ಬೆಂಗಳೂರು: ರಾಜ್ಯದ 2ನೇ ಮತ್ತು 3ನೇ ದರ್ಜೆಯ (Tier-II & Tier-III) ನಗರ ಹಾಗೂ ಪಟ್ಟಣಗಳಲ್ಲಿ ಭವಿಷ್ಯದ ಸಂಚಾರ ದಟ್ಟಣೆ ನಿಯಂತ್ರಣ, ಸುಗಮ ಸಂಪರ್ಕ ವ್ಯವಸ್ಥೆ ಮತ್ತು ಉದ್ಯೋಗ ಸೃಷ್ಟಿಯ ಕೈಗಾರಿಕಾ ವಿಸ್ತರಣೆಗೆ ಪೂರಕವಾಗಿ ನಗರಾಭಿವೃದ್ಧಿ ಇಲಾಖೆ ಮಹತ್ವದ ಹೆಜ್ಜೆಯಿಟ್ಟಿದೆ.
ಸ್ಥಳೀಯ ಯೋಜನಾ ಪ್ರದೇಶಗಳಲ್ಲಿ ಪ್ರಸ್ತುತ ಚಾಲ್ತಿಯಲ್ಲಿರುವ ಹಾಗೂ ರೂಪಿಸಲಾಗುತ್ತಿರುವ ಮಹಾಯೋಜನೆಗಳಲ್ಲಿ (ಮಾಸ್ಟರ್ ಪ್ಲಾನ್) ಅಳವಡಿಸಲು ಸಿದ್ಧಪಡಿಸಲಾಗಿರುವ 'ಜಿಐಎಸ್ (GIS) ಆಧಾರಿತ ರೋಡ್ ನೆಟ್ವರ್ಕ್ ಗ್ರಿಡ್ ಪ್ಲಾನ್'ಗೆ ರಾಜ್ಯ ಸರ್ಕಾರ ತಾತ್ಕಾಲಿಕ ಅನುಮೋದನೆ ನೀಡಿ ಅಧಿಕೃತ ಗೆಜೆಟ್ ಅಧಿಸೂಚನೆ ಹೊರಡಿಸಿದೆ.
ಮುಖ್ಯಮಂತ್ರಿಗಳ ಅಧ್ಯಕ್ಷತೆಯಲ್ಲಿ ನಡೆದ ಸಚಿವ ಸಂಪುಟ ಸಭೆಯಲ್ಲಿ ಈ ಮಹತ್ವದ ಯೋಜನೆಗೆ ಹಸಿರು ನಿಶಾನೆ ಸಿಕ್ಕಿದ್ದು, ನಗರಾಭಿವೃದ್ಧಿ ಇಲಾಖೆಯ ಸರ್ಕಾರದ ಅಧೀನ ಕಾರ್ಯದರ್ಶಿ ಲತಾ ಕೆ. ಅವರು ಈ ಕುರಿತು ಆದೇಶ ಪ್ರಕಟಿಸಿದ್ದಾರೆ.
ಡಲ್ಟ್ (DULT) ರೂಪಿಸಿದ ಜಿಐಎಸ್ ತಂತ್ರಜ್ಞಾನ ಆಧಾರಿತ ನಕ್ಷೆ
ನಗರ ಭೂ ಸಾರಿಗೆ ನಿರ್ದೇಶನಾಲಯವು (DULT) ಕರ್ನಾಟಕ ನಗರ ಮತ್ತು ಗ್ರಾಮಾಂತರ ಯೋಜನಾ ಕಾಯ್ದೆ 1961ರ ಅನ್ವಯ ರಾಜ್ಯದ 170ಕ್ಕೂ ಹೆಚ್ಚು ನಗರ, ಪಟ್ಟಣ ಮತ್ತು ಪುರಸಭೆ ಯೋಜನಾ ಪ್ರದೇಶಗಳ ರಸ್ತೆ ಜಾಲವನ್ನು ಜಿಐಎಸ್ ತಂತ್ರಜ್ಞಾನದ ಮೂಲಕ ವೈಜ್ಞಾನಿಕವಾಗಿ ಮರು ವಿನ್ಯಾಸಗೊಳಿಸಿದೆ. ನಗರ ಸ್ಥಳೀಯ ಸಂಸ್ಥೆಗಳ ವ್ಯಾಪ್ತಿಯ ಹಾಲಿ ರಸ್ತೆಗಳ ಜತೆಗೆ, ನಗರದ ಹೊರವಲಯದ ಸಂಪರ್ಕ ರಸ್ತೆಗಳು, ವರ್ತುಲ ರಸ್ತೆಗಳು (ರಿಂಗ್ ರೋಡ್) ಮತ್ತು ಹೊಸ ಲಿಂಕ್ ರಸ್ತೆಗಳನ್ನು ಒಂದಕ್ಕೊಂದು ಸುಲಲಿತವಾಗಿ ಜೋಡಿಸುವ ಉದ್ದೇಶದಿಂದ ಈ ಸಮಗ್ರ ಗ್ರಿಡ್ ಯೋಜನೆ ರೂಪಿಸಲಾಗಿದೆ.
ಆಕ್ಷೇಪಣೆ ಸಲ್ಲಿಕೆಗೆ 60 ದಿನಗಳ ಗಡುವು
ಸರ್ಕಾರ ತಾತ್ಕಾಲಿಕ ಅನುಮೋದನೆ ನೀಡಿರುವ ಹಿನ್ನೆಲೆಯಲ್ಲಿ, ಸಾರ್ವಜನಿಕರ ಸಲಹೆ ಹಾಗೂ ಆಕ್ಷೇಪಣೆಗಳ ಆಹ್ವಾನಕ್ಕೆ ಪ್ರಕ್ರಿಯೆ ಆರಂಭವಾಗಲಿದೆ:
-
ಸಂಬಂಧಪಟ್ಟ ನಗರಾಭಿವೃದ್ಧಿ ಪ್ರಾಧಿಕಾರಗಳು (UDA), ನಗರ ಯೋಜನಾ ಪ್ರಾಧಿಕಾರಗಳು ಹಾಗೂ ಸ್ಥಳೀಯ ಸಂಸ್ಥೆಗಳ ಕಚೇರಿಗಳಲ್ಲಿ ಸಾರ್ವಜನಿಕರ ವೀಕ್ಷಣೆಗೆ ಈ ರಸ್ತೆ ಗ್ರಿಡ್ ನಕ್ಷೆಗಳನ್ನು ಲಭ್ಯವಿರಿಸಲಾಗುತ್ತದೆ.
-
ಪತ್ರಿಕಾ ಪ್ರಕಟಣೆ ಹೊರಡಿಸಿದ ದಿನಾಂಕದಿಂದ 60 ದಿನಗಳ ನಿಗದಿತ ಕಾಲಮಿತಿಯೊಳಗೆ ಸಾರ್ವಜನಿಕರು ತಮ್ಮ ಸಲಹೆ, ಆಕ್ಷೇಪಣೆಗಳನ್ನು ಪ್ರಾಧಿಕಾರಗಳಿಗೆ ಸಲ್ಲಿಸಬಹುದು.
-
ಆಕ್ಷೇಪಣೆಗಳನ್ನು ಪರಿಶೀಲಿಸಿ, ಡಲ್ಟ್ ಮೂಲಕ ಅಂತಿಮ ಅನುಮೋದನೆಗಾಗಿ ಸರ್ಕಾರಕ್ಕೆ ವರದಿ ರವಾನಿಸಲಾಗುತ್ತದೆ.
ರಿಂಗ್ ರೋಡ್ನ 2 ಕಿ.ಮೀ ವ್ಯಾಪ್ತಿಯಲ್ಲಿ 'ಇಂಪ್ಯಾಕ್ಟ್ ಝೋನ್'
ಪ್ರಸ್ತಾಪಿತ ಯೋಜನೆಯ ಪ್ರಕಾರ, ವರ್ತುಲ ರಸ್ತೆಗಳ (ರಿಂಗ್ ರೋಡ್) ಎರಡೂ ಬದಿಯ 2 ಕಿಲೋಮೀಟರ್ ವ್ಯಾಪ್ತಿಯನ್ನು 'ಇಂಪ್ಯಾಕ್ಟ್ ಝೋನ್' (Impact Zone) ಎಂದು ಪರಿಗಣಿಸಲಾಗಿದ್ದು, ಇಲ್ಲಿ ಹೈ-ಡೆನ್ಸಿಟಿ ವಾಣಿಜ್ಯ ಮತ್ತು ವಸತಿ ಚಟುವಟಿಕೆಗಳಿಗೆ ಮುಕ್ತ ಅವಕಾಶ ಕಲ್ಪಿಸಲಾಗಿದೆ:
-
ವಸತಿ ಮತ್ತು ವಾಣಿಜ್ಯ: ಅಪಾರ್ಟ್ಮೆಂಟ್ಗಳು, ಹೈರೈಸ್ ಕಟ್ಟಡಗಳು, ಟೌನ್ಶಿಪ್ಗಳು, ಹೋಟೆಲ್ಗಳು, ಸೂಪರ್ಮಾರ್ಕೆಟ್ಗಳು, ಸಗಟು ಮಾರುಕಟ್ಟೆಗಳು ಹಾಗೂ ಬಿಸಿನೆಸ್ ಪಾರ್ಕ್ಗಳ ನಿರ್ಮಾಣ.
-
ಕೈಗಾರಿಕೆ ಹಾಗೂ ಲಾಜಿಸ್ಟಿಕ್ಸ್: ಮಾಲಿನ್ಯಕಾರಕವಲ್ಲದ ಕೈಗಾರಿಕೆಗಳು, ಬಸ್/ಟ್ರಕ್ ಟರ್ಮಿನಲ್, ಲಾಜಿಸ್ಟಿಕ್ಸ್ ಪಾರ್ಕ್, ಕೋಲ್ಡ್ ಸ್ಟೋರೇಜ್ ಹಾಗೂ ಇವಿ ಚಾರ್ಜಿಂಗ್ ಸ್ಟೇಷನ್ಗಳು.
-
ಸಾರ್ವಜನಿಕ ಸೌಲಭ್ಯ: ಶಾಲೆ, ಕಾಲೇಜು, ಮಲ್ಟಿಸ್ಪೆಷಾಲಿಟಿ ಆಸ್ಪತ್ರೆಗಳು, ಕ್ರೀಡಾ ಸಂಕೀರ್ಣ ಹಾಗೂ ಜಲಮೂಲಗಳ ಪುನಶ್ಚೇತನ ಕಾಮಗಾರಿಗಳು.
ಬೆಳಗಾವಿ, ಬಳ್ಳಾರಿ, ಹುಬ್ಬಳ್ಳಿ-ಧಾರವಾಡ, ಶಿವಮೊಗ್ಗ, ಮಂಗಳೂರು, ಕಲಬುರಗಿ, ಮೈಸೂರು, ವಿಜಯಪುರ, ದಾವಣಗೆರೆ, ಸಾಗರ, ಭಟ್ಕಳ, ಶಿರಸಿ, ಪುತ್ತೂರು ಸೇರಿದಂತೆ ರಾಜ್ಯದ ಪ್ರಮುಖ ನಗರಗಳು ಮತ್ತು ಪಟ್ಟಣ ಪಂಚಾಯಿತಿಗಳ ವ್ಯಾಪ್ತಿಯಲ್ಲಿ ಈ ನಿಯಮ ಅನ್ವಯವಾಗಲಿದ್ದು, ಇನ್ಮುಂದೆ ಹೊಸ ಬಡಾವಣೆ ಅಥವಾ ರಸ್ತೆ ಕಾಮಗಾರಿಗಳಿಗೆ ಅನುಮತಿ ನೀಡುವಾಗ ಸ್ಥಳೀಯ ಸಂಸ್ಥೆಗಳು ಈ 'ರೋಡ್ ಗ್ರಿಡ್ ಪ್ಲಾನ್' ಪರಿಗಣಿಸುವುದನ್ನು ಕಡ್ಡಾಯಗೊಳಿಸಲಾಗಿದೆ.
