ಬಾಲಿವುಡ್ ನಟಿ ಐಶ್ವರ್ಯಾ ರೈ ಬಚ್ಚನ್ ಅವರು ತಮ್ಮ ದಿವಂಗತ ತಂದೆ ಕೃಷ್ಣರಾಜ್ ರೈ ಮತ್ತು ಮಗಳು ಆರಾಧ್ಯಾ ಬಚ್ಚನ್ ಅವರ ಹುಟ್ಟುಹಬ್ಬದ ವಿಶೇಷ ಸಂದರ್ಭದಲ್ಲಿ ಇನ್ಸ್ಟಾಗ್ರಾಮ್ನಲ್ಲಿ ಭಾವುಕ ಪೋಸ್ಟ್ ಒಂದನ್ನು ಹಂಚಿಕೊಂಡಿದ್ದಾರೆ. ಆರಾಧ್ಯಾ ಬಾಲ್ಯದ ಅಪರೂಪದ ಹಳೆಯ ಫೋಟೋವನ್ನು ಪ್ರಕಟಿಸಿರುವ ನಟಿ, ತಂದೆ ಮತ್ತು ಮಗಳ ಮೇಲಿನ ತಮ್ಮ ಅಪಾರ ಪ್ರೀತಿಯನ್ನು ವ್ಯಕ್ತಪಡಿಸಿದ್ದಾರೆ.
ತಮ್ಮ ತಂದೆಯನ್ನು ಪ್ರೀತಿಯಿಂದ ಅಜ್ಜ ಎಂದು ಹಾಗೂ ಮಗಳನ್ನು ಏಂಜಲ್ ಎಂದು ಸಂಬೋಧಿಸಿರುವ ಐಶ್ವರ್ಯಾ, ಇಬ್ಬರಿಗೂ ಹುಟ್ಟುಹಬ್ಬದ ಶುಭಾಶಯ ಕೋರಿದ್ದಾರೆ. ತಂದೆ ಮತ್ತು ಮಗಳ ಮೇಲಿನ ತಮ್ಮ ಪ್ರೀತಿ ಶಾಶ್ವತ ಮತ್ತು ಷರತ್ತುರಹಿತವಾದದ್ದು ಎಂದು ಅವರು ಬರೆದುಕೊಂಡಿದ್ದಾರೆ. ಈ ಫೋಟೋ ಕುಟುಂಬದ ಸುಂದರ ನೆನಪುಗಳನ್ನು ಮೆಲುಕು ಹಾಕುವಂತಿದ್ದು, ಅಭಿಮಾನಿಗಳ ಗಮನ ಸೆಳೆದಿದೆ.
2006ರ ಧೂಮ್ 2 ಸಿನಿಮಾದ ಚಿತ್ರೀಕರಣದ ವೇಳೆ ಪ್ರೀತಿಯಲ್ಲಿ ಬಿದ್ದ ಐಶ್ವರ್ಯಾ ರೈ ಮತ್ತು ಅಭಿಷೇಕ್ ಬಚ್ಚನ್, 2007ರ ಏಪ್ರಿಲ್ನಲ್ಲಿ ಸಾಂಪ್ರದಾಯಿಕವಾಗಿ ವಿವಾಹವಾಗಿದ್ದರು. ಅಂದಿನಿಂದ ಈ ಜೋಡಿ ಆಗಾಗ ತಮ್ಮ ಮಗಳು ಆರಾಧ್ಯಾ ಜೊತೆಗಿನ ವಿಶೇಷ ಕ್ಷಣಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಳ್ಳುತ್ತಿರುತ್ತದೆ.
1994ರಲ್ಲಿ ವಿಶ್ವ ಸುಂದರಿ ಕಿರೀಟ ಮುಡಿಗೇರಿಸಿಕೊಂಡ ಬಳಿಕ ಚಿತ್ರರಂಗಕ್ಕೆ ಕಾಲಿಟ್ಟ ಐಶ್ವರ್ಯಾ, 1997ರಲ್ಲಿ ಮಣಿರತ್ನಂ ಅವರ ತಮಿಳು ಚಿತ್ರ ಇರುವರ್ ಮತ್ತು ಬಾಲಿವುಡ್ನ ಔರ್ ಪ್ಯಾರ್ ಹೋ ಗಯಾ ಸಿನಿಮಾಗಳ ಮೂಲಕ ನಟನಾ ಪಯಣ ಆರಂಭಿಸಿದ್ದರು. ಕೊನೆಯದಾಗಿ ಅವರು ಮಣಿರತ್ನಂ ನಿರ್ದೇಶನದ ಐತಿಹಾಸಿಕ ಚಿತ್ರ ಪೊನ್ನಿಯಿನ್ ಸೆಲ್ವನ್ 2 ಸಿನಿಮಾದಲ್ಲಿ ದ್ವಿಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು.