್ನದಲ್ಲಿ ಭಾರತೀಯ ಕ್ಯಾಪ್ಟನ್ ಸ್ಮಿತ್ ಮಚ್ಚಾರ್ ಅವರ ಮೇಲೆ ಹಲ್ಲೆ ನಡೆಸಿದ ಒಮನ್‌ನ ಸಹ-ಪೈಲಟ್ ಹಮ್ಮಮ್ ಅಲ್-ಹಮ್ಮಮಿ, ವಿಮಾನವನ್ನು ಟೆಲ್ ಅವೀವ್‌ ನಲ್ಲಿ ಪತನಗೊಳಿಸುವ ತನ್ನ ಯೋಜನೆ ವಿಫಲವಾದ ನಂತರ, ವಿಮಾನದ ಎಂಜಿನ್‌ಗಳನ್ನು ಸ್ಥಗಿತಗೊಳಿಸಿ ಸೌದಿ ಮರುಭೂಮಿಯಲ್ಲಿ ಅದನ್ನು ಪತನಗೊಳಿಸಲು ಪ್ರಯತ್ನಿಸಿರಬಹುದು ಎಂದು ‘ವೈನೆಟ್ ನ್ಯೂಸ್’ (Ynet News) ಉಲ್ಲೇಖಿಸಿರುವ ಇಟಾಲಿಯನ್ ಪತ್ರಿಕೆ ‘ಕೊರಿಯರ್ ಡೆಲ್ಲಾ ಸೆರಾ’ದ (Corriere della Sera) ತನಿಖೆಯು ತಿಳಿಸಿದೆ.
ಸಹ-ಪೈಲಟ್ ವಿಮಾನದ ತುರ್ತು ಬಳಕೆಯ ಕೊಡಲಿಯಿಂದ (crash axe) ಮಚ್ಚಾರ್ ಅವರ ಮೇಲೆ ಪದೇ ಪದೇ ಹಲ್ಲೆ ನಡೆಸಿದ ನಂತರ ವಿಮಾನದ ನಿಯಂತ್ರಣವನ್ನು ವಶಪಡಿಸಿಕೊಂಡಿದ್ದಾರೆ ಎಂದು ಆರೋಪಿಸಲಾಗಿದೆ. ಗಾಯಗೊಂಡ ಕ್ಯಾಪ್ಟನ್ ನಂತರ ಕಾಕ್‌ ಪಿಟ್ ಬಾಗಿಲನ್ನು ತೆರೆಯಲು ಅನುವು ಮಾಡಿಕೊಡುವ ಸ್ವಿಚ್ ಅನ್ನು ಸಕ್ರಿಯಗೊಳಿಸಿದರು, ಇದರಿಂದಾಗಿ ಪ್ರಯಾಣಿಕರು ಮಧ್ಯಪ್ರವೇಶಿಸಲು ಸಾಧ್ಯವಾಯಿತು.
‘ಕೊರಿಯರ್ ಡೆಲ್ಲಾ ಸೆರಾ’ದ ತನಿಖೆಯ ಪ್ರಕಾರ, ವಿಮಾನವನ್ನು ಪತನಗೊಳಿಸುವ ತನ್ನ ಮೂಲ ಯೋಜನೆ ವಿಫಲವಾದ ನಂತರ, ಒಮನ್‌ ನ ಸಹ-ಪೈಲಟ್ ಆಟೋಪೈಲಟ್ ವ್ಯವಸ್ಥೆಯನ್ನು ಸಂಪರ್ಕ ಕಡಿತಗೊಳಿಸಿ, ವಿಮಾನವನ್ನು ತೀವ್ರವಾಗಿ ಕೆಳಮುಖವಾಗಿ ಧುಮುಕುವಂತೆ (steep dive) ಮಾಡಿದರು. ಸಹ-ಪೈಲಟ್ ವಿಮಾನವನ್ನು ಸೌದಿ ಮರುಭೂಮಿಯಲ್ಲಿ ಪತನಗೊಳಿಸಲು ಪ್ರಯತ್ನಿಸುತ್ತಿದ್ದಾಗ, ವಿಮಾನವು ಒಂದು ನಿಮಿಷಕ್ಕಿಂತ ಕಡಿಮೆ ಅವಧಿಯಲ್ಲಿ ಸುಮಾರು 16,000 ಅಡಿಗಳಷ್ಟು ಎತ್ತರವನ್ನು ಕಳೆದುಕೊಂಡಿತು ಎಂದು ವರದಿಯಾಗಿದೆ.
ವಿಮಾನದ ಎಂಜಿನ್ ಗಳಿಗೆ ಇಂಧನ ಪೂರೈಕೆ ಸ್ಥಗಿತಗೊಳಿಸಿರಬಹುದು
ಸಹ-ಪೈಲಟ್ ವಿಮಾನದ ಎಂಜಿನ್ ಗಳಿಗೆ ಇಂಧನ ಪೂರೈಕೆಯನ್ನು ಸ್ಥಗಿತಗೊಳಿಸಿರಬಹುದು ಎಂಬ ಸಾಧ್ಯತೆಯನ್ನೂ ‘ಕೊರಿಯರ್ ಡೆಲ್ಲಾ ಸೆರಾ’ದ ತನಿಖೆಯು ವ್ಯಕ್ತಪಡಿಸಿದೆ; ಈ ಅಂಶವನ್ನು ಈ ಹಿಂದೆ ವರದಿ ಮಾಡಲಾಗಿರಲಿಲ್ಲ.
ವಿಮಾನದ ಒಳಗಿನ ದೃಶ್ಯಾವಳಿಗಳನ್ನು ಪರಿಶೀಲಿಸಿದ ಇಬ್ಬರು ಬೋಯಿಂಗ್ 737 ಕ್ಯಾಪ್ಟನ್ ಗಳು, ಹಾರಾಟದ ಸಮಯದಲ್ಲಿ ಪ್ರಯಾಣಿಕರ ಕ್ಯಾಬಿನ್‌ ನಲ್ಲಿ ತುರ್ತು ದೀಪಗಳು ಇದ್ದಕ್ಕಿದ್ದಂತೆ ಉರಿಯಲು ಪ್ರಾರಂಭಿಸಿದ್ದನ್ನು ಗಮನಿಸಿದ ನಂತರ ಈ ಸಾಧ್ಯತೆಯನ್ನು ಕಂಡುಕೊಂಡಿದ್ದಾರೆ ಎಂದು ‘ವೈನೆಟ್ ನ್ಯೂಸ್’ ವರದಿ ಮಾಡಿದೆ.
ತುರ್ತು ದೀಪಗಳನ್ನು ಪ್ರಯಾಣಿಕರನ್ನು ಸ್ಥಳಾಂತರಿಸುವಾಗ ಅಥವಾ ವಿಮಾನವು ನೆಲದ ಮೇಲಿರುವಾಗ ಮಾರ್ಗದರ್ಶನ ನೀಡಲು ವಿನ್ಯಾಸಗೊಳಿಸಲಾಗಿದೆ. ವರದಿಯ ಪ್ರಕಾರ, ವಿಮಾನವು ಸಾಮಾನ್ಯ ಹಾರಾಟದ ಸ್ಥಿತಿಯಲ್ಲಿದ್ದಾಗ (cruising) ಇಂತಹ ದೀಪಗಳು ಸಾಮಾನ್ಯವಾಗಿ ಸಕ್ರಿಯಗೊಳ್ಳುವುದಿಲ್ಲ.
ಬೋಯಿಂಗ್ 737 ವಿಮಾನದ ಮುಖ್ಯ ವಿದ್ಯುತ್ ಪೂರೈಕೆ ಸ್ಥಗಿತಗೊಂಡು ಬ್ಯಾಟರಿ ವಿದ್ಯುತ್ ಗೆ ಬದಲಾದಾಗ ತುರ್ತು ದೀಪಗಳು ಉರಿಯಬಹುದು ಎಂದು ಆ ಇಬ್ಬರು ಕ್ಯಾಪ್ಟನ್‌ಗಳು ‘ಕೊರಿಯರ್ ಡೆಲ್ಲಾ ಸೆರಾ’ಗೆ ತಿಳಿಸಿದ್ದಾರೆ. ವಿಮಾನದ ಜನರೇಟರ್‌ ಗಳು ಅಥವಾ ಎಂಜಿನ್ ಗಳನ್ನು ಸ್ಥಗಿತಗೊಳಿಸಿದಾಗ ಇಂತಹ ಪರಿಸ್ಥಿತಿ ಉಂಟಾಗಬಹುದು. ಆದ್ದರಿಂದ, ಇಂಜಿನ್‌ ಗಳಿಗೆ ಇಂಧನ ಪೂರೈಕೆಯನ್ನು ನಿಯಂತ್ರಿಸುವ ಸ್ವಿಚ್ ಗಳನ್ನು ಸಹ-ಪೈಲಟ್ ‘ರನ್'(Run) ಸ್ಥಿತಿಯಿಂದ ‘ಕಟ್-ಆಫ್'(Cutoff) ಸ್ಥಿತಿಗೆ ಬದಲಾಯಿಸಿದ್ದರೇ ಎಂಬುದನ್ನು ತನಿಖಾಧಿಕಾರಿಗಳು ನಿರ್ಧರಿಸಬೇಕಾಗುತ್ತದೆ ಎಂದು ವರದಿ ತಿಳಿಸಿದೆ.
ಪ್ರಯಾಣಿಕರ ಹೇಳಿಕೆಗಳು, ವಿಮಾನ ಸಿಬ್ಬಂದಿ ಭದ್ರತಾ ಅಧಿಕಾರಿಗಳಿಗೆ ಸಲ್ಲಿಸಿದ ವರದಿಗಳು, ಘಟನೆಯ ಬಗ್ಗೆ ತಿಳಿದಿರುವ ವ್ಯಕ್ತಿಗಳು, ವಿಮಾನ ನಿಲ್ದಾಣದ ಉದ್ಯೋಗಿಗಳು ಮತ್ತು ವಾಯು ಸಂಚಾರ ನಿಯಂತ್ರಕರ (air traffic controllers) ಮಾಹಿತಿ ಹಾಗೂ ವಿವಿಧ ವೇದಿಕೆಗಳಿಂದ ಪಡೆದ ದತ್ತಾಂಶಗಳ ಆಧಾರದ ಮೇಲೆ ತಮ್ಮ ತನಿಖೆಯನ್ನು ನಡೆಸಲಾಗಿದೆ ಎಂದು ‘ಕೊರಿಯರೆ ಡೆಲ್ಲಾ ಸೆರಾ’ (Corriere della Sera) ಪತ್ರಿಕೆ ತಿಳಿಸಿದೆ.
ವಿಮಾನಯಾನದ ಸಮಯದಲ್ಲಿ ಸೆರೆಹಿಡಿಯಲಾದ ವೀಡಿಯೊಗಳನ್ನು, ಪತ್ರಿಕೆಯೊಂದಿಗೆ ಮಾತನಾಡಿದ ಬೋಯಿಂಗ್ 737 ವಿಮಾನದ ಕ್ಯಾಪ್ಟನ್ ಗಳು ಸಹ ವಿಶ್ಲೇಷಿಸಿದ್ದಾರೆ.
‘ಸಾಯಲು ಹೆದರುವುದಿಲ್ಲ’: ಫ್ಲೈದುಬೈ (flydubai) ದಾಳಿಕೋರನ ಬೆಚ್ಚಿಬೀಳಿಸುವ ಹೇಳಿಕೆ
ಇಸ್ರೇಲ್ ನಲ್ಲಿ ವಿಮಾನವನ್ನು ಪತನಗೊಳಿಸಲು ಬಯಸಿದ್ದಾಗಿ ಮತ್ತು ತನಗೆ ಸಾವಿನ ಭಯವಿಲ್ಲ ಎಂದು ಒಮಾನ್ ನ ಸಹ-ಪೈಲಟ್ ಒಪ್ಪಿಕೊಂಡಿದ್ದಾನೆ. ಸೌದಿ ಅರೇಬಿಯಾದ ಅಧಿಕಾರಿಗಳ ವಿಚಾರಣೆಯ ವೇಳೆ ಆತ ಈ ವಿಷಯವನ್ನು ಒಪ್ಪಿಕೊಂಡಿದ್ದಾನೆ ಎಂದು ‘ದಿ ವಾಲ್ ಸ್ಟ್ರೀಟ್ ಜರ್ನಲ್’ (WSJ) ವರದಿ ತಿಳಿಸಿದೆ.
ಹಮ್ಮಮಿ ಒಮಾನ್‌ನ ಪ್ರಜೆಯಾಗಿದ್ದರೂ, ತನ್ನ ಹೆಚ್ಚಿನ ಸಮಯವನ್ನು ದೇಶದ ಹೊರಗೆ, ವಿಶೇಷವಾಗಿ ತನ್ನ ತಾಯಿಯ ತವರು ನೆಲವಾದ ಸಿರಿಯಾದಲ್ಲಿ ಕಳೆದಿದ್ದನು. ಆತ ಸಿರಿಯಾದಲ್ಲಿಯೇ ತನ್ನ ಉಗ್ರಗಾಮಿ ಸಿದ್ಧಾಂತವನ್ನು ಬೆಳೆಸಿಕೊಂಡಿದ್ದನು ಮತ್ತು 2024ರಲ್ಲಿ ‘ಒಮಾನ್ ಏರ್’ನಲ್ಲಿ ಕೆಲಸ ಮಾಡುತ್ತಿದ್ದಾಗ ಆತನ ಬಳಿ ಉಗ್ರಗಾಮಿ ಚಟುವಟಿಕೆಗಳಿಗೆ ಸಂಬಂಧಿಸಿದ ಸಾಮಗ್ರಿಗಳು ಪತ್ತೆಯಾಗಿದ್ದವು. ಆತನ ಉಗ್ರಗಾಮಿ ನಿಲುವುಗಳ ಕಾರಣದಿಂದಾಗಿ, ಸ್ವದೇಶದಲ್ಲಿ ವಿಮಾನ ಹಾರಾಟ ನಡೆಸದಂತೆ ಆತನ ಮೇಲೆ ನಿಷೇಧ ಹೇರಲಾಗಿತ್ತು.
ಯುನೈಟೆಡ್ ಅರಬ್ ಎಮಿರೇಟ್ಸ್ (UAE) ಅಧಿಕಾರಿಗಳು ಕೂಡ ಹಮ್ಮಮಿಯನ್ನು ವಿಚಾರಣೆಗೆ ಒಳಪಡಿಸಿದ್ದರು; ಈ ಸಹ-ಪೈಲಟ್ “ಭಯೋತ್ಪಾದಕ ಕೃತ್ಯ”ವೊಂದನ್ನು ನಡೆಸಲು ಯೋಜನೆ ರೂಪಿಸುತ್ತಿದ್ದ ಎಂದು ಅವರು ತಿಳಿಸಿದ್ದಾರೆ.
“ಸಹ-ಪೈಲಟ್ ಭಯೋತ್ಪಾದಕ ಕೃತ್ಯವನ್ನು ನಡೆಸಲು ಪ್ರಯತ್ನಿಸಿದ್ದನು” ಹಾಗೂ “ಕಾಕ್‌ಪಿಟ್‌ನಲ್ಲಿ ತುರ್ತು ಪರಿಸ್ಥಿತಿಯ ಸಂದರ್ಭದಲ್ಲಿ ಬಳಸುವ ಕೊಡಲಿಯಿಂದ ಕ್ಯಾಪ್ಟನ್ ಮೇಲೆ ದಾಳಿ ಮಾಡಿ, ವಿಮಾನದ ನಿಯಂತ್ರಣವನ್ನು ತನ್ನ ವಶಕ್ಕೆ ತೆಗೆದುಕೊಳ್ಳಲು ಯತ್ನಿಸಿದ್ದನು” ಎಂದು ಮೂಲಗಳನ್ನು ಉಲ್ಲೇಖಿಸಿ ‘ಎಮಿರೇಟ್ಸ್ ನ್ಯೂಸ್ ಏಜೆನ್ಸಿ’ (WAM) ವರದಿ ಮಾಡಿದೆ.
