ಒಮಾನ್‌ ನಲ್ಲಿ ನಡೆದ U19 ಏಷ್ಯಾ ಕಪ್ 2026ರ ಫೈನಲ್ ನಲ್ಲಿ, ಮೋಹಿತ್ ಉಲ್ವಾ ಅವರ ಅದ್ಭುತ ಪ್ರದರ್ಶನದ ನೆರವಿನಿಂದ ಭಾರತ ತಂಡವು ಪಾಕಿಸ್ತಾನದ ವಿರುದ್ಧ ರೋಚಕ ಜಯ ಸಾಧಿಸಿದೆ..
ಅಲ್ ಅಮೆರಾತ್ ಕ್ರಿಕೆಟ್ ಮೈದಾನದಲ್ಲಿ (ಮಿನಿಸ್ಟ್ರಿ ಟರ್ಫ್ 2) ನಡೆದ ಈ ಪಂದ್ಯದಲ್ಲಿ ಭಾರತವು ಪಾಕಿಸ್ತಾನವನ್ನು ಒಂದು ವಿಕೆಟ್ ಅಂತರದಿಂದ ಸೋಲಿಸಿ U19 ಏಷ್ಯಾ ಕಪ್ 2026 ಪ್ರಶಸ್ತಿಯನ್ನು ಗೆದ್ದುಕೊಂಡಿತು. ಲಕ್ಷ್ಯ ರೈಚಂದಾನಿ ನೇತೃತ್ವದ ಭಾರತ ತಂಡವು 252 ರನ್‌ಗಳಿಗೆ 8 ವಿಕೆಟ್ ಗಳನ್ನು ಕಳೆದುಕೊಂಡು ಸಂಕಷ್ಟದಲ್ಲಿದ್ದಾಗ, ಪಂದ್ಯವು ಭಾರತದ ಕೈತಪ್ಪುವಂತೆ ಭಾಸವಾಗಿತ್ತು. ಆದರೆ, ಆ ನಿರ್ಣಾಯಕ ಹಂತದಲ್ಲಿ ಮೋಹಿತ್ ಉಲ್ವಾ ಮತ್ತು ಮಾನಲ್ ಚೌಹಾಣ್ ಜವಾಬ್ದಾರಿಯುತ ಆಟವಾಡಿ ಪಂದ್ಯದ ಗತಿಯನ್ನೇ ಬದಲಿಸಿದರು. ಅಂತಿಮ ಎಸೆತದಲ್ಲಿ ಬೌಂಡರಿ ಬಾರಿಸುವ ಮೂಲಕ ಭಾರತ ತಂಡವು ಒಂದು ವಿಕೆಟ್ ಅಂತರದ ರೋಚಕ ಗೆಲುವು ದಾಖಲಿಸಿತು.
ಫೈನಲ್ ಪಂದ್ಯದಲ್ಲಿ ಟಾಸ್ ಗೆದ್ದ ಪಾಕಿಸ್ತಾನ ಮೊದಲು ಬ್ಯಾಟಿಂಗ್ ಮಾಡಲು ನಿರ್ಧರಿಸಿತು. ಮೂರನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ಉಸ್ಮಾನ್ ಖಾನ್ 107 ರನ್‌ಗಳ ಭರ್ಜರಿ ಆಟವಾಡಿದರೆ, ಅಬ್ದುಲ್ ಖಾದಿರ್ 54 ಎಸೆತಗಳಲ್ಲಿ 80 ರನ್ ಗಳಿಸಿದರು. ಮಧ್ಯಮ ಕ್ರಮಾಂಕದ ಬ್ಯಾಟರ್‌ ಗಳು ಉತ್ತಮವಾಗಿ ರನ್ ಕಲೆಹಾಕಿದರು; ನಾಯಕ ಫರ್ಹಾನ್ ಯೂಸುಫ್ 60 ಎಸೆತಗಳಲ್ಲಿ 63 ರನ್ ಸೇರಿಸಿದರು. ಈ ಹಂತದಲ್ಲಿ ಭಾರತ ತಂಡವು ನಿಯಮಿತ ಅಂತರದಲ್ಲಿ ವಿಕೆಟ್‌ಗಳನ್ನು ಕಬಳಿಸುವ ಮೂಲಕ ಪಾಕಿಸ್ತಾನವನ್ನು 337 ರನ್‌ಗಳಿಗೆ ಸೀಮಿತಗೊಳಿಸಿತು.
ಕಾವ್ಯ ಪಟೇಲ್ ನಾಲ್ಕು ವಿಕೆಟ್ ಗಳನ್ನು ಪಡೆದರೆ, ಗಾಯಗೊಂಡ ಇಶಾನ್ ಸೂದ್ ಬದಲಿಗೆ ತಂಡಕ್ಕೆ ಸೇರ್ಪಡೆಗೊಂಡ ಚಿಗುರುಪತಿ ವೆಂಕಟ ಮೂರು ವಿಕೆಟ್ ಗಳನ್ನು ಕಬಳಿಸಿದರು. ಫೈನಲ್ ಪಂದ್ಯವೊಂದರಲ್ಲಿ 320ಕ್ಕೂ ಹೆಚ್ಚು ರನ್ ಗಳನ್ನು ಗಳಿಸುವುದು ಉತ್ತಮ ಮೊತ್ತವಾಗಿರುವುದರಿಂದ, ಇನ್ನಿಂಗ್ಸ್‌ನ ಅರ್ಧ ಹಂತದಲ್ಲಿ ಪಾಕಿಸ್ತಾನ ತಂಡವು ತಮ್ಮ ಬ್ಯಾಟಿಂಗ್ ಪ್ರದರ್ಶನದ ಬಗ್ಗೆ ಖುಷಿಯಾಗಿತ್ತು.
ಲಕ್ಷ್ಯ ಮತ್ತು ಆರ್ಯವೀರ್ ಅವರಿಂದ ಭಾರತದ ಚೇಸಿಂಗ್ ಆರಂಭ
ಭಾರತದ ಗುರಿ ಬೆನ್ನಟ್ಟುವ ಪ್ರಕ್ರಿಯೆಯು ಲಕ್ಷ್ಯ ರೈಚಂದಾನಿ ಮತ್ತು ಆರ್ಯವೀರ್ ಸೆಹ್ವಾಗ್ ಅವರೊಂದಿಗೆ ಸುಗಮವಾಗಿ ಆರಂಭವಾಯಿತು. ಈ ಜೋಡಿಯು 95 ರನ್‌ಗಳ ಅಮೂಲ್ಯ ಜೊತೆಯಾಟವನ್ನು ನೀಡಿತು. ನಂತರ, ಆರ್ಯವೀರ್ ಸೆಹ್ವಾಗ್ 61 ಎಸೆತಗಳಲ್ಲಿ 58 ರನ್ ಗಳಿಸಿ ಔಟಾದರು. ಅವರು ಪೆವಿಲಿಯನ್‌ಗೆ ಮರಳಿದ ಬಳಿಕ, ಭಾರತದ ಆಟದಲ್ಲಿ, ವಿಶೇಷವಾಗಿ ‘ಸ್ಟ್ರೈಕ್ ರೇಟ್’ ವಿಷಯದಲ್ಲಿ ದೊಡ್ಡ ಬದಲಾವಣೆ ಕಂಡುಬಂತು. ಭಾರತವು ನಿಧಾನವಾಗಿ ‘ನೆಟ್ ರನ್ ರೇಟ್’ (NRR) ಮೇಲಿನ ಹಿಡಿತವನ್ನು ಕಳೆದುಕೊಳ್ಳತೊಡಗಿತು; ಜೊತೆಗೆ ಒಂದೆಡೆ ವಿಕೆಟ್‌ಗಳು ಬೀಳುತ್ತಿದ್ದುದು ತಂಡಕ್ಕೆ ಮತ್ತಷ್ಟು ಹಿನ್ನಡೆಯಾಯಿತು.
ಮೂರನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಗೆ ಇಳಿದ ವಿ.ಕೆ. ವಿನೀತ್ 24 ರನ್ ಗಳಿಸಿದರು. ಈ ಟೂರ್ನಿಯಲ್ಲಿ ಪಾಕಿಸ್ತಾನದ ವಿರುದ್ಧ ಶತಕ ಸಿಡಿಸಿದ್ದ ಅರ್ಜುನ್ ರಜಪೂತ್ 16 ರನ್ ಸೇರಿಸಿದರು. ಯಶ್‌ ವರ್ಧನ್ ಚೌಹಾಣ್ ಕೂಡ ಗಮನಾರ್ಹ ಪ್ರದರ್ಶನ ನೀಡಲು ವಿಫಲರಾಗಿ, 9 ರನ್ ಗಳಿಗೆ ಪೆವಿಲಿಯನ್‌ಗೆ ಮರಳಿದರು. ಇದರೊಂದಿಗೆ ಭಾರತದ ಮೊತ್ತ 186/4 ಕ್ಕೆ ಕುಸಿಯಿತು. ಲಕ್ಷ್ಯ 80 ರನ್ ಗಳಿಸಿ ತಂಡದ ಸ್ಕೋರ್‌ ಬೋರ್ಡ್ ಚಲಿಸುವಂತೆ ನೋಡಿಕೊಂಡರಾದರೂ, ಇನ್ನೊಂದು ತುದಿಯಿಂದ ಅವರಿಗೆ ಸೂಕ್ತ ಬೆಂಬಲ ಸಿಗಲಿಲ್ಲ.
ನಂತರ, ಅನ್ವಯ್ ದ್ರಾವಿಡ್ ಉತ್ತಮವಾಗಿ ಆಡುತ್ತಿದ್ದರೂ, ದುರದೃಷ್ಟವಶಾತ್ ರನ್-ಔಟ್ ಆಗುವ ಮೂಲಕ 19 ರನ್‌ಗಳಿಗೆ ಅವರ ಆಟ ಅಂತ್ಯಗೊಂಡಿತು. ಈ ಹಂತದಲ್ಲಿ ಪಂದ್ಯವು ಭಾರತದ ಕೈತಪ್ಪುವಂತೆ ಭಾಸವಾಯಿತು, ಆದರೆ ಆಗ ಮನಲ್ ಚೌಹಾಣ್ ಅದ್ಭುತ ಬ್ಯಾಟಿಂಗ್ ಪ್ರದರ್ಶಿಸಿದರು. ಮೋಹಿತ್ ಉಲ್ವಾ ಅವರಿಗೆ ಉತ್ತಮ ಸಾಥ್ ನೀಡಿದರು ಮತ್ತು ಮನಲ್ ಔಟ್ ಆದ ನಂತರ ತಂಡದ ಜವಾಬ್ದಾರಿಯನ್ನು ತಮ್ಮ ಹೆಗಲ ಮೇಲೆ ತೆಗೆದುಕೊಂಡರು. ಅಂತಿಮವಾಗಿ, ಮೋಹಿತ್ ಅಜೇಯ 49 ರನ್ ಗಳಿಸುವ ಮೂಲಕ ತಂಡಕ್ಕೆ ಟೂರ್ನಿ ಗೆಲ್ಲಿಸಿಕೊಟ್ಟರು.
