ಬೆಂಗಳೂರು: ದಸರಾ ಹಬ್ಬದ ಸುಸಂದರ್ಭದಲ್ಲಿ ಕಲಾಸಾಗರ ರಂಗತಂಡದ ವತಿಯಿಂದ ನಗರದ ಗಾಂಧಿ ಭವನದ ಬಾಪು ಸಭಾಂಗಣದಲ್ಲಿ 'ಕಲಾಸಾಗರ ಉತ್ಸವ' ಕಾರ್ಯಕ್ರಮವನ್ನು ಅತ್ಯಂತ ಅರ್ಥಪೂರ್ಣವಾಗಿ ಆಯೋಜಿಸಲಾಗಿತ್ತು. ಸಮಾರಂಭದಲ್ಲಿ ನಾಡಿನ ವಿವಿಧ ಕ್ಷೇತ್ರಗಳಲ್ಲಿ ಗಣನೀಯ ಸಾಧನೆಗೈದ ಸಾಧಕರಿಗೆ ಪ್ರಶಸ್ತಿ ಪ್ರದಾನ ಮಾಡಿ ಗೌರವಿಸಲಾಯಿತು. ಇದೇ ವೇದಿಕೆಯಲ್ಲಿ 'ಚಂದ್ರಗುತ್ತಿಯ ಚೆಲುವಾಂಬೆ' ಭಕ್ತಿಗೀತೆಗಳ ಆಡಿಯೋ ಬಿಡುಗಡೆ ಹಾಗೂ ಮಹಿಳಾ ಕಲಾವಿದರಿಂದ ರಂಗಗೀತೆಗಳ ಗಾಯನ ಕಛೇರಿ ನಡೆಯಿತು.
ಪೋಸ್ಟರ್ ಬಿಡುಗಡೆಯೊಂದಿಗೆ ಕಾರ್ಯಕ್ರಮ ಉದ್ಘಾಟನೆ
ಖ್ಯಾತ ವೈದ್ಯರಾದ ಡಾ. ಆಂಜನಪ್ಪ ಅವರು 'ಚಂದ್ರಗುತ್ತಿಯ ಚೆಲುವಾಂಬೆ' ಭಕ್ತಿಗೀತೆಗಳ ಪೋಸ್ಟರ್ ಅನಾವರಣಗೊಳಿಸುವ ಮೂಲಕ ಸಮಾರಂಭಕ್ಕೆ ವಿದ್ಯುಕ್ತ ಚಾಲನೆ ನೀಡಿದರು. ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ಖ್ಯಾತ ರಂಗಭೂಮಿ ಕಲಾವಿದರಾದ ದೊಡ್ಡರಾಮಯ್ಯ ಅವರು ವಹಿಸಿದ್ದರು. ವೇದಿಕೆಯಲ್ಲಿ ಚಿಂತಕರು ಹಾಗೂ ಕನ್ನಡಪರ ಹೋರಾಟಗಾರರಾದ ಡಾ. ಟಿ. ಗೋವಿಂದರಾಜು, ಕಲಾಪೋಷಕರಾದ ಧನಂಜಯ ಗೌಡ, 'ಹಸಿರೇ ಉಸಿರು' ವೇದಿಕೆಯ ಬೆಟ್ಟಹಲಸೂರು ಶ್ರೀನಿವಾಸಮೂರ್ತಿ ಹಾಗೂ ಪ್ರಗತಿಪರ ರೈತರು ಮತ್ತು ಕಲಾ ಸಂಘಟಕರಾದ ಬಿ.ಎಸ್. ರಾಜೇಗೌಡ ಮುಖ್ಯ ಅತಿಥಿಗಳಾಗಿ ಉಪಸ್ಥಿತರಿದ್ದು ಶುಭ ಹಾರೈಸಿದರು.
'ಚಂದ್ರಗುತ್ತಿಯ ಚೆಲುವಾಂಬೆ' ಭಕ್ತಿಗೀತೆಗಳ ಲೋಕಾರ್ಪಣೆ
ನಟ, ನಿರ್ದೇಶಕ ಹಾಗೂ ಬರಹಗಾರರಾದ ಮಹೇಶ್ ಸಾಗರ್ (ಮಹಾಬಲೇಶ್ವರ) ಅವರ ಸಾಹಿತ್ಯ ರಚನೆಯಲ್ಲಿ ಮೂಡಿಬಂದಿರುವ, ಚಂದ್ರಗುತ್ತಿ ದೇವಿಯ ಮಹಿಮೆಯನ್ನು ಸಾರುವ 'ಚಂದ್ರಗುತ್ತಿಯ ಚೆಲುವಾಂಬೆ' ಭಕ್ತಿಗೀತೆಗಳ ಆಡಿಯೋ ಧ್ವನಿಸುರುಳಿಯನ್ನು ಸಮಾರಂಭದಲ್ಲಿ ಗಣ್ಯರು ಲೋಕಾರ್ಪಣೆ ಮಾಡಿದರು.
ಮಹಿಳಾ ತಂಡದಿಂದ ರಂಗಗೀತೆಗಳ ರಸದೌತಣ
ಕಾರ್ಯಕ್ರಮದ ವಿಶೇಷ ಆಕರ್ಷಣೆಯಾಗಿ ಮಾಗಡಿ ತಾಲ್ಲೂಕಿನ ಕುದೂರಿನ 'ಮಾರುತಿ ಮಹಿಳಾ ನಾಟಕ ತಂಡ'ದ ವತಿಯಿಂದ ಪೌರಾಣಿಕ ರಂಗಗೀತೆಗಳ ಗಾಯನ ಕಾರ್ಯಕ್ರಮ ನಡೆಯಿತು. ಮಹಿಳಾ ಕಲಾವಿದರೇ ಸುಶ್ರಾವ್ಯವಾಗಿ ಹಾಡಿದ ಪೌರಾಣಿಕ ನಾಟಕಗಳ ರಂಗಗೀತೆಗಳು ಸಭಿಕರ ಅಪಾರ ಮೆಚ್ಚುಗೆಗೆ ಪಾತ್ರವಾಗಿ, ಸಾಂಸ್ಕೃತಿಕ ರಸದೌತಣವನ್ನು ಉಣಬಡಿಸಿದವು.
