ಪ್ರತಿದಿನ ಮುಂಜಾನೆ 3 ಗಂಟೆಗೆ ಎಚ್ಚರವಾಗುತ್ತಿದ್ದೀರಾ? ನಿಮ್ಮ ದೇಹ ನೀಡುತ್ತಿರುವ ಈ 6 ಸೂಚನೆಗಳನ್ನು ನಿರ್ಲಕ್ಷಿಸಬೇಡಿ!

ದಿನವಿಡೀ ಕೆಲಸ ಮಾಡಿ ಸುಸ್ತಾಗಿ ಮನೆಗೆ ಬಂದು ರಾತ್ರಿ ನೆಮ್ಮದಿಯಾಗಿ ಮಲಗುತ್ತೀರಿ. ಆದರೆ ಮುಂಜಾನೆ ಸರಿಯಾಗಿ 3 ಗಂಟೆಯಾಗುತ್ತಿದ್ದಂತೆ ಇದ್ದಕ್ಕಿದ್ದಂತೆ ಕಣ್ಣು ತೆರೆಯುತ್ತದೆ! ಮತ್ತೆ ಮಲಗಲು ಎಷ್ಟೇ ಪ್ರಯತ್ನಿಸಿದರೂ ನಿದ್ದೆ ಮಾತ್ರ ಹತ್ತಿರ ಸುಳಿಯುವುದಿಲ್ಲ. ಗಡಿಯಾರ ನೋಡಿದರೆ ಪ್ರತಿದಿನವೂ ಅದೇ ಸಮಯ! ನಿಮಗೂ ಇಂತಹ ಅನುಭವವಾಗಿದೆಯೇ? ಹಾಗಿದ್ದರೆ ಇದನ್ನು ಕೇವಲ ಕಾಕತಾಳೀಯ ಎಂದು ನಿರ್ಲಕ್ಷಿಸಬೇಡಿ. ನಿಮ್ಮ ದೇಹದ ನಿದ್ರೆಯ ಚಕ್ರ, ಮಾನಸಿಕ ಒತ್ತಡ, ಹಾರ್ಮೋನ್ ಏರಿಳಿತ ಸೇರಿದಂತೆ ಹಲವು ಸಂಗತಿಗಳು ಇದಕ್ಕೆ ಕಾರಣವಾಗಿರಬಹುದು. ರಾತ್ರಿ 3 ಗಂಟೆಗೆ ಪದೇಪದೇ ಎಚ್ಚರವಾಗುವುದರ ಹಿಂದಿನ 6 ಪ್ರಮುಖ ಕಾರಣಗಳನ್ನು ತಜ್ಞರು ವಿವರಿಸಿದ್ದಾರೆ.

ನಿದ್ದೆ ಎನ್ನುವುದು ಕೇವಲ ದೇಹಕ್ಕೆ ವಿಶ್ರಾಂತಿ ನೀಡುವ ಪ್ರಕ್ರಿಯೆಯಲ್ಲ. ಮೆದುಳು ಮತ್ತು ದೇಹದ ಆರೋಗ್ಯಕ್ಕೂ ಇದು ಅತ್ಯಂತ ಮುಖ್ಯ. ರಾತ್ರಿ ನಿದ್ರೆಯ ಮಧ್ಯೆ ಒಮ್ಮೆ ಎಚ್ಚರವಾಗುವುದು ಸಾಮಾನ್ಯ. ಆದರೆ ಪ್ರತಿದಿನ ಒಂದೇ ಸಮಯಕ್ಕೆ ಎಚ್ಚರವಾಗುವುದು, ಮತ್ತೆ ನಿದ್ದೆ ಬಾರದೆ ಒದ್ದಾಡುವುದು ನಿಮ್ಮ ನಿದ್ರೆಯ ಗುಣಮಟ್ಟದ ಮೇಲೆ ಪರಿಣಾಮ ಬೀರಬಹುದು.

ಹಾಗಾದರೆ ರಾತ್ರಿ 3 ಗಂಟೆಗೆ ಕಣ್ಣು ತೆರೆಯುವುದಕ್ಕೆ ನಿಜವಾದ ಕಾರಣಗಳೇನು? ತಜ್ಞರು ಗುರುತಿಸಿರುವ ಆರು ಪ್ರಮುಖ ಕಾರಣಗಳು ಇಲ್ಲಿವೆ.

ರಾತ್ರಿ 3 ಗಂಟೆಗೆ ಕಣ್ಣು ತೆರೆಯಲು ಕಾರಣವಾಗುವ 6 ಸಂಗತಿಗಳು

1. ನಿಮ್ಮ ನಿದ್ರೆಯ ಚಕ್ರವೇ ಇದಕ್ಕೆ ಕಾರಣವಾಗಿರಬಹುದು!

ನೀವು ರಾತ್ರಿ ಮಲಗಿದ ತಕ್ಷಣ ಬೆಳಗಿನವರೆಗೆ ಒಂದೇ ರೀತಿಯ ಗಾಢ ನಿದ್ರೆಯಲ್ಲಿರುವುದಿಲ್ಲ. ನಿದ್ರೆ ಹಲವು ಹಂತಗಳಲ್ಲಿ ಸಾಗುತ್ತದೆ. ಸಾಮಾನ್ಯವಾಗಿ ಒಂದು ನಿದ್ರೆಯ ಚಕ್ರ 90ರಿಂದ 100 ನಿಮಿಷಗಳವರೆಗೆ ಇರುತ್ತದೆ.

ರಾತ್ರಿ ಕಳೆದಂತೆ ನಿದ್ರೆ ಹಗುರವಾಗುತ್ತಾ ಹೋಗುತ್ತದೆ. ವಿಶೇಷವಾಗಿ ಮುಂಜಾನೆಯ ವೇಳೆಯಲ್ಲಿ ಸಣ್ಣ ಶಬ್ದ ಅಥವಾ ಸುತ್ತಮುತ್ತಲಿನ ಬದಲಾವಣೆಗಳಿಗೂ ಎಚ್ಚರವಾಗಬಹುದು.

ಹೀಗಾಗಿ ರಾತ್ರಿ 3 ಗಂಟೆಗೆ ಎಚ್ಚರವಾಗುವುದು ಕೆಲವರಲ್ಲಿ ಸಹಜ ನಿದ್ರೆಯ ಪ್ರಕ್ರಿಯೆಯ ಭಾಗವಾಗಿರಬಹುದು. ಮತ್ತೆ ಸುಲಭವಾಗಿ ನಿದ್ದೆಗೆ ಜಾರುತ್ತಿದ್ದರೆ ಸಾಮಾನ್ಯವಾಗಿ ಆತಂಕಪಡುವ ಅಗತ್ಯವಿಲ್ಲ.

2. ಪ್ರತಿದಿನ ಅದೇ ಸಮಯಕ್ಕೆ ಎಚ್ಚರವಾಗುವ ಅಭ್ಯಾಸ!

ಒಮ್ಮೆ ನಿದ್ರೆ ಕೆಟ್ಟರೆ ಸಾಕು, ನಂತರ ಅದೇ ಸಮಯಕ್ಕೆ ಎಚ್ಚರವಾಗುವ ಅಭ್ಯಾಸ ಬೆಳೆಯಬಹುದು. ಇದನ್ನು ವೈದ್ಯಕೀಯ ಭಾಷೆಯಲ್ಲಿ ‘ಕಂಡೀಷನ್ಡ್ ಇನ್ಸೋಮ್ನಿಯಾ’ ಎಂದು ಕರೆಯಲಾಗುತ್ತದೆ.

ಆರಂಭದಲ್ಲಿ ಕೆಲಸದ ಒತ್ತಡ, ಆತಂಕ ಅಥವಾ ಯಾವುದಾದರೂ ಸಮಸ್ಯೆಯಿಂದ ನಿದ್ರೆ ಹಾಳಾಗಿರಬಹುದು. ಆದರೆ ಸಮಸ್ಯೆ ಪರಿಹಾರವಾದ ಬಳಿಕವೂ ಮೆದುಳು ಅದೇ ಸಮಯಕ್ಕೆ ಎಚ್ಚರವಾಗುವ ಅಭ್ಯಾಸವನ್ನು ಮುಂದುವರಿಸಬಹುದು.

ಹೀಗಾಗಿ ಪ್ರತಿದಿನ ಒಂದೇ ಸಮಯಕ್ಕೆ ಎಚ್ಚರವಾಗುತ್ತಿದ್ದರೆ ನಿಮ್ಮ ನಿದ್ರೆಯ ಅಭ್ಯಾಸದ ಮೇಲೂ ಗಮನ ಹರಿಸಬೇಕು.

3. ದೇಹದಲ್ಲಿನ ಕಾರ್ಟಿಸೋಲ್ ಹಾರ್ಮೋನ್ ಏರಿಳಿತ!

ರಾತ್ರಿ ಚೆನ್ನಾಗಿ ನಿದ್ರೆ ಮಾಡುತ್ತಿದ್ದರೂ ಮುಂಜಾನೆ ಇದ್ದಕ್ಕಿದ್ದಂತೆ ಎಚ್ಚರವಾಗುವುದಕ್ಕೆ ಕಾರ್ಟಿಸೋಲ್ ಹಾರ್ಮೋನ್‌ನ ಪಾತ್ರವೂ ಇರಬಹುದು.

ಕಾರ್ಟಿಸೋಲ್ ಅನ್ನು ಸಾಮಾನ್ಯವಾಗಿ ಒತ್ತಡದ ಹಾರ್ಮೋನ್ ಎಂದು ಕರೆಯಲಾಗುತ್ತದೆ. ದೇಹದ ನೈಸರ್ಗಿಕ ಜೈವಿಕ ಗಡಿಯಾರದ ಪ್ರಕಾರ ಮುಂಜಾನೆ ಇದರ ಮಟ್ಟ ಹೆಚ್ಚಾಗುತ್ತದೆ. ಇದು ದೇಹವನ್ನು ಎಚ್ಚರಗೊಳ್ಳಲು ಸಿದ್ಧಪಡಿಸುತ್ತದೆ.

ಆದರೆ ನೀವು ನಿರಂತರ ಒತ್ತಡ, ಆತಂಕ ಅಥವಾ ಮಾನಸಿಕ ಆಘಾತಕ್ಕೆ ಒಳಗಾಗಿದ್ದರೆ ಈ ಪ್ರಕ್ರಿಯೆಯಲ್ಲಿನ ಬದಲಾವಣೆ ನಿದ್ರೆಗೆ ಅಡ್ಡಿಯಾಗಬಹುದು. ಇದರಿಂದ ಬೆಳಗಾಗುವ ಮುನ್ನವೇ ಎಚ್ಚರವಾಗುವ ಸಾಧ್ಯತೆಯಿದೆ.

4. ಮನಸ್ಸಿನಲ್ಲಿರುವ ಚಿಂತೆ ನಿದ್ದೆಯನ್ನೇ ಕದಿಯುತ್ತಿದೆಯೇ?

ಕೆಲಸದ ಒತ್ತಡ, ಕುಟುಂಬದ ಸಮಸ್ಯೆಗಳು, ಹಣಕಾಸಿನ ಚಿಂತೆ, ಭವಿಷ್ಯದ ಆತಂಕ… ಇವೆಲ್ಲವೂ ನಿಮ್ಮ ನಿದ್ರೆಯ ಶತ್ರುಗಳಾಗಬಹುದು.

ಹಗಲಿನಲ್ಲಿ ಬ್ಯುಸಿಯಾಗಿರುವಾಗ ಗಮನಕ್ಕೆ ಬಾರದ ಆಲೋಚನೆಗಳು ರಾತ್ರಿ ಮಲಗಿದಾಗ ಹೆಚ್ಚಾಗಬಹುದು. ಅದರಲ್ಲೂ ನಿದ್ರೆ ಹಗುರವಾಗಿರುವ ಮುಂಜಾನೆಯ ವೇಳೆಯಲ್ಲಿ ಇಂತಹ ಆಲೋಚನೆಗಳು ನಿಮ್ಮನ್ನು ಎಚ್ಚರಗೊಳಿಸಬಹುದು.

ಖಿನ್ನತೆಯೂ ನಿದ್ರೆ-ಎಚ್ಚರದ ನೈಸರ್ಗಿಕ ಚಕ್ರದ ಮೇಲೆ ಪರಿಣಾಮ ಬೀರಬಹುದು. ಇದರಿಂದ ಮುಂಜಾನೆ ಬೇಗನೆ ಎಚ್ಚರವಾಗುವುದು ಅಥವಾ ರಾತ್ರಿ ಪದೇಪದೇ ನಿದ್ರೆ ಕಡಿತಗೊಳ್ಳುವುದು ಸಂಭವಿಸಬಹುದು.

ಗಮನಿಸಿ: ಸಾಮಾನ್ಯವಾಗಿ ವಯಸ್ಕರಿಗೆ ಪ್ರತಿದಿನ 7ರಿಂದ 9 ಗಂಟೆಗಳ ನಿದ್ರೆ ಅಗತ್ಯವಿರುತ್ತದೆ.

5. ರಾತ್ರಿ ಊಟದ ಸಮಯ ಮತ್ತು ಆಹಾರ ಪದ್ಧತಿಯೂ ಕಾರಣ!

ನೀವು ರಾತ್ರಿ ಮಲಗುವ ಮುನ್ನ ಏನು ತಿನ್ನುತ್ತೀರಿ ಎಂಬುದು ಕೂಡ ನಿಮ್ಮ ನಿದ್ರೆಯನ್ನು ನಿರ್ಧರಿಸಬಹುದು.

• ಮಲಗುವ ಮುನ್ನ ಅತಿಯಾಗಿ ಆಹಾರ ಸೇವಿಸುವುದು.

• ರಾತ್ರಿ ಮಲಗುವ ಸಮಯದಲ್ಲಿ ಹೆಚ್ಚು ದ್ರವ ಪದಾರ್ಥಗಳನ್ನು ಕುಡಿಯುವುದು.

• ಮಲಗುವ ಮುನ್ನ ಮದ್ಯಪಾನ ಮಾಡುವುದು.

• ಊಟದ ಸಮಯದಲ್ಲಿ ಅನಿಯಮಿತತೆ.

ಈ ಅಭ್ಯಾಸಗಳು ನಿದ್ರೆಯ ಗುಣಮಟ್ಟವನ್ನು ಕಡಿಮೆ ಮಾಡಬಹುದು. ಕೆಲವು ಸಂದರ್ಭಗಳಲ್ಲಿ ರಕ್ತದಲ್ಲಿನ ಸಕ್ಕರೆ ಮಟ್ಟ ಕುಸಿಯುವುದರಿಂದಲೂ ನಿದ್ರೆಯಿಂದ ಎಚ್ಚರವಾಗಬಹುದು. ವಿಶೇಷವಾಗಿ ಮಧುಮೇಹ ಇರುವವರು ಈ ಬಗ್ಗೆ ಎಚ್ಚರಿಕೆ ವಹಿಸಬೇಕು.

6. ಮಹಿಳೆಯರಲ್ಲಿ ಹಾರ್ಮೋನ್ ಬದಲಾವಣೆ ಸೇರಿದಂತೆ ಆರೋಗ್ಯ ಸಮಸ್ಯೆಗಳು!

ಕೆಲವೊಮ್ಮೆ ರಾತ್ರಿ ನಿದ್ರೆ ಹಾಳಾಗುವುದರ ಹಿಂದೆ ದೇಹದಲ್ಲಿನ ಆರೋಗ್ಯ ಸಮಸ್ಯೆಗಳೂ ಇರಬಹುದು.

ವಿಶೇಷವಾಗಿ ಮಹಿಳೆಯರಲ್ಲಿ ಮೆನೋಪಾಸ್‌ಗೆ ಮುಂಚಿನ ಹಂತವಾದ ಪೆರಿಮೆನೋಪಾಸ್ ಮತ್ತು ಮೆನೋಪಾಸ್ ಸಮಯದಲ್ಲಿ ಈಸ್ಟ್ರೋಜನ್ ಹಾಗೂ ಪ್ರೊಜೆಸ್ಟರಾನ್ ಹಾರ್ಮೋನ್‌ಗಳಲ್ಲಿ ಏರಿಳಿತ ಉಂಟಾಗುತ್ತದೆ. ಇದರಿಂದ ರಾತ್ರಿ ಬೆವರುವುದು, ದೇಹದಲ್ಲಿ ಬಿಸಿಯ ಅನುಭವ (ಹಾಟ್ ಫ್ಲ್ಯಾಷ್) ಕಾಣಿಸಿಕೊಂಡು ನಿದ್ರೆ ಕಡಿತಗೊಳ್ಳಬಹುದು.

ಇದರ ಜೊತೆಗೆ ಉಸಿರಾಟದ ತೊಂದರೆ, ದೇಹದ ನೋವು, ಹೃದಯ ಸಂಬಂಧಿ ಸಮಸ್ಯೆಗಳು ಹಾಗೂ ನರಮಂಡಲದ ಕೆಲವು ಕಾಯಿಲೆಗಳು ಕೂಡ ರಾತ್ರಿ ಪದೇಪದೇ ಎಚ್ಚರವಾಗಲು ಕಾರಣವಾಗಬಹುದು. ಕೆಲವು ಔಷಧಿಗಳೂ ನಿದ್ರೆಯ ಮೇಲೆ ಪರಿಣಾಮ ಬೀರಬಹುದು.

ಯಾವಾಗ ಈ ಸಮಸ್ಯೆಯನ್ನು ಗಂಭೀರವಾಗಿ ಪರಿಗಣಿಸಬೇಕು?

ಒಮ್ಮೊಮ್ಮೆ ರಾತ್ರಿ 3 ಗಂಟೆಗೆ ಎಚ್ಚರವಾಗುವುದು ದೊಡ್ಡ ಸಮಸ್ಯೆಯಲ್ಲ. ಆದರೆ ವಾರದಲ್ಲಿ ಮೂರು ಅಥವಾ ಅದಕ್ಕಿಂತ ಹೆಚ್ಚು ದಿನ ಈ ರೀತಿ ಆಗುತ್ತಿದ್ದರೆ, ಒಂದು ತಿಂಗಳಿಗೂ ಹೆಚ್ಚು ಕಾಲ ಮುಂದುವರಿದರೆ ಮತ್ತು ಹಗಲಿನಲ್ಲಿ ಸುಸ್ತು, ಕೆಲಸದಲ್ಲಿ ಏಕಾಗ್ರತೆಯ ಕೊರತೆ ಅಥವಾ ದೈನಂದಿನ ಜೀವನದ ಮೇಲೆ ಪರಿಣಾಮ ಉಂಟಾಗುತ್ತಿದ್ದರೆ ವೈದ್ಯರನ್ನು ಸಂಪರ್ಕಿಸುವುದು ಉತ್ತಮ.

ನಿದ್ರೆಯ ಸಮಸ್ಯೆಗೆ ಒಂದೇ ಕಾರಣ ಇರುವುದಿಲ್ಲ. ನಿಮ್ಮ ಜೀವನಶೈಲಿ, ಮಾನಸಿಕ ಸ್ಥಿತಿ ಮತ್ತು ಆರೋಗ್ಯವನ್ನು ಪರಿಶೀಲಿಸಿ ನಿಖರ ಕಾರಣ ತಿಳಿದುಕೊಳ್ಳುವುದು ಮುಖ್ಯ.

ಸೂಚನೆ: ಈ ಲೇಖನವು ಆರೋಗ್ಯ ಜಾಗೃತಿಗಾಗಿ ಮಾತ್ರ. ರಾತ್ರಿ 3 ಗಂಟೆಗೆ ಎಚ್ಚರವಾಗುವುದನ್ನು ಯಾವುದೇ ನಿರ್ದಿಷ್ಟ ಕಾಯಿಲೆಯ ಲಕ್ಷಣವೆಂದು ಪರಿಗಣಿಸಬಾರದು. ನಿರಂತರ ನಿದ್ರೆಯ ಸಮಸ್ಯೆ ಇದ್ದರೆ ವೈದ್ಯಕೀಯ ಸಲಹೆ ಪಡೆಯಿರಿ.