ನವದೆಹಲಿ: ದೇಶದ ಪ್ರಮುಖ ಟೆಲಿಕಾಂ ಸಂಸ್ಥೆ ರಿಲಯನ್ಸ್ ಜಿಯೋ, ದೀರ್ಘಾವಧಿಯ ಪ್ರಿಪೇಯ್ಡ್ ರೀಚಾರ್ಜ್ ಯೋಜನೆಯೊಂದನ್ನು ಪರಿಚಯಿಸಿದೆ. ₹10,000 ಬೆಲೆಯ ಈ ಪ್ಲಾನ್‌ನಲ್ಲಿ ಬರೋಬ್ಬರಿ 36 ತಿಂಗಳು ಅಥವಾ 1,095 ದಿನಗಳ ವ್ಯಾಲಿಡಿಟಿ ನೀಡಲಾಗುತ್ತದೆ. ಪ್ರತಿದಿನ 2.5GB ಹೈ-ಸ್ಪೀಡ್ ಡೇಟಾ, ಅನಿಯಮಿತ ಧ್ವನಿ ಕರೆ, ಪ್ರತಿದಿನ 100 SMS ಸೇರಿದಂತೆ ಹಲವು ಸೌಲಭ್ಯಗಳನ್ನು ಈ ಯೋಜನೆ ಒಳಗೊಂಡಿದೆ ಎಂದು ನೀಡಿರುವ ಮಾಹಿತಿಯಲ್ಲಿ ತಿಳಿಸಲಾಗಿದೆ.
ಪ್ರತಿ ತಿಂಗಳು ಅಥವಾ ವರ್ಷಕ್ಕೊಮ್ಮೆ ರೀಚಾರ್ಜ್ ಮಾಡುವ ತೊಂದರೆ ಬೇಡ ಎನ್ನುವ ಗ್ರಾಹಕರನ್ನು ಗಮನದಲ್ಲಿಟ್ಟುಕೊಂಡು ಈ ದೀರ್ಘಾವಧಿ ಯೋಜನೆ ರೂಪಿಸಲಾಗಿದೆ. ಇದರೊಂದಿಗೆ OTT ಮನರಂಜನೆ ಮತ್ತು ಡಿಜಿಟಲ್ ಉತ್ಪಾದಕತಾ ಸಾಧನಗಳ ಚಂದಾದಾರಿಕೆಗಳನ್ನೂ ಒದಗಿಸಲಾಗುತ್ತದೆ.
ಪ್ಲಾನ್ ನ ಪ್ರಮುಖ ಸೌಲಭ್ಯಗಳೇನು?
ಈ ಯೋಜನೆಯ ಪ್ರಮುಖ ಆಕರ್ಷಣೆ 3 ವರ್ಷಗಳ ವ್ಯಾಲಿಡಿಟಿ. ಒಮ್ಮೆ ₹10,000 ಪಾವತಿಸಿದರೆ 1,095 ದಿನಗಳವರೆಗೆ ಪ್ಲಾನ್‌ನ ಮೂಲ ಸೌಲಭ್ಯಗಳನ್ನು ಪಡೆಯಬಹುದು.
– ಬೆಲೆ: ₹10,000
– ವ್ಯಾಲಿಡಿಟಿ: 36 ತಿಂಗಳು ಅಥವಾ 1,095 ದಿನಗಳು
– ಡೇಟಾ: ಪ್ರತಿದಿನ 2.5GB ಹೈ-ಸ್ಪೀಡ್ ಡೇಟಾ
– ಒಟ್ಟು ಡೇಟಾ: 1,095 ದಿನಗಳಿಗೆ 2,737.5GB
– ಕರೆಗಳು: ಭಾರತದಾದ್ಯಂತ ಅನಿಯಮಿತ ಧ್ವನಿ ಕರೆ
– SMS: ಪ್ರತಿದಿನ 100 ಸಂದೇಶಗಳು
– ರೋಮಿಂಗ್: ಉಚಿತ ರಾಷ್ಟ್ರೀಯ ರೋಮಿಂಗ್
– 5G: ಅರ್ಹ ಗ್ರಾಹಕರಿಗೆ ಅನಿಯಮಿತ 5G ಡೇಟಾ
ದೈನಂದಿನ 2.5GB ಡೇಟಾ ಮಿತಿ ಮುಗಿದ ಬಳಿಕ ಅನ್ವಯವಾಗುವ ವೇಗ ಮತ್ತು ಬಳಕೆಯ ನಿಯಮಗಳು ಜಿಯೋ ಷರತ್ತುಗಳಿಗೆ ಒಳಪಟ್ಟಿರುತ್ತವೆ. ಅದೇ ರೀತಿ ಅನ್‌ಲಿಮಿಟೆಡ್ 5G ಸೌಲಭ್ಯ ಪಡೆಯಲು ಗ್ರಾಹಕರು ಜಿಯೋದ ಅರ್ಹತಾ ಮಾನದಂಡಗಳನ್ನು ಪೂರೈಸಿರಬೇಕು.
JioHotstar, Canva Pro Lite ಚಂದಾದಾರಿಕೆ
ಕೇವಲ ಕರೆ ಮತ್ತು ಡೇಟಾ ಸೌಲಭ್ಯಗಳಿಗೆ ಸೀಮಿತವಾಗದೆ, ಈ ಯೋಜನೆಯಲ್ಲಿ ಹೆಚ್ಚುವರಿ ಡಿಜಿಟಲ್ ಸೇವೆಗಳನ್ನೂ ಸೇರಿಸಲಾಗಿದೆ.
ಚಂದಾದಾರರಿಗೆ JioHotstar Mobile + Hollywood ಸೌಲಭ್ಯ ದೊರೆಯಲಿದೆ. ಇದರಿಂದ ಮೊಬೈಲ್‌ನಲ್ಲಿ ವಿವಿಧ ಮನರಂಜನಾ ಕಾರ್ಯಕ್ರಮಗಳು, ಚಲನಚಿತ್ರಗಳು ಮತ್ತು ಇತರ OTT ವಿಷಯಗಳನ್ನು ವೀಕ್ಷಿಸಲು ಅವಕಾಶ ಸಿಗಲಿದೆ.
ಇದರ ಜೊತೆಗೆ 12 ತಿಂಗಳ Canva Pro Lite ಚಂದಾದಾರಿಕೆಯನ್ನೂ ನೀಡಲಾಗುತ್ತದೆ. ಸಾಮಾಜಿಕ ಜಾಲತಾಣಗಳ ಪೋಸ್ಟ್‌ಗಳು, ಪೋಸ್ಟರ್‌ಗಳು, ಪ್ರೆಸೆಂಟೇಶನ್‌ಗಳು ಹಾಗೂ ಇತರ ವಿನ್ಯಾಸಗಳನ್ನು ಸಿದ್ಧಪಡಿಸಲು Canva ಉಪಯುಕ್ತವಾಗಿದೆ.
JioAICloud ನಲ್ಲಿ 50GB ಉಚಿತ ಸಂಗ್ರಹಣೆ
ಈ ರೀಚಾರ್ಜ್ ಪ್ಲಾನ್‌ನ ಮತ್ತೊಂದು ಸೌಲಭ್ಯವೆಂದರೆ JioAICloudನಲ್ಲಿ 50GB ಕ್ಲೌಡ್ ಸ್ಟೋರೇಜ್. ಬಳಕೆದಾರರು ತಮ್ಮ ಫೋಟೋಗಳು, ದಾಖಲೆಗಳು ಮತ್ತು ಇತರ ಡಿಜಿಟಲ್ ಫೈಲ್‌ಗಳನ್ನು ಆನ್‌ಲೈನ್‌ನಲ್ಲಿ ಸಂಗ್ರಹಿಸಿಟ್ಟುಕೊಳ್ಳಲು ಇದರಿಂದ ನೆರವಾಗಲಿದೆ.
ಒಟ್ಟಿನಲ್ಲಿ, ದೂರವಾಣಿ ಸಂಪರ್ಕ, ಇಂಟರ್‌ನೆಟ್, ಮನರಂಜನೆ ಮತ್ತು ಡಿಜಿಟಲ್ ಸಾಧನಗಳ ಬಳಕೆಯನ್ನು ಒಂದೇ ಪ್ಯಾಕೇಜ್‌ನಲ್ಲಿ ಒದಗಿಸುವ ಪ್ರಯತ್ನವನ್ನು ಜಿಯೋ ಮಾಡಿದೆ.
₹10,000 ಪ್ಲಾನ್ ದಿನಕ್ಕೆ ಎಷ್ಟು ವೆಚ್ಚವಾಗುತ್ತದೆ?
₹10,000 ಅನ್ನು 1,095 ದಿನಗಳಿಗೆ ಹಂಚಿದರೆ ದಿನಕ್ಕೆ ಸರಾಸರಿ ಸುಮಾರು ₹9.13 ವೆಚ್ಚವಾಗುತ್ತದೆ. ತಿಂಗಳ ಲೆಕ್ಕದಲ್ಲಿ ಸುಮಾರು ₹278 ಆಗುತ್ತದೆ. ಹೀಗಾಗಿ ದೀರ್ಘಾವಧಿಯವರೆಗೆ ಒಂದೇ ಟೆಲಿಕಾಂ ಕಂಪನಿಯ ಸೇವೆ ಬಳಸಲು ಬಯಸುವವರಿಗೆ ಈ ಪ್ಲಾನ್ ಆಕರ್ಷಕ ಆಯ್ಕೆಯಾಗಬಹುದು.
ಉದಾಹರಣೆಗೆ, ಜಿಯೋದ ₹3,599ರ ಒಂದು ವರ್ಷದ ಪ್ಲಾನ್ ಅನ್ನು ಮೂರು ಬಾರಿ ರೀಚಾರ್ಜ್ ಮಾಡಿದರೆ ಒಟ್ಟು ₹10,797 ವೆಚ್ಚವಾಗುತ್ತದೆ. ಅದೇ ಅವಧಿಗೆ ₹10,000ರ ಹೊಸ ಪ್ಲಾನ್ ಆಯ್ಕೆ ಮಾಡಿದರೆ ಲೆಕ್ಕಾಚಾರದ ಪ್ರಕಾರ ₹797 ಉಳಿತಾಯವಾಗುತ್ತದೆ. ಆದರೆ ಈ ಯೋಜನೆಯಲ್ಲಿ ಗ್ರಾಹಕರು ಒಂದೇ ಬಾರಿಗೆ ₹10,000 ಪಾವತಿಸಬೇಕಾಗುತ್ತದೆ.
₹15ರ ಡೇಟಾ ಪ್ಯಾಕ್‌ ನಲ್ಲಿ ಅನಿಯಮಿತ 5G ಡೇಟಾ!
ಜಿಯೋ ಮತ್ತೊಂದು ₹15ರ ಡೇಟಾ ಆಡ್‌ಆನ್ ಪ್ಯಾಕ್‌ ಪರಿಚಯಿಸಿದೆ. ಈ ಪ್ಯಾಕ್‌ನಲ್ಲಿ 24 ಗಂಟೆಗಳವರೆಗೆ ಅನಿಯಮಿತ 5G ಡೇಟಾ ಸೌಲಭ್ಯ ದೊರೆಯುತ್ತದೆ. ಆದರೆ ಇದನ್ನು ಬಳಸಲು 5G ಸ್ಮಾರ್ಟ್‌ಫೋನ್, ಜಿಯೋದ True 5G ನೆಟ್‌ವರ್ಕ್ ವ್ಯಾಪ್ತಿ ಮತ್ತು ಅನ್ವಯವಾಗುವ ಅರ್ಹತೆ ಇರಬೇಕು.
ಗ್ರಾಹಕರಿಗೆ ಸೂಚನೆ: ₹10,000ರ ದೀರ್ಘಾವಧಿ ಪ್ಲಾನ್ ಖರೀದಿಸುವ ಮೊದಲು MyJio ಆ್ಯಪ್‌ನಲ್ಲಿ ಅದರ ಸಂಪೂರ್ಣ ಷರತ್ತುಗಳು, OTT ಚಂದಾದಾರಿಕೆಗಳ ಅವಧಿ ಮತ್ತು 5G ಅರ್ಹತೆಯನ್ನು ಪರಿಶೀಲಿಸುವುದು ಉತ್ತಮ. Canva Pro Lite ಸೌಲಭ್ಯ 12 ತಿಂಗಳಿಗೆ ಮಾತ್ರ ಸೀಮಿತವಾಗಿದೆ; ಮೂರು ವರ್ಷಗಳವರೆಗೆ ಅಲ್ಲ.
