ಗ್ಲಾಮರಸ್ ಲುಕ್ ಹಾಗೂ ಸಾಮಾಜಿಕ ಕಾಳಜಿಯ ಮೂಲಕ ಸದಾ ಸುದ್ದಿಯಲ್ಲಿರುವ ನ್ಯಾಷನಲ್ ಕ್ರಶ್ ರಶ್ಮಿಕಾ ಮಂದಣ್ಣ ಇತ್ತೀಚೆಗೆ ನಡೆದ ಸ್ವಾರೋವ್ಸ್ಕಿ ದೀಪಾವಳಿ ಪಾರ್ಟಿಯಲ್ಲಿ ತಮ್ಮ ವಿಭಿನ್ನ ಫ್ಯಾಷನ್ ಉಡುಗೆಯಿಂದ ಎಲ್ಲರ ಗಮನ ಸೆಳೆದಿದ್ದಾರೆ. ಖ್ಯಾತ ಫ್ಯಾಷನ್ ಡಿಸೈನರ್ ಅಮಿತ್ ಅಗರ್ವಾಲ್ ಅವರ ವಿಶೇಷ ವಿನ್ಯಾಸದ ಉಡುಗೆಯಲ್ಲಿ ಕಂಗೊಳಿಸಿರುವ ರಶ್ಮಿಕಾ ಫ್ಯಾಷನ್ ಪ್ರಿಯರ ಮೆಚ್ಚುಗೆಗೆ ಪಾತ್ರರಾಗಿದ್ದಾರೆ.
ಸ್ವಾರೋವ್ಸ್ಕಿ ದೀಪಾವಳಿ ಪಾರ್ಟಿಯಲ್ಲಿ ಭಾಗವಹಿಸಿದ್ದ ರಶ್ಮಿಕಾ ಮಂದಣ್ಣ ನೀಲಿ ಬಣ್ಣದ ಆಕರ್ಷಕ ಕಸ್ಟಮ್ ಅಮಿತ್ ಅಗರ್ವಾಲ್ ಕೌಚರ್ ಧರಿಸಿ ಬಂದಿದ್ದರು. ಸಾವಿರಾರು ಹರಳುಗಳಿಂದ ಜರ್ಜರಿತವಾದ ಸ್ಟ್ರಾಪ್‌ಲೆಸ್ ಕಾರ್ಸೆಟ್ ಹಾಗೂ ಸೊಂಟದ ಸುತ್ತಲೂ ಅಂದವಾಗಿ ಮಡಚಿದ ವಿನ್ಯಾಸದ ಸ್ಕರ್ಟ್ ಧರಿಸಿದ್ದರು. ಇದರೊಂದಿಗೆ ಸಾಂಪ್ರದಾಯಿಕ ಬನಾರಸಿ ದುಪಟ್ಟಾವನ್ನು ಕೈಗಳ ಮೇಲೆ ಧರಿಸುವ ಮೂಲಕ ಮಾಡರ್ನ್ ಹಾಗೂ ಟ್ರೆಡಿಷನಲ್ ಲುಕ್‌ನ ಮೇಳೈಸಿದ್ದರು. ನೇರವಾದ ಕೇಶವಿನ್ಯಾಸ, ವಜ್ರಖಚಿತ ಆಭರಣಗಳು, ಕ್ರೀಮಿ ಬ್ರೌನ್ ಲಿಪ್‌ಸ್ಟಿಕ್ ಹಾಗೂ ಮಿನಿಮಲ್ ಮೇಕಪ್ ಅವರ ಸೌಂದರ್ಯವನ್ನು ಇನ್ನುಷ್ಟು ಹೆಚ್ಚಿಸಿತ್ತು.
ಇನ್ನು ಸಿನಿಮಾಗಳ ವಿಚಾರಕ್ಕೆ ಬರುವುದಾದರೆ, ರಶ್ಮಿಕಾ ಮಂದಣ್ಣ ನಟನೆಯ ‘ಕಾಕ್‌ಟೈಲ್ 2’ ಸಿನಿಮಾ ಬಳಿಕ ಮುಂಬರುವ ದಿನಗಳಲ್ಲಿ ವಿಜಯ್ ದೇವರಕೊಂಡ ಜತೆ ‘ರಾಣಾಬಾಲಿ’ ಚಿತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. 1870 ರ ಹಿನ್ನೆಲೆಯಲ್ಲಿ ಬ್ರಿಟಿಷರ ವಿರುದ್ಧ ಹೋರಾಡುವ ಕಾಲ್ಪನಿಕ ಯೋಧನ ಕಥೆಯುಳ್ಳ ಈ ಚಿತ್ರದಲ್ಲಿ ರಶ್ಮಿಕಾ ಜಯಮ್ಮ ಎಂಬ ಪಾತ್ರದಲ್ಲಿ ನಟಿಸುತ್ತಿದ್ದಾರೆ. ಸಿನಿಮಾದಲ್ಲಿನ ತಮ್ಮ ಪಾತ್ರದಿಂದ ಪ್ರೇರೇಪಿತರಾಗಿ ರಶ್ಮಿಕಾ ಇತ್ತೀಚೆಗೆ 400 ಬಡ ಕುಟುಂಬಗಳಿಗೆ ಮೂರು ತಿಂಗಳ ಅವಧಿಗೆ ಆಗುವಷ್ಟು ಅಗತ್ಯ ಆಹಾರ ಸಾಮಗ್ರಿಗಳನ್ನು (ರೇಷನ್) ದಾನ ಮಾಡುವ ಮೂಲಕ ದೊಡ್ಡ ಮನಸ್ಸು ಮೆರೆದಿದ್ದಾರೆ. ಸಮಾಜಮುಖಿ ಕಾರ್ಯಗಳಲ್ಲಿ ಇತರರು ಕೈಜೋಡಿಸಬೇಕು ಎಂಬ ಉದ್ದೇಶದಿಂದ ಈ ಸಹಾಯವನ್ನು ಬಹಿರಂಗಪಡಿಸಿರುವುದಾಗಿ ಅವರು ತಿಳಿಸಿದ್ದಾರೆ.
