ಬಾಲಿವುಡ್‌ನಲ್ಲಿ ಯಾರೂ ನಾನಾ ಪಾಟೇಕರ್ ಮೃತದೇಹ ನೋಡಿಲ್ಲ, ಅವರು ಜೀವಂತವಾಗಿರಬಹುದು!’ ತನುಶ್ರೀ ದತ್ತಾ ಬಾಂಬ್

ಮುಂಬೈ:ಬಾಲಿವುಡ್‌ನ ಹಿರಿಯ ನಟ ನಾನಾ ಪಾಟೇಕರ್ ಅವರ ಸಾವಿನ ಕುರಿತು ನಟಿ ತನುಶ್ರೀ ದತ್ತಾ ಸ್ಫೋಟಕ ಹೇಳಿಕೆ ನೀಡಿದ್ದು, ಹೊಸ ಚರ್ಚೆಗೆ ಕಾರಣವಾಗಿದೆ. “ಬಾಲಿವುಡ್‌ನಲ್ಲಿ ಯಾರೂ ನಾನಾ ಪಾಟೇಕರ್ ಅವರ ಮೃತದೇಹವನ್ನು ನೋಡಿಲ್ಲ, ಅವರು ಇನ್ನೂ ಜೀವಂತವಾಗಿರಬಹುದು” ಎಂದು ತನುಶ್ರೀ ಅನುಮಾನ ವ್ಯಕ್ತಪಡಿಸಿದ್ದಾರೆ.

ನಾನಾ ಅವರ ಅಂತ್ಯಕ್ರಿಯೆ, ಮೃತದೇಹದ ದರ್ಶನ ಹಾಗೂ ಪ್ರಾರ್ಥನಾ ಸಭೆಯ ಕುರಿತು ಹಲವು ಪ್ರಶ್ನೆಗಳನ್ನು ಎತ್ತಿರುವ ಅವರು, ಸಾವಿನ ಸುತ್ತ ಅನುಮಾನಗಳನ್ನು ವ್ಯಕ್ತಪಡಿಸಿದ್ದಾರೆ.

ಬಾಲಿವುಡ್‌ನ ಹಿರಿಯ ನಟ ನಾನಾ ಪಾಟೇಕರ್ ಅವರ ಸಾವಿನ ಕುರಿತು ನಟಿ ತನುಶ್ರೀ  ದತ್ತಾ ಹಲವು ಪ್ರಶ್ನೆಗಳನ್ನು ಎತ್ತಿದ ಬೆನ್ನಲ್ಲೇ, ಮುಂಬೈನಲ್ಲಿ ಬುಧವಾರ (ಅಕ್ಟೋಬರ್ 14) ಅವರಿಗೆ ಶ್ರದ್ಧಾಂಜಲಿ ಸಲ್ಲಿಸಲು ಪ್ರಾರ್ಥನಾ ಸಭೆ ಆಯೋಜಿಸಲಾಗಿತ್ತು. ನಾನಾ ಅವರ ಅಂತಿಮ ದರ್ಶನ ಪಡೆಯಲು ಚಿತ್ರರಂಗದ ಗಣ್ಯರು ಮತ್ತು ಮಾಧ್ಯಮದವರಿಗೆ ಅವಕಾಶ ಸಿಗಲಿಲ್ಲ ಎಂದು ತನುಶ್ರೀ  ದತ್ತಾ ಈ ಹಿಂದೆ ಪ್ರಶ್ನಿಸಿದ್ದರು.

ಮುಂಬೈನಲ್ಲಿ ನಡೆದ ಪ್ರಾರ್ಥನಾ ಸಭೆ

ಮುಂಬೈನ ಪ್ರಭಾದೇವಿ ಪ್ರದೇಶದಲ್ಲಿರುವ ಪಿ.ಎಲ್. ದೇಶಪಾಂಡೆ ಮಹಾರಾಷ್ಟ್ರ ಕಲಾ ಅಕಾಡೆಮಿ ಆವರಣದಲ್ಲಿ ಪ್ರಾರ್ಥನಾ ಸಭೆ ನಡೆಯಿತು. ನಟರಾದ ಶಿವಾಜಿ ಸಾಟಂ, ವರ್ಷಾ ಉಸಗಾಂವ್ಕರ್ ಮತ್ತು ರೋಹಿಣಿ ಹಟ್ಟಂಗಡಿ ಸೇರಿದಂತೆ ಹಲವು ಗಣ್ಯರು ಸಭೆಯಲ್ಲಿ ಪಾಲ್ಗೊಂಡಿದ್ದರು.

ಚಿತ್ರನಿರ್ದೇಶಕ ಸಂಜಯ್ ಜಾಧವ್, ನಿರ್ದೇಶಕ ಮೆಹುಲ್ ಕುಮಾರ್ ಹಾಗೂ ಮಹಾರಾಷ್ಟ್ರ ಆಹಾರ ಮತ್ತು ಔಷಧ ಆಡಳಿತದ ಆಯುಕ್ತ ತುಕಾರಾಂ ಮುಂಧೆ ಕೂಡ ಉಪಸ್ಥಿತರಿದ್ದರು.

ಈ ಸಂದರ್ಭದಲ್ಲಿ ಮಾತನಾಡಿದ ತುಕಾರಾಂ ಮುಂಧೆ, ನಾನಾ ಪಾಟೇಕರ್ ಅವರ ಸಾಮಾಜಿಕ ಕಾಳಜಿ ಹಾಗೂ ಬಡವರ ಏಳಿಗೆಗಾಗಿ ಅವರು ತೋರಿದ ಆಸಕ್ತಿಯನ್ನು ಸ್ಮರಿಸಿದರು.

“ಅವರು ನಿಜಕ್ಕೂ ಅದ್ಭುತ ವ್ಯಕ್ತಿಯಾಗಿದ್ದರು. ಸಮಾಜದ ಬಗ್ಗೆ ಅವರ ದೃಷ್ಟಿಕೋನ ಸ್ಪಷ್ಟವಾಗಿತ್ತು. ಬಡವರಿಗೆ ನೆರವಾಗುವುದು ಮತ್ತು ಅವರನ್ನು ಮೇಲೆತ್ತುವುದು ಹೇಗೆ ಎಂಬ ಬಗ್ಗೆ ಅವರಿಗೆ ಅಪಾರ ಕಾಳಜಿ ಇತ್ತು. ಅವರು ಸಮಾಜದ ಅವಿಭಾಜ್ಯ ಅಂಗವಾಗಿದ್ದರು. ಅವರ ಹಾದಿಯಲ್ಲೇ ಸಾಗಲು ನಾವು ಪ್ರಯತ್ನಿಸುತ್ತಿದ್ದೇವೆ” ಎಂದು ಅವರು ಹೇಳಿದರು.

ನಾನಾ ಪಾಟೇಕರ್ ಸಾವಿನ ಬಗ್ಗೆ ತನುಶ್ರೀ  ದತ್ತಾ ಪ್ರಶ್ನೆ

ಅಕ್ಟೋಬರ್ 12ರಂದು ಇನ್‌ಸ್ಟಾಗ್ರಾಂ ಲೈವ್‌ನಲ್ಲಿ ಮಾತನಾಡಿದ್ದ ತನುಶ್ರೀ  ದತ್ತಾ ನಾನಾ ಪಾಟೇಕರ್ ಅವರ ಸಾವಿನ ಸುತ್ತ ಹಲವು ಪ್ರಶ್ನೆಗಳನ್ನು ಎತ್ತಿದ್ದರು.

75 ವರ್ಷದ ನಾನಾ ಪಾಟೇಕರ್ ಅವರು ಅಕ್ಟೋಬರ್ 8ರಂದು ಹೃದಯಾಘಾತದಿಂದ ಮೃತಪಟ್ಟಿದ್ದಾರೆ ಎಂದು ವರದಿಯಾಗಿತ್ತು. ಪುಣೆಯ ಸಮೀಪದ ಡೋಂಜೆ ಗ್ರಾಮದ ಅವರ ಫಾರ್ಮ್‌ಹೌಸ್‌ನಲ್ಲಿ ಅಂತ್ಯಕ್ರಿಯೆ ನೆರವೇರಿಸಲಾಗಿದೆ ಎಂದೂ ವರದಿಗಳು ತಿಳಿಸಿದ್ದವು.

ನಾನಾ ಅವರಂತಹ ಹಿರಿಯ ಕಲಾವಿದನಿಗೆ ಪ್ರಾರ್ಥನಾ ಸಭೆಯನ್ನು ಏಕೆ ಆಯೋಜಿಸಲಿಲ್ಲ? ಚಿತ್ರರಂಗದವರು ಮತ್ತು ಮಾಧ್ಯಮದವರಿಗೆ ಅಂತಿಮ ದರ್ಶನ ಪಡೆಯಲು ಏಕೆ ಅವಕಾಶ ನೀಡಲಿಲ್ಲ? ಎಂದು ತನುಶ್ರೀ  ದತ್ತಾ ಪ್ರಶ್ನಿಸಿದ್ದರು.

“ಅವರು ದೊಡ್ಡ ದಂತಕಥೆ, ಮಹಾನ್ ವ್ಯಕ್ತಿ. ಬಾಲಿವುಡ್‌ನವರು ಮತ್ತು ಮಾಧ್ಯಮದವರು ಬಂದು ಅಂತಿಮ ದರ್ಶನ ಪಡೆದು ಗೌರವ ಸಲ್ಲಿಸಲು ಪ್ರಾರ್ಥನಾ ಸಭೆ ಆಯೋಜಿಸಬೇಕಿತ್ತು. ಹಿಂದೂ ಸಂಪ್ರದಾಯದಂತೆ ಜನರು ಮೃತರ ಅಂತಿಮ ದರ್ಶನ ಪಡೆದು ಗೌರವ ಸಲ್ಲಿಸುತ್ತಾರೆ” ಎಂದು ಅವರು ಹೇಳಿದ್ದರು.

ಅಂತ್ಯಕ್ರಿಯೆಗೂ ಮೊದಲು ನಾನಾ ಪಾಟೇಕರ್ ಅವರ ಕುಟುಂಬದವರು ಅವರ ಮುಖವನ್ನು ನೋಡಿದ್ದಾರೆಯೇ ಎಂಬ ಬಗ್ಗೆಯೂ ತನುಶ್ರೀ  ದತ್ತಾ ಪ್ರಶ್ನಿಸಿದ್ದರು. ಮೃತದೇಹದ ಯಾವುದೇ ಸಾರ್ವಜನಿಕ ಫೋಟೋ ಅಥವಾ ವಿಡಿಯೋ ಕಾಣಿಸದಿರುವುದನ್ನು ಅವರು ಪ್ರಸ್ತಾಪಿಸಿದ್ದರು.

“ಬಾಲಿವುಡ್‌ನಲ್ಲಿ ಯಾರೂ ಮೃತದೇಹವನ್ನು ನೋಡಿಲ್ಲ. ಹಲವರು ಸಾಮಾಜಿಕ ಜಾಲತಾಣಗಳಲ್ಲಿ ಸಂತಾಪ ಸೂಚಿಸಿದ್ದಾರೆ. ಆದರೆ, ಅವರು ನಿಜವಾಗಿಯೂ ಮೃತದೇಹವನ್ನು ನೋಡಿದ್ದಾರೆಯೇ? ಕುಟುಂಬದವರು ಅಂತಿಮ ದರ್ಶನ ಪಡೆದಿದ್ದಾರೆಯೇ? ಅಂತ್ಯಕ್ರಿಯೆ ನಡೆದಿದ್ದು ಯಾರದ್ದು? ಅವರ ಮುಖವನ್ನು ಮುಚ್ಚಲಾಗಿತ್ತು” ಎಂದು ತನುಶ್ರೀ  ದತ್ತಾ ಹೇಳಿದ್ದರು.

ನಾನಾ ಅವರನ್ನು ಆಸ್ಪತ್ರೆಗೆ ಕರೆದೊಯ್ಯುವ ದೃಶ್ಯಗಳು ಏಕೆ ಲಭ್ಯವಾಗಿಲ್ಲ ಎಂದೂ ಅವರು ಪ್ರಶ್ನಿಸಿದ್ದರು. ತಮ್ಮ ಅಪಘಾತದ ಸಂದರ್ಭದಲ್ಲಿಯೂ ಫೋಟೋಗಳು ಮತ್ತು ವಿಡಿಯೋಗಳು ಹೊರಬಂದಿದ್ದವು ಎಂದು ಉದಾಹರಿಸಿದ್ದರು.

ಅಂತ್ಯಕ್ರಿಯೆಯ ಸಮಯದ ಬಗ್ಗೆಯೂ ಆಕ್ಷೇಪ ವ್ಯಕ್ತಪಡಿಸಿದ್ದ ತನುಶ್ರೀ  ದತ್ತಾ “ರಾತ್ರಿಯ ಮಧ್ಯದಲ್ಲಿ ಅಂತ್ಯಕ್ರಿಯೆ ನಡೆಸುವ ಆತುರ ಏನಿತ್ತು? ಕತ್ತಲಿನಲ್ಲಿ ಅಂತ್ಯಕ್ರಿಯೆ ನಡೆಸಿದ್ದೇಕೆ?” ಎಂದು ಪ್ರಶ್ನಿಸಿದ್ದರು.

ಇದಕ್ಕೂ ಮುಂದುವರಿದು, ಅಂತ್ಯಕ್ರಿಯೆ ನಡೆದಿದ್ದು ನಾನಾ ಪಾಟೇಕರ್ ಅವರ ಮೃತದೇಹವಲ್ಲ ಎಂದು ಅವರು ಆರೋಪಿಸಿದ್ದರು. ನಾನಾ ಅವರು ಸಿಂಗಾಪುರ ಅಥವಾ ಮಲೇಷ್ಯಾದಲ್ಲಿ ಇನ್ನೂ ಜೀವಂತವಾಗಿರಬಹುದು ಎಂದು ಊಹಿಸಿದ್ದರು. ಕಾನೂನು ಪ್ರಕ್ರಿಯೆಗಳಿಂದ ತಪ್ಪಿಸಿಕೊಳ್ಳಲು ತಮ್ಮ ಸಾವಿನ ನಾಟಕವಾಡಿರಬಹುದು ಎಂದೂ ಹೇಳಿದ್ದರು. ಅವರು ತಮ್ಮ ರೂಪ ಬದಲಿಸಿಕೊಂಡಿದ್ದರೆ ಡಿಎನ್‌ಎ ಪರೀಕ್ಷೆ ನಡೆಸಬಹುದು ಎಂದು ಸಲಹೆ ನೀಡಿದ್ದರು.

ನಾನಾ ಅಂತ್ಯಕ್ರಿಯೆಗೆ ಬಾಲಿವುಡ್ ಗಣ್ಯರು ಗೈರು

ನಿರ್ದೇಶಕ ಹಾಗೂ ನಟ ಪ್ರವೀಣ್ ತಾರ್ಡೆ ಕೂಡ ನಾನಾ ಪಾಟೇಕರ್ ಅವರ ಅಂತ್ಯಕ್ರಿಯೆಗೆ ಬಾಲಿವುಡ್‌ನ ಗಣ್ಯರು ಹೆಚ್ಚಿನ ಸಂಖ್ಯೆಯಲ್ಲಿ ಹಾಜರಾಗದಿರುವುದಕ್ಕೆ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಎಬಿಪಿ ಮಾಝಾಗೆ ನೀಡಿದ ಸಂದರ್ಶನದಲ್ಲಿ ಮಾತನಾಡಿದ ಅವರು, ಬಾಲಿವುಡ್‌ನವರು ಅಂತ್ಯಕ್ರಿಯೆಗೆ ಹಾಜರಾಗದಿರುವುದರಿಂದ ನಾನಾ ಅವರ ವ್ಯಕ್ತಿತ್ವದ ಮಹತ್ವ ಕಡಿಮೆಯಾಗುವುದಿಲ್ಲ ಎಂದು ಹೇಳಿದ್ದಾರೆ.

“ಬಾಲಿವುಡ್‌ನವರು ಅಂತ್ಯಕ್ರಿಯೆಗೆ ಬರಲಿಲ್ಲ ಎಂಬ ಕಾರಣಕ್ಕೆ ನಾನಾ ಅವರ ದೊಡ್ಡತನ ಕಡಿಮೆಯಾಗುವುದಿಲ್ಲ. ಬಾಲಿವುಡ್‌ಗಿಂತ ನಾನಾ ದೊಡ್ಡವರು. ಅವರು ಮಹಾನ್ ವ್ಯಕ್ತಿ. ಅವರ ಅಂತಿಮ ಮೆರವಣಿಗೆಯಲ್ಲಿ ಸಾವಿರಾರು ರೈತರು ಭಾಗವಹಿಸಿದ್ದರು. ಅವರ ಮೈಯಲ್ಲಿ ಬೆವರು ಮತ್ತು ಮಣ್ಣಿನ ವಾಸನೆಯಿತ್ತು. ಸುಗಂಧ ದ್ರವ್ಯ ಹಚ್ಚಿಕೊಂಡು ಬರುವ ಬಾಲಿವುಡ್‌ನ ಯಾರಿಗಿಂತಲೂ ಆ ರೈತ ಹೆಚ್ಚು ಮುಖ್ಯ” ಎಂದು ಪ್ರವೀಣ್ ತಾರ್ಡೆ ಹೇಳಿದ್ದಾರೆ.

ನಾನಾ ಅವರ ಚಿತ್ರರಂಗದ ಸ್ನೇಹಿತರು ಹೆಚ್ಚಿನ ಸಂಖ್ಯೆಯಲ್ಲಿ ಅಂತ್ಯಕ್ರಿಯೆಗೆ ಹಾಜರಾಗದಿರುವುದು ಬೇಸರ ತಂದಿದೆ ಎಂದ ಅವರು, “ನನಗೆ ದೂರು ಇದೆಯೇ ಎಂದು ಕೇಳಿದರೆ, ಹೌದು, ಇದೆ. ಬಾಲಿವುಡ್‌ನವರು ಅಂತ್ಯಕ್ರಿಯೆಗೆ ಬರಬೇಕಿತ್ತು. ಕನಿಷ್ಠ ನಾನಾ ತಮ್ಮ ಸ್ನೇಹಿತರೆಂದು ಭಾವಿಸಿದ್ದವರಾದರೂ ಹಾಜರಾಗಬೇಕಿತ್ತು. ಜಾಕಿ ಶ್ರಾಫ್ ಮತ್ತು ಸುರೇಶ್ ವಾಡ್ಕರ್ ಆಗಮಿಸಿದ್ದರು” ಎಂದು ತಿಳಿಸಿದ್ದಾರೆ.

ನಾನಾ ಪಾಟೇಕರ್ ವಿರುದ್ಧದ ಹಳೆಯ ಆರೋಪವೇನು?

ನಾನಾ ಪಾಟೇಕರ್ ಅವರ ಸಾವಿನ ಕುರಿತು ತನುಶ್ರೀ  ದತ್ತಾ ಪ್ರಶ್ನೆಗಳನ್ನು ಎತ್ತಿರುವ ಹಿನ್ನೆಲೆಯಲ್ಲಿ, ಈ ಹಿಂದೆ ಅವರ ವಿರುದ್ಧ ಮಾಡಿದ್ದ ಲೈಂಗಿಕ ಕಿರುಕುಳದ ಆರೋಪಗಳೂ ಮತ್ತೆ ಚರ್ಚೆಗೆ ಬಂದಿವೆ.

2008ರಲ್ಲಿ ಹಾರ್ನ್ ‘ಓಕೆ’ ಪ್ಲೀಸ್ ಚಿತ್ರದ ವಿಶೇಷ ಹಾಡಿನ ಚಿತ್ರೀಕರಣದ ವೇಳೆ ನಾನಾ ಪಾಟೇಕರ್ ತಮ್ಮೊಂದಿಗೆ ಅನುಚಿತವಾಗಿ ವರ್ತಿಸಿದ್ದರು ಎಂದು ತನುಶ್ರೀ ಆರೋಪಿಸಿದ್ದರು. ಈ ಕುರಿತು ಸಿನೆ ಮತ್ತು ಟಿವಿ ಕಲಾವಿದರ ಸಂಘಕ್ಕೆ ದೂರು ನೀಡಿದ್ದರು. ಆದರೆ, ನಾನಾ ಪಾಟೇಕರ್ ಈ ಆರೋಪಗಳನ್ನು ನಿರಾಕರಿಸಿದ್ದರು.

2018ರ ಅಕ್ಟೋಬರ್‌ನಲ್ಲಿ ತನುಶ್ರೀ ಅವರ ವಕೀಲ ನಿತಿನ್ ಸತ್ಪುತೆ, ನಾನಾ ಪಾಟೇಕರ್ ಸೇರಿದಂತೆ ನೃತ್ಯ ನಿರ್ದೇಶಕ ಗಣೇಶ್ ಆಚಾರ್ಯ, ನಿರ್ಮಾಪಕ ಸಮೀ ಸಿದ್ದಿಕಿ ಮತ್ತು ನಿರ್ದೇಶಕ ರಾಕೇಶ್ ಸಾರಂಗ್ ಅವರ ಮೇಲೆ ನಾರ್ಕೊ ಅನಾಲಿಸಿಸ್, ಬ್ರೇನ್ ಮ್ಯಾಪಿಂಗ್ ಹಾಗೂ ಸುಳ್ಳು ಪತ್ತೆ ಪರೀಕ್ಷೆಗಳನ್ನು ನಡೆಸುವಂತೆ ಕೋರಿ ಮುಂಬೈನ ಓಶಿವಾರಾ ಪೊಲೀಸ್ ಠಾಣೆಯಲ್ಲಿ ಅರ್ಜಿ ಸಲ್ಲಿಸಿದ್ದರು.

2019ರ ಜೂನ್‌ನಲ್ಲಿ ಸಾಕಷ್ಟು ಸಾಕ್ಷ್ಯಾಧಾರಗಳಿಲ್ಲ ಎಂಬ ಕಾರಣಕ್ಕೆ ನಾನಾ ಪಾಟೇಕರ್ ವಿರುದ್ಧದ ಲೈಂಗಿಕ ಕಿರುಕುಳ ಪ್ರಕರಣದಲ್ಲಿ ಮುಂದಿನ ಕ್ರಮ ಕೈಗೊಳ್ಳಲು ಸಾಧ್ಯವಿಲ್ಲ ಎಂದು ಮುಂಬೈ ಪೊಲೀಸರು ತಿಳಿಸಿದ್ದರು.

ಒಟ್ಟಿನಲ್ಲಿ ನಾನಾ ಪಾಟೇಕರ್ ಅವರ ಸಾವಿನ ಕುರಿತು ತನುಶ್ರೀ ದತ್ತಾ ವ್ಯಕ್ತಪಡಿಸಿರುವ ಅನುಮಾನಗಳು ಮತ್ತು ಪ್ರವೀಣ್ ತಾರ್ಡೆ ಅವರ ಹೇಳಿಕೆಗಳು ಬಾಲಿವುಡ್‌ನಲ್ಲಿ ಚರ್ಚೆಗೆ ಕಾರಣವಾಗಿವೆ. ಆದರೆ, ಸಾವಿನ ಕುರಿತು ತನುಶ್ರೀ ಮಾಡಿರುವ ಆರೋಪಗಳು ಸ್ವತಂತ್ರವಾಗಿ ದೃಢಪಟ್ಟಿಲ್ಲ ಎಂಬುದನ್ನು ಗಮನಿಸಬೇಕು.