ನಮ್ಮ ಹಿರಿಯರು ಹೇಳುವ ಪ್ರತಿಯೊಂದು ಮಾತಿನ ಹಿಂದೆ ಒಂದು ಅರ್ಥವಿರುತ್ತದೆ, ಪ್ರತಿ ಆಚಾರದ ಹಿಂದೆ ಒಂದು ವೈಜ್ಞಾನಿಕ ಕಾರಣವಿರುತ್ತದೆ. ಅದರಲ್ಲಿ ಪ್ರಮುಖವಾದದ್ದು ಬ್ರಾಹ್ಮಿ ಮುಹೂರ್ತ. “ಸೂರ್ಯೋದಯಕ್ಕಿಂತ ಮುಂಚೆಯೇ ಏಳಬೇಕು” ಎಂದು ಹಿರಿಯರು ಹೇಳುವ ಮಾತನ್ನು ಇಂದಿನ ಪೀಳಿಗೆಯವರು ಮೂಢನಂಬಿಕೆ ಎಂದು ನೋಡಬಹುದು. ಆದರೆ ಆಧುನಿಕ ವೈದ್ಯಕೀಯ ವಿಜ್ಞಾನ ಮತ್ತು ಶರೀರ ಶಾಸ್ತ್ರವು ಈ ಸಮಯವನ್ನು ಅತ್ಯಂತ ಶಕ್ತಿಶಾಲಿ ಎಂದು ಗುರುತಿಸುತ್ತಿದೆ.
ಏನಿದು ಬ್ರಾಹ್ಮಿ ಮುಹೂರ್ತ? ಇದರ ಸಮಯ ಎಷ್ಟು?
ಸೂರ್ಯೋದಯಕ್ಕಿಂತ ಸರಿಯಾಗಿ 96 ನಿಮಿಷಗಳ ಮೊದಲು ಪ್ರಾರಂಭವಾಗುವ ಕಾಲವನ್ನು ಬ್ರಾಹ್ಮಿ ಮುಹೂರ್ತ ಎನ್ನಲಾಗುತ್ತದೆ. ಸೂರ್ಯೋದಯದ ಸಮಯಕ್ಕೆ ಅನುಗುಣವಾಗಿ ಇದು ಬದಲಾಗುತ್ತಿರುತ್ತದೆ. ಆದರೆ ಸಾಮಾನ್ಯವಾಗಿ ಮುಂಜಾನೆ 4:00 ರಿಂದ 5:30 ರ ನಡುವಿನ ಸಮಯವನ್ನು ಇದಕ್ಕೆ ಪ್ರಮಾಣಿತವಾಗಿ ತೆಗೆದುಕೊಳ್ಳಲಾಗುತ್ತದೆ. ಈ ಸಮಯದಲ್ಲಿ ಎಚ್ಚರಗೊಳ್ಳುವುದರಿಂದ ದೇಹದಲ್ಲಿ ಪ್ರಾಣವಾಯುವಿನ ಸಂಚಾರ ಸುಗಮವಾಗಿ, ದಿನವಿಡೀ ಉತ್ಸಾಹದಿಂದ ಇರುವಂತೆ ಮಾಡುತ್ತದೆ.
ವಾತಾವರಣದಲ್ಲಿನ ಅದ್ಭುತ
ವೈಜ್ಞಾನಿಕ ಸಂಶೋಧನೆಗಳ ಪ್ರಕಾರ, ಮುಂಜಾನೆ ವಾತಾವರಣದಲ್ಲಿ ಓಜೋನ್ ಅನಿಲದ ಸಾಂದ್ರತೆ ಹೆಚ್ಚಾಗಿರುತ್ತದೆ. ಈ ಶುದ್ಧ ಗಾಳಿಯನ್ನು ಸೇವಿಸುವುದರಿಂದ ಶ್ವಾಸಕೋಶಗಳು ಶುದ್ಧವಾಗುತ್ತವೆ. ಓಜೋನ್ ಮಿಶ್ರಿತ ಗಾಳಿಯು ಮೆದುಳಿನ ಜೀವಕೋಶಗಳಿಗೆ ಅಮೃತದಂತಿದೆ. ಇದು ನೆನಪಿನ ಶಕ್ತಿಯನ್ನು ಹೆಚ್ಚಿಸುವುದು ಮಾತ್ರವಲ್ಲದೆ, ಆಲೋಚನಾ ಶಕ್ತಿಯನ್ನು ಸುಧಾರಿಸುತ್ತದೆ. ವಿಶ್ವದಾದ್ಯಂತ ಸುಮಾರು 99 ಪ್ರತಿಶತ ಜನರು ಈ ಸಮಯದಲ್ಲಿ ನಿದ್ರೆಯಲ್ಲಿರುತ್ತಾರೆ. ಇದರಿಂದ ಶಬ್ದ ಮಾಲಿನ್ಯವಿರುವುದಿಲ್ಲ ಮತ್ತು ಮಾನಸಿಕ ಶಾಂತಿ ಉನ್ನತ ಮಟ್ಟದಲ್ಲಿರುತ್ತದೆ. ಅದಕ್ಕಾಗಿಯೇ ಲೇಖಕರು, ವಿಜ್ಞಾನಿಗಳು ಮತ್ತು ವಿದ್ಯಾರ್ಥಿಗಳಿಗೆ ಇದು ‘ಗೋಲ್ಡನ್ ಅವರ್’ (ಸುವರ್ಣ ಸಮಯ).
ಸರ್ಕಾಡಿಯನ್ ರಿದಮ್ (Circadian Rhythm)
ನಮ್ಮ ದೇಹದಲ್ಲಿ ಬೆಳಕು ಮತ್ತು ಕತ್ತಲಿಗೆ ಅನುಗುಣವಾಗಿ ಸ್ಪಂದಿಸುವ ಒಂದು ಜೈವಿಕ ಗಡಿಯಾರವಿರುತ್ತದೆ. ಇದನ್ನೇ ‘ಸರ್ಕಾಡಿಯನ್ ರಿದಮ್’ ಎನ್ನುತ್ತಾರೆ. ನಮ್ಮನ್ನು ಕ್ರಿಯಾಶೀಲವಾಗಿಡುವ ಕಾರ್ಟಿಸೋಲ್ ಹಾರ್ಮೋನ್ ಮಟ್ಟವು ಬೆಳಿಗ್ಗೆ 6:00 ರಿಂದ 8:30 ರ ನಡುವೆ ಹೆಚ್ಚಾಗಲು ಪ್ರಾರಂಭಿಸುತ್ತದೆ. ಒಂದು ವೇಳೆ ನೀವು ಈ ಸಮಯವನ್ನು ಬಳಸಿಕೊಳ್ಳದೆ ಬೆಳಿಗ್ಗೆ 9 ಅಥವಾ 10 ಗಂಟೆಯವರೆಗೆ ನಿದ್ರಿಸಿದರೆ, ಹೆಚ್ಚಾದ ಕಾರ್ಟಿಸೋಲ್ ಮಟ್ಟವು ಸರಿಯಾಗಿ ಬಳಕೆಯಾಗುವುದಿಲ್ಲ. ಫಲಿತಾಂಶವಾಗಿ ದಿನವಿಡೀ ಸುಸ್ತು, ತಲೆನೋವು ಮತ್ತು ಸೋಮಾರಿ ತನ ಆವರಿಸುತ್ತದೆ.
ಯಾರಿಗೆ ಎಷ್ಟು ನಿದ್ರೆ ಅಗತ್ಯ?
ಬೇಗ ಏಳುವುದು ಎಷ್ಟು ಮುಖ್ಯವೋ, ಸರಿಯಾದ ಪ್ರಮಾಣದ ನಿದ್ರೆ ಪಡೆಯುವುದು ಅಷ್ಟೇ ಮುಖ್ಯ. ಕಡಿಮೆ ನಿದ್ರೆ ಮಾಡುವುದರಿಂದಲೂ ಆರೋಗ್ಯ ಕೆಡುತ್ತದೆ. ಆರೋಗ್ಯ ತಜ್ಞರ ಲೆಕ್ಕಾಚಾರದ ಪ್ರಕಾರ:
- 6 ರಿಂದ 13 ವರ್ಷದ ಮಕ್ಕಳು: 9 ರಿಂದ 11 ಗಂಟೆ ನಿದ್ರಿಸಬೇಕು.
- 18 ರಿಂದ 25 ವರ್ಷದ ಯುವಕರು: 7 ರಿಂದ 9 ಗಂಟೆ ನಿದ್ರಿಸಬೇಕು.
- 26 ರಿಂದ 64 ವರ್ಷದ ವ್ಯಕ್ತಿಗಳು: 7 ರಿಂದ 8 ಗಂಟೆ ನಿದ್ರಿಸಬೇಕು.
- ವೃದ್ಧರು: 7 ರಿಂದ 8 ಗಂಟೆ ನಿದ್ರಿಸಬೇಕು.
ನೀವು ಯಾವುದಾದರೂ ಹೊಸ ವಿಷಯವನ್ನು ಕಲಿಯಬೇಕೆಂದಿದ್ದರೆ ಅಥವಾ ಕಷ್ಟದ ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳಬೇಕೆಂದಿದ್ದರೆ ಬ್ರಾಹ್ಮಿ ಮುಹೂರ್ತವೇ ಸರಿಯಾದ ಸಮಯ. ಈ ಸಮಯದಲ್ಲಿ ಮೆದುಳಿನಲ್ಲಿ ಆಲ್ಫಾ ತರಂಗಗಳು ಚುರುಕಾಗಿರುತ್ತವೆ. ಇವು ಸೃಜನಶೀಲತೆ ಮತ್ತು ಏಕಾಗ್ರತೆಯನ್ನು ಪ್ರೇರೇಪಿಸುತ್ತವೆ. ಪ್ರಕೃತಿಯ ನಿಯಮಗಳನ್ನು ಅನುಸರಿಸುವುದು ಎಂದರೆ ನಮ್ಮ ಆರೋಗ್ಯವನ್ನು ನಾವೇ ಕಾಪಾಡಿಕೊಂಡಂತೆ. ಮುಂಜಾನೆ ನಿದ್ರೆಯಿಂದ ಏಳುವುದು ಕೇವಲ ಒಂದು ಅಭ್ಯಾಸವಲ್ಲ, ಅದು ಒಂದು ಸಂಪೂರ್ಣ ಆರೋಗ್ಯದ ರಹಸ್ಯ. ನಾಳೆಯಿಂದಲೇ ಈ ಬದಲಾವಣೆಯನ್ನು ಪ್ರಯತ್ನಿಸಿ ನೋಡಿ.
