ಭಾರತದ ಲಕ್ಷಾಂತರ ಮಹಿಳೆಯರಲ್ಲಿ ಇತ್ತೀಚಿನ ವರ್ಷಗಳಲ್ಲಿ ಪಿಸಿಓಎಸ್ ಅಂದರೆ ಪಾಲಿಸಿಸ್ಟಿಕ್ ಓವರಿ ಸಿಂಡ್ರೋಮ್ ಸಮಸ್ಯೆ ವ್ಯಾಪಕವಾಗಿ ಕಾಣಿಸಿಕೊಳ್ಳುತ್ತಿದೆ. ಆದರೆ, ಇದನ್ನು ಕೇವಲ ಮುಟ್ಟಿನ ತೊಂದರೆ, ಮೊಡವೆ ಅಥವಾ ಸಂತಾನಹೀನತೆಗೆ ಸಂಬಂಧಿಸಿದ ಕಾಯಿಲೆ ಎಂದು ನಿರ್ಲಕ್ಷಿಸುತ್ತಿದ್ದರೆ ಎಚ್ಚೆತ್ತುಕೊಳ್ಳಲೇಬೇಕು. ಏಕೆಂದರೆ, ವೈದ್ಯಕೀಯ ಜಗತ್ತಿನಲ್ಲಿ ಈಗ ಪಿಸಿಓಎಸ್ ಹೆಸರನ್ನು ‘ಪಿಎಂಓಎಸ್’ ಅಂದರೆ ಪಾಲಿಎಂಡೋಕ್ರೈನ್ ಮೆಟಾಬಾಲಿಕ್ ಒವೇರಿಯನ್ ಸಿಂಡ್ರೋಮ್ ಎಂದು ಮರುನಾಮಕರಣ ಮಾಡಲಾಗಿದೆ. ಇದು ಕೇವಲ ಹಾರ್ಮೋನ್ ಏರುಪೇರಲ್ಲ, ಬದಲಿಗೆ ಇಡೀ ದೇಹದ ಚಯಾಪಚಯ ಕ್ರಿಯೆ ಮತ್ತು ಹೃದಯದ ಆರೋಗ್ಯಕ್ಕೆ ಕುತ್ತು ತರುವ ಗಂಭೀರ ಕಾಯಿಲೆ ಎಂಬುದನ್ನು ತಜ್ಞರು ಸ್ಪಷ್ಟಪಡಿಸಿದ್ದಾರೆ.
ಹೃದಯ ಸಂಬಂಧಿ ಕಾಯಿಲೆಗಳ ಅಪಾಯ ಶೇಕಡಾ 32 ರಷ್ಟು ಹೆಚ್ಚು
ಇತ್ತೀಚೆಗೆ ಯುರೋಪಿಯನ್ ಜರ್ನಲ್ ಆಫ್ ಎಂಡೋಕ್ರೈನಾಲಜಿಯಲ್ಲಿ ಪ್ರಕಟವಾದ ಬೃಹತ್ ಸಂಶೋಧನಾ ವರದಿಯೊಂದು ಆತಂಕಕಾರಿ ಸತ್ಯವನ್ನು ಬಿಚ್ಚಿಟ್ಟಿದೆ. ಸುಮಾರು 1.28 ಲಕ್ಷ ಪಿಎಂಓಎಸ್ ಬಾಧಿತ ಮಹಿಳೆಯರನ್ನು ಹಾಗೂ ಕಾಯಿಲೆ ಇಲ್ಲದ 5.87 ಲಕ್ಷ ಮಹಿಳೆಯರನ್ನು ಹೋಲಿಸಿ ಈ ಅಧ್ಯಯನ ನಡೆಸಲಾಗಿತ್ತು. ಇದರ ಪ್ರಕಾರ, ಪಿಎಂಓಎಸ್ ಹೊಂದಿರುವ ಮಹಿಳೆಯರಲ್ಲಿ ಇತರರಿಗಿಂತ ಹೃದಯ ಸಂಬಂಧಿ ಕಾಯಿಲೆಗಳು ಬರುವ ಅಪಾಯ ಶೇಕಡಾ 32 ರಷ್ಟು ಹೆಚ್ಚಾಗಿರುತ್ತದೆ ಎಂದು ತಿಳಿದುಬಂದಿದೆ.
ದಪ್ಪಗಿಲ್ಲದಿದ್ದರೂ ತಪ್ಪಿದ್ದಲ್ಲ ಆತಂಕ!
ಸಾಮಾನ್ಯವಾಗಿ ಬೊಜ್ಜು ಅಥವಾ ಮಧುಮೇಹ ಇದ್ದವರಿಗಷ್ಟೇ ಹೃದಯದ ಕಾಯಿಲೆ ಬರುತ್ತದೆ ಎಂಬ ನಂಬಿಕೆ ಇದೆ. ಆದರೆ ಈ ಸಂಶೋಧನೆಯು ಆ ಕಲ್ಪನೆಯನ್ನು ಸುಳ್ಳಾಗಿಸಿದೆ. ಸಾಮಾನ್ಯ ತೂಕ ಹೊಂದಿರುವ, ಅಂದರೆ ಬಿಎಂಐ 25 ಕ್ಕಿಂತ ಕಡಿಮೆ ಇರುವ ಮತ್ತು ಮಧುಮೇಹ ಇಲ್ಲದ ಪಿಎಂಓಎಸ್ ಬಾಧಿತ ಮಹಿಳೆಯರಲ್ಲೂ ಹೃದಯ ಸಂಬಂಧಿ ಕಾಯಿಲೆಗಳ ಅಪಾಯ ಶೇಕಡಾ 40 ರಷ್ಟು ಹೆಚ್ಚಿರುವುದು ಪತ್ತೆಯಾಗಿದೆ. ಅಂದರೆ ದೇಹದ ತೂಕ ಸಾಮಾನ್ಯವಾಗಿ ಕಂಡರೂ, ಒಳಗೊಳಗೇ ಹಾರ್ಮೋನ್ ಮತ್ತು ಚಯಾಪಚಯ ವ್ಯವಸ್ಥೆ ಹದಗೆಟ್ಟಿರುತ್ತದೆ.
ಭಾರತದಲ್ಲಿ ಪ್ರಸ್ತುತ ಸಂಭವಿಸುವ ಒಟ್ಟು ಸಾವುಗಳಲ್ಲಿ ಶೇಕಡಾ 31 ರಷ್ಟು ಸಾವುಗಳು ಹೃದಯದ ಕಾಯಿಲೆಗಳಿಂದಲೇ ಆಗುತ್ತಿವೆ. ಇಂತಹ ಪರಿಸ್ಥಿತಿಯಲ್ಲಿ ಯುವತಿಯರನ್ನು ಕಾಡುತ್ತಿರುವ ಪಿಎಂಓಎಸ್ ಮತ್ತಷ್ಟು ಆತಂಕ ಮೂಡಿಸಿದೆ.
ಏನಿದು ಪಿಎಂಓಎಸ್? ಹೃದಯದ ಮೇಲೆ ಹೇಗೆ ಪರಿಣಾಮ ಬೀರುತ್ತದೆ?
ಭಾರತದ ಪ್ರಮುಖ ವೈದ್ಯಕೀಯ ತಜ್ಞರಾದ ಡಾ. ಹರ್ಷಲ್ ಚೌಧರಿ ಅವರ ಪ್ರಕಾರ, ಪಿಎಂಓಎಸ್ ಕೇವಲ ಅಂಡಾಶಯಕ್ಕೆ ಸೀಮಿತವಾಗಿಲ್ಲ. ಇದು ದೇಹದ ಸ್ವಯಂಚಾಲಿತ ನರಮಂಡಲದ ಮೇಲೆ ಪ್ರಭಾವ ಬೀರುತ್ತದೆ. ಇದರಿಂದಾಗಿ ರಕ್ತದೊತ್ತಡ ನಿಯಂತ್ರಣ ತಪ್ಪುತ್ತದೆ. ಜೊತೆಗೆ, ದೇಹದಲ್ಲಿ ಇನ್ಸುಲಿನ್ ಪ್ರತಿರೋಧಕ ಶಕ್ತಿ ಹೆಚ್ಚಾಗಿ, ರಕ್ತನಾಳಗಳಲ್ಲಿ ದೀರ್ಘಕಾಲದ ಉರಿಯೂತ ಉಂಟಾಗುತ್ತದೆ. ಇದು ಕಾಲಕ್ರಮೇಣ ಹೃದಯಾಘಾತ ಅಥವಾ ಪಾರ್ಶ್ವವಾಯುವಿಗೆ ಕಾರಣವಾಗಬಹುದು.
ಭಾರತದ ನಗರ ಪ್ರದೇಶಗಳಲ್ಲಿನ ಇಂದಿನ ಬದಲಾದ ಜೀವನಶೈಲಿ, ಅಂದರೆ ದೀರ್ಘಕಾಲ ಕುಳಿತು ಕೆಲಸ ಮಾಡುವುದು, ಅತಿಯಾದ ಮಾನಸಿಕ ಒತ್ತಡ, ನಿದ್ದೆಯಿಲ್ಲದಿರುವುದು ಮತ್ತು ಜಂಕ್ ಫುಡ್ ಸೇವನೆಯು ಈ ಸಮಸ್ಯೆಯನ್ನು ಮತ್ತಷ್ಟು ಉಲ್ಬಣಗೊಳಿಸುತ್ತಿದೆ. ಸಾಮಾನ್ಯವಾಗಿ 40 ವರ್ಷದೊಳಗಿನ ಮಹಿಳೆಯರಲ್ಲಿ ಹೃದಯದ ಕಾಯಿಲೆ ಬರುವುದು ಅಪರೂಪ ಎಂದು ಭಾವಿಸಲಾಗುತ್ತದೆ. ಇದೇ ಕಾರಣಕ್ಕೆ ಯುವತಿಯರಲ್ಲಿ ರಕ್ತದೊತ್ತಡ ಹೆಚ್ಚಿದ್ದರೂ ಅದನ್ನು ಆರಂಭದಲ್ಲೇ ಪತ್ತೆ ಹಚ್ಚದೆ ನಿರ್ಲಕ್ಷಿಸಲಾಗುತ್ತಿದೆ.
ಪರಿಹಾರ ಮತ್ತು ಮುನ್ನೆಚ್ಚರಿಕೆ ಕ್ರಮಗಳು
ಪಿಎಂಓಎಸ್ ಸಮಸ್ಯೆಯಿಂದ ಉಂಟಾಗುವ ಹೃದಯದ ಅಪಾಯವನ್ನು ತಪ್ಪಿಸಲು ವೈದ್ಯರು ಕೆಲವು ಪ್ರಮುಖ ಜೀವನಶೈಲಿ ಬದಲಾವಣೆಗಳನ್ನು ಸೂಚಿಸಿದ್ದಾರೆ:
- ನಿಯಮಿತವಾಗಿ ರಕ್ತದೊತ್ತಡ, ಕೊಲೆಸ್ಟ್ರಾಲ್ ಮತ್ತು ರಕ್ತದಲ್ಲಿನ ಸಕ್ಕರೆ ಪ್ರಮಾಣವನ್ನು ಪರೀಕ್ಷಿಸಿಕೊಳ್ಳಬೇಕು.
- ಸಂಸ್ಕರಿಸಿದ ಮತ್ತು ಸಕ್ಕರೆ ಅಂಶ ಹೆಚ್ಚಿರುವ ಆಹಾರಗಳನ್ನು ತ್ಯಜಿಸಿ, ನಾರಿನಂಶವಿರುವ ನೈಸರ್ಗಿಕ ಆಹಾರ ಮತ್ತು ಒಮೆಗಾ-3 ಸಮೃದ್ಧವಾಗಿರುವ ಧಾನ್ಯಗಳನ್ನು ಸೇವಿಸಬೇಕು.
- ತೂಕವನ್ನು ನಿಯಂತ್ರಣದಲ್ಲಿಟ್ಟುಕೊಳ್ಳಲು ದಿನಾಲು ನಡಿಗೆ, ಯೋಗ, ಸೈಕ್ಲಿಂಗ್ ಅಥವಾ ಜಿಮ್ ನಂತಹ ದೈಹಿಕ ಕಸರತ್ತುಗಳನ್ನು ರೂಢಿಸಿಕೊಳ್ಳಬೇಕು.
- ಮಾನಸಿಕ ಒತ್ತಡ ನಿರ್ವಹಣೆಗೆ ಧ್ಯಾನ ಮಾಡುವುದು ಮತ್ತು ಕನಿಷ್ಠ 7 ರಿಂದ 8 ಗಂಟೆಗಳ ಕಾಲ ಉತ್ತಮ ನಿದ್ದೆ ಮಾಡುವುದು ಅತಿ ಅಗತ್ಯ.
ಇಲ್ಲಿಯವರೆಗೆ ಮಹಿಳೆಯರು ಮುಟ್ಟಿನ ಸಮಸ್ಯೆಗೆ ಸ್ತ್ರೀರೋಗ ತಜ್ಞರನ್ನು, ಮೊಡವೆಗೆ ಚರ್ಮರೋಗ ತಜ್ಞರನ್ನು ಪ್ರತ್ಯೇಕವಾಗಿ ಕಂಡು ಚಿಕಿತ್ಸೆ ಪಡೆಯುತ್ತಿದ್ದರು. ಆದರೆ ಪಿಎಂಓಎಸ್ ನಿಯಂತ್ರಣಕ್ಕೆ ಕೇವಲ ಹಾರ್ಮೋನ್ ಚಿಕಿತ್ಸೆಯಷ್ಟೇ ಸಾಲದು, ಹೃದಯದ ಆರೋಗ್ಯದ ಕಡೆಯೂ ಸಮಾನ ಗಮನ ಹರಿಸುವ ಸಮಗ್ರ ವೈದ್ಯಕೀಯ ಚಿಕಿತ್ಸಾ ಪದ್ಧತಿಯ ಅಗತ್ಯವಿದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
