ಬೆಂಗಳೂರು: ಪರಮ್ ಕಲ್ಚರ್ ವತಿಯಿಂದ ಆಯೋಜಿಸಲಾಗುವ ಮಾಸಿಕ ಸಾಂಸ್ಕೃತಿಕ ಕಾರ್ಯಕ್ರಮವಾದ ‘ಪರಮ್ ವಿಹಾರ’ದ 17ನೇ ಆವೃತ್ತಿಯು ಅಕ್ಟೋಬರ್ 25ರಂದು ಸಂಜೆ 6 ಗಂಟೆಗೆ ನಡೆಯಲಿದೆ. ಬೆಂಗಳೂರಿನ ಬನಶಂಕರಿಯಲ್ಲಿರುವ ಸುಚಿತ್ರ ಅಕಾಡೆಮಿ ಮತ್ತು ಸಿನಿಮಾ ಆವರಣದಲ್ಲಿ ಆಯೋಜಿಸಿರುವ ಈ ಕಾರ್ಯಕ್ರಮದಲ್ಲಿ ಭಾರತೀಯ ಶಾಸ್ತ್ರೀಯ ಸಂಗೀತ ಮತ್ತು ಭರತನಾಟ್ಯದ ಸೊಬಗು ಅನಾವರಣಗೊಳ್ಳಲಿದೆ.
ಪ್ರತಿ ತಿಂಗಳ ನಾಲ್ಕನೇ ಭಾನುವಾರದಂದು ನಡೆಯುವ ‘ಪರಮ್ ವಿಹಾರ’, ಸಂಗೀತ ಮತ್ತು ನೃತ್ಯ ಕ್ಷೇತ್ರದ ಉದಯೋನ್ಮುಖ ಕಲಾವಿದರಿಗೆ ವೇದಿಕೆ ಕಲ್ಪಿಸುವುದರ ಜೊತೆಗೆ ಸಾರ್ವಜನಿಕರಲ್ಲಿ ಕಲೆ ಮತ್ತು ಸಂಸ್ಕೃತಿಯ ಬಗ್ಗೆ ಆಸಕ್ತಿ ಬೆಳೆಸುವ ಉದ್ದೇಶ ಹೊಂದಿದೆ.
ಡಾ. ಜಯಂತ್ ಕುಮಾರ್ ಅವರಿಂದ ವಿಶಿಷ್ಟ ವಾದ್ಯಸಂಗೀತ ಪ್ರಸ್ತುತಿ
ಈ ಬಾರಿ ಕಾರ್ಯಕ್ರಮದ ಪ್ರಮುಖ ಆಕರ್ಷಣೆಯಾಗಿ ಡಾ. ಜಯಂತ್ ಕುಮಾರ್ ಅವರ ನೇತೃತ್ವದಲ್ಲಿ ವಿಶಿಷ್ಟ ಶಾಸ್ತ್ರೀಯ ಸಂಗೀತ ಪ್ರಸ್ತುತಿ ನಡೆಯಲಿದೆ. ಉತ್ತರ ಭಾರತದ ಹಿಂದೂಸ್ತಾನಿ ಮತ್ತು ದಕ್ಷಿಣ ಭಾರತದ ಕರ್ನಾಟಕ ಶಾಸ್ತ್ರೀಯ ಸಂಗೀತ ಪರಂಪರೆಗಳನ್ನು ಒಂದೇ ವೇದಿಕೆಯಲ್ಲಿ ಪರಿಚಯಿಸುವ ಈ ಸಂಗೀತ ಕಾರ್ಯಕ್ರಮದಲ್ಲಿ ಸಿತಾರ್, ರುದ್ರವೀಣೆ, ಹಿಂದೂಸ್ತಾನಿ ಮತ್ತು ಕರ್ನಾಟಕ ಶಾಸ್ತ್ರೀಯ ಗಾಯನ, ತಬಲಾ, ಮೃದಂಗ ಹಾಗೂ ಕೊನ್ನಕೋಲ್‌ನ ಸಮ್ಮಿಲನವನ್ನು ಆಸ್ವಾದಿಸಬಹುದು. ಎರಡೂ ಸಂಗೀತ ಪದ್ಧತಿಗಳ ರಾಗಗಳ ವೈವಿಧ್ಯ, ಮಧುರತೆ ಮತ್ತು ಲಯದ ಸೊಬಗನ್ನು ಅನಾವರಣಗೊಳಿಸುವ ಈ ಪ್ರಸ್ತುತಿ ಸಂಗೀತಾಸಕ್ತರಿಗೆ ವಿಶಿಷ್ಟ ಅನುಭವ ನೀಡಲಿದೆ.
ವಿದುಷಿ ಅರ್ಚನಾ ಎಚ್.ಆರ್. ಮತ್ತು ಶಿಷ್ಯರಿಂದ ‘ಸಮರ್ಪಣಂ’ ಭರತನಾಟ್ಯ ಪ್ರದರ್ಶನ
ವಿದುಷಿ ಅರ್ಚನಾ ಎಚ್.ಆರ್. ಅವರ ಹಿರಿಯ ಶಿಷ್ಯೆಯರಾದ ನಮಿತಾ ವೆಂಕಟೇಶ್, ವೈಷ್ಣವಿ ವಿ., ಸ್ವಾತಿ ಗಂಗಾಧರ್, ಅಂಬಿಕಾ ಮತ್ತು ಕೀರ್ತನಾ ಪ್ರಕಾಶ್ ಅವರು ‘ಸಮರ್ಪಣಂ’ ಶೀರ್ಷಿಕೆಯಡಿ ಭರತನಾಟ್ಯ ಪ್ರದರ್ಶನ ನೀಡಲಿದ್ದಾರೆ. ಭಕ್ತಿ, ದೈವತ್ವ, ಶಕ್ತಿ, ಸೌಂದರ್ಯ ಮತ್ತು ಲವಲವಿಕೆಯನ್ನು ನೃತ್ಯದ ಮೂಲಕ ಅಭಿವ್ಯಕ್ತಿಸುವ ಈ ಪ್ರಸ್ತುತಿ, ಭಾರತೀಯ ಶಾಸ್ತ್ರೀಯ ನೃತ್ಯ ಪರಂಪರೆಯ ವಿವಿಧ ಆಯಾಮಗಳನ್ನು ಪರಿಚಯಿಸಲಿದೆ. ವಿಘ್ನವಿನಾಶಕ ಗಣೇಶನ ಸ್ತುತಿಯೊಂದಿಗೆ ಆರಂಭವಾಗುವ ನೃತ್ಯಯಾನವು ದೇವಿ ಲಲಿತೆಯ ದಿವ್ಯ ಸೌಂದರ್ಯ ಮತ್ತು ಶಕ್ತಿಯ ಆರಾಧನೆ, ನಟರಾಜ ಶಿವನ ಸೃಷ್ಟಿ, ಸ್ಥಿತಿ ಮತ್ತು ಲಯವನ್ನು ಪ್ರತಿನಿಧಿಸುವ ವಿಶ್ವನೃತ್ಯ ಹಾಗೂ ತುಂಟಾಟದ ಕೃಷ್ಣನ ಮನಮೋಹಕ ಲೀಲೆಗಳ ಮೂಲಕ ಸಾಗಲಿದೆ. ಅಂತಿಮವಾಗಿ ಲಯಬದ್ಧ ಹೆಜ್ಜೆಗಳು ಮತ್ತು ಚೈತನ್ಯಭರಿತ ಚಲನೆಗಳಿಂದ ಕೂಡಿದ ತಿಲ್ಲಾನ ನೃತ್ಯ ಪ್ರಸ್ತುತಿಯೊಂದಿಗೆ ಕಾರ್ಯಕ್ರಮವು ಕಳೆಗಟ್ಟಲಿದೆ. ಮಂಗಳಂ ಮೂಲಕ ದೈವಿಕ ಆಶೀರ್ವಾದವನ್ನು ಕೋರುವುದರೊಂದಿಗೆ ನೃತ್ಯಯಾನ ಸಂಪನ್ನಗೊಳ್ಳಲಿದೆ.
ಸಂಗೀತ ಮತ್ತು ನೃತ್ಯದ ಮೂಲಕ ಭಾರತೀಯ ಕಲಾ ಪರಂಪರೆಯನ್ನು ಜನರಿಗೆ ಇನ್ನಷ್ಟು ಹತ್ತಿರವಾಗಿಸುವ ಈ ಕಾರ್ಯಕ್ರಮವು ಕಲಾಸಕ್ತರಿಗೆ ಮನಮೋಹಕ ಸಾಂಸ್ಕೃತಿಕ ಅನುಭವವನ್ನು ನೀಡಲಿದೆ.
ಕಾರ್ಯಕ್ರಮದ ವಿವರಗಳು
ದಿನಾಂಕ: ಭಾನುವಾರ, 25 ಅಕ್ಟೋಬರ್ 2026
ಸಮಯ: ಸಂಜೆ 6 ಗಂಟೆಯಿಂದ
ಸ್ಥಳ: ಸುಚಿತ್ರ ಅಕಾಡೆಮಿ ಮತ್ತು ಸಿನಿಮಾ, ಬೆಂಗಳೂರು
ಆಯೋಜನೆ: ಪರಮ್ ಕಲ್ಚರ್
ಪ್ರವೇಶ- ಉಚಿತ
