ಫ್ರೆಂಚ್ ರಾಜಧಾನಿ ಪ್ಯಾರಿಸ್‌ನಲ್ಲಿ ನಡೆಯುತ್ತಿರುವ ಪ್ರತಿಷ್ಠಿತ ಫ್ಯಾಷನ್ ವೀಕ್ ಕಾರ್ಯಕ್ರಮದಲ್ಲಿ ಬಾಲಿವುಡ್ ನಟಿ ಜಾನ್ವಿ ಕಪೂರ್ ತಮ್ಮ ಅಪರೂಪದ ಉಡುಪಿನ ಮೂಲಕ ಎಲ್ಲರ ಗಮನ ಸೆಳೆದಿದ್ದಾರೆ. ಅಕ್ಟೋಬರ್ ಮೂರರಂದು ನಡೆದ ‘ಬೋಫ್ 500 ಗಾಲಾ’ ಸಮಾರಂಭದಲ್ಲಿ ಸಾಂಪ್ರದಾಯಿಕ ಭಾರತೀಯ ಸೀರೆಯನ್ನು ವಿಭಿನ್ನ ಶೈಲಿಯಲ್ಲಿ ಧರಿಸಿ ಪ್ರದರ್ಶಿಸುವ ಮೂಲಕ ಜಾನ್ವಿ ಜಾಗತಿಕ ವೇದಿಕೆಯಲ್ಲಿ ಸದ್ದು ಮಾಡಿದ್ದಾರೆ.
ಪ್ರಸಿದ್ಧ ಡಿಸೈನರ್ ಪಂಕಜ್ ಎಸ್ ಹೆರಿಟೇಜ್ ವಿನ್ಯಾಸಗೊಳಿಸಿದ ಆಫ್-ವೈಟ್ ಬಣ್ಣದ ಸೀರೆಯನ್ನು ಧರಿಸಿದ್ದ ಜಾನ್ವಿ ಕಪೂರ್, ಫ್ಯಾಷನ್ ಪ್ರಿಯರ ಮನಗೆದ್ದಿದ್ದಾರೆ. ಈ ಸೀರೆಯ ಪಲ್ಲುವನ್ನು ಸಾಂಪ್ರದಾಯಿಕ ಶೈಲಿಯಲ್ಲಿ ಭುಜದ ಮೇಲೆ ಹಾಕಿಕೊಳ್ಳುವ ಬದಲಾಗಿ, ತಮ್ಮ ಬಲಗೈಯಿಂದ ಕೆಳಗೆ ತೂಗಾಡುವಂತೆ ವಿಭಿನ್ನವಾಗಿ ಡ್ರೇಪ್ ಮಾಡಲಾಗಿತ್ತು. ಇದು ಸೀರೆಯ ಸಾಂಪ್ರದಾಯಿಕ ರೂಪಕ್ಕೆ ಆಧುನಿಕ ಮತ್ತು ಮಾಡರ್ನ್ ಸ್ಪರ್ಶ ನೀಡುವಂತಿತ್ತು.
ಈ ಸೀರೆಗೆ ಹೊಂದುವಂತೆ ಅವರು ಧರಿಸಿದ್ದ ಹಾರ ಮತ್ತು ಭುಜದ ಆಭರಣಗಳು ಪ್ರಮುಖ ಆಕರ್ಷಣೆಯಾಗಿದ್ದವು. ಕೊರಳಿನಲ್ಲಿ ಯಾವುದೇ ನೆಕ್ಲೇಸ್ ಧರಿಸದ ಜಾನ್ವಿ, ಭುಜದಿಂದ ಕೈಗಳವರೆಗೆ ಮುತ್ತುಗಳು, ಕವಡೆಗಳು, ಚಿನ್ನದ ಮಣಿಗಳು ಹಾಗೂ ಗುಲಾಬಿ ಬಣ್ಣದ ಕುಚ್ಚುಗಳಿಂದ ಕೂಡಿದ ಆಭರಣಗಳನ್ನು ತೊಟ್ಟಿದ್ದರು. ಈ ವಿಶೇಷ ವಿನ್ಯಾಸದ ಆಭರಣಗಳು ಉಡುಪಿನ ಅಂದವನ್ನು ಮತ್ತಷ್ಟು ಹೆಚ್ಚಿಸಿದ್ದವು.
ಇನ್ನು ತಮ್ಮ ಸೌಂದರ್ಯವರ್ಧನೆಗಾಗಿ ನ್ಯೂಡ್ ಮೇಕಪ್ ಶೈಲಿಯನ್ನು ಆಯ್ಕೆ ಮಾಡಿಕೊಂಡಿದ್ದ ನಟಿ, ಕೇಶವಿನ್ಯಾಸವನ್ನು ಅತ್ಯಂತ ಸರಳ ಹಾಗೂ ಕ್ಲಾಸಿಕ್ ಆಗಿ ಮಾಡಿಕೊಂಡಿದ್ದರು. ಖ್ಯಾತ ಸ್ಟೈಲಿಸ್ಟ್ ರಿಯಾ ಕಪೂರ್ ಅವರ ಮಾರ್ಗದರ್ಶನದಲ್ಲಿ ಮೂಡಿಬಂದ ಈ ಲುಕ್, ಪ್ಯಾರಿಸ್ ಫ್ಯಾಷನ್ ಅಂಗಳದಲ್ಲಿ ಭಾರತೀಯ ಸೀರೆಯ ವೈಭವವನ್ನು ಹೊಸ ರೀತಿಯಲ್ಲಿ ಎತ್ತಿಹಿಡಿದಿದೆ.
