ಪ್ರಸ್ತುತ ಬಹುತೇಕ ಎಲ್ಲರೂ ಯುಪಿಐ ಪಾವತಿಗಳನ್ನು ಬಳಸುತ್ತಿದ್ದಾರೆ. ಕ್ಯೂಆರ್ ಕೋಡ್ ಸ್ಕ್ಯಾನ್ ಮಾಡುವುದು, ಮೊಬೈಲ್ ಸಂಖ್ಯೆ ಅಥವಾ ಯುಪಿಐ ಐಡಿ ನಮೂದಿಸುವ ಮೂಲಕ ಕ್ಷಣಾರ್ಧದಲ್ಲಿ ಹಣ ವರ್ಗಾವಣೆ ಮಾಡಬಹುದು. ಆದರೆ ಕೆಲವೊಮ್ಮೆ ಪಾವತಿ ವಿಫಲವಾದರೂ ಬ್ಯಾಂಕ್ ಖಾತೆಯಿಂದ ಹಣ ಕಡಿತವಾಗುತ್ತದೆ. ಇಂತಹ ಸಂದರ್ಭದಲ್ಲಿ ಆತಂಕಪಡುವ ಅಗತ್ಯವಿಲ್ಲ. ಹಣವನ್ನು ಮರಳಿ ಪಡೆಯಲು ಕೆಲವು ಕ್ರಮಗಳನ್ನು ಕೈಗೊಳ್ಳಬೇಕು.
ವಹಿವಾಟು ವಿಫಲವಾದರೂ ಹಣ ಕಡಿತವಾಗಿದೆಯೇ?
ಕೆಲವೊಮ್ಮೆ ಯುಪಿಐ ವಹಿವಾಟು ವಿಫಲವಾದಾಗ ಖಾತೆಯಿಂದ ಕಡಿತವಾದ ಹಣ ಸ್ವಯಂಚಾಲಿತವಾಗಿ ಮರಳುತ್ತದೆ. ಆದರೆ ಕೆಲವು ಸಂದರ್ಭಗಳಲ್ಲಿ ತಕ್ಷಣ ಹಣ ವಾಪಸ್ ಬರುವುದಿಲ್ಲ. ಇಂತಹ ಸಂದರ್ಭದಲ್ಲಿ ಮತ್ತೆ ಪಾವತಿ ಮಾಡುವ ಮುನ್ನ ಮೊದಲ ವಹಿವಾಟಿನ ಸ್ಥಿತಿಯನ್ನು ಪರಿಶೀಲಿಸುವುದು ಬಹಳ ಮುಖ್ಯ.
ಮೊದಲ ವಹಿವಾಟು ವಿಫಲವಾಗಿದೆ ಎಂದು ಭಾವಿಸಿ ಮತ್ತೆ ಪಾವತಿ ಮಾಡಿದರೆ, ಮೊದಲ ವಹಿವಾಟು ಕೂಡ ಯಶಸ್ವಿಯಾಗುವ ಸಾಧ್ಯತೆಯಿದೆ. ಆಗ ಒಂದೇ ಪಾವತಿಗೆ ಎರಡು ಬಾರಿ ಹಣ ಕಡಿತವಾಗಬಹುದು.
ತಪ್ಪಾದ ಯುಪಿಐ ಪಿನ್ ನಮೂದಿಸುವುದು, ಖಾತೆಯಲ್ಲಿ ಸಾಕಷ್ಟು ಹಣ ಇಲ್ಲದಿರುವುದು, ಬ್ಯಾಂಕ್ ಸರ್ವರ್ ಸಮಸ್ಯೆ, ಇಂಟರ್ನೆಟ್ ಸಂಪರ್ಕದ ಸಮಸ್ಯೆ ಸೇರಿದಂತೆ ಹಲವು ಕಾರಣಗಳಿಂದ ಯುಪಿಐ ವಹಿವಾಟುಗಳು ವಿಫಲವಾಗಬಹುದು.
ಹಣ ವಾಪಸ್ ಬರದಿದ್ದರೆ ಏನು ಮಾಡಬೇಕು?
ಮೊದಲು ನೀವು ಪಾವತಿ ಮಾಡಿದ ಯುಪಿಐ ಅಪ್ಲಿಕೇಶನ್ ತೆರೆಯಿರಿ. ಅಲ್ಲಿ ‘ಸಮಸ್ಯೆಯನ್ನು ವರದಿ ಮಾಡಿ’ (Report Issue) ಎಂಬ ಆಯ್ಕೆಯನ್ನು ಆರಿಸಿ. ನಿಮ್ಮ ವಹಿವಾಟು ರೆಫರೆನ್ಸ್ ಸಂಖ್ಯೆ, ಆರ್‌ಆರ್‌ಎನ್ (RRN) ಸಂಖ್ಯೆ ಹಾಗೂ ವಹಿವಾಟಿನ ಸ್ಕ್ರೀನ್‌ಶಾಟ್ ಅನ್ನು ಸಲ್ಲಿಸಿ.
ಯುಪಿಐ ಅಪ್ಲಿಕೇಶನ್ ಮೂಲಕ ಸಮಸ್ಯೆ ಬಗೆಹರಿಯದಿದ್ದರೆ ನಿಮ್ಮ ಬ್ಯಾಂಕ್ ಅನ್ನು ಸಂಪರ್ಕಿಸಿ. ವಹಿವಾಟಿನ ರೆಫರೆನ್ಸ್ ಸಂಖ್ಯೆ, ಪಾವತಿ ಮಾಡಿದ ದಿನಾಂಕ, ಸಮಯ ಸೇರಿದಂತೆ ಅಗತ್ಯ ಮಾಹಿತಿಯನ್ನು ಬ್ಯಾಂಕ್‌ಗೆ ನೀಡಿ.
ಹಣವು ನೀವು ಪಾವತಿ ಮಾಡಿದ ವ್ಯಕ್ತಿಗೆ ತಲುಪದಿದ್ದರೆ, ಆರ್‌ಬಿಐ ನಿಯಮಗಳ ಪ್ರಕಾರ ಸಾಮಾನ್ಯವಾಗಿ ಮರುದಿನದೊಳಗೆ ಹಣ ಖಾತೆಗೆ ಹಿಂತಿರುಗಬೇಕು.
ಒಂದು ವೇಳೆ ಮರ್ಚೆಂಟ್ ಪಾವತಿಯಲ್ಲಿ ನಿಮ್ಮ ಖಾತೆಯಿಂದ ಹಣ ಕಡಿತವಾಗಿದ್ದರೂ ಮರ್ಚೆಂಟ್‌ಗೆ ಹಣ ತಲುಪದಿದ್ದರೆ, ನಿಗದಿತ ರಿವರ್ಸಲ್ ಅವಧಿ ಐದು ದಿನಗಳವರೆಗೆ ಇರಬಹುದು. ಈ ಅವಧಿಯೊಳಗೆ ಹಣ ವಾಪಸ್ ಆಗದಿದ್ದರೆ ಅನ್ವಯವಾಗುವ ನಿಯಮಗಳ ಪ್ರಕಾರ ದಿನಕ್ಕೆ ₹100 ಪರಿಹಾರ ನೀಡುವ ಅವಕಾಶವಿದೆ.
