ಲಿಮಾ: ದಕ್ಷಿಣ ಅಮೆರಿಕದ ಪೆರುವಿನಲ್ಲಿ ಶುಕ್ರವಾರ ರಾತ್ರಿ ಪ್ರಬಲ ಭೂಕಂಪ ಸಂಭವಿಸಿದ್ದು, ಜನರಲ್ಲಿ ಆತಂಕ ಸೃಷ್ಟಿಸಿದೆ. 6.9 ತೀವ್ರತೆಯ ಭೂಕಂಪದ ಕಂಪನ ಅನುಭವವಾಗುತ್ತಿದ್ದಂತೆ ರಾಜಧಾನಿ ಲಿಮಾದ ನಿವಾಸಿಗಳು ಭಯದಿಂದ ಮನೆಗಳಿಂದ ಹೊರಬಂದು ಬೀದಿಗಳಲ್ಲಿ ಆಶ್ರಯ ಪಡೆದಿದ್ದಾರೆ. ಸದ್ಯಕ್ಕೆ ಯಾವುದೇ ಪ್ರಾಣಹಾನಿ ಅಥವಾ ದೊಡ್ಡ ಪ್ರಮಾಣದ ಆಸ್ತಿ ಹಾನಿ ವರದಿಯಾಗಿಲ್ಲ.
ಅಮೆರಿಕದ ಭೂವೈಜ್ಞಾನಿಕ ಸಮೀಕ್ಷೆ (USGS) ಪ್ರಕಾರ, ಸ್ಥಳೀಯ ಸಮಯ ಶುಕ್ರವಾರ ಸಂಜೆ 7:09ಕ್ಕೆ ಆಂಡಿಸ್ ಪರ್ವತ ಪ್ರದೇಶದಲ್ಲಿ ಭೂಕಂಪ ಸಂಭವಿಸಿದೆ. ಭೂಮಿಯ ಸುಮಾರು 108 ಕಿ.ಮೀ. ಆಳದಲ್ಲಿ ಕಂಪನದ ಕೇಂದ್ರ ಪತ್ತೆಯಾಗಿದೆ.
ಪೆರುವಿನ ಭೌಗೋಳಿಕ ಸಂಸ್ಥೆಯ ಪ್ರಕಾರ, ಜುನಿನ್ (Junín) ಪ್ರದೇಶದಲ್ಲಿ ಸುಮಾರು 129 ಕಿ.ಮೀ. ಆಳದಲ್ಲಿ ಭೂಕಂಪದ ಮೂಲ ಪತ್ತೆಯಾಗಿದೆ. ಭೂಕಂಪದ ಕಂಪನಗಳು ಮಧ್ಯ ಪೆರುವಿನ ಆಂಡಿಸ್ ಪ್ರದೇಶ ಸೇರಿದಂತೆ ಹಲವು ಕಡೆಗಳಲ್ಲಿ ಅನುಭವವಾಗಿವೆ.
ಭಯದಿಂದ ಮನೆಗಳಿಂದ ಹೊರಬಂದ ಜನರು
ಭೂಕಂಪದ ತೀವ್ರ ಕಂಪನಕ್ಕೆ ಲಿಮಾದ ನಿವಾಸಿಗಳು ಬೆಚ್ಚಿಬಿದ್ದಿದ್ದಾರೆ. ಕಟ್ಟಡಗಳು ಅಲುಗಾಡುತ್ತಿದ್ದಂತೆ ಜನರು ತಮ್ಮ ಮನೆಗಳು ಹಾಗೂ ಕಚೇರಿಗಳಿಂದ ಹೊರಬಂದು ರಸ್ತೆಗಳತ್ತ ಧಾವಿಸಿದ್ದಾರೆ. ಸಂಸತ್ ಸದಸ್ಯರು ಕೂಡ ಸಂಸತ್ ಕಟ್ಟಡದಿಂದ ಹೊರಬರುತ್ತಿರುವ ದೃಶ್ಯಗಳು ಟಿವಿ ವಾಹಿನಿಗಳಲ್ಲಿ ಪ್ರಸಾರವಾಗಿವೆ.
ಪೆರುವಿನ ರಾಷ್ಟ್ರೀಯ ತುರ್ತು ಕಾರ್ಯಾಚರಣೆ ಕೇಂದ್ರದ ಮಾಹಿತಿ ಪ್ರಕಾರ, ಭೂಕಂಪದ ಕಂಪನಗಳು ಮಧ್ಯಮದಿಂದ ತೀವ್ರ ಮಟ್ಟದಲ್ಲಿ ಅನುಭವವಾಗಿವೆ. ಆದರೆ, ಇಲ್ಲಿಯವರೆಗೆ ಯಾವುದೇ ಸಾವುನೋವು ಅಥವಾ ಗಮನಾರ್ಹ ಕಟ್ಟಡ ಹಾನಿಯ ಮಾಹಿತಿ ಲಭ್ಯವಾಗಿಲ್ಲ.
ಸುನಾಮಿ ಭೀತಿ ಇಲ್ಲ
ಭೂಕಂಪದ ಬೆನ್ನಲ್ಲೇ ಸುನಾಮಿ ಆತಂಕವೂ ಎದುರಾಗಿತ್ತು. ಆದರೆ, ಅಮೆರಿಕದ ಸುನಾಮಿ ಎಚ್ಚರಿಕೆ ವ್ಯವಸ್ಥೆ ಈ ಭೂಕಂಪದಿಂದ ಸುನಾಮಿ ಅಪಾಯವಿಲ್ಲ ಎಂದು ಸ್ಪಷ್ಟಪಡಿಸಿದೆ. ಹೀಗಾಗಿ ಕರಾವಳಿ ಪ್ರದೇಶಗಳಲ್ಲಿ ಸುನಾಮಿ ಎಚ್ಚರಿಕೆ ನೀಡಲಾಗಿಲ್ಲ.
ಭೂಕಂಪಗಳಿಗೆ ಹೆಚ್ಚು ಒಳಪಡುವ ಪ್ರದೇಶ ಪೆರು
ಪೆರು ದೇಶವು ಪೆಸಿಫಿಕ್ ಸಾಗರದ ಸುತ್ತಲಿನ ಸುಮಾರು 40,000 ಕಿ.ಮೀ. ಉದ್ದದ ‘ರಿಂಗ್ ಆಫ್ ಫೈರ್’ ವಲಯದಲ್ಲಿದೆ. ಈ ಪ್ರದೇಶದಲ್ಲಿ ಜ್ವಾಲಾಮುಖಿಗಳು ಮತ್ತು ಭೂಫಲಕಗಳ ಚಲನೆಯಿಂದಾಗಿ ವಿಶ್ವದ ಬಹುತೇಕ ಭೂಕಂಪಗಳು ಸಂಭವಿಸುತ್ತವೆ. ಹೀಗಾಗಿ ಪೆರು ಸೇರಿದಂತೆ ಈ ವಲಯದ ಹಲವು ದೇಶಗಳು ಆಗಾಗ ಭೂಕಂಪನದ ಅಪಾಯ ಎದುರಿಸುತ್ತಿವೆ.