ರೋಮ್- ಕಾಂಗ್ರೆಸ್ ನಾಯಕಿ ಸೋನಿಯಾ ಗಾಂಧಿ ಅವರ ಬಾಲ್ಯದ ನೆನಪುಗಳನ್ನು ಒಳಗೊಂಡಿರುವ ಇಟಲಿಯಲ್ಲಿನ ಮನೆಯನ್ನು ವಸ್ತುಸಂಗ್ರಹಾಲಯವನ್ನಾಗಿ ಅಭಿವೃದ್ಧಿಪಡಿಸುವ ಪ್ರಯತ್ನವೊಂದು ಆರಂಭವಾಗಿದೆ. ಈ ಮಹತ್ವಾಕಾಂಕ್ಷೆಯ ಯೋಜನೆಯ ಹಿಂದೆ ಇಟಲಿಯಲ್ಲಿ ನೆಲೆಸಿರುವ ಭಾರತೀಯ ಮೂಲದ ಸಿಖ್ ಉದ್ಯಮಿ ಸುಖದೇವ್ ಸಿಂಗ್ ಕಾಂಗ್ ಇದ್ದಾರೆ.
ಸುಮಾರು ಆರು ವರ್ಷಗಳ ಹಿಂದೆ ಸೋನಿಯಾ ಗಾಂಧಿ ಅವರ ಬಾಲ್ಯದ ಮನೆಯನ್ನು ಖರೀದಿಸಿರುವ 52 ವರ್ಷದ ಸುಖದೇವ್ ಸಿಂಗ್ ಕಾಂಗ್, ಇದೀಗ ಅದನ್ನು ಅತ್ಯಾಧುನಿಕ ವಸ್ತುಸಂಗ್ರಹಾಲಯವನ್ನಾಗಿ ರೂಪಿಸಲು ಉತ್ಸುಕರಾಗಿದ್ದಾರೆ. ಇಟಲಿಯ ವಿಸೆಂಜಾ ಪ್ರಾಂತ್ಯದ ಲುಸಿಯಾನಾದಲ್ಲಿರುವ ಈ ಆರು ಕೋಣೆಗಳ ಮನೆ, ಬೂದು ಕಲ್ಲು ಮತ್ತು ಕಾಂಕ್ರೀಟ್ನಿಂದ ನಿರ್ಮಾಣಗೊಂಡಿದೆ. ಬ್ರೆಸಿಯಾದಲ್ಲಿರುವ ಕಾಂಗ್ ಅವರ ನಿವಾಸದಿಂದ ಸುಮಾರು ಒಂದು ಗಂಟೆಯ ಪ್ರಯಾಣದ ದೂರದಲ್ಲಿದೆ.
2020ರಲ್ಲಿ ಖರೀದಿಸಿದ್ದ ಮನೆ
1992ರಲ್ಲಿ ಪಂಜಾಬ್ನ ಹೋಶಿಯಾರ್ಪುರ ಜಿಲ್ಲೆಯ ಹಳ್ಳಿಯೊಂದರಿಂದ ಇಟಲಿಗೆ ವಲಸೆ ಹೋದ ಸುಖದೇವ್ ಸಿಂಗ್ ಕಾಂಗ್, ಆರಂಭದಲ್ಲಿ ಹೈನುಗಾರಿಕೆ, ಕೃಷಿ ಹಾಗೂ ಕಾರ್ಖಾನೆಗಳಲ್ಲಿ ಕೆಲಸ ಮಾಡಿದ್ದರು. ಬಳಿಕ ಉದ್ಯಮಿಯಾಗಿ ಬೆಳೆದ ಅವರು, 2020ರಲ್ಲಿ ತಮ್ಮ ಪತ್ನಿ ಮತ್ತು ಮಗಳ ಹೆಸರಿನಲ್ಲಿ ಈ ಮನೆಯನ್ನು ಖರೀದಿಸಿದ್ದಾರೆ.
ಮನೆಗೆ ಈಗಾಗಲೇ ‘ಇಂಡಿಯನ್ ಹೌಸ್’ ಎಂದು ಹೆಸರಿಡಲಾಗಿದ್ದು, ಕಟ್ಟಡದ ಮೇಲೆ ಭಾರತದ ತ್ರಿವರ್ಣ ಧ್ವಜವನ್ನೂ ಹಾರಿಸಲಾಗಿದೆ. ಹೊರಭಾಗದ ನಾಮಫಲಕದಲ್ಲಿ ಇದು ಸೋನಿಯಾ ಗಾಂಧಿ ಅವರ ಜನ್ಮಸ್ಥಳ ಎಂಬ ಉಲ್ಲೇಖವಿದೆ ಎಂದು ಕಾಂಗ್ ತಿಳಿಸಿದ್ದಾರೆ.
ಸೋನಿಯಾ ಗಾಂಧಿ ಅವರು 1946ರ ಡಿಸೆಂಬರ್ 9ರಂದು ಇದೇ ಮನೆಯಲ್ಲಿ ಜನಿಸಿದ್ದರು. ತಮ್ಮ ಬಾಲ್ಯದ ಆರಂಭಿಕ ವರ್ಷಗಳನ್ನು ಇಲ್ಲಿಯೇ ಕಳೆದಿದ್ದರು. ಪ್ರಸ್ತುತ ಮನೆ ನಿರ್ವಹಣೆಗಾಗಿ ಕೇರ್ಟೇಕರ್ ಒಬ್ಬರನ್ನು ನೇಮಿಸಲಾಗಿದ್ದು, ಪ್ರವಾಸಿಗರು ಮನೆ ವೀಕ್ಷಿಸಲು ಬಂದರೆ ಅವರಿಗೆ ವ್ಯವಸ್ಥೆ ಮಾಡಲಾಗುತ್ತದೆ. ಆಸ್ತಿ ತೆರಿಗೆ ಸೇರಿದಂತೆ ಮನೆಯ ನಿರ್ವಹಣೆಗೆ ಕಾಂಗ್ ವಾರ್ಷಿಕವಾಗಿ ಸುಮಾರು 1,000 ಯುರೋಗಳನ್ನು ಖರ್ಚು ಮಾಡುತ್ತಿದ್ದಾರೆ.
ಗಾಂಧಿ ಕುಟುಂಬದ ಸಹಕಾರಕ್ಕೆ ಮನವಿ
ಸೋನಿಯಾ ಗಾಂಧಿ ಮತ್ತು ಅವರ ಕುಟುಂಬದ ಬಗ್ಗೆ ಅಭಿಮಾನ ಹೊಂದಿರುವ ಕಾಂಗ್, ಈ ಮನೆಯನ್ನು ಕೇವಲ ಪ್ರವಾಸಿ ತಾಣವನ್ನಾಗಿ ಮಾಡುವುದಕ್ಕಿಂತ ಅದರ ಐತಿಹಾಸಿಕ ಮಹತ್ವವನ್ನು ಉಳಿಸುವ ಉದ್ದೇಶ ಹೊಂದಿದ್ದಾರೆ. ಇದಕ್ಕಾಗಿ ಸೋನಿಯಾ ಗಾಂಧಿ, ಅವರ ಪುತ್ರ ರಾಹುಲ್ ಗಾಂಧಿ ಹಾಗೂ ಪುತ್ರಿ ಪ್ರಿಯಾಂಕಾ ಗಾಂಧಿ ಅವರನ್ನು ಭೇಟಿಯಾಗಲು ಬಯಸಿದ್ದಾರೆ.
ಪ್ರಸ್ತಾವಿತ ವಸ್ತುಸಂಗ್ರಹಾಲಯದಲ್ಲಿ ಪ್ರದರ್ಶಿಸಲು ಸೋನಿಯಾ ಗಾಂಧಿ ಅವರ ಬಾಲ್ಯದ ಛಾಯಾಚಿತ್ರಗಳು, ವೈಯಕ್ತಿಕ ವಸ್ತುಗಳು, ದಾಖಲೆಗಳು ಹಾಗೂ ಕುಟುಂಬದ ನೆನಪಿನ ವಸ್ತುಗಳನ್ನು ಪಡೆಯುವ ನಿರೀಕ್ಷೆಯಲ್ಲಿದ್ದಾರೆ. ಈ ಸಂಬಂಧ ಗಾಂಧಿ ಕುಟುಂಬದ ಸಹಕಾರ ದೊರೆತರೆ ವಸ್ತುಸಂಗ್ರಹಾಲಯದ ಯೋಜನೆಗೆ ಮತ್ತಷ್ಟು ಬಲ ಸಿಗಲಿದೆ ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ಈ ಹಿಂದೆ ಈ ಆಸ್ತಿಯನ್ನು ಬಾಡಿಗೆಗೆ ನೀಡುವ ಅಥವಾ ಗುರುದ್ವಾರವನ್ನಾಗಿ ಪರಿವರ್ತಿಸುವ ಪ್ರಸ್ತಾಪಗಳು ಬಂದಿದ್ದರೂ, ಸೋನಿಯಾ ಗಾಂಧಿ ಹಾಗೂ ಮೈನೋ ಕುಟುಂಬದೊಂದಿಗಿನ ಐತಿಹಾಸಿಕ ಸಂಬಂಧವನ್ನು ಉಳಿಸಿಕೊಳ್ಳುವ ಉದ್ದೇಶದಿಂದ ಅವುಗಳನ್ನು ತಿರಸ್ಕರಿಸಿರುವುದಾಗಿ ಕಾಂಗ್ ಹೇಳಿದ್ದಾರೆ.
ಇಟಲಿಗೆ ಬರುವ ಭಾರತೀಯರಿಗೆ ಮತ್ತೊಂದು ಪ್ರವಾಸಿ ತಾಣ
ಈ ಮನೆಯನ್ನು ಸಂಪೂರ್ಣವಾಗಿ ವಸ್ತುಸಂಗ್ರಹಾಲಯವನ್ನಾಗಿ ಅಭಿವೃದ್ಧಿಪಡಿಸಿದರೆ ನೂರಾರು ಪ್ರವಾಸಿಗರು ಭೇಟಿ ನೀಡಬಹುದು. ವಿಶೇಷವಾಗಿ ಇಟಲಿಗೆ ತೆರಳುವ ಭಾರತೀಯರಿಗೆ ಇದು ಹೊಸ ಪ್ರವಾಸಿ ಆಕರ್ಷಣೆಯಾಗಲಿದೆ. ಇದರಿಂದ ಸ್ಥಳೀಯ ಹಳ್ಳಿಯ ಆರ್ಥಿಕ ಚಟುವಟಿಕೆಗಳಿಗೂ ಉತ್ತೇಜನ ದೊರೆಯಬಹುದು ಎಂಬುದು ಕಾಂಗ್ ಅವರ ಲೆಕ್ಕಾಚಾರ.
ಪ್ರತಿ ವರ್ಷ ಸೋನಿಯಾ ಗಾಂಧಿ ಅವರ ಜನ್ಮದಿನವನ್ನು ಸಾರ್ವಜನಿಕ ಕಾರ್ಯಕ್ರಮದ ಮೂಲಕ ಆಚರಿಸುವುದಾಗಿಯೂ ಅವರು ತಿಳಿಸಿದ್ದಾರೆ.
ಇತ್ತೀಚೆಗೆ ಬಿಡುಗಡೆಯಾದ ಸೋನಿಯಾ ಗಾಂಧಿ ಅವರ ಆತ್ಮಕಥನ ‘ಬಿಲಾಂಗ್: ಎ ಜರ್ನಿ ಆಫ್ ಲವ್’ ಹಿನ್ನೆಲೆಯಲ್ಲಿ ಅವರ ಇಟಲಿಯ ಬಾಲ್ಯದ ಬದುಕಿನ ಕುರಿತು ಮತ್ತೊಮ್ಮೆ ಆಸಕ್ತಿ ಹೆಚ್ಚಾಗಿದೆ. ಈ ಪುಸ್ತಕವನ್ನು ಓದಲು ತಾವು ಕಾತರದಿಂದ ಕಾಯುತ್ತಿರುವುದಾಗಿಯೂ ಕಾಂಗ್ ಹೇಳಿದ್ದಾರೆ.
ಸೋನಿಯಾ ಗಾಂಧಿ ಅವರ ಬಾಲ್ಯದ ಮನೆಯನ್ನು ಐತಿಹಾಸಿಕ ಸ್ಮಾರಕ ಹಾಗೂ ವಸ್ತುಸಂಗ್ರಹಾಲಯವನ್ನಾಗಿ ರೂಪಿಸುವ ಸುಖದೇವ್ ಸಿಂಗ್ ಕಾಂಗ್ ಅವರ ಪ್ರಯತ್ನ ಕುತೂಹಲ ಮೂಡಿಸಿದೆ.