ಚಿತ್ರೀಕರಣ ವೇಳೆಯಲ್ಲೇ ಅಸ್ವಸ್ಥ: ‘ಪುಲಿಮುರುಗನ್’ ಖ್ಯಾತಿಯ ಸಿನಿಮಾ ಛಾಯಾಗ್ರಾಹಕ ಶಾಜಿ ಕುಮಾರ್ ಸಾವು

‘ಪುಲಿಮುರುಗನ್’, ‘ನಾರನ್’ ಮತ್ತು ‘ತುಡರುಮ್’ ಮುಂತಾದ ಚಿತ್ರಗಳಿಗೆ ಹೆಸರುವಾಸಿಯಾದ ಖ್ಯಾತ ಮಲಯಾಳಂ ಛಾಯಾಗ್ರಾಹಕ ಶಾಜಿ ಕುಮಾರ್(57) ಮಂಗಳವಾರ ನಿಧನರಾಗಿದ್ದಾರೆ.

ಅವರು ಅಲಪ್ಪುಳದಲ್ಲಿ ದಿಲೀಪ್ ನಟಿಸುತ್ತಿರುವ ಮುಂಬರುವ ಚಿತ್ರವೊಂದರ ಚಿತ್ರೀಕರಣದಲ್ಲಿ ನಿರತರಾಗಿದ್ದಾಗ, ವಾರಾಂತ್ಯದಲ್ಲಿ ಆರೋಗ್ಯ ಸಮಸ್ಯೆ ಕಾಣಿಸಿಕೊಂಡಿತ್ತು.

ಚಿತ್ರೀಕರಣಕ್ಕಾಗಿ ಅಲಪ್ಪುಳದ ಹೋಟೆಲ್ ಒಂದರಲ್ಲಿ ತಂಗಿದ್ದ ಶಾಜಿ ಕುಮಾರ್ ಅವರಿಗೆ ಶನಿವಾರ ರಾತ್ರಿ ದೈಹಿಕ ಅಸ್ವಸ್ಥತೆ ಉಂಟಾಯಿತು. ಅವರು ಚಿತ್ರದ ನಿರ್ದೇಶಕ ಉಲ್ಲಾಸ್ ಕೃಷ್ಣ ಅವರಿಗೆ ಈ ವಿಷಯ ತಿಳಿಸಿದರು, ತಕ್ಷಣವೇ ಅವರನ್ನು ಹತ್ತಿರದ ಆಸ್ಪತ್ರೆಗೆ ಕರೆದೊಯ್ಯಲಾಯಿತು. ನಂತರ ಹೆಚ್ಚಿನ ಚಿಕಿತ್ಸೆಗಾಗಿ ಅವರನ್ನು ಖಾಸಗಿ ಆಸ್ಪತ್ರೆಗೆ ಸ್ಥಳಾಂತರಿಸಲಾಯಿತು.

ಆಸ್ಪತ್ರೆಗೆ ದಾಖಲಾದ ನಂತರ ಅವರ ಆರೋಗ್ಯದಲ್ಲಿ ಸುಧಾರಣೆ ಕಂಡುಬಂದಿತ್ತು ಮತ್ತು ಅವರು ಸಹಜವಾಗಿ ಮಾತನಾಡಬಲ್ಲ ಸ್ಥಿತಿಯಲ್ಲಿದ್ದರು, ಆದರೆ ಭಾನುವಾರ ರಾತ್ರಿ ಅವರ ಆರೋಗ್ಯ ಮತ್ತೆ ಹದಗೆಟ್ಟಿದ್ದು, ಕೊನೆಯುಸಿರೆಳೆದಿದ್ದಾರೆ. ಅವರ ಅನಿರೀಕ್ಷಿತ ನಿಧನವು ಮಲಯಾಳಂ ಚಲನಚಿತ್ರ ರಂಗವನ್ನು ಶೋಕಸಾಗರದಲ್ಲಿ ಮುಳುಗಿಸಿದೆ.

ಶಾಜಿ ಕುಮಾರ್ ಹಲವು ವರ್ಷಗಳಿಂದ ಪೆರುಂಬಾವೂರಿನಲ್ಲಿ ವಾಸಿಸುತ್ತಿದ್ದರು. ಅವರು ಪತ್ನಿ ಸ್ಮಿತಾ ಹಾಗೂ ಪುತ್ರರಾದ ಆರ್ಯನ್ ಮತ್ತು ಸೂರ್ಯನ್ ಅವರನ್ನು ಅಗಲಿದ್ದಾರೆ. ಅವರ ಪಾರ್ಥಿವ ಶರೀರವನ್ನು ಎರ್ನಾಕುಲಂನ ಗೋಕುಲಂ ಕನ್ವೆನ್ಷನ್ ಸೆಂಟರ್‌ ನಲ್ಲಿ ಬೆಳಿಗ್ಗೆ 10 ರಿಂದ ಮಧ್ಯಾಹ್ನ 1 ರವರೆಗೆ ಸಾರ್ವಜನಿಕ ದರ್ಶನಕ್ಕಾಗಿ ಇರಿಸಲಾಗುತ್ತದೆ. ಸಂಜೆ 7 ಗಂಟೆಗೆ ಪೆರುಂಬಾವೂರಿನಲ್ಲಿರುವ ಅವರ ನಿವಾಸದಲ್ಲಿ ಅಂತ್ಯಕ್ರಿಯೆ ನಡೆಯಲಿದೆ.

ಮಲಯಾಳಂ ಚಿತ್ರರಂಗಕ್ಕೆ ಅವರು ನೀಡಿದ ಕೊಡುಗೆಯನ್ನು ಸ್ಮರಿಸುತ್ತಾ, ‘ಫೆಫ್ಕಾ’ (FEFKA) ನಿರ್ದೇಶಕರ ಸಂಘವು ಸಂತಾಪ ಸೂಚಿಸಿದೆ.

ಶಾಜಿ ಕುಮಾರ್ ಅವರ ಬಗ್ಗೆ ಮಾಹಿತಿ:

ತಿರುವನಂತಪುರಂ ಮೂಲದ ಶಾಜಿ ಕುಮಾರ್, ಹಿರಿಯ ಛಾಯಾಗ್ರಾಹಕ ವಿಪಿನ್ ಮೋಹನ್ ಅವರ ಶಿಷ್ಯರಾಗಿದ್ದರು. ಅವರು ತಮ್ಮ ವೃತ್ತಿಜೀವನದ ಆರಂಭದಲ್ಲಿ ಹಲವು ಚಿತ್ರಗಳಲ್ಲಿ ಸಹಾಯಕ ಛಾಯಾಗ್ರಾಹಕರಾಗಿ ಕೆಲಸ ಮಾಡಿದರು, ನಂತರ ಸ್ವತಂತ್ರ ಛಾಯಾಗ್ರಾಹಕರಾಗಿ ಗುರುತಿಸಿಕೊಂಡರು. ದಶಕಗಳ ಅವಧಿಯಲ್ಲಿ, ಅವರು ಮಲಯಾಳಂ ಚಿತ್ರರಂಗದಲ್ಲಿ ಪರಿಚಿತ ಹೆಸರಾದರು ಮತ್ತು ವಾಣಿಜ್ಯಿಕವಾಗಿ ಯಶಸ್ವಿಯಾದ ಅನೇಕ ಚಲನಚಿತ್ರಗಳಲ್ಲಿ ಕೆಲಸ ಮಾಡಿದರು. ಫಿಲ್ಮ್ ಕ್ಯಾಮೆರಾಗಳ ಯುಗದಲ್ಲಿ ತಮ್ಮ ವೃತ್ತಿಜೀವನವನ್ನು ಪ್ರಾರಂಭಿಸಿದ ಅವರು, ಬೆಳಕಿನ ಬಳಕೆ (lighting), ಬಣ್ಣಗಳ ಸಂಯೋಜನೆ (colour composition) ಮತ್ತು ಫ್ರೇಮಿಂಗ್ ಕುರಿತಾದ ತಮ್ಮ ಆಳವಾದ ತಿಳಿವಳಿಕೆಗೆ ಹೆಸರುವಾಸಿಯಾಗಿದ್ದರು. ಡಿಜಿಟಲ್ ಚಲನಚಿತ್ರ ನಿರ್ಮಾಣದ ಬದಲಾವಣೆಗೆ ಅವರು ಸುಲಭವಾಗಿ ಹೊಂದಿಕೊಂಡರು ಮತ್ತು ದೃಶ್ಯಗಳ ಮೂಲಕ ಕಥೆಯನ್ನು ಹೇಳುವ ಹೊಸ ತಂತ್ರಗಳನ್ನು ಅಳವಡಿಸಿಕೊಂಡರು.

ಶಾಜಿ ಕುಮಾರ್ ಅವರು ಜೋಶಿ, ಶಾಜಿ ಕೈಲಾಸ್, ವಿ.ಎಂ. ವಿನು, ಎಂ. ಪದ್ಮಕುಮಾರ್ ಮತ್ತು ವೈಶಾಖ್ ಸೇರಿದಂತೆ ಹಲವು ಪ್ರಮುಖ ಚಲನಚಿತ್ರ ನಿರ್ಮಾಪಕರೊಂದಿಗೆ ಕೆಲಸ ಮಾಡಿದ್ದಾರೆ. ಅಲ್ಲದೆ, ತರುಣ್ ಮೂರ್ತಿ ಅವರಂತಹ ಯುವ ನಿರ್ದೇಶಕರೊಂದಿಗೂ ಅವರು ಕೆಲಸ ಮಾಡಿದ್ದಾರೆ.

ಅವರ ಚಲನಚಿತ್ರ ಪಟ್ಟಿಯಲ್ಲಿ ‘ನಾರನ್’, ‘ಪುಲಿಮುರುಗನ್’, ‘ರಾಮಲೀಲಾ’, ‘ಒಡಿಯನ್’, ‘ಮಧುರ ರಾಜ’, ‘ಇಟ್ಟಿಮಾನಿ: ಮೇಡ್ ಇನ್ ಚೀನಾ’, ‘ನೈಟ್ ಡ್ರೈವ್’, ‘ಪತೊನ್ಪತಾಂ ನೂಟಾಂದು(Pathonpatham Noottandu), ‘ಬಾಂದ್ರಾ’, ‘ಒನ್ಸ್ ಅಪಾನ್ ಎ ಟೈಮ್ ಇನ್ ಕೊಚ್ಚಿ’ ಮತ್ತು ‘ತುಡರುಮ್’ (Thudarum) ನಂತಹ ಜನಪ್ರಿಯ ಚಿತ್ರಗಳು ಸೇರಿವೆ.

ಇತ್ತೀಚೆಗೆ ಅವರು ಛಾಯಾಗ್ರಾಹಕರಾಗಿ ಕೆಲಸ ಮಾಡಿದ ಚಿತ್ರಗಳಲ್ಲಿ, ತರುಣ್ ಮೂರ್ತಿ ನಿರ್ದೇಶನದ ಹಾಗೂ ಮೋಹನ್‌ ಲಾಲ್ ನಟಿಸಿರುವ ‘ಅತಿಮನೋಹರಂ'(Athimanoharam) ಮತ್ತು ಸುರೇಶ್ ಗೋಪಿ ಅಭಿನಯದ ‘ಒಟ್ಟಕೊಂಬನ್'(Ottakomban) ಸೇರಿವೆ.