ಫ್ರೀಲ್ಯಾನ್ಸ್ ಬರಹಗಾರರಿಗೆ ಕೆಲಸ ಹುಡುಕಿಕೊಡುವ ಉದ್ದೇಶದಿಂದ ಆರಂಭವಾದ ಸಣ್ಣ ನ್ಯೂಸ್‌ಲೆಟರ್ ಇಷ್ಟೊಂದು ಬೆಳೆಯುತ್ತದೆ ಎಂದು ಯಾರೂ ಊಹಿಸಿರಲಿಲ್ಲ! ಅಮೆರಿಕದ ಸ್ಯಾನ್ ಫ್ರಾನ್ಸಿಸ್ಕೋ ಮೂಲದ 32 ವರ್ಷದ ಏಮಿ ಸುಟೋ (Amy Suto) ಎಂಬ ಬರಹಗಾರ್ತಿ ‘ಸಬ್‌ಸ್ಟಾಕ್’ ವೇದಿಕೆಯಲ್ಲಿ ಆರಂಭಿಸಿದ “ಮೇಕ್ ರೈಟಿಂಗ್ ಯುವರ್ ಜಾಬ್” ಎಂಬ ಸೈಡ್ ಬಿಸಿನೆಸ್, ಇಂದು ವರ್ಷಕ್ಕೆ ಬರೋಬ್ಬರಿ 2.53 ಕೋಟಿ ರೂಪಾಯಿ ($263,000) ಗಳಿಸುವ ಬೃಹತ್ ಉದ್ಯಮವಾಗಿ ಬೆಳೆದಿದೆ.
ಸ್ವಂತ ಅನುಭವದಿಂದ ಮೂಡಿದ ಹೊಸ ಉದ್ಯಮದ ಕಲ್ಪನೆ
ಆರಂಭದಲ್ಲಿ ಹಾಲಿವುಡ್‌ನಲ್ಲಿ ಟೆಲಿವಿಷನ್ ಬರಹಗಾರ್ತಿಯಾಗಿ ವೃತ್ತಿಜೀವನ ಪ್ರಾರಂಭಿಸಿದ ಏಮಿ ಸುಟೋ, ನಂತರ ಫ್ರೀಲ್ಯಾನ್ಸ್ ಹಾಗೂ ‘ಗೋಸ್ಟ್‌ರೈಟಿಂಗ್’ (ಇತರರ ಹೆಸರಿನಲ್ಲಿ ಬರೆಯುವ ಕೆಲಸ) ಕಡೆ ಗಮನಹರಿಸಿದರು. ಒಮ್ಮೆ ಪ್ಯಾರಿಸ್‌ನ ಕೆಫೆಯೊಂದರಲ್ಲಿ ಕುಳಿತು ಕೆಲಸ ಮಾಡುತ್ತಿದ್ದಾಗ, ಅವರಿಗೆ ಸಾಮರ್ಥ್ಯಕ್ಕಿಂತ ಹೆಚ್ಚಿನ ಕೆಲಸದ ಆಫರ್‌ಗಳು ಬಂದಿದ್ದವು. ಆದರೆ ಆ ಅವಕಾಶಗಳನ್ನು ಇತರ ಬರಹಗಾರರಿಗೆ ಶಿಫಾರಸು ಮಾಡಲು ಅವರ ಬಳಿ ಸರಿಯಾದ ವೇದಿಕೆ ಇರಲಿಲ್ಲ. ಈ ಆಲೋಚನೆಯಿಂದ 2023 ರ ಜೂನ್‌ನಲ್ಲಿ ಅವರು ‘ಸಬ್‌ಸ್ಟಾಕ್’ ಮೂಲಕ ತಮ್ಮ ನ್ಯೂಸ್‌ಲೆಟರ್ ಪಯಣ ಆರಂಭಿಸಿದರು.
ಉಚಿತ ಮಾಹಿತಿಯಿಂದ ಉದ್ಯೋಗ ಮಂಡಳಿಯವರೆಗೆ
ಆರಂಭದಲ್ಲಿ ಉಚಿತ ಬರಹ ಸಲಹೆಗಳು, ಕರಿಯರ್ ಗೈಡೆನ್ಸ್ ನೀಡುತ್ತಿದ್ದ ಏಮಿ, 2024 ರಲ್ಲಿ ತಮ್ಮ ಪತಿ ಕೈಲ್ ಕೋರ್ಡ್ಸ್ ಜೊತೆಗೂಡಿ ‘ಜಾಬ್ ಬೋರ್ಡ್’ ಅನ್ನು ಪರಿಚಯಿಸಿದರು. ಅಂತರ್ಜಾಲದಲ್ಲಿ ಲಭ್ಯವಿರುವ ಅತ್ಯುತ್ತಮ ಬರವಣಿಗೆಯ ಉದ್ಯೋಗ ಅವಕಾಶಗಳನ್ನು ಒಂದೇ ಕಡೆ ಕಲೆಹಾಕಿ ಚಂದಾದಾರರಿಗೆ ನೀಡಲು ಪ್ರಾರಂಭಿಸಿದರು. ಇಂದು ಅವರ ನ್ಯೂಸ್‌ಲೆಟರ್ 58,000 ಕ್ಕೂ ಹೆಚ್ಚು ಚಂದಾದಾರರನ್ನು ಹೊಂದಿದ್ದು, ಉಚಿತ ಸಂಪನ್ಮೂಲಗಳು, ಪ್ರಸಿದ್ಧ ಲೇಖಕರ ಸಂದರ್ಶನಗಳನ್ನು ಒಳಗೊಂಡಿದೆ.
ಜಾಹೀರಾತಿಗಾಗಿ ಖರ್ಚು ಮಾಡಿದ್ದು ಕೇವಲ 9,600 ರೂಪಾಯಿ !
ಈ ಸಬ್‌ಸ್ಟಾಕ್ ವೇದಿಕೆಯನ್ನು ಬೆಳೆಸಲು ಏಮಿ ಮತ್ತು ಅವರ ಪತಿ ಜಾಹೀರಾತಿಗಾಗಿ ಖರ್ಚು ಮಾಡಿದ್ದು ಕೇವಲ $100 (ಸುಮಾರು 9,600 ರೂಪಾಯಿ) ಮಾತ್ರ! ಬದಲಿಗೆ ಲಿಂಕ್ಡ್‌ಇನ್ (LinkedIn), ಥ್ರೆಡ್ಸ್ (Threads) ಹಾಗೂ ಸಬ್‌ಸ್ಟಾಕ್ ನೋಟ್ಸ್ ಮೂಲಕ ಉಪಯುಕ್ತ ಮಾಹಿತಿಗಳನ್ನು ಹಂಚಿಕೊಳ್ಳುವ ಮೂಲಕ ಚಂದಾದಾರರನ್ನು ಆಕರ್ಷಿಸಿದರು. ಪ್ರತೀವಾರ ನಿಯಮಿತವಾಗಿ ಕಂಟೆಂಟ್ ಪೋಸ್ಟ್ ಮಾಡಿದ್ದೇ ಅವರ ಯಶಸ್ಸಿಗೆ ಮುಖ್ಯ ಕಾರಣವಾಯಿತು.
ತಿಂಗಳಿಗೆ 1,800 ರೂ. ಚಂದಾದಾರಿಕೆ ಶುಲ್ಕ
ಪ್ರಸ್ತುತ ಅವರ ಜಾಬ್ ಬೋರ್ಡ್‌ಗೆ ಪ್ರವೇಶಿಸಲು ಸ್ಟ್ಯಾಂಡರ್ಡ್ ಸದಸ್ಯತ್ವಕ್ಕೆ ತಿಂಗಳಿಗೆ $19 (ಸುಮಾರು 1,800 ರೂಪಾಯಿ) ಹಾಗೂ ವಾರ್ಷಿಕ ಫೌಂಡಿಂಗ್ ಸದಸ್ಯತ್ವಕ್ಕೆ $550 (ಸುಮಾರು 52,000 ರೂಪಾಯಿ) ದರ ನಿಗದಿಪಡಿಸಲಾಗಿದೆ. 2025 ರ ಮಧ್ಯಭಾಗದಲ್ಲಿ ಆರು ಅಂಕಿಗಳ ವಾರ್ಷಿಕ ಆದಾಯ ಗಳಿಸಿದ್ದ ಈ ಸಂಸ್ಥೆ, ಇದೀಗ ವರ್ಷಕ್ಕೆ $2,63,000 (ಸುಮಾರು 2.53 ಕೋಟಿ ರೂಪಾಯಿ) ವಾರ್ಷಿಕ ಮರುಕಳಿಸುವ ಒಟ್ಟು ಆದಾಯ ಗಳಿಸುತ್ತಿದೆ.
ಇನ್ನೂ ನಿಂತಿಲ್ಲ ಪ್ರಮುಖ ವೃತ್ತಿ:
ಇಷ್ಟೊಂದು ದೊಡ್ಡ ಮೊತ್ತದ ಆದಾಯ ಸಬ್‌ಸ್ಟಾಕ್‌ನಿಂದ ಬರುತ್ತಿದ್ದರೂ, ಏಮಿ ತಮ್ಮ ಮುಖ್ಯ ವೃತ್ತಿಯಾದ ‘ಮೆಮೋಯಿರ್ ಗೋಸ್ಟ್‌ರೈಟಿಂಗ್’ ಅನ್ನು ಬಿಟ್ಟಿಲ್ಲ. “ಸಬ್‌ಸ್ಟಾಕ್ ಕೇವಲ ಒಂದು ಸೈಡ್ ಹಸಲ್ (ಉಪ-ಉದ್ಯೋಗ). ನನ್ನ ಮುಖ್ಯ ಆದಾಯ ಇಂದಿಗೂ ಫ್ರೀಲ್ಯಾನ್ಸ್ ಗೋಸ್ಟ್‌ರೈಟಿಂಗ್‌ನಿಂದಲೇ ಬರುತ್ತದೆ” ಎಂದು ಅವರು ಹೇಳಿದ್ದಾರೆ. ತಮ್ಮ ವೇದಿಕೆಯ ಮೂಲಕ ಹಲವು ಯುವ ಬರಹಗಾರರು ಉದ್ಯೋಗ ಕಂಡುಕೊಂಡಿರುವುದೇ ತಮಗೆ ಸಿಕ್ಕ ಅತಿದೊಡ್ಡ ತೃಪ್ತಿ ಎಂದು ಏಮಿ ಹರ್ಷ ವ್ಯಕ್ತಪಡಿಸಿದ್ದಾರೆ.
