ಪರ್ತ್ ನಲ್ಲಿ ಆರಂಭವಾಗಿರುವ ಆಸ್ಟ್ರೇಲಿಯಾ ಮತ್ತು ಇಂಗ್ಲೆಂಡ್ ನಡುವಿನ ಮೊದಲ ಏಕದಿನ ಪಂದ್ಯದಲ್ಲಿ ಆತಿಥೇಯ ಆಸೀಸ್ ಬೌಲರ್ ಗಳು ಭರ್ಜರಿ ಪ್ರದರ್ಶನ ನೀಡಿದ್ದಾರೆ. ಪದಾರ್ಪಣೆ ಪಂದ್ಯವನ್ನಾಡಿದ ಯುವ ವೇಗಿ ಮಹ್ಲಿ ಬಿಯರ್ಡ್‌ಮನ್ ಅವರ ಮಾರಕ ಬೌಲಿಂಗ್ ದಾಳಿಗೆ ನಲುಗಿದ ಇಂಗ್ಲೆಂಡ್ ತಂಡ, ಕೇವಲ 33.4 ಓವರ್ ಗಳಲ್ಲಿ 131 ರನ್ ಗಳಿಗೆ ಸರ್ವಪತನ ಕಂಡಿದೆ.
ಉಸ್ಮಾನ್ ಖವಾಜಾ ಅವರ ಪುಸ್ತಕದ ವಿವಾದ ಹಾಗೂ ನಾಯಕ ಪ್ಯಾಟ್ ಕಮಿನ್ಸ್ ಅವರ ಖಡಕ್ ಪ್ರತಿಕ್ರಿಯೆಯ ಬಿಸಿ ನಡುವೆಯೇ ಈ ಸರಣಿ ಆರಂಭವಾಗಿದೆ. ಮಿಚೆಲ್ ಮಾರ್ಷ್ ನಾಯಕತ್ವದ ಆಸ್ಟ್ರೇಲಿಯಾ ತಂಡದ ವಿರುದ್ಧ ಹ್ಯಾರಿ ಬ್ರೂಕ್ ಸಾರಥ್ಯದ ಇಂಗ್ಲೆಂಡ್ ಪಡೆ ಬ್ಯಾಟಿಂಗ್ ವೈಫಲ್ಯ ಅನುಭವಿಸಿತು. ಇಂಗ್ಲೆಂಡ್ ಹಿರಿಯ ಬ್ಯಾಟರ್ ಜೋ ರೂಟ್ ಅವರಿಗೆ ಇದು 200ನೇ ಏಕದಿನ ಪಂದ್ಯವಾಗಿದ್ದರೂ ತಂಡಕ್ಕೆ ದೊಡ್ಡ ಮೊತ್ತ ಪೇರಿಸಲು ಸಾಧ್ಯವಾಗಲಿಲ್ಲ.
ಇನಿಂಗ್ಸ್ ನ ಆರಂಭದಿಂದಲೂ ಆಸೀಸ್ ವೇಗಿಗಳ ವೇಗ ಮತ್ತು ಸ್ವಿಂಗ್ ಎದುರಿಸಲು ಇಂಗ್ಲೆಂಡ್ ಬ್ಯಾಟರ್ ಗಳು ಪರದಾಡಿದರು. ವಿಶೇಷವಾಗಿ ತಮ್ಮ ಚೊಚ್ಚಲ ಅಂತಾರಾಷ್ಟ್ರೀಯ ಪಂದ್ಯದಲ್ಲೇ ಚೆಂಡಿನೊಂದಿಗೆ ಮ್ಯಾಜಿಕ್ ಮಾಡಿದ ಮಹ್ಲಿ ಬಿಯರ್ಡ್‌ಮನ್ ಬರೋಬ್ಬರಿ ಆರು ವಿಕೆಟ್ ಕಬಳಿಸಿ ಇಂಗ್ಲೆಂಡ್ ಬ್ಯಾಟಿಂಗ್ ಬೆನ್ನೆಲುಬು ಮುರಿದರು.
34ನೇ ಓವರ್ ನ ನಾಲ್ಕನೇ ಎಸೆತದಲ್ಲಿ ಜೋಫ್ರಾ ಆರ್ಚರ್ ಅವರ ವಿಕೆಟ್ ಪಡೆಯುವ ಮೂಲಕ ಬಿಯರ್ಡ್‌ಮನ್ ಇಂಗ್ಲೆಂಡ್ ಇನಿಂಗ್ಸ್ ಗೆ ತೆರೆ ಎಳೆದರು. ಆಫ್ ಸ್ಟಂಪ್ ಆಚೆ ಬಿದ್ದ ಚೆಂಡನ್ನು ಆರ್ಚರ್ ಬಾರಿಸಲು ಯತ್ನಿಸಿದಾಗ ಬ್ಯಾಟ್ ನ ಅಂಚಿಗೆ ತಗುಲಿ ಬ್ಯಾಕ್ ವರ್ಡ್ ಪಾಯಿಂಟ್ ದಿಕ್ಕಿನತ್ತ ಚಿಮ್ಮಿತು. ಅಲ್ಲಿದ್ದ ಜ್ಯಾಕ್ ಎಡ್ವರ್ಡ್ಸ್ ತಮ್ಮ ಎಡಭಾಗಕ್ಕೆ ಅದ್ಭುತವಾಗಿ ಡೈವ್ ಮಾಡಿ ಹಿಡಿದ ರೋಚಕ ಕ್ಯಾಚ್ ಗೆ ಇಂಗ್ಲೆಂಡ್ ಇನಿಂಗ್ಸ್ ಅಂತ್ಯಗೊಂಡಿತು.
