ಇಂಗ್ಲೆಂಡ್ ಪ್ರವಾಸದಲ್ಲಿರುವ ಪಾಕಿಸ್ತಾನ ಅಂಡರ್-19 ಕ್ರಿಕೆಟ್ ತಂಡಕ್ಕೆ ಪೋರ್ಟ್ಸ್ಮೌತ್ ನಗರದಲ್ಲಿ ಒಂದು ವಿಚಿತ್ರ ಹಾಗೂ ಮುಜುಗರದ ಸನ್ನಿವೇಶ ಎದುರಾಗಿದೆ. ತಂಗಿದ್ದ ಹೊಟೇಲ್ ಹೊರಗಡೆ ಜಮಾಯಿಸಿದ ವಲಸೆ ವಿರೋಧಿ ಪ್ರತಿಭಟನಾಕಾರರು, ಯುವ ಕ್ರಿಕೆಟಿಗರನ್ನು ಅಕ್ರಮವಾಗಿ ದೇಶಕ್ಕೆ ಬಂದ ವಲಸಿಗರು ಎಂದು ತಪ್ಪಾಗಿ ತಿಳಿದುಕೊಂಡು ಗಲಾಟೆ ನಡೆಸಿದ ಘಟನೆ ನಡೆದಿದೆ.
ಪೋರ್ಟ್ಸ್ಮೌತ್ನ ಮ್ಯಾರಿಯಟ್ ಹೊಟೇಲ್ಗೆ ವಿದೇಶಿ ಪುರುಷರ ದೊಡ್ಡ ಗುಂಪೊಂದು ಆಗಮಿಸಿದೆ ಎಂಬ ಸುದ್ದಿ ಹರಡುತ್ತಿದ್ದಂತೆ ವಲಸೆ ವಿರೋಧಿ ಗುಂಪು ಹೊಟೇಲ್ ಮುಂದೆ ಜಮಾಯಿಸಿ ಪ್ರತಿಭಟನೆ ಆರಂಭಿಸಿತ್ತು. ಸಾಮಾನ್ಯವಾಗಿ ವಲಸಿಗರನ್ನು ಕರೆದೊಯ್ಯಲು ಬಳಸುವ ಕಂಪನಿಯ ಬಸ್ನಲ್ಲೇ ಈ ಕ್ರಿಕೆಟಿಗರು ಬಂದಿಳಿದದ್ದು ಈ ಗೊಂದಲಕ್ಕೆ ಪ್ರಮುಖ ಕಾರಣವಾಯಿತು. ಸ್ಥಳೀಯರಲ್ಲಿ ಉಂಟಾದ ಈ ಭ್ರಮೆಯಿಂದಾಗಿ ಹೊಟೇಲ್ ಆವರಣದಲ್ಲಿ ಕೆಲ ಕಾಲ ಉದ್ವಿಗ್ನ ವಾತಾವರಣ ನಿರ್ಮಾಣವಾಗಿತ್ತು.
ವಿಷಯ ತಿಳಿದ ತಕ್ಷಣ ಸ್ಥಳೀಯ ಮಂಡಳಿ ಸದಸ್ಯ ಜಾರ್ಜ್ ಮ್ಯಾಡ್ವಿಕ್ ಸ್ಥಳಕ್ಕೆ ಧಾವಿಸಿ ಹೊಟೇಲ್ ಆಡಳಿತ ಮಂಡಳಿ ಹಾಗೂ ಪಾಕಿಸ್ತಾನ ತಂಡದ ಕೋಚ್ ಅವರೊಂದಿಗೆ ಮಾತುಕತೆ ನಡೆಸಿದರು. ಬಂದಿರುವುದು ವಲಸಿಗರಲ್ಲ, ಪ್ರವಾಸಕ್ಕೆ ಬಂದಿರುವ ಪಾಕಿಸ್ತಾನ ಅಂಡರ್-19 ಕ್ರಿಕೆಟ್ ಆಟಗಾರರು ಎಂದು ಸ್ಪಷ್ಟಪಡಿಸಿದ ನಂತರ ಪ್ರತಿಭಟನಾಕಾರರು ಅಲ್ಲಿಂದ ಕಾಲ್ಕಿತ್ತಿದ್ದಾರೆ. ಅದೃಷ್ಟವಶಾತ್ ಆಟಗಾರರು ಹಾಗೂ ಪ್ರತಿಭಟನಾಕಾರರ ನಡುವೆ ಯಾವುದೇ ಗಲಾಟೆ ನಡೆದಿಲ್ಲ. ಪ್ರಸ್ತುತ ಗೊಂದಲ ತಿಳಿಯಾಗಿದ್ದು, ಯುವ ಆಟಗಾರರು ತಮ್ಮ ಮುಂದಿನ ಪಂದ್ಯಗಳತ್ತ ಗಮನ ಹರಿಸಿದ್ದಾರೆ.
