ಬೆಂಗಳೂರು: ರಾಜ್ಯದಲ್ಲಿ ಗೌರಿ-ಗಣೇಶ ಹಬ್ಬದ ಸಡಗರ ಮನೆಮಾಡಿರುವ ಬೆನ್ನಲ್ಲೇ, ಸಾರ್ವಜನಿಕ ಶಾಂತಿ ಹಾಗೂ ಕಾನೂನು ಸುವ್ಯವಸ್ಥೆ ಕಾಪಾಡಲು ಪೊಲೀಸ್ ಇಲಾಖೆ ಸರ್ವಸನ್ನದ್ಧವಾಗಿದೆ. ಉತ್ಸವದ ಸಂದರ್ಭದಲ್ಲಿ ಯಾವುದೇ ಅಹಿತಕರ ಘಟನೆಗಳು ಮರುಕಳಿಸದಂತೆ ಮುನ್ನೆಚ್ಚರಿಕೆ ವಹಿಸಲು ರಾಜ್ಯ ಪೊಲೀಸ್ ಮಹಾನಿರ್ದೇಶಕ (ಡಿಜಿ-ಐಜಿಪಿ) ಡಾ. ಎಂ.ಎ. ಸಲೀಂ ಆದೇಶದ ಮೇರೆಗೆ ಹೆಚ್ಚುವರಿ ಪೊಲೀಸ್ ಮಹಾನಿರ್ದೇಶಕರು (ಎಡಿಜಿಪಿ), ಐಜಿಪಿ ಹಾಗೂ ಎಸ್ಪಿ ಶ್ರೇಣಿಯ ಹಿರಿಯ ಅಧಿಕಾರಿಗಳಿಗೆ ವಿವಿಧ ಜಿಲ್ಲೆ ಹಾಗೂ ವಲಯಗಳ ಭದ್ರತಾ ಹೊಣೆಗಾರಿಕೆ ವಹಿಸಲಾಗಿದೆ.
ವಲಯವಾರು ಎಡಿಜಿಪಿಗಳ ನಿಯೋಜನೆ
ಸಂವೇದನಾಶೀಲ ಪ್ರದೇಶಗಳು ಸೇರಿದಂತೆ ಪ್ರಮುಖ ವಲಯಗಳ ನೇರ ನಿಗಾ ವಹಿಸಲು ಎಡಿಜಿಪಿ ಮಟ್ಟದ ಅಧಿಕಾರಿಗಳನ್ನು ನಿಯೋಜಿಸಲಾಗಿದೆ.
-
ಬೆಳಗಾವಿ ನಗರ ಹಾಗೂ ಉತ್ತರ ವಲಯ: ಆರ್. ಹಿತೇಂದ್ರ
-
ಮೈಸೂರು ನಗರ ಹಾಗೂ ದಕ್ಷಿಣ ವಲಯ: ಬಿ.ಕೆ. ಸಿಂಗ್
-
ಶಿವಮೊಗ್ಗ ಮತ್ತು ದಾವಣಗೆರೆ ವ್ಯಾಪ್ತಿ: ಮುರುಗನ್
-
ಬೆಂಗಳೂರು ಕೇಂದ್ರ ವಲಯ: ಹೇಮಂತ್ ಎಂ. ನಿಂಬಾಳ್ಕರ್
-
ಮಂಗಳೂರು ಪಶ್ಚಿಮ ವಲಯ: ಎಂ. ಚಂದ್ರಶೇಖರ್
-
ಕಲಬುರಗಿ ನಗರ ಹಾಗೂ ಈಶಾನ್ಯ ವಲಯ: ದೇವಜ್ಯೋತಿ ರೇ
ಜಿಲ್ಲಾವಾರು ಐಜಿಪಿ ಹಾಗೂ ಡಿಐಜಿಪಿಗಳ ಕಣ್ಗಾವಲು
ಹುಬ್ಬಳ್ಳಿ-ಧಾರವಾಡ ಅವಳಿ ನಗರದ ಜವಾಬ್ದಾರಿಯನ್ನು ಐಜಿಪಿ ಲಾಬೂರಾಮ್ ಅವರಿಗೆ ವಹಿಸಲಾಗಿದ್ದರೆ, ಬಾಗಲಕೋಟೆಗೆ ಐಜಿಪಿ ಚೇತನ್ ಸಿಂಗ್ ರಾಥೋಡ್, ಚಿಕ್ಕಮಗಳೂರಿಗೆ ಐಜಿಪಿ ಅಮಿತ್ ಸಿಂಗ್ ಹಾಗೂ ರಾಯಚೂರಿಗೆ ಡಾ. ಕೆ. ತ್ಯಾಗರಾಜನ್ ಅವರನ್ನು ಉಸ್ತುವಾರಿಯಾಗಿ ನೇಮಿಸಲಾಗಿದೆ. ಕೊಪ್ಪಳಕ್ಕೆ ಡಿಐಜಿಪಿ ಟಿ. ಶ್ರೀಧರ್, ಹಾವೇರಿಗೆ ಡಿಐಜಿಪಿ ಎನ್. ವಿಷ್ಣುವರ್ಧನ್ ಹಾಗೂ ಮಂಡ್ಯ ಜಿಲ್ಲೆಗೆ ಕೆಪಿಎ ಮೈಸೂರು ನಿರ್ದೇಶಕರನ್ನು ಕಳುಹಿಸಲಾಗಿದೆ.
ಎಸ್ಪಿಗಳ ನೇತೃತ್ವದಲ್ಲಿ ಹೆಚ್ಚುವರಿ ಭದ್ರತೆ
ಸ್ಥಳೀಯ ಪೊಲೀಸ್ ವ್ಯವಸ್ಥೆಗೆ ಬಲ ತುಂಬಲು ಹೆಚ್ಚುವರಿಯಾಗಿ ಪೊಲೀಸ್ ವರಿಷ್ಠಾಧಿಕಾರಿಗಳನ್ನು (ಎಸ್ಪಿ) ಕಣಕ್ಕಿಳಿಸಲಾಗಿದೆ. ಬೆಳಗಾವಿ ನಗರಕ್ಕೆ ಎಸ್ಪಿ ರಿಷ್ಯಂತ್, ಹುಬ್ಬಳ್ಳಿ-ಧಾರವಾಡಕ್ಕೆ ಲೋಕೇಶ್ ಭರಮಪ್ಪ ಜಗಲಾಸರ್, ಬಾಗಲಕೋಟೆಗೆ ಕಮಾಂಡೆಂಟ್ ಅಮರನಾಥ ರೆಡ್ಡಿ, ಶಿವಮೊಗ್ಗಕ್ಕೆ ಎಂ. ರಾಜೀವ್, ಚಿಕ್ಕಮಗಳೂರಿಗೆ ಕೆ.ಎಸ್. ನಾಗರಾಜ್ ಹಾಗೂ ಉತ್ತರ ಕನ್ನಡಕ್ಕೆ ಬಿ.ಎಸ್. ಶ್ರೀನಿವಾಸ್ ಅವರನ್ನು ನಿಯೋಜಿಸಲಾಗಿದೆ. ಮಂಡ್ಯ ಜಿಲ್ಲೆಗೆ ಎಂ.ಎನ್. ಕರಿಬಸವನಗೌಡ ಮತ್ತು ಕೆ. ನಂಜುಂಡೇಗೌಡ ಅವರು ಭದ್ರತಾ ಉಸ್ತುವಾರಿ ನೋಡಿಕೊಳ್ಳಲಿದ್ದಾರೆ.
ವಿಸರ್ಜನಾ ಮೆರವಣಿಗೆಗಳ ಮೇಲೆ ಹದ್ದಿನ ಕಣ್ಣು
ನಿಯೋಜಿತ ಹಿರಿಯ ಅಧಿಕಾರಿಗಳು ತಮಗೆ ನಿಗದಿಪಡಿಸಿದ ಕೇಂದ್ರಸ್ಥಾನಗಳಲ್ಲೇ ಖುದ್ದು ಮೊಕ್ಕಾಂ ಹೂಡಲಿದ್ದಾರೆ. ಗಣೇಶ ಮೂರ್ತಿ ಪ್ರತಿಷ್ಠಾಪನೆ, ಸೂಕ್ಷ್ಮ ಪ್ರದೇಶಗಳಲ್ಲಿ ಧ್ವನಿವರ್ಧಕಗಳ ಬಳಕೆ ಹಾಗೂ ವಿಸರ್ಜನಾ ಮೆರವಣಿಗೆಗಳ ಸಂದರ್ಭದಲ್ಲಿ ಸ್ಥಳದಲ್ಲೇ ಉಪಸ್ಥಿತರಿದ್ದು ಬಿಗಿ ಬಂದೋಬಸ್ತ್ ಖಚಿತಪಡಿಸಿಕೊಳ್ಳುವಂತೆ ಇಲಾಖೆ ಕಟ್ಟುನಿಟ್ಟಿನ ಸೂಚನೆ ನೀಡಿದೆ.
