ಬೆಂಗಳೂರು: ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರಿಗೆ ಸಂಬಂಧಿಸಿದ ಸೌಂಡ್ ಮತ್ತು ಸ್ಟಿಂಗ್ ವೀಡಿಯೋ ಪ್ರಕರಣದಲ್ಲಿ ಪ್ರಮುಖ ಬೆಳವಣಿಗೆಯೊಂದು ನಡೆದಿದ್ದು, ವೀಡಿಯೋದಲ್ಲಿದ್ದ ಮಹಿಳೆಯು ಸಿಸಿಬಿ ಮುಂಭಾಗ ಹೊಸ ಹೇಳಿಕೆ ನೀಡಿದ್ದಾರೆ. ಈ ಮೂಲಕ ಸಿದ್ದರಾಮಯ್ಯ ಅವರಿಗೆ ಪ್ರಕರಣದಿಂದ ಬಹುತೇಕ ಬಿಗ್ ರಿಲೀಫ್ ಸಿಕ್ಕಂತಾಗಿದೆ. ತನಿಖೆ ವೇಳೆ ಮಹಿಳೆಯು ಸಿದ್ದರಾಮಯ್ಯ ಅವರಿಂದ ನನಗೆ ಯಾವುದೇ ತೊಂದರೆಯಾಗಿಲ್ಲ ಮತ್ತು ನಾನು ಅವರನ್ನು ಭೇಟಿಯಾಗೇ ಇಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ. ಅಲ್ಲದೆ, ಯಾರೋ ಹೇಳಿಕೊಟ್ಟ ಮಾತುಗಳನ್ನು ಆಧರಿಸಿ ಮತ್ತು ವೀಡಿಯೋ ಮಾಡಿದವರ ಮಾರ್ಗದರ್ಶನದಂತೆ ತಾನು ಹಾಗೆ ಹೇಳಿಕೆ ನೀಡಿದ್ದಾಗಿ ಆಕೆ ಬಹಿರಂಗಪಡಿಸಿದ್ದಾರೆ.
ದ್ವೇಷಪೂರಿತ ಉದ್ದೇಶದಿಂದ ಹಾಗೂ ರಾಜಕೀಯ ಅಥವಾ ವೈಯಕ್ತಿಕ ಲಾಭ ಪಡೆಯುವ ಸಲುವಾಗಿ ಈ ವೀಡಿಯೋವನ್ನು ಯೋಜಿತವಾಗಿ ಚಿತ್ರೀಕರಿಸಲಾಗಿದೆ ಎಂಬ ಅನುಮಾನಗಳು ಈಗ ಬಲವಾಗಿ ವ್ಯಕ್ತವಾಗಿವೆ. ಒಂದು ವೇಳೆ ಮಹಿಳೆಯು ಸಿದ್ದರಾಮಯ್ಯ ಅವರ ವಿರುದ್ಧವೇ ಅಧಿಕೃತವಾಗಿ ದೂರು ಅಥವಾ ಹೇಳಿಕೆ ನೀಡಿದ್ದರೆ ಅವರ ವಿರುದ್ಧ ಎಫ್‌ಐಆರ್ ಅಥವಾ ಕೇಸ್ ದಾಖಲಾಗಬೇಕಿತ್ತು. ಆದರೆ ಮಹಿಳೆ ಮಾಜಿ ಸಿಎಂ ವಿರುದ್ಧ ಯಾವುದೇ ದೂರು ನೀಡಿಲ್ಲದಿರುವುದರಿಂದ, ಈ ಸ್ಟಿಂಗ್ ಪ್ರಕರಣದಲ್ಲಿ ಸಿದ್ದರಾಮಯ್ಯ ಅವರಿಗೆ ಯಾವುದೇ ರೀತಿಯ ಕಾನೂನು ತೊಡಕುಗಳಿಲ್ಲ ಎಂಬುದು ಸದ್ಯಕ್ಕೆ ಸ್ಪಷ್ಟವಾಗಿದೆ.
ಸಿಸಿಬಿ ಪೊಲೀಸರ ಮುಂದೆ ನೀಡಿದ ಈ ಹೇಳಿಕೆಯನ್ನು ಸದ್ಯಕ್ಕೆ ಅಧಿಕೃತ ಕೇಸ್ ಫೈಲ್‌ಗೆ ಸೇರಿಸಲಾಗಿಲ್ಲ. ಏಕೆಂದರೆ, ನಿಯಮಾವಳಿಗಳ ಪ್ರಕಾರ ಮಹಿಳೆಯು ಸಿಸಿಬಿ ನೀಡಿದ ಹೇಳಿಕೆಯನ್ನೇ ನ್ಯಾಯಾಲಯದ (ಕೋರ್ಟ್) ಮುಂಭಾಗದಲ್ಲೂ ನೀಡಬೇಕಾಗುತ್ತದೆ. ಕೋರ್ಟ್‌ನಲ್ಲೂ ಮಹಿಳೆ ಇದೇ ಹೇಳಿಕೆಯನ್ನು ಪುನರಾವರ್ತಿಸಿದರೆ, ಎರಡೂ ಹೇಳಿಕೆಗಳನ್ನು ಪರಿಶೀಲಿಸಿ ಕೇಸ್ ಫೈಲ್‌ಗೆ ಸೇರಿಸಲಾಗುತ್ತದೆ. ನ್ಯಾಯಾಲಯದಲ್ಲೂ ಒಂದೇ ರೀತಿಯ ಹೇಳಿಕೆ ದಾಖಲಾದರೆ, ಸಿದ್ದರಾಮಯ್ಯ ಅವರಿಗೆ ಈ ಪ್ರಕರಣದಿಂದ ಸಂಪೂರ್ಣವಾಗಿ 'ಕ್ಲೀನ್‌ಚಿಟ್' ಸಿಗುವುದು ಬಹುತೇಕ ಖಚಿತವಾಗಲಿದೆ.
