ಟೀಮ್ ಇಂಡಿಯಾದಿಂದ ಹೊರಗುಳಿದಿರುವ ಸ್ಫೋಟಕ ಓಪನರ್ ಪೃಥ್ವಿ ಶಾ, ಭಾರತ ತಂಡಕ್ಕೆ ಮರಳಿ ಕಂಬ್ಯಾಕ್ ಮಾಡುವ ಕನಸು ತಮ್ಮ ಮನಸ್ಸಿನಲ್ಲಿ ಸದಾ ಇದೆ ಆದರೆ ಪ್ರಸ್ತುತ ಪ್ರದರ್ಶನದ ಕಡೆಗೆ ಗಮನ ಹರಿಸಲು ಬಯಸುವುದಾಗಿ ತಿಳಿಸಿದ್ದಾರೆ. ರಣಜಿ ಟ್ರೋಫಿ ಪಂದ್ಯದಲ್ಲಿ ಮಹಾರಾಷ್ಟ್ರ ತಂಡವು ಬೆಂಗಾಲ್ ವಿರುದ್ಧ 10 ವಿಕೆಟ್‌ಗಳ ಭರ್ಜರಿ ಜಯ ಸಾಧಿಸಿದ ಬಳಿಕ ಮಾತನಾಡಿದ 26 ವರ್ಷದ ಪೃಥ್ವಿ ಶಾ, ತಮ್ಮ ಕಂಬ್ಯಾಕ್ ಹಾಗೂ ಪ್ರಸ್ತುತ ಫಾರ್ಮ್ ಬಗ್ಗೆ ಮುಕ್ತವಾಗಿ ಮಾತನಾಡಿದ್ದಾರೆ.
“ಟೀಮ್ ಇಂಡಿಯಾಗೆ ಮರಳುವ ಆಲೋಚನೆ ಸದಾ ಮನಸ್ಸಿನ ಹಿನ್ನೆಲೆಯಲ್ಲಿ ಇದ್ದೇ ಇರುತ್ತದೆ. ಆದರೆ ನನ್ನ ಅನುಭವದ ಪ್ರಕಾರ, ನಾನು ಮುಂದಿನ ದಿನಗಳ ಬಗ್ಗೆ ಹೆಚ್ಚು ಯೋಚಿಸಬಾರದು. ಸದ್ಯಕ್ಕೆ ರಣಜಿ ಪಂದ್ಯಗಳಲ್ಲಿ ತಂಡಕ್ಕೆ ಜಯ ತಂದುಕೊಡುವುದು, ಉತ್ತಮ ತರಬೇತಿ ಪಡೆಯುವುದು ಮತ್ತು ನೈಜ ಆಟದ ಮೇಲೆ ಗಮನ ಹರಿಸುವುದಷ್ಟೇ ನನ್ನ ಗುರಿ. ಮುಂಬರುವ ದಿನಗಳಲ್ಲಿ ಒಂದೇ ಒಂದು ಉತ್ತಮ ಇನಿಂಗ್ಸ್ ನನ್ನ ಸಂಪೂರ್ಣ ಫಾರ್ಮ್ ಅನ್ನು ಮರಳಿ ತರಲಿದೆ” ಎಂದು ಪೃಥ್ವಿ ಶಾ ಭರವಸೆ ವ್ಯಕ್ತಪಡಿಸಿದ್ದಾರೆ.
ಮುಂಬೈ ತಂಡವನ್ನು ತೊರೆದು ಕಳೆದ ಋತುವಿನಲ್ಲಿ ಮಹಾರಾಷ್ಟ್ರ ತಂಡವನ್ನು ಸೇರಿಕೊಂಡಿದ್ದ ಪೃಥ್ವಿ ಶಾ, ಋತುರಾಜ್ ಗಾಯಕ್ವಾಡ್ ಸೇರಿದಂತೆ ಹಲವು ಆಟಗಾರರ ಜೊತೆ ಉತ್ತಮ ಬಾಂಧವ್ಯ ಹೊಂದಿರುವುದಾಗಿ ಹೇಳಿದ್ದಾರೆ. ಇನ್ನು ಬೆಂಗಾಲ್ ವಿರುದ್ಧದ ಪಂದ್ಯದಲ್ಲಿ ಎದುರಾಳಿ ತಂಡದ ಅನುಭವಿ ವೇಗಿ ಮಹಮ್ಮದ್ ಶಮಿ ಬೌಲಿಂಗ್ ಎದುರಿಸಿದ ಅನುಭವವನ್ನು ಹಂಚಿಕೊಂಡ ಶಾ, “ಶಮಿ ಭಾಯ್ ಮುಂಚಿನಂತೆಯೇ ಅತ್ಯಂತ ವೇಗವಾಗಿ ಹಾಗೂ ಕಟ್ಟುನಿಟ್ಟಾಗಿ ಬೌಲಿಂಗ್ ಮಾಡುತ್ತಿದ್ದಾರೆ. ಇಂತಹ ವೇಗದ ಬೌಲಿಂಗ್‌ಗೆ ಬೆಂಬಲ ನೀಡುವ ಪಿಚ್‌ಗಳಲ್ಲಿ ಶಮಿ ಭಾಯ್ ಎದುರಿಸುವುದು ಯಾವುದೇ ಬ್ಯಾಟರ್‌ಗೆ ನಿಜಕ್ಕೂ ಸವಾಲಿನ ಕೆಲಸ” ಎಂದು ಭಾರತದ ಹಿರಿಯ ಬೌಲರ್ ಅನ್ನು ಶ್ಲಾಘಿಸಿದ್ದಾರೆ.
