ದೇಶದಲ್ಲಿನ ಅತ್ಯಂತ ಜನಪ್ರಿಯ ಉಳಿತಾಯ ಯೋಜನೆಗಳಲ್ಲಿ ಸಾರ್ವಜನಿಕ ಭವಿಷ್ಯ ನಿಧಿ (PPF – Public Provident Fund) ಪ್ರಮುಖ ಸ್ಥಾನದಲ್ಲಿದೆ. ಕಡಿಮೆ ಮೊತ್ತದಿಂದ ಹೂಡಿಕೆ ಮಾಡಿ ದೀರ್ಘಾವಧಿಯಲ್ಲಿ ಉತ್ತಮ ಆದಾಯ ಪಡೆಯಲು ಬಯಸುವವರಿಗೆ ಇದು ಅತ್ಯುತ್ತಮ ಯೋಜನೆ ಎಂದು ಪರಿಗಣಿಸಲಾಗಿದೆ. ಕೇಂದ್ರ ಸರ್ಕಾರದ ಬೆಂಬಲ ಇರುವುದರಿಂದ ಹೂಡಿಕೆ ಸಂಪೂರ್ಣ ಸುರಕ್ಷಿತವಾಗಿದ್ದು, ಷೇರು ಮಾರುಕಟ್ಟೆಯ ಏರಿಳಿತಗಳ ಪ್ರಭಾವವೂ ಇದಕ್ಕೆ ಇರುವುದಿಲ್ಲ.
PPF ಯ ವಿಶೇಷತೆಗಳು
- ಹೂಡಿಕೆಗೆ ಕೇಂದ್ರ ಸರ್ಕಾರದ ಭರವಸೆ
- ಸಂಪೂರ್ಣ ಸುರಕ್ಷಿತ ಮತ್ತು ಅಪಾಯರಹಿತ ಯೋಜನೆ
- ಆದಾಯ ತೆರಿಗೆ ಕಾಯ್ದೆಯ ಸೆಕ್ಷನ್ 80C ಅಡಿಯಲ್ಲಿ ತೆರಿಗೆ ವಿನಾಯಿತಿ
- ಹೂಡಿಕೆ, ಬಡ್ಡಿ ಮತ್ತು ಮೆಚ್ಯೂರಿಟಿ ಮೊತ್ತ – ಎಲ್ಲವೂ ತೆರಿಗೆ ಮುಕ್ತ
- ನಿವೃತ್ತಿ ಜೀವನಕ್ಕೆ ಉತ್ತಮ ಆರ್ಥಿಕ ಭದ್ರತೆ
ತೆರಿಗೆ ಉಳಿತಾಯದ ಜೊತೆಗೆ ತಿಂಗಳಿಗೆ ₹1 ಲಕ್ಷ ಆದಾಯ ಹೇಗೆ?
PPF ಮೂಲಕ ತೆರಿಗೆ ಉಳಿತಾಯ ಮಾಡಿಕೊಳ್ಳುವುದಷ್ಟೇ ಅಲ್ಲ, ನಿವೃತ್ತಿಯ ನಂತರ ಪ್ರತಿ ತಿಂಗಳು ದೊಡ್ಡ ಮೊತ್ತದ ಆದಾಯ ಪಡೆಯುವ ಅವಕಾಶವೂ ಇದೆ.ಒಂದು ಹಣಕಾಸು ವರ್ಷದಲ್ಲಿ ಗರಿಷ್ಠ ₹1.50 ಲಕ್ಷ ಹೂಡಿಕೆ ಮಾಡಬಹುದು. ವಾರ್ಷಿಕ ಸರಾಸರಿ 7.1% ಬಡ್ಡಿದರ ಆಧಾರದ ಮೇಲೆ ಲೆಕ್ಕ ಹಾಕಿದರೆ, 30 ವರ್ಷಗಳ ನಂತರ ಹೂಡಿಕೆ ಮೊತ್ತ ಸುಮಾರು ₹1.54 ಕೋಟಿ ಆಗಬಹುದು.ಈ ಮೊತ್ತವನ್ನು ಒಮ್ಮೆಗೆ ಹಿಂಪಡೆಯದೇ, ವರ್ಷಕ್ಕೆ ಸುಮಾರು 7% ಸ್ಥಿರ ಆದಾಯ ನೀಡುವ ಸುರಕ್ಷಿತ ಹೂಡಿಕೆ ಸಾಧನದಲ್ಲಿ ಇಟ್ಟು, ತಿಂಗಳಿಗೆ ₹1 ಲಕ್ಷದಂತೆ ಹಿಂಪಡೆಯುವ ಯೋಜನೆ ಅನುಸರಿಸಿದರೆ, ಸುಮಾರು 20 ವರ್ಷಗಳ ಕಾಲ ಪಿಂಚಣಿ ಮಾದರಿಯ ಆದಾಯ ಪಡೆಯಬಹುದು.
ಹೀಗೆ 20 ವರ್ಷಗಳ ಕಾಲ ಪ್ರತಿ ತಿಂಗಳು ₹1 ಲಕ್ಷದಂತೆ ಒಟ್ಟು ₹2.40 ಕೋಟಿ ಹಣವನ್ನು ಹಿಂಪಡೆದ ಬಳಿಕವೂ, ನಿಮ್ಮ ಖಾತೆಯಲ್ಲಿ ಸುಮಾರು ₹1.5 ಕೋಟಿಗೂ ಹೆಚ್ಚು ಮೊತ್ತ ಉಳಿಯುವ ಸಾಧ್ಯತೆ ಇದೆ ಎಂದು ಹಣಕಾಸು ತಜ್ಞರು ಅಭಿಪ್ರಾಯಪಡುತ್ತಾರೆ.
PPF ಖಾತೆಯನ್ನು ಎಷ್ಟು ವರ್ಷ ವಿಸ್ತರಿಸಬಹುದು ?
ಸಾಮಾನ್ಯವಾಗಿ PPF ಖಾತೆಯ ಅವಧಿ 15 ವರ್ಷಗಳು. ಆದರೆ ಅದರ ಬಳಿಕ ಪ್ರತಿ 5 ವರ್ಷಗಳ ಅವಧಿಗೆ ಅನಿಯಮಿತ ಬಾರಿ ವಿಸ್ತರಿಸಿಕೊಳ್ಳುವ ಅವಕಾಶ ಕೇಂದ್ರ ಸರ್ಕಾರ ನೀಡಿದೆ.ಉದಾಹರಣೆಗೆ, ಒಬ್ಬ ವ್ಯಕ್ತಿ 30ನೇ ವಯಸ್ಸಿನಲ್ಲಿ PPF ಖಾತೆ ತೆರೆಯುತ್ತಿದ್ದರೆ, 15 ವರ್ಷಗಳ ಬಳಿಕ ಅದನ್ನು ಮೂರು ಬಾರಿ ತಲಾ 5 ವರ್ಷಗಳಂತೆ ವಿಸ್ತರಿಸಿದರೆ, ಒಟ್ಟು 30 ವರ್ಷಗಳ ಕಾಲ ಹೂಡಿಕೆಯನ್ನು ಮುಂದುವರಿಸಬಹುದು.
ಗಮನಿಸಿ: ಮೇಲಿನ ಲೆಕ್ಕಾಚಾರಗಳು ಪ್ರಸ್ತುತ ಬಡ್ಡಿದರ ಮತ್ತು ಅಂದಾಜು ಆದಾಯದ ಆಧಾರದ ಮೇಲೆ ನೀಡಲ್ಪಟ್ಟಿವೆ. ಬಡ್ಡಿದರಗಳು ಕಾಲಾನುಗುಣವಾಗಿ ಬದಲಾಗಬಹುದು.
