ಟೆಲ್ ಅವಿವ್: ಫ್ಲೈದುಬೈ ವಿಮಾನದ ಪೈಲಟ್ ಸ್ಮಿತ್ ಮಚ್ಚಾರ್ ಮೇಲೆ ಹಲ್ಲೆಗೈದ ಸಹ ಪೈಲಟ್ ಕುರಿತ ಅಚ್ಚರಿ ಮಾಹಿತಿ ಬಹಿರಂಗವಾಗಿದೆ.
ಟೆಲ್ ಅವಿವ್ ಗೆ ತೆರಳುತ್ತಿದ್ದ ವಿಮಾನದಲ್ಲಿ ಭಾರತೀಯ ಪೈಲಟ್ ಕ್ಯಾಪ್ಟನ್ ಸ್ಮಿತ್ ಮಚ್ಚಾರ್ ಅವರ ಮೇಲೆ ಹಲ್ಲೆ ನಡೆಸಿದ ಆರೋಪ ಹೊತ್ತಿರುವ ಒಮಾನಿ ಸಹ-ಪೈಲಟ್(co-pilot) ಹಮಾಮ್ ಅಲ್ಹಮಾಮಿ ಎಂದು ಗುರುತಿಸಲಾಗಿದೆ. ಈತ ತನ್ನ ಹೆಚ್ಚಿನ ಸಮಯವನ್ನು ಸಿರಿಯಾದಲ್ಲಿ ಕಳೆದಿದ್ದ ಎಂದು ವರದಿಯಾಗಿದೆ.
ಅಲ್ ಅರೇಬಿಯಾ ಇಂಗ್ಲಿಷ್‌ ನ ವರದಿಯ ಪ್ರಕಾರ, ಈ ಒಮಾನಿ ಸಹ-ಪೈಲಟ್ ನನ್ನು ಈ ಹಿಂದೆ ಒಮಾನ್ ನಲ್ಲಿ ವಿಮಾನ ಹಾರಾಟದಿಂದ ನಿರ್ಬಂಧಿಸಲಾಗಿತ್ತು. ಸಿರಿಯಾದಲ್ಲಿದ್ದ ಅವಧಿಯಲ್ಲಿ ಆತ ಹೊಂದಿದ್ದ ಉಗ್ರಗಾಮಿ ವಿಚಾರಧಾರೆಗಳ ಕುರಿತಾದ ಕಳವಳಗಳೇ ಇದಕ್ಕೆ ಕಾರಣವಾಗಿತ್ತು.
ಅಧಿಕಾರಿಗಳು ವಿಮಾನ ಹಾರಾಟದಿಂದ ನಿರ್ಬಂಧಿಸಿದ ನಂತರ ಹಮಾಮ್ ಅಲ್ಹಮಾಮಿ ಒಮಾನ್ ತೊರೆದಿದ್ದನು.
ತನ್ನ ಉಗ್ರಗಾಮಿ ವಿಚಾರಧಾರೆಗಳ ಕುರಿತಾದ ಕಳವಳಗಳಿಂದಾಗಿ ಅಧಿಕಾರಿಗಳು ವಿಮಾನ ಹಾರಾಟದಿಂದ ನಿರ್ಬಂಧಿಸಿದ ನಂತರ ಆತ ಒಮಾನ್ ತೊರೆದಿದ್ದ ಎಂದು ಅಲ್ ಅರೇಬಿಯಾ ವರದಿ ಮಾಡಿದೆ. ಮೂಲಗಳನ್ನು ಉಲ್ಲೇಖಿಸಿರುವ ವರದಿಯು, ಈ ಸಹ-ಪೈಲಟ್ ತನ್ನ ಹೆಚ್ಚಿನ ಸಮಯವನ್ನು ದೇಶದ ಹೊರಗೆ, ವಿಶೇಷವಾಗಿ ಸಿರಿಯಾದಲ್ಲಿ ಕಳೆದಿದ್ದನು ಮತ್ತು ಯುಎಇಗೆ (UAE) ಬರುವ ಮುನ್ನ ಅಲ್ಲಿ ಉಗ್ರಗಾಮಿ ವಿಚಾರಗಳಿಂದ ಪ್ರಭಾವಿತನಾಗಿದ್ದನು ಎಂದು ತಿಳಿಸಿದೆ.
ಏತನ್ಮಧ್ಯೆ, ಉಗ್ರಗಾಮಿ ವಿಚಾರಧಾರೆಗಳ ಕುರಿತಾದ ಕಳವಳಗಳ ಹಿನ್ನೆಲೆಯಲ್ಲಿ ಕಳೆದ ವರ್ಷ ಒಮಾನ್ ನ ರಾಷ್ಟ್ರೀಯ ವಿಮಾನಯಾನ ಸಂಸ್ಥೆಯಲ್ಲಿದ್ದ ಹಿಂದಿನ ಕೆಲಸದಿಂದ ಈ ಸಹ-ಪೈಲಟ್‌ನನ್ನು ತೆಗೆದುಹಾಕಲಾಗಿತ್ತು ಎಂದು ಸಿಎನ್‌ಎನ್ (CNN) ಕೂಡ ವರದಿ ಮಾಡಿದೆ.
ಪ್ರಾದೇಶಿಕ ರಾಜತಾಂತ್ರಿಕ ಮೂಲವೊಂದು ಸಿಎನ್‌ಎನ್‌ಗೆ ತಿಳಿಸಿದಂತೆ, ಆತ ಉಗ್ರಗಾಮಿ ವಿಚಾರಧಾರೆಗಳನ್ನು ಹೊಂದಿದ್ದಾನೆ ಎಂಬ ಕಳವಳದಿಂದಾಗಿ ಆತನನ್ನು ತರಬೇತಿಯಿಂದ ತೆಗೆದುಹಾಕಲಾಗಿತ್ತು, ಆದರೆ ನಂತರ ಆ ವಿಮಾನಯಾನ ಸಂಸ್ಥೆಯಲ್ಲಿಯೇ ಮತ್ತೊಂದು ಹುದ್ದೆಯನ್ನು ನೀಡಲಾಗಿತ್ತು.
ಸಹ-ಪೈಲಟ್ ಒಮಾನಿ ತಂದೆ ಮತ್ತು ಸಿರಿಯನ್ ತಾಯಿಗೆ ಜನಿಸಿದ್ದನು.
ಸಹ-ಪೈಲಟ್ ಯುಎಇಯಲ್ಲಿ ಒಮಾನಿ ತಂದೆ ಮತ್ತು ಸಿರಿಯನ್ ತಾಯಿಗೆ ಜನಿಸಿದ್ದನು ಹಾಗೂ ತನ್ನ ಜೀವನದ ಹಲವು ವರ್ಷಗಳನ್ನು ಯುಎಇಯಲ್ಲಿ ಕಳೆದಿದ್ದನು ಎಂದು ಮತ್ತೊಂದು ಮೂಲ ತಿಳಿಸಿದೆ.
ವಿಮಾನವು ಮೊದಲು ಇಳಿದಿದ್ದ ಸೌದಿ ಅರೇಬಿಯಾದಿಂದ ಆತನನ್ನು ಯುಎಇಗೆ ವರ್ಗಾಯಿಸಲಾಗಿದೆ ಮತ್ತು ಅಲ್ಲಿ ಆತ ಭಯೋತ್ಪಾದನೆಗೆ ಸಂಬಂಧಿಸಿದ ತನಿಖೆಯನ್ನು ಎದುರಿಸುತ್ತಿದ್ದಾನೆ.
ಆರೋಪಿಯು ಫ್ಲೈದುಬೈ(Flydubai) ಸಂಸ್ಥೆಯಲ್ಲಿ ಕೇವಲ ಎಂಟು ತಿಂಗಳು ಕೆಲಸ ಮಾಡಿದ್ದನು ಎಂದು ಇಸ್ರೇಲಿ ಅಧಿಕಾರಿಯೊಬ್ಬರು ತಿಳಿಸಿದರೆ, ಆತ ಈ ಹಿಂದೆ ರಾಯಲ್ ಏರ್ ಮೊರಾಕೊದಲ್ಲಿ ಕೆಲಸ ಮಾಡಿದ್ದನು ಎಂದು ತಿಳಿದು ಬಂದಿದೆ.
ಒಮಾನ್ ಇಸ್ರೇಲ್ ಅನ್ನು ಮಾನ್ಯ ಮಾಡುವುದಿಲ್ಲ ಎಂಬ ವಾಸ್ತವದ ನಡುವೆಯೇ, ಒಮಾನಿ ಪ್ರಜೆಯೊಬ್ಬರಿಗೆ ಟೆಲ್ ಅವಿವ್‌ಗೆ ತೆರಳುವ ವಿಮಾನದಲ್ಲಿ ಪೈಲಟ್ ಆಗಿ ಸೇವೆ ಸಲ್ಲಿಸಲು ಹೇಗೆ ಅನುಮತಿ ನೀಡಲಾಯಿತು ಎಂಬ ಪ್ರಶ್ನೆಗಳನ್ನು ಈ ವರದಿಗಳು ಹುಟ್ಟುಹಾಕಿವೆ.
ಒಮಾನಿ ಪೈಲಟ್ ವಿಮಾನ ಸಿಬ್ಬಂದಿಯ ಭಾಗವಾಗಿದ್ದು ಹೇಗೆ?
ಇದಲ್ಲದೆ, ಒಮಾನಿ ಪೈಲಟ್ ವಿಮಾನ ಸಿಬ್ಬಂದಿಯ ಭಾಗವಾಗಿದ್ದು ಹೇಗೆ ಎಂಬುದರ ಕುರಿತು ‘ಶಿನ್ ಬೆಟ್’ (Shin Bet), ‘ಮೊಸಾಡ್’ (Mossad), ಸೇನೆ ಮತ್ತು ಸಾರಿಗೆ ಸಚಿವಾಲಯ ಸೇರಿದಂತೆ ಹಲವಾರು ಇಸ್ರೇಲಿ ಸಂಸ್ಥೆಗಳು ತನಿಖೆ ನಡೆಸುತ್ತಿವೆ ಎಂದು ಇಸ್ರೇಲಿ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಇದಕ್ಕೂ ಮುನ್ನ, ಒಮಾನಿ ಸಹ-ಪೈಲಟ್‌ನ ಸಾಮಾನುಗಳ ನಡುವೆ ‘ಫ್ರೀ ಪ್ಯಾಲೆಸ್ಟೈನ್’ (Free Palestine) ಗುಂಪುಗಳ ಕರಪತ್ರಗಳು ಮತ್ತು ಪ್ರಕಟಣೆಗಳು ಹಾಗೂ ಪ್ಯಾಲೆಸ್ಟೈನ್ ಪರವಾದ ಸಾಮಗ್ರಿಗಳು ಪತ್ತೆಯಾಗಿವೆ ಎಂದು ಎಮಿರೇಟಿ ಮೂಲವೊಂದನ್ನು ಉಲ್ಲೇಖಿಸಿ ‘i24 ನ್ಯೂಸ್’ ವರದಿ ಮಾಡಿತ್ತು.
‘i24 ನ್ಯೂಸ್’ ವರದಿಯ ಪ್ರಕಾರ, ಆ ಪೈಲಟ್ ಪದೇ ಪದೇ ಪ್ಯಾಲೆಸ್ಟೀನಿಯನ್ನರಿಗೆ ಬೆಂಬಲ ಮತ್ತು ಇಸ್ರೇಲ್ ವಿರುದ್ಧ ದ್ವೇಷವನ್ನು ವ್ಯಕ್ತಪಡಿಸಿದ್ದರು. ಅವರಲ್ಲಿ ಕಂಡುಬಂದಿದೆ ಎನ್ನಲಾದ ಇಸ್ಲಾಮಿಕ್ ತೀವ್ರಗಾಮಿತ್ವ ಮತ್ತು ಸಂಭಾವ್ಯ ಭಯೋತ್ಪಾದಕ ಉದ್ದೇಶಗಳ ಕುರಿತಾದ ವ್ಯಾಪಕ ತನಿಖೆಯ ಭಾಗವಾಗಿ ಈ ವಿಷಯವನ್ನೂ ಪರಿಶೀಲಿಸಲಾಗುತ್ತಿದೆ ಎಂದು ವರದಿ ತಿಳಿಸಿದೆ.
