ಕೋಲಾರ: ಪೋಷಕರ ವಿರೋಧವನ್ನು ಲೆಕ್ಕಿಸದೆ ಪ್ರೀತಿಸಿ ಮದುವೆಯಾಗಿರುವ ಅಂತರಜಾತಿ ಜೋಡಿಯೊಂದು, ತಮ್ಮ ಕುಟುಂಬದಿಂದ ತಮಗೆ ಹಾಗೂ ತಮ್ಮವರಿಗೆ ಯಾವುದೇ ತೊಂದರೆಯಾಗದಂತೆ ರಕ್ಷಣೆ ಕೋರಿ ಸಾಮಾಜಿಕ ಜಾಲತಾಣದಲ್ಲಿ ವಿಡಿಯೋ ಬಿಡುಗಡೆ ಮಾಡಿರುವ ಘಟನೆ ಕೋಲಾರ ನಗರದಲ್ಲಿ ನಡೆದಿದೆ.
ಕೋಲಾರ ನಗರದ ಗಾಂಧಿ ನಗರದ ವಂಶಿ ಹಾಗೂ ಕುರುಬರಪೇಟೆಯ ಹೇಮಶ್ರೀ ಪ್ರೀತಿಸಿ ಪರಾರಿಯಾಗಿ ವಿವಾಹವಾಗಿದ್ದಾರೆ. ಮದುವೆಯ ಬಳಿಕ ಬಿಡುಗಡೆ ಮಾಡಿರುವ ವಿಡಿಯೋದಲ್ಲಿ ಮಾತನಾಡಿರುವ ಹೇಮಶ್ರೀ, "ನಾವು ಇಷ್ಟಪಟ್ಟು ಮದುವೆಯಾಗಿದ್ದೇವೆ. ವಂಶಿ ಕುಟುಂಬದವರಿಗೆ ಏನಾದರೂ ತೊಂದರೆಯಾದರೆ ಅದಕ್ಕೆ ನಮ್ಮ ಕುಟುಂಬದವರೇ ಹೊಣೆ" ಎಂದು ಸ್ಪಷ್ಟಪಡಿಸಿದ್ದಾರೆ. ಪ್ರಸ್ತುತ ಈ ನವದಂಪತಿಗಳು ತಮ್ಮ ಪ್ರೀತಿಗೆ ಹಾಗೂ ಕುಟುಂಬದ ಸುರಕ್ಷತೆಗೆ ವಿಡಿಯೋ ಮೂಲಕ ಪೊಲೀಸ್ ಆಡಳಿತದಿಂದ ರಕ್ಷಣೆ ಕೋರಿದ್ದಾರೆ.
