ಕಲಬುರಗಿ: ಕ್ಯಾನ್ಸರ್ನಂತಹ ಮಾರಕ ರೋಗದಿಂದ ಬಳಲುತ್ತಿರುವ ಬಡ ಮತ್ತು ಮಧ್ಯಮ ವರ್ಗದ ರೋಗಿಗಳಿಗೆ ದೊಡ್ಡ ರಿಲೀಫ್ ನೀಡಿರುವ ಕೇಂದ್ರ ಸರ್ಕಾರದ ನಿರ್ಧಾರವನ್ನು ಹೃತ್ಪೂರ್ವಕವಾಗಿ ಸ್ವಾಗತಿಸುತ್ತೇನೆ ಎಂದು ಸೇಡಂ ಮತಕ್ಷೇತ್ರದ ಮಾಜಿ ಶಾಸಕ ರಾಜಕುಮಾರ ಪಾಟೀಲ್ ತೇಲ್ಕೂರ್ ಹೇಳಿದ್ದಾರೆ.
ಈ ಕುರಿತು ಪತ್ರಿಕಾ ಹೇಳಿಕೆ ಬಿಡುಗಡೆ ಮಾಡಿರುವ ಅವರು, ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಕೇಂದ್ರ ಸರ್ಕಾರ, ರಾಷ್ಟ್ರೀಯ ಔಷಧ ಬೆಲೆ ನಿಯಂತ್ರಣ ಪ್ರಾಧಿಕಾರ (NPPA) ಮೂಲಕ 137 ಕ್ಯಾನ್ಸರ್ ಔಷಧಿಗಳ ಮೇಲಿನ ವ್ಯಾಪಾರ ಲಾಭಾಂಶವನ್ನು ಶೇ.30ಕ್ಕೆ ಮಿತಿಗೊಳಿಸಿ, ಔಷಧಿಗಳ ಬೆಲೆಯನ್ನು ಶೇ.70ರವರೆಗೆ ಇಳಿಕೆ ಮಾಡಿದೆ. ನವೆಂಬರ್ 9, 2026 ರಿಂದ ಹೊಸ ಪರಿಷ್ಕೃತ ದರಗಳು ಜಾರಿಗೆ ಬರಲಿವೆ.
"ಕ್ಯಾನ್ಸರ್ ಚಿಕಿತ್ಸೆ ಎಂದರೆ ಲಕ್ಷಾಂತರ ರೂಪಾಯಿ ಖರ್ಚು. Pembrolizumab, Bevacizumab, Osimertinib ನಂತಹ ದುಬಾರಿ ಇಮ್ಯುನೋಥೆರಪಿ ಔಷಧಿಗಳು ಬಡವರ ಕೈಗೆಟುಕುತ್ತಿರಲಿಲ್ಲ. ಈಗ ಮೋದಿ ಸರ್ಕಾರದ ಈ ಕ್ರಾಂತಿಕಾರಿ ಮತ್ತು ಮಾನವೀಯ ನಿರ್ಧಾರದಿಂದ ಕೋಟ್ಯಂತರ ರೋಗಿಗಳಿಗೆ ಜೀವದಾನ ಸಿಕ್ಕಂತಾಗಿದೆ. ಇದು ಕೇವಲ ಬೆಲೆ ಇಳಿಕೆಯಲ್ಲ, ಬಡವರ ಬದುಕಿನ ಜೊತೆಗಿನ ಬದ್ಧತೆ" ಎಂದು ತೇಲ್ಕೂರ್ ಬಣ್ಣಿಸಿದ್ದಾರೆ.
"ಕಾಂಗ್ರೆಸ್ ಆಡಳಿತದಲ್ಲಿ ಔಷಧ ಕಂಪನಿಗಳು ಮನಬಂದಂತೆ ಬೆಲೆ ನಿಗದಿ ಮಾಡಿ ಲೂಟಿ ಮಾಡುತ್ತಿದ್ದವು. ಆದರೆ ಮೋದಿಜೀ ಅವರು ಜನೌಷಧಿ ಕೇಂದ್ರ, ಆಯುಷ್ಮಾನ್ ಭಾರತ್ ಮೂಲಕ ಬಡವರ ಆರೋಗ್ಯಕ್ಕೆ ಭದ್ರತೆ ನೀಡಿದ್ದಾರೆ. ಈಗ ಕ್ಯಾನ್ಸರ್ ಔಷಧಿಗಳ ಬೆಲೆ ಇಳಿಕೆ ಮೂಲಕ ಮತ್ತೊಮ್ಮೆ ಬಡವರ ಪರ ಸರ್ಕಾರ ಎಂಬುದನ್ನು ಸಾಬೀತುಪಡಿಸಿದ್ದಾರೆ. ಕಾಂಗ್ರೆಸ್ ಅವಧಿಯಲ್ಲಿ ಲೂಟಿ ಇತ್ತು, ಮೋದಿ ಅವಧಿಯಲ್ಲಿ ರಿಯಾಯಿತಿ ಸಿಗುತ್ತಿದೆ" ಎಂದು ಹೇಳಿದರು.
ಕೇಂದ್ರ ರಾಸಾಯನಿಕ ಮತ್ತು ರಸಗೊಬ್ಬರ ಖಾತೆ ಸಚಿವರಿಗೆ ಹಾಗೂ ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಸೇಡಂ ಕ್ಷೇತ್ರದ ಜನತೆಯ ಪರವಾಗಿ ಹೃತ್ಪೂರ್ವಕ ಅಭಿನಂದನೆಗಳನ್ನು ಸಲ್ಲಿಸುವುದಾಗಿ ತೇಲ್ಕೂರ್ ತಿಳಿಸಿದ್ದಾರೆ.
