ವಾಯುಮಾಲಿನ್ಯಕ್ಕೆ ‘ಸಾಂಸ್ಕೃತಿಕ ಬದಲಾವಣೆ’ ಅಗತ್ಯ

– ದೆಹಲಿಯ ವಾಯುಮಾಲಿನ್ಯಕ್ಕೆ ‘ಸಾಂಸ್ಕೃತಿಕ ಬದಲಾವಣೆ’ ಅಗತ್ಯ: ಸುಪ್ರೀಂ ಕೋರ್ಟ್

ನವದೆಹಲಿ- ದೆಹಲಿಯಲ್ಲಿ ವಾಯುಮಾಲಿನ್ಯ ತೀವ್ರಗೊಳ್ಳುತ್ತಿರುವ ಹಿನ್ನೆಲೆಯಲ್ಲಿ ಸುಪ್ರೀಂ ಕೋರ್ಟ್ ಶುಕ್ರವಾರ ಕಳವಳ ವ್ಯಕ್ತಪಡಿಸಿದ್ದು, ವಾರ್ಷಿಕ ಮಾಲಿನ್ಯ ನಿಯಂತ್ರಣಕ್ಕೆ ಕೇವಲ ಆಡಳಿತಾತ್ಮಕ ಕ್ರಮಗಳಷ್ಟೇ ಸಾಕಾಗುವುದಿಲ್ಲ, ಸಾಂಸ್ಕೃತಿಕ ಬದಲಾವಣೆಯೂ ಅಗತ್ಯ ಎಂದು ಅಭಿಪ್ರಾಯಪಟ್ಟಿದೆ.

ಮುಖ್ಯ ನ್ಯಾಯಮೂರ್ತಿ ಸೂರ್ಯ ಕಾಂತ್ ನೇತೃತ್ವದ ಪೀಠವು ದೀಪಾವಳಿ ಸಂದರ್ಭದಲ್ಲಿ ಉಡುಗೊರೆಗಳನ್ನು ವಿನಿಮಯ ಮಾಡಿಕೊಳ್ಳುವ ಸಂಸ್ಕೃತಿಯೂ ವಾಹನ ಸಂಚಾರ ಮತ್ತು ಮಾಲಿನ್ಯಕ್ಕೆ ಪರೋಕ್ಷವಾಗಿ ಕಾರಣವಾಗುತ್ತಿದೆ ಎಂದು ಗಮನಸೆಳೆದಿದೆ. ಶ್ರೀಮಂತ ವರ್ಗದಲ್ಲಿ ದೀಪಾವಳಿ ಉಡುಗೊರೆ ವಿನಿಮಯವು ಸಾಮಾಜಿಕ ಮತ್ತು ಸ್ಥಾನಮಾನದ ಸಂಕೇತವಾಗಿ ರೂಪುಗೊಂಡಿರುವುದನ್ನು ಸಿಜೆಐ ಟೀಕಿಸಿದರು.

ಶುಕ್ರವಾರ ದೆಹಲಿಯ ಸರಾಸರಿ ವಾಯು ಗುಣಮಟ್ಟ ಸೂಚ್ಯಂಕ (AQI) 389ಕ್ಕೆ ತಲುಪಿದ್ದು, ಹಲವು ಪ್ರದೇಶಗಳಲ್ಲಿ 400ರ ಗಡಿ ದಾಟಿತ್ತು. ದೀಪಾವಳಿಗೂ ಮುನ್ನ ಮಾರುಕಟ್ಟೆಗಳಲ್ಲಿ ಹೆಚ್ಚುತ್ತಿರುವ ಜನದಟ್ಟಣೆ ಹಾಗೂ ವಾಹನ ಸಂಚಾರವೂ ಪರಿಸ್ಥಿತಿಯನ್ನು ಮತ್ತಷ್ಟು ಗಂಭೀರಗೊಳಿಸಿದೆ.

ದೆಹಲಿಯ ಮಾಲಿನ್ಯಕ್ಕೆ ನಗರದೊಳಗಿನ ವಾಹನಗಳಷ್ಟೇ ಕಾರಣವಲ್ಲ ಎಂದು ಸುಪ್ರೀಂ ಕೋರ್ಟ್ ಹೇಳಿದೆ. ದೇಶದ ವಿವಿಧ ಭಾಗಗಳಿಂದ ವಾಹನಗಳು ದೆಹಲಿಗೆ ಪ್ರವೇಶಿಸುತ್ತಿದ್ದು, ಅವುಗಳ ಒಟ್ಟಾರೆ ಸ್ಥಿತಿ ಮತ್ತು ಹೊರಸೂಸುವಿಕೆಯ ಮಟ್ಟವನ್ನು ನಿರಂತರವಾಗಿ ಮೇಲ್ವಿಚಾರಣೆ ಮಾಡುವುದು ಕಷ್ಟಕರವಾಗಿದೆ ಎಂದು ಸಿಜೆಐ ಹೇಳಿದರು.

ಒಂದು ವಾಹನ ಕೆಲವೇ ಗಂಟೆಗಳ ಕಾಲ ದೆಹಲಿಗೆ ಪ್ರವೇಶಿಸಿದರೂ ಅದರ ಹೊರಸೂಸುವಿಕೆ ವಾಯು ಗುಣಮಟ್ಟದ ಮೇಲೆ ಪರಿಣಾಮ ಬೀರುತ್ತದೆ. ಹೀಗಾಗಿ ವಾಹನ ಮಾಲಿನ್ಯ ನಿಯಂತ್ರಣದ ಜೊತೆಗೆ ಜನರ ಜೀವನಶೈಲಿ ಮತ್ತು ಹಬ್ಬದ ಆಚರಣೆಯಲ್ಲಿಯೂ ಜವಾಬ್ದಾರಿಯುತ ಬದಲಾವಣೆ ಅಗತ್ಯ ಎಂಬ ಸಂದೇಶವನ್ನು ನ್ಯಾಯಾಲಯದ ಅಭಿಪ್ರಾಯ ಒತ್ತಿ ಹೇಳಿದೆ.