ವಿಕ್ಟೋರಿಯಾಸ್ ಸೀಕ್ರೆಟ್ ಶೋನಲ್ಲಿ ಮಿಂಚಿದ ಮಲಯಾಳಿ ಬೆಡಗಿ! ಯಾರು ಈ ರಾವ್ಲೀನ್ ವರ್ಗೀಸ್?

ಅಕ್ಟೋಬರ್ 18ರಂದು ವಿಶ್ವಪ್ರಸಿದ್ಧ ‘ವಿಕ್ಟೋರಿಯಾಸ್ ಸೀಕ್ರೆಟ್’ ಫ್ಯಾಷನ್ ಶೋ ಅದ್ಧೂರಿಯಾಗಿ ನಡೆಯಿತು. ಈ ಫ್ಯಾಷನ್ ಶೋ ಅನ್ನು ಜಗತ್ತಿನಾದ್ಯಂತದ ಫ್ಯಾಷನ್ ಪ್ರಿಯರು ಕಾತರದಿಂದ ಕಾಯುತ್ತಿರುತ್ತಾರೆ. ಸೂಪರ್ ಮಾಡೆಲ್‌ಗಳಾದ ಆಡ್ರಿಯಾನಾ ಲಿಮಾ, ಗಿಗಿ ಹದೀದ್, ಬೆಲ್ಲಾ ಹದೀದ್ ಮತ್ತು ಕೈಲಿ ಜೆನ್ನರ್ ಸೇರಿದಂತೆ ಹಲವು ಖ್ಯಾತ ಮಾಡೆಲ್‌ಗಳು ‘ವಿಕ್ಟೋರಿಯಾಸ್ ಸೀಕ್ರೆಟ್ ಏಂಜಲ್ಸ್’ ಆಗಿ ರ‍್ಯಾಂಪ್ ವಾಕ್ ಮಾಡಿದರು.

ಈ ಖ್ಯಾತನಾಮರ ನಡುವೆ ಮಲಯಾಳಿ ಮಾಡೆಲ್ ಒಬ್ಬರು ಕೂಡ ಎಲ್ಲರ ಗಮನ ಸೆಳೆದರು. ಅವರೇ ರಾವ್ಲೀನ್ ವರ್ಗೀಸ್. ಈ ಪ್ರತಿಷ್ಠಿತ ಫ್ಯಾಷನ್ ಶೋನಲ್ಲಿ ತಮ್ಮ ಅದ್ಭುತ ಪ್ರದರ್ಶನದ ಮೂಲಕ ರಾವ್ಲೀನ್ ಭಾರತೀಯ ಮಹಿಳೆಯರನ್ನು ಪ್ರತಿನಿಧಿಸಿ ಅನೇಕರ ಮೆಚ್ಚುಗೆಗೆ ಪಾತ್ರರಾಗಿದ್ದಾರೆ.

ಯಾರು ಈ ರಾವ್ಲೀನ್ ವರ್ಗೀಸ್?

ಕೇರಳದ ಪತ್ತನಂತಿಟ್ಟ ಜಿಲ್ಲೆಯವರಾದ 25 ವರ್ಷದ ರಾವ್ಲೀನ್ ವರ್ಗೀಸ್, ‘ವಿಕ್ಟೋರಿಯಾಸ್ ಸೀಕ್ರೆಟ್’ ಫ್ಯಾಷನ್ ಶೋನಲ್ಲಿ ರ‍್ಯಾಂಪ್ ವಾಕ್ ಮಾಡಿದ ಮೊದಲ ಮಲಯಾಳಿ ಮಾಡೆಲ್ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.

ಆಶ್ಚರ್ಯದ ಸಂಗತಿಯೆಂದರೆ, ಮಾಡೆಲಿಂಗ್ ಅವರ ಆರಂಭಿಕ ಗುರಿಯಾಗಿರಲಿಲ್ಲ. ಡಿಸೈನ್ ಶಾಲೆಯಲ್ಲಿ ಓದಲು ದೆಹಲಿಗೆ ಬಂದಿದ್ದಾಗ, ಅವರಿಗೆ ಕೇವಲ 18 ವರ್ಷ ವಯಸ್ಸಿನಲ್ಲಿ ಮಾಡೆಲಿಂಗ್ ಅವಕಾಶ ದೊರೆಯಿತು.

ನಂತರ ನ್ಯೂಯಾರ್ಕ್ ಫ್ಯಾಷನ್ ವೀಕ್‌ನಲ್ಲಿ ಖ್ಯಾತ ವಿನ್ಯಾಸಕ ಪ್ರಬಲ್ ಗುರುಂಗ್ ಅವರ SS25 ಸಂಗ್ರಹದ ಮೂಲಕ ಮಾಡೆಲಿಂಗ್ ಕ್ಷೇತ್ರದಲ್ಲಿ ಮೊದಲ ದೊಡ್ಡ ಅವಕಾಶವನ್ನು ಪಡೆದುಕೊಂಡರು.

ಎರಡು ವಿಭಿನ್ನ ಲುಕ್‌ಗಳಲ್ಲಿ ಮಿಂಚಿದ ರಾವ್ಲೀನ್

ನ್ಯೂಯಾರ್ಕ್ ಫ್ಯಾಷನ್ ವೀಕ್‌ನಲ್ಲಿ ಭಾಗವಹಿಸಿದ ಕೇವಲ ಒಂದು ವರ್ಷದೊಳಗೆ ರಾವ್ಲೀನ್‌ಗೆ ವಿಕ್ಟೋರಿಯಾಸ್ ಸೀಕ್ರೆಟ್ ಫ್ಯಾಷನ್ ಶೋನಲ್ಲಿ ರ‍್ಯಾಂಪ್ ವಾಕ್ ಮಾಡುವ ಅವಕಾಶ ಸಿಕ್ಕಿತು. ಈ ಶೋನಲ್ಲಿ ಅವರು ಎರಡು ವಿಭಿನ್ನ ಲುಕ್‌ಗಳಲ್ಲಿ ಕಾಣಿಸಿಕೊಂಡರು.

• ಮೊದಲ ಲುಕ್: ಗುಲಾಬಿ ಬಣ್ಣದ ಪಾರದರ್ಶಕ ಲೇಸ್ ಒಳ ಉಡುಪುಗಳ ಸೆಟ್‌ ಧರಿಸಿ, ಅದರ ಮೇಲೆ ರೋಬ್‌ ಧರಿಸಿದ್ದರು.

• ಎರಡನೇ ಲುಕ್: ಬಿಳಿ ಬಣ್ಣದ ಕಸೂತಿ ವಿನ್ಯಾಸವಿದ್ದ ಕಪ್ಪು ಲೇಸ್ ಒಳ ಉಡುಪುಗಳ ಉಡುಪಿನಲ್ಲಿ ಕಾಣಿಸಿಕೊಂಡರು.

ಎರಡೂ ಲುಕ್‌ಗಳನ್ನು ರಾವ್ಲೀನ್ ಆತ್ಮವಿಶ್ವಾಸ ಮತ್ತು ಸೊಗಸಿನಿಂದ ಪ್ರದರ್ಶಿಸಿದರು. ಅವರ ರ‍್ಯಾಂಪ್ ವಾಕ್ ಫ್ಯಾಷನ್ ಪ್ರಿಯರ ಗಮನ ಸೆಳೆಯಿತು.

ಫ್ಯಾಷನ್ ಶೋ ದಿನ ರಾವ್ಲೀನ್ ಅವರ ದಿನಚರಿ ಹೇಗಿರುತ್ತದೆ?

‘ಡಯಟ್ ಸಬ್ಯಾ’ ಎಂಬ ಫ್ಯಾಷನ್ ಪೇಜ್ ಅಕ್ಟೋಬರ್ 19ರಂದು ಇನ್‌ಸ್ಟಾಗ್ರಾಮ್‌ನಲ್ಲಿ ರಾವ್ಲೀನ್ ಅವರ ಚಿತ್ರಗಳನ್ನು ಹಂಚಿಕೊಂಡು, “ಹೊಸ ತಾರೆಯ ಉದಯವಾಗಿದೆ. ಈ ಶೋನಲ್ಲಿ ರ‍್ಯಾಂಪ್ ವಾಕ್ ಮಾಡಿದ ಮೊದಲ ಮಲಯಾಳಿ ಮಾಡೆಲ್ ಇವರಾಗಿದ್ದಾರೆ” ಎಂಬರ್ಥದ ಶ್ಲಾಘನೆಯನ್ನು ವ್ಯಕ್ತಪಡಿಸಿದೆ.

ವರದಿಗಳ ಪ್ರಕಾರ, ಫ್ಯಾಷನ್ ಶೋಗೆ ಮುನ್ನ ರಾವ್ಲೀನ್ ಮಲಯಾಳಂ ಹಾಡುಗಳನ್ನು ಹಾಕಿಕೊಂಡು ನೃತ್ಯ ಮಾಡುತ್ತಾ ತಮ್ಮ ತ್ವಚೆಯ ಆರೈಕೆ ಮಾಡಿಕೊಳ್ಳಲು ಇಷ್ಟಪಡುತ್ತಾರೆ.ಇನ್ನು ಶೋ ಮುಗಿದ ಬಳಿಕ ಬ್ರೂಕ್ಲಿನ್‌ನ ‘ತಕಹಾಚಿ’ (Takahachi) ರೆಸ್ಟೋರೆಂಟ್‌ನ ಮ್ಯಾಚಾ ಸಾಫ್ಟ್ ಸರ್ವ್ ಐಸ್‌ಕ್ರೀಂ ಸವಿಯುವುದು ಅವರಿಗೆ ಇಷ್ಟವಂತೆ.