ಪಾಲಕ್ಕಾಡ್: ಪ್ರಯಾಣಿಕರಿಂದ ದುಬಾರಿ ಫೋನ್, ಲ್ಯಾಪ್ ಟಾಪ್ ಕಳವು ಪ್ರಕರಣದಲ್ಲಿ ಚಿತ್ರ ನಿರ್ಮಾಪಕ ಖಾಜಾ ಹುಸೇನ್ ಬಂಧಿಸಲಾಗಿದೆ.
80 ಸಾವಿರ ರೂ. ಮೌಲ್ಯದ ಫೋನ್, 2 ಲ್ಯಾಪ್ ಟಾಪ್ ಕಳವು ಮಾಡಿದ ಆರೋಪದಡಿ ಮಲಯಾಳಂ ಚಲನಚಿತ್ರ ನಿರ್ಮಾಪಕ ಖಾಜಾ ಹುಸೇನ್ ರನ್ನು ಪೊಲೀಸರು ಬಂಧಿಸಿದ್ದಾರೆ.
‘ಕಲ್ಲನ್ಮಾರುಡೆ ವೀಡು’ (Kallanmaarude Veedu) ನಂತಹ ಚಿತ್ರಗಳಿಗೆ ಹೆಸರುವಾಸಿಯಾದ ಮಲಯಾಳಂ ಚಲನಚಿತ್ರ ನಿರ್ದೇಶಕ ಮತ್ತು ನಿರ್ಮಾಪಕ ಖಾಜಾ ಹುಸೇನ್ ಅವರ ಕುರಿತು ಆಘಾತಕಾರಿ ಸುದ್ದಿ ಹೊರಬಿದ್ದಿದೆ. ಕೇರಳದ ಪಾಲಕ್ಕಾಡ್ ರೈಲು ನಿಲ್ದಾಣದಲ್ಲಿ ಭಾನುವಾರ ಪೊಲೀಸರು ಅವರನ್ನು ಬಂಧಿಸಿದ್ದಾರೆ. ರೈಲುಗಳಲ್ಲಿ ಪ್ರಯಾಣಿಸುವ ಪ್ರಯಾಣಿಕರಿಂದ ದುಬಾರಿ ಫೋನ್ ಗಳು ಮತ್ತು ಲ್ಯಾಪ್ ಟಾಪ್ ಗಳನ್ನು ಕದ್ದ ಆರೋಪದ ಮೇಲೆ ಪಾಲಕ್ಕಾಡ್ ರೈಲ್ವೆ ಪೊಲೀಸರು ಅವರನ್ನು ಬಂಧಿಸಿದ್ದಾರೆ. ಮಹಿಳೆಯೊಬ್ಬರು ತಮ್ಮ ಮೊಬೈಲ್ ಫೋನ್ ಕಳುವಾಗಿರುವ ಬಗ್ಗೆ ದೂರು ನೀಡಿದ ನಂತರ ನಡೆಸಿದ ತನಿಖೆಯ ಆಧಾರದ ಮೇಲೆ ಹುಸೇನ್ ಅವರನ್ನು ಪತ್ತೆಹಚ್ಚಲಾಗಿದೆ ಎಂದು ಶೋರ್ನೂರು ರೈಲ್ವೆ ಪೊಲೀಸ್ ಠಾಣೆಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಪೊಲೀಸರು ಹೇಳಿದ್ದೇನು?
ಖಾಜಾ ಹುಸೇನ್ ಅವರು ಮೊಬೈಲ್ ಫೋನ್ ಗಳು ಮತ್ತು ಲ್ಯಾಪ್ ಟಾಪ್ ಗಳಂತಹ ವಸ್ತುಗಳನ್ನು ಕದ್ದ ಆರೋಪವನ್ನು ಎದುರಿಸುತ್ತಿದ್ದಾರೆ ಎಂದು ಶೋರ್ನೂರು ರೈಲ್ವೆ ಪೊಲೀಸ್ ಠಾಣೆಯ ಅಧಿಕಾರಿಯೊಬ್ಬರು ಸುದ್ದಿಗಾರರಿಗೆ ತಿಳಿಸಿದರು. ಎರಡು ದಿನಗಳ ಹಿಂದೆ ‘ಮಂಗಳೂರು ಸೆಂಟ್ರಲ್ ಇಂಟರ್‌ಸಿಟಿ ಎಸ್‌ಎಫ್ ಎಕ್ಸ್‌ಪ್ರೆಸ್’ನಲ್ಲಿ ಪ್ರಯಾಣಿಸುತ್ತಿದ್ದ ಮಹಿಳಾ ಪ್ರಯಾಣಿಕರೊಬ್ಬರಿಂದ 80,000 ರೂ. ಮೌಲ್ಯದ ಮೊಬೈಲ್ ಫೋನ್ ಕದ್ದ ನಂತರ ಆರೋಪಿ ಪರಾರಿಯಾಗಿದ್ದನು ಮತ್ತು ಅಂದಿನಿಂದ ಪೊಲೀಸರು ಆತನಿಗಾಗಿ ಹುಡುಕಾಟ ನಡೆಸುತ್ತಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.
ವಿವಿಧ ಸೆಕ್ಷನ್ ಗಳ ಅಡಿಯಲ್ಲಿ ಪ್ರಕರಣ ದಾಖಲು
ಕಳ್ಳತನದ ನಂತರ, ರೈಲ್ವೆ ಪೊಲೀಸರು ಬಿಎನ್‌ಎಸ್(BNS) ನ ಸೆಕ್ಷನ್ 305(ವಸತಿ ಗೃಹ, ಸಾರಿಗೆ ವಾಹನ ಅಥವಾ ಪೂಜಾ ಸ್ಥಳದಲ್ಲಿ ಕಳ್ಳತನ) ಅಡಿಯಲ್ಲಿ ಪ್ರಕರಣ ದಾಖಲಿಸಿ ತನಿಖೆ ಆರಂಭಿಸಿದರು; ಈ ತನಿಖೆಯು ಭಾನುವಾರ ಹುಸೇನ್ ಅವರ ಬಂಧನಕ್ಕೆ ಕಾರಣವಾಯಿತು. ಖಾಜಾ ಹುಸೇನ್ ಅವರು 2024 ರಲ್ಲಿ ಬಿಡುಗಡೆಯಾದ ಗಮನಾರ್ಹ ಮಲಯಾಳಂ ಚಲನಚಿತ್ರ ‘ಕಲ್ಲನ್ಮಾರುಡೆ ವೀಡು’ನ ನಿರ್ದೇಶಕ ಮತ್ತು ನಿರ್ಮಾಪಕರಾಗಿದ್ದಾರೆ. ಪೊಲೀಸರ ಪ್ರಕಾರ, ಸಿನಿಮಾ ವಾಣಿಜ್ಯಿಕವಾಗಿ ವಿಫಲವಾದ ನಂತರ ಹುಸೇನ್ ಭಾರಿ ಆರ್ಥಿಕ ನಷ್ಟವನ್ನು ಅನುಭವಿಸಿದರು ಮತ್ತು ತೀವ್ರ ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿದರು. ಪರಿಣಾಮವಾಗಿ, ನಷ್ಟವನ್ನು ಸರಿದೂಗಿಸಲು ಮತ್ತು ಹಣ ಗಳಿಸಲು ಅವರು ಕಳ್ಳತನದ ಹಾದಿಯನ್ನು ಹಿಡಿದು ರೈಲುಗಳಲ್ಲಿ ಕಳ್ಳತನ ಮಾಡಲು ಪ್ರಾರಂಭಿಸಿದರು.
ಶೋರ್ನೂರು ಪ್ರದೇಶದಲ್ಲಿ 2 ಲ್ಯಾಪ್ ಟಾಪ್ ಗಳು ಮತ್ತು 1 ಮೊಬೈಲ್ ಕಳ್ಳತನ
ಶೋರ್ನೂರು ಪ್ರದೇಶದಲ್ಲಿ ಖಾಜಾ ಹುಸೇನ್ ಎರಡು ಲ್ಯಾಪ್ ಟಾಪ್ ಗಳು ಮತ್ತು 80,000 ರೂ. ಮೌಲ್ಯದ ಮೊಬೈಲ್ ಫೋನ್ ಕದ್ದಿದ್ದಾರೆ ಎಂಬುದು ಇಲ್ಲಿಯವರೆಗಿನ ತನಿಖೆಯಿಂದ ತಿಳಿದುಬಂದಿದೆ ಎಂದು ಶೋರ್ನೂರು ರೈಲ್ವೆ ಪೊಲೀಸ್ ಠಾಣೆಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಇದಲ್ಲದೆ, ಕೋಝಿಕ್ಕೋಡ್‌ನಲ್ಲಿ ಎರಡು ಲ್ಯಾಪ್‌ಟಾಪ್‌ಗಳನ್ನು ಕದ್ದ ಆರೋಪವೂ ಕಾಜಾ ಮೇಲಿದೆ. ಈ ಸುದ್ದಿಯು ಮನರಂಜನಾ ಉದ್ಯಮದಲ್ಲಿರುವವರನ್ನೂ ಆಘಾತಕ್ಕೀಡುಮಾಡಿದೆ. ‘ಕಲ್ಲನ್ಮಾರುಡೆ ವೀಡು’ (Kallanmaarude Veedu) ಚಲನಚಿತ್ರವು ವಿಫಲವಾದ ನಂತರ, ಚಿತ್ರದ ನಟ ಬಿಜುಕುಟ್ಟನ್ ಪ್ರಚಾರ ಕಾರ್ಯಕ್ರಮಗಳಿಗೆ ಹಾಜರಾಗಲಿಲ್ಲ ಮತ್ತು ಇದರಿಂದ ಚಿತ್ರಕ್ಕೆ ಭಾರಿ ನಷ್ಟವಾಯಿತು ಎಂದು ಖಾಜಾ ಹುಸೇನ್ ಆರೋಪಿಸಿದ್ದರು ಎಂಬುದು ಗಮನಾರ್ಹ. ಪ್ರಚಾರದ ಚಟುವಟಿಕೆಗಳ ಸಮಯದಲ್ಲಿ ನಟ ಹಾಜರಿದ್ದಿದ್ದರೆ ಅದು ಪ್ರೇಕ್ಷಕರ ಮೇಲೆ ವಿಭಿನ್ನ ಪರಿಣಾಮ ಬೀರುತ್ತಿತ್ತು ಹಾಗೂ ಅವರ ಅಭಿಮಾನಿಗಳು ಖಂಡಿತವಾಗಿಯೂ ಚಿತ್ರವನ್ನು ವೀಕ್ಷಿಸಲು ಬರುತ್ತಿದ್ದರು ಎಂದು ಅವರು ಪ್ರತಿಪಾದಿಸಿದ್ದರು.
